| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၂၁. ပဝာရဏာဘေဒာ
121. Pavāraṇābhedā
၂၁၂. အထ ခော ဘိက္ခူနံ ဧတဒဟောသိ – ‘‘ကတိ နု ခော ပဝာရဏာ’’တိ? ဘဂဝတော ဧတမတ္ထံ အာရောစေသုံ။ ဒ္ဝေမာ, ဘိက္ခဝေ, ပဝာရဏာ – စာတုဒ္ဒသိကာ စ ပန္နရသိကာ စ။ ဣမာ ခော, ဘိက္ခဝေ, ဒ္ဝေ ပဝာရဏာတိ။
212. Atha kho bhikkhūnaṃ etadahosi – ‘‘kati nu kho pavāraṇā’’ti? Bhagavato etamatthaṃ ārocesuṃ. Dvemā, bhikkhave, pavāraṇā – cātuddasikā ca pannarasikā ca. Imā kho, bhikkhave, dve pavāraṇāti.
အထ ခော ဘိက္ခူနံ ဧတဒဟောသိ – ‘‘ကတိ နု ခော ပဝာရဏကမ္မာနီ’’တိ? 1 ဘဂဝတော ဧတမတ္ထံ အာရောစေသုံ။ စတ္တာရိမာနိ, ဘိက္ခဝေ, ပဝာရဏကမ္မာနိ – အဓမ္မေန ဝဂ္ဂံ ပဝာရဏကမ္မံ, အဓမ္မေန သမဂ္ဂံ ပဝာရဏကမ္မံ, ဓမ္မေန ဝဂ္ဂံ ပဝာရဏကမ္မံ, ဓမ္မေန သမဂ္ဂံ ပဝာရဏကမ္မံ။ တတ္ရ, ဘိက္ခဝေ, ယဒိဒံ အဓမ္မေန ဝဂ္ဂံ ပဝာရဏကမ္မံ, န, ဘိက္ခဝေ, ဧဝရူပံ ပဝာရဏကမ္မံ ကာတဗ္ဗံ; န စ မယာ ဧဝရူပံ ပဝာရဏကမ္မံ အနုညာတံ။ တတ္ရ, ဘိက္ခဝေ, ယဒိဒံ အဓမ္မေန သမဂ္ဂံ ပဝာရဏကမ္မံ, န, ဘိက္ခဝေ, ဧဝရူပံ ပဝာရဏကမ္မံ ကာတဗ္ဗံ; န စ မယာ ဧဝရူပံ ပဝာရဏကမ္မံ အနုညာတံ။ တတ္ရ, ဘိက္ခဝေ, ယဒိဒံ ဓမ္မေန ဝဂ္ဂံ ပဝာရဏကမ္မံ, န, ဘိက္ခဝေ, ဧဝရူပံ ပဝာရဏကမ္မံ ကာတဗ္ဗံ; န စ မယာ ဧဝရူပံ ပဝာရဏကမ္မံ အနုညာတံ။ တတ္ရ, ဘိက္ခဝေ, ယဒိဒံ ဓမ္မေန သမဂ္ဂံ ပဝာရဏကမ္မံ, ဧဝရူပံ, ဘိက္ခဝေ, ပဝာရဏကမ္မံ ကာတဗ္ဗံ; ဧဝရူပဉ္စ မယာ ပဝာရဏကမ္မံ အနုညာတံ။ တသ္မာတိဟ, ဘိက္ခဝေ, ဧဝရူပံ ပဝာရဏကမ္မံ ကရိသ္သာမ ယဒိဒံ ဓမ္မေန သမဂ္ဂန္တိ, ဧဝဉ္ဟိ ဝော, ဘိက္ခဝေ, သိက္ခိတဗ္ဗန္တိ။
Atha kho bhikkhūnaṃ etadahosi – ‘‘kati nu kho pavāraṇakammānī’’ti? 2 Bhagavato etamatthaṃ ārocesuṃ. Cattārimāni, bhikkhave, pavāraṇakammāni – adhammena vaggaṃ pavāraṇakammaṃ, adhammena samaggaṃ pavāraṇakammaṃ, dhammena vaggaṃ pavāraṇakammaṃ, dhammena samaggaṃ pavāraṇakammaṃ. Tatra, bhikkhave, yadidaṃ adhammena vaggaṃ pavāraṇakammaṃ, na, bhikkhave, evarūpaṃ pavāraṇakammaṃ kātabbaṃ; na ca mayā evarūpaṃ pavāraṇakammaṃ anuññātaṃ. Tatra, bhikkhave, yadidaṃ adhammena samaggaṃ pavāraṇakammaṃ, na, bhikkhave, evarūpaṃ pavāraṇakammaṃ kātabbaṃ; na ca mayā evarūpaṃ pavāraṇakammaṃ anuññātaṃ. Tatra, bhikkhave, yadidaṃ dhammena vaggaṃ pavāraṇakammaṃ, na, bhikkhave, evarūpaṃ pavāraṇakammaṃ kātabbaṃ; na ca mayā evarūpaṃ pavāraṇakammaṃ anuññātaṃ. Tatra, bhikkhave, yadidaṃ dhammena samaggaṃ pavāraṇakammaṃ, evarūpaṃ, bhikkhave, pavāraṇakammaṃ kātabbaṃ; evarūpañca mayā pavāraṇakammaṃ anuññātaṃ. Tasmātiha, bhikkhave, evarūpaṃ pavāraṇakammaṃ karissāma yadidaṃ dhammena samagganti, evañhi vo, bhikkhave, sikkhitabbanti.
ပဝာရဏာဘေဒာ နိဋ္ဌိတာ။
Pavāraṇābhedā niṭṭhitā.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ပဝာရဏာဘေဒကထာ • Pavāraṇābhedakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပဝာရဏာဘေဒကထာဝဏ္ဏနာ • Pavāraṇābhedakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ပဝာရဏာဘေဒဝဏ္ဏနာ • Pavāraṇābhedavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၂၁. ပဝာရဏာဘေဒကထာ • 121. Pavāraṇābhedakathā
