| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
121. පවාරණාභෙදා
121. Pavāraṇābhedā
212. අථ ඛො භික්‌ඛූනං එතදහොසි – ‘‘කති නු ඛො පවාරණා’’ති? භගවතො එතමත්‌ථං ආරොචෙසුං. ද්‌වෙමා, භික්‌ඛවෙ, පවාරණා – චාතුද්‌දසිකා ච පන්‌නරසිකා ච. ඉමා ඛො, භික්‌ඛවෙ, ද්‌වෙ පවාරණාති.
212. Atha kho bhikkhūnaṃ etadahosi – ‘‘kati nu kho pavāraṇā’’ti? Bhagavato etamatthaṃ ārocesuṃ. Dvemā, bhikkhave, pavāraṇā – cātuddasikā ca pannarasikā ca. Imā kho, bhikkhave, dve pavāraṇāti.
අථ ඛො භික්‌ඛූනං එතදහොසි – ‘‘කති නු ඛො පවාරණකම්‌මානී’’ති? 1 භගවතො එතමත්‌ථං ආරොචෙසුං. චත්‌තාරිමානි, භික්‌ඛවෙ, පවාරණකම්‌මානි – අධම්‌මෙන වග්‌ගං පවාරණකම්‌මං, අධම්‌මෙන සමග්‌ගං පවාරණකම්‌මං, ධම්‌මෙන වග්‌ගං පවාරණකම්‌මං, ධම්‌මෙන සමග්‌ගං පවාරණකම්‌මං. තත්‍ර, භික්‌ඛවෙ, යදිදං අධම්‌මෙන වග්‌ගං පවාරණකම්‌මං, න, භික්‌ඛවෙ, එවරූපං පවාරණකම්‌මං කාතබ්‌බං; න ච මයා එවරූපං පවාරණකම්‌මං අනුඤ්‌ඤාතං. තත්‍ර, භික්‌ඛවෙ, යදිදං අධම්‌මෙන සමග්‌ගං පවාරණකම්‌මං, න, භික්‌ඛවෙ, එවරූපං පවාරණකම්‌මං කාතබ්‌බං; න ච මයා එවරූපං පවාරණකම්‌මං අනුඤ්‌ඤාතං. තත්‍ර, භික්‌ඛවෙ, යදිදං ධම්‌මෙන වග්‌ගං පවාරණකම්‌මං, න, භික්‌ඛවෙ, එවරූපං පවාරණකම්‌මං කාතබ්‌බං; න ච මයා එවරූපං පවාරණකම්‌මං අනුඤ්‌ඤාතං. තත්‍ර, භික්‌ඛවෙ, යදිදං ධම්‌මෙන සමග්‌ගං පවාරණකම්‌මං, එවරූපං, භික්‌ඛවෙ, පවාරණකම්‌මං කාතබ්‌බං; එවරූපඤ්‌ච මයා පවාරණකම්‌මං අනුඤ්‌ඤාතං. තස්‌මාතිහ, භික්‌ඛවෙ, එවරූපං පවාරණකම්‌මං කරිස්‌සාම යදිදං ධම්‌මෙන සමග්‌ගන්‌ති, එවඤ්‌හි වො, භික්‌ඛවෙ, සික්‌ඛිතබ්‌බන්‌ති.
Atha kho bhikkhūnaṃ etadahosi – ‘‘kati nu kho pavāraṇakammānī’’ti? 2 Bhagavato etamatthaṃ ārocesuṃ. Cattārimāni, bhikkhave, pavāraṇakammāni – adhammena vaggaṃ pavāraṇakammaṃ, adhammena samaggaṃ pavāraṇakammaṃ, dhammena vaggaṃ pavāraṇakammaṃ, dhammena samaggaṃ pavāraṇakammaṃ. Tatra, bhikkhave, yadidaṃ adhammena vaggaṃ pavāraṇakammaṃ, na, bhikkhave, evarūpaṃ pavāraṇakammaṃ kātabbaṃ; na ca mayā evarūpaṃ pavāraṇakammaṃ anuññātaṃ. Tatra, bhikkhave, yadidaṃ adhammena samaggaṃ pavāraṇakammaṃ, na, bhikkhave, evarūpaṃ pavāraṇakammaṃ kātabbaṃ; na ca mayā evarūpaṃ pavāraṇakammaṃ anuññātaṃ. Tatra, bhikkhave, yadidaṃ dhammena vaggaṃ pavāraṇakammaṃ, na, bhikkhave, evarūpaṃ pavāraṇakammaṃ kātabbaṃ; na ca mayā evarūpaṃ pavāraṇakammaṃ anuññātaṃ. Tatra, bhikkhave, yadidaṃ dhammena samaggaṃ pavāraṇakammaṃ, evarūpaṃ, bhikkhave, pavāraṇakammaṃ kātabbaṃ; evarūpañca mayā pavāraṇakammaṃ anuññātaṃ. Tasmātiha, bhikkhave, evarūpaṃ pavāraṇakammaṃ karissāma yadidaṃ dhammena samagganti, evañhi vo, bhikkhave, sikkhitabbanti.
පවාරණාභෙදා නිට්‌ඨිතා.
Pavāraṇābhedā niṭṭhitā.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / පවාරණාභෙදකථා • Pavāraṇābhedakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පවාරණාභෙදකථාවණ්‌ණනා • Pavāraṇābhedakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / පවාරණාභෙදවණ්‌ණනා • Pavāraṇābhedavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 121. පවාරණාභෙදකථා • 121. Pavāraṇābhedakathā
