| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೫. ಪಞ್ಚಮವಗ್ಗೋ
5. Pañcamavaggo
(೫೧) ೯. ಪಟುಪ್ಪನ್ನಕಥಾ
(51) 9. Paṭuppannakathā
೪೪೧. ಪಟುಪ್ಪನ್ನೇ 1 ಞಾಣಂ ಅತ್ಥೀತಿ? ಆಮನ್ತಾ। ತೇನ ಞಾಣೇನ ತಂ ಞಾಣಂ ಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ॰… ತೇನ ಞಾಣೇನ ತಂ ಞಾಣಂ ಜಾನಾತೀತಿ? ಆಮನ್ತಾ। ತೇನ ಞಾಣೇನ ತಂ ಞಾಣಂ ‘‘ಞಾಣ’’ನ್ತಿ ಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ॰… ತೇನ ಞಾಣೇನ ತಂ ಞಾಣಂ ‘‘ಞಾಣ’’ನ್ತಿ ಜಾನಾತೀತಿ? ಆಮನ್ತಾ। ತಂ ಞಾಣಂ ತಸ್ಸ ಞಾಣಸ್ಸ ಆರಮ್ಮಣನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
441. Paṭuppanne 2 ñāṇaṃ atthīti? Āmantā. Tena ñāṇena taṃ ñāṇaṃ jānātīti? Na hevaṃ vattabbe…pe… tena ñāṇena taṃ ñāṇaṃ jānātīti? Āmantā. Tena ñāṇena taṃ ñāṇaṃ ‘‘ñāṇa’’nti jānātīti? Na hevaṃ vattabbe…pe… tena ñāṇena taṃ ñāṇaṃ ‘‘ñāṇa’’nti jānātīti? Āmantā. Taṃ ñāṇaṃ tassa ñāṇassa ārammaṇanti? Na hevaṃ vattabbe…pe….
ತಂ ಞಾಣಂ ತಸ್ಸ ಞಾಣಸ್ಸ ಆರಮ್ಮಣನ್ತಿ? ಆಮನ್ತಾ। ತೇನ ಫಸ್ಸೇನ ತಂ ಫಸ್ಸಂ ಫುಸತಿ, ತಾಯ ವೇದನಾಯ ತಂ ವೇದನಂ ವೇದೇತಿ, ತಾಯ ಸಞ್ಞಾಯ ತಂ ಸಞ್ಞಂ ಸಞ್ಜಾನಾತಿ, ತಾಯ ಚೇತನಾಯ ತಂ ಚೇತನಂ ಚೇತೇತಿ, ತೇನ ಚಿತ್ತೇನ ತಂ ಚಿತ್ತಂ ಚಿನ್ತೇತಿ, ತೇನ ವಿತಕ್ಕೇನ ತಂ ವಿತಕ್ಕಂ ವಿತಕ್ಕೇತಿ, ತೇನ ವಿಚಾರೇನ ತಂ ವಿಚಾರಂ ವಿಚಾರೇತಿ, ತಾಯ ಪೀತಿಯಾ ತಂ ಪೀತಿಂ ಪಿಯಾಯತಿ, ತಾಯ ಸತಿಯಾ ತಂ ಸತಿಂ ಸರತಿ, ತಾಯ ಪಞ್ಞಾಯ ತಂ ಪಞ್ಞಂ ಪಜಾನಾತಿ, ತೇನ ಖಗ್ಗೇನ ತಂ ಖಗ್ಗಂ ಛಿನ್ದತಿ, ತೇನ ಫರಸುನಾ ತಂ ಫರಸುಂ ತಚ್ಛತಿ, ತಾಯ ಕುಧಾರಿಯಾ ತಂ ಕುಧಾರಿಂ ತಚ್ಛತಿ, ತಾಯ ವಾಸಿಯಾ ತಂ ವಾಸಿಂ ತಚ್ಛತಿ, ತಾಯ ಸೂಚಿಯಾ ತಂ ಸೂಚಿಂ ಸಿಬ್ಬೇತಿ, ತೇನ ಅಙ್ಗುಲಗ್ಗೇನ ತಂ ಅಙ್ಗುಲಗ್ಗಂ ಪರಾಮಸತಿ, ತೇನ ನಾಸಿಕಗ್ಗೇನ ತಂ ನಾಸಿಕಗ್ಗಂ ಪರಾಮಸತಿ, ತೇನ ಮತ್ಥಕೇನ ತಂ ಮತ್ಥಕಂ ಪರಾಮಸತಿ, ತೇನ ಗೂಥೇನ ತಂ ಗೂಥಂ ಧೋವತಿ, ತೇನ ಮುತ್ತೇನ ತಂ ಮುತ್ತಂ ಧೋವತಿ, ತೇನ ಖೇಳೇನ ತಂ ಖೇಳಂ ಧೋವತಿ, ತೇನ ಪುಬ್ಬೇನ ತಂ ಪುಬ್ಬಂ ಧೋವತಿ, ತೇನ ಲೋಹಿತೇನ ತಂ ಲೋಹಿತಂ ಧೋವತೀತಿ? ನ ಹೇವಂ ವತ್ತಬ್ಬೇ …ಪೇ॰…।
