| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༤. པཝནངྒཔཉྷོ
4. Pavanaṅgapañho
༤. ‘‘བྷནྟེ ནཱགསེན, ‘པཝནསྶ པཉྩ ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི པཉྩ ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, པཝནཾ ནཱམ ཨསུཙིཛནཾ པཊིཙྪཱདེཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན པརེསཾ ཨཔརདྡྷཾ ཁལིཏཾ པཊིཙྪཱདེཏབྦཾ ན ཝིཝརིཏབྦཾ། ཨིདཾ, མཧཱརཱཛ, པཝནསྶ པཋམཾ ཨངྒཾ གཧེཏབྦཾ།
4. ‘‘Bhante nāgasena, ‘pavanassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, pavanaṃ nāma asucijanaṃ paṭicchādeti, evameva kho, mahārāja, yoginā yogāvacarena paresaṃ aparaddhaṃ khalitaṃ paṭicchādetabbaṃ na vivaritabbaṃ. Idaṃ, mahārāja, pavanassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, པཝནཾ སུཉྙཾ པཙུརཛནེཧི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན རཱགདོསམོཧམཱནདིཊྛིཛཱལེཧི སབྦེཧི ཙ ཀིལེསེཧི སུཉྙེན བྷཝིཏབྦཾ། ཨིདཾ, མཧཱརཱཛ, པཝནསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, pavanaṃ suññaṃ pacurajanehi, evameva kho, mahārāja, yoginā yogāvacarena rāgadosamohamānadiṭṭhijālehi sabbehi ca kilesehi suññena bhavitabbaṃ. Idaṃ, mahārāja, pavanassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, པཝནཾ ཝིཝིཏྟཾ ཛནསམྦཱདྷརཧིཏཾ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན པཱཔཀེཧི ཨཀུསལེཧི དྷམྨེཧི ཨནརིཡེཧི པཝིཝིཏྟེན བྷཝིཏབྦཾ། ཨིདཾ, མཧཱརཱཛ, པཝནསྶ ཏཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, pavanaṃ vivittaṃ janasambādharahitaṃ, evameva kho, mahārāja, yoginā yogāvacarena pāpakehi akusalehi dhammehi anariyehi pavivittena bhavitabbaṃ. Idaṃ, mahārāja, pavanassa tatiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, པཝནཾ སནྟཾ པརིསུདྡྷཾ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སནྟེན པརིསུདྡྷེན བྷཝིཏབྦཾ, ནིབྦུཏེན པཧཱིནམཱནེན པཧཱིནམཀྑེན བྷཝིཏབྦཾ། ཨིདཾ, མཧཱརཱཛ, པཝནསྶ ཙཏུཏྠཾ ཨངྒཾ གཧེཏབྦཾ།
‘‘Puna caparaṃ, mahārāja, pavanaṃ santaṃ parisuddhaṃ, evameva kho, mahārāja, yoginā yogāvacarena santena parisuddhena bhavitabbaṃ, nibbutena pahīnamānena pahīnamakkhena bhavitabbaṃ. Idaṃ, mahārāja, pavanassa catutthaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, པཝནཾ ཨརིཡཛནསཾསེཝིཏཾ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨརིཡཛནསཾསེཝིཏེན བྷཝིཏབྦཾ། ཨིདཾ, མཧཱརཱཛ, པཝནསྶ པཉྩམཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, བྷགཝཏཱ དེཝཱཏིདེཝེན སཾཡུཏྟནིཀཱཡཝརེ –
‘‘Puna caparaṃ, mahārāja, pavanaṃ ariyajanasaṃsevitaṃ, evameva kho, mahārāja, yoginā yogāvacarena ariyajanasaṃsevitena bhavitabbaṃ. Idaṃ, mahārāja, pavanassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare –
‘‘‘པཝིཝིཏྟེཧི ཨརིཡེཧི, པཧིཏཏྟེཧི ཛྷཱཡིབྷི།
‘‘‘Pavivittehi ariyehi, pahitattehi jhāyibhi;
ནིཙྩཾ ཨཱརདྡྷཝཱིརིཡེཧི, པཎྜིཏེཧི སཧཱཝསེ’’’ཏི༎
Niccaṃ āraddhavīriyehi, paṇḍitehi sahāvase’’’ti.
པཝནངྒཔཉྷོ ཙཏུཏྠོ།
Pavanaṅgapañho catuttho.
