| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༩. པཊུཔྤནྣཉཱཎཀཐཱཝཎྞནཱ
9. Paṭuppannañāṇakathāvaṇṇanā
༤༤༡-༤༤༢. ཨིདཱནི པཊུཔྤནྣཉཱཎཀཐཱ ནཱམ ཧོཏི། ཏཏྠ ཡེསཾ ‘‘སབྦསངྑཱརེསུ ཨནིཙྩཏོ དིཊྛེསུ ཏམྤི ཉཱཎཾ ཨནིཙྩཏོ དིཊྛཾ ཧོཏཱི’’ཏི ཝཙནཾ ནིསྶཱཡ ‘‘ཨཝིསེསེན སབྦསྨིཾ པཙྩུཔྤནྣེ ཉཱཎཾ ཨཏྠཱི’’ཏི ལདྡྷི, སེཡྻཐཱཔི ཨནྡྷཀཱནཾ; ཏེ སནྡྷཱཡ པཊུཔྤནྣེཏི པུཙྪཱ སཀཝཱདིསྶ, པཊིཉྙཱ ཨིཏརསྶ། ཨཐ ནཾ ‘‘ཡདི ཨཝིསེསེན པཊུཔྤནྣེ ཉཱཎཾ ཨཏྠི, ཁཎཔཙྩུཔྤནྣེཔི ཏེན བྷཝིཏབྦཾ། ཨེཝཾ སནྟེ དྭིནྣཾ ཉཱཎཱནཾ ཨེཀཏོ ཨབྷཱཝཱ ཏེནེཝ ཉཱཎེན ཏཾ ཛཱནིཏབྦཾ ཧོཏཱི’’ཏི ཙོདནཏྠཾ ཏེནཱཏི ཨནུཡོགོ སཀཝཱདིསྶ། ཏཏྠ པཋམཔཉྷེ ཏེནེཝ ཏཾ ཛཱནིཏུཾ ན སཀྐཱཏི པཊིཀྑེཔོ ཨིཏརསྶ། དུཏིཡཔཉྷེ སནྟཏིཾ སནྡྷཱཡ པཊིཉྙཱ ཏསྶེཝ། པཊིཔཱཊིཏོ བྷངྒཾ པསྶནྟོ བྷངྒཱནུཔསྶནེནེཝ བྷངྒཱནུཔསྶནཱཉཱཎཾ པསྶཏཱིཏི ཨདྷིཔྤཱཡོ། ཏེན ཉཱཎེན ཏཾ ཉཱཎཾ ཛཱནཱཏཱིཏིཨཱདཱིསུཔི ཨེསེཝ ནཡོ། ཏེན ཕསྶེན ཏཾ ཕསྶནྟིཨཱདཱིནིསྶ ལེསོཀཱསནིཝཱརཎཏྠཾ ཝུཏྟཱནི ། ཡཾ པནེཏེན ལདྡྷིཔཏིཊྛཱཔནཏྠཾ ནནུ སབྦསངྑཱརེཏིཨཱདི ཝུཏྟཾ། ཏཏྠ ནཡཏོ ཏཾ ཉཱཎཾ དིཊྛཾ ཧོཏི, ན ཨཱརམྨཎཏོཏི ཨདྷིཔྤཱཡེན པཊིཉྙཱ སཀཝཱདིསྶ། ཏསྨཱ ཨེཝཾ པཏིཊྛིཏཱཔིསྶ ལདྡྷི ཨཔྤཏིཊྛིཏཱཝ ཧོཏི།
441-442. Idāni paṭuppannañāṇakathā nāma hoti. Tattha yesaṃ ‘‘sabbasaṅkhāresu aniccato diṭṭhesu tampi ñāṇaṃ aniccato diṭṭhaṃ hotī’’ti vacanaṃ nissāya ‘‘avisesena sabbasmiṃ paccuppanne ñāṇaṃ atthī’’ti laddhi, seyyathāpi andhakānaṃ; te sandhāya paṭuppanneti pucchā sakavādissa, paṭiññā itarassa. Atha naṃ ‘‘yadi avisesena paṭuppanne ñāṇaṃ atthi, khaṇapaccuppannepi tena bhavitabbaṃ. Evaṃ sante dvinnaṃ ñāṇānaṃ ekato abhāvā teneva ñāṇena taṃ jānitabbaṃ hotī’’ti codanatthaṃ tenāti anuyogo sakavādissa. Tattha paṭhamapañhe teneva taṃ jānituṃ na sakkāti paṭikkhepo itarassa. Dutiyapañhe santatiṃ sandhāya paṭiññā tasseva. Paṭipāṭito bhaṅgaṃ passanto bhaṅgānupassaneneva bhaṅgānupassanāñāṇaṃ passatīti adhippāyo. Tena ñāṇena taṃ ñāṇaṃ jānātītiādīsupi eseva nayo. Tena phassena taṃ phassantiādīnissa lesokāsanivāraṇatthaṃ vuttāni . Yaṃ panetena laddhipatiṭṭhāpanatthaṃ nanu sabbasaṅkhāretiādi vuttaṃ. Tattha nayato taṃ ñāṇaṃ diṭṭhaṃ hoti, na ārammaṇatoti adhippāyena paṭiññā sakavādissa. Tasmā evaṃ patiṭṭhitāpissa laddhi appatiṭṭhitāva hoti.
པཊུཔྤནྣཉཱཎཀཐཱཝཎྞནཱ།
Paṭuppannañāṇakathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༥༡) ༩. པཊུཔྤནྣཀཐཱ • (51) 9. Paṭuppannakathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༩. པཊུཔྤནྣཉཱཎཀཐཱཝཎྞནཱ • 9. Paṭuppannañāṇakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༩. པཊུཔྤནྣཉཱཎཀཐཱཝཎྞནཱ • 9. Paṭuppannañāṇakathāvaṇṇanā