Taṃ ñāṇaṃ tassa ñāṇassa ārammaṇanti? Āmantā. Tena phassena taṃ phassaṃ phusati, tāya vedanāya taṃ vedanaṃ vedeti, tāya saññāya taṃ saññaṃ sañjānāti, tāya cetanāya taṃ cetanaṃ ceteti, tena cittena taṃ cittaṃ cinteti, tena vitakkena taṃ vitakkaṃ vitakketi, tena vicārena taṃ vicāraṃ vicāreti, tāya pītiyā taṃ pītiṃ piyāyati, tāya satiyā taṃ satiṃ sarati, tāya paññāya taṃ paññaṃ pajānāti, tena khaggena taṃ khaggaṃ chindati, tena pharasunā taṃ pharasuṃ tacchati, tāya kudhāriyā taṃ kudhāriṃ tacchati, tāya vāsiyā taṃ vāsiṃ tacchati, tāya sūciyā taṃ sūciṃ sibbeti, tena aṅgulaggena taṃ aṅgulaggaṃ parāmasati, tena nāsikaggena taṃ nāsikaggaṃ parāmasati, tena matthakena taṃ matthakaṃ parāmasati, tena gūthena taṃ gūthaṃ dhovati, tena muttena taṃ muttaṃ dhovati, tena kheḷena taṃ kheḷaṃ dhovati, tena pubbena taṃ pubbaṃ dhovati, tena lohitena taṃ lohitaṃ dhovatīti? Na hevaṃ vattabbe …pe….
೪೪೨. ನ ವತ್ತಬ್ಬಂ – ‘‘ಪಟುಪ್ಪನ್ನೇ ಞಾಣಂ ಅತ್ಥೀ’’ತಿ? ಆಮನ್ತಾ। ನನು ಸಬ್ಬಸಙ್ಖಾರೇ ಅನಿಚ್ಚತೋ ದಿಟ್ಠೇ ತಮ್ಪಿ ಞಾಣಂ ಅನಿಚ್ಚತೋ ದಿಟ್ಠಂ ಹೋತೀತಿ? ಆಮನ್ತಾ। ಹಞ್ಚಿ ಸಬ್ಬಸಙ್ಖಾರೇ ಅನಿಚ್ಚತೋ ದಿಟ್ಠೇ ತಮ್ಪಿ ಞಾಣಂ ಅನಿಚ್ಚತೋ ದಿಟ್ಠಂ ಹೋತಿ, ತೇನ ವತ ರೇ ವತ್ತಬ್ಬೇ – ‘‘ಪಟುಪ್ಪನ್ನೇ ಞಾಣಂ ಅತ್ಥೀ’’ತಿ।
442. Na vattabbaṃ – ‘‘paṭuppanne ñāṇaṃ atthī’’ti? Āmantā. Nanu sabbasaṅkhāre aniccato diṭṭhe tampi ñāṇaṃ aniccato diṭṭhaṃ hotīti? Āmantā. Hañci sabbasaṅkhāre aniccato diṭṭhe tampi ñāṇaṃ aniccato diṭṭhaṃ hoti, tena vata re vattabbe – ‘‘paṭuppanne ñāṇaṃ atthī’’ti.
Footnotes:
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೯. ಪಟುಪ್ಪನ್ನಞಾಣಕಥಾವಣ್ಣನಾ • 9. Paṭuppannañāṇakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೯. ಪಟುಪ್ಪನ್ನಞಾಣಕಥಾವಣ್ಣನಾ • 9. Paṭuppannañāṇakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೯. ಪಟುಪ್ಪನ್ನಞಾಣಕಥಾವಣ್ಣನಾ • 9. Paṭuppannañāṇakathāvaṇṇanā
