| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
121. பவாரணாபே⁴த³கதா²
121. Pavāraṇābhedakathā
212. சாதுத்³த³ஸிகாயாதி ப⁴ண்ட³னகாரகேஹி உபத்³து³தத்தா பச்சுக்கட்³டி⁴தாய புப்³ப³கத்திகமாஸஸ்ஸ காளபக்க²சாதுத்³த³ஸிகாய. ‘‘அஜ்ஜ பவாரணா பன்னரஸீ’’தி புப்³ப³கிச்சங் காதப்³ப³ந்தி யோஜனா.
212.Cātuddasikāyāti bhaṇḍanakārakehi upaddutattā paccukkaḍḍhitāya pubbakattikamāsassa kāḷapakkhacātuddasikāya. ‘‘Ajja pavāraṇā pannarasī’’ti pubbakiccaṃ kātabbanti yojanā.
பவாரணாகம்மேஸூதி நித்³தா⁴ரணே பு⁴ம்மங், ‘‘அத⁴ம்மேன வக்³க³ங் பவாரணாகம்ம’’ந்திஆதீ³ஸு ஸம்ப³ந்தி⁴தப்³ப³ங். அத⁴ம்மேன வக்³க³ந்தி எத்த² அத⁴ம்மங் நாம ஸங்கோ⁴ ஹுத்வாபி ஸங்க⁴பவாரணமகத்வா க³ணபவாரணாய கரணங், க³ணோ ஹுத்வாபி க³ணபவாரணமகத்வா ஸங்க⁴பவாரணாய கரணஞ்ச. வக்³க³ங் நாம ஏகஸீமாயங் வஸந்தானம்பி ஸப்³பே³ஸங் ஏகதோ அஸன்னிபதனங்.
Pavāraṇākammesūti niddhāraṇe bhummaṃ, ‘‘adhammena vaggaṃ pavāraṇākamma’’ntiādīsu sambandhitabbaṃ. Adhammena vagganti ettha adhammaṃ nāma saṅgho hutvāpi saṅghapavāraṇamakatvā gaṇapavāraṇāya karaṇaṃ, gaṇo hutvāpi gaṇapavāraṇamakatvā saṅghapavāraṇāya karaṇañca. Vaggaṃ nāma ekasīmāyaṃ vasantānampi sabbesaṃ ekato asannipatanaṃ.
அத⁴ம்மேன ஸமக்³க³ந்தி எத்த² அத⁴ம்மங் வுத்தனயமேவ. ஸமக்³க³ங் நாம ஸப்³பே³ஸங் ஏகதோ ஸன்னிபதனங்.
Adhammena samagganti ettha adhammaṃ vuttanayameva. Samaggaṃ nāma sabbesaṃ ekato sannipatanaṃ.
த⁴ம்மேன வக்³க³ந்தி எத்த² த⁴ம்மங் நாம ஸங்கோ⁴ ஹுத்வா ஸங்க⁴பவாரணாய கரணங், க³ணோ ஹுத்வா க³ணபவாரணாய கரணஞ்ச. வக்³க³ங் வுத்தனயமேவ. த⁴ம்மேன ஸமக்³க³ங் ஸுவிஞ்ஞெய்யமேவ. இதிஸத்³தோ³ பரிஸமாபனத்தோ².
Dhammena vagganti ettha dhammaṃ nāma saṅgho hutvā saṅghapavāraṇāya karaṇaṃ, gaṇo hutvā gaṇapavāraṇāya karaṇañca. Vaggaṃ vuttanayameva. Dhammena samaggaṃ suviññeyyameva. Itisaddo parisamāpanattho.
213. ஏவங் தி³ன்னாயாதி ஏவங் பாளியங் வுத்தனயேனேவ தி³ன்னாய. பவாரேதப்³ப³ந்தி வஸ்ஸங்வுத்த²பவாரணாய பவாரேதப்³ப³ங். திஸ்ஸோதி திஸ்ஸனாமகோ. தி³ட்டே²ன வா வத³தூதி ஸம்ப³ந்தோ⁴. தந்தி திஸ்ஸனாமகங் பி⁴க்கு²ங். ஸங்கோ⁴ அனுகம்பங் உபாதா³ய வத³தூதி யோஜனா. வுட்³ட⁴தரோதி பவாரணாதா³யகோ தங்ஹாரகதோ வுட்³ட⁴தரோ. ஹீதி லத்³த⁴கு³ணோ. தேனாதி பவாரணாஹாரகேன. தஸ்ஸாதி பவாரணாதா³யகஸ்ஸ.
213.Evaṃ dinnāyāti evaṃ pāḷiyaṃ vuttanayeneva dinnāya. Pavāretabbanti vassaṃvutthapavāraṇāya pavāretabbaṃ. Tissoti tissanāmako. Diṭṭhena vā vadatūti sambandho. Tanti tissanāmakaṃ bhikkhuṃ. Saṅgho anukampaṃ upādāya vadatūti yojanā. Vuḍḍhataroti pavāraṇādāyako taṃhārakato vuḍḍhataro. Hīti laddhaguṇo. Tenāti pavāraṇāhārakena. Tassāti pavāraṇādāyakassa.
இதா⁴பி சாதி இமஸ்மிங் பவாரணாக்க²ந்த⁴கேபி ச. அபிஸத்³தோ³ உபோஸத²க்க²ந்த⁴கங் அபெக்க²தி. அவஸேஸகம்மத்தா²யாதி பவாரணாகம்மதோ அவஸேஸானங் கம்மானமத்தா²ய ஹோதீதி ஸம்ப³ந்தோ⁴. பவாரணாய ஆஹடாய ஸதியாதி யோஜனா. தஸ்ஸ சாதி பவாரணாதா³யகஸ்ஸ ச. ஸப்³பே³ஸந்தி பவாரணாதா³யகஸ்ஸ ச ஸங்க⁴ஸ்ஸ சாதி ஸப்³பே³ஸங். அஞ்ஞங் பன கம்மந்தி பவாரணாகம்மதோ அஞ்ஞங் கம்மங் பன. தேன பன பி⁴க்கு²னாதி பவாரணாதா³யகேன பி⁴க்கு²னா பன. எத்த² ச தத³ஹுபவாரணாய அத்தனோ ச ஸங்க⁴ஸ்ஸ ச ஸசே பவாரணாகம்மமேவ ஹோதி, பவாரணாயேவ தா³தப்³பா³. அத² அஞ்ஞமேவ கம்மங் ஹோதி, ச²ந்தோ³யேவ தா³தப்³போ³. யதி³ பவாரணாகம்மஞ்ச அஞ்ஞகம்மஞ்ச ஹோதி, பவாரணா ச ச²ந்தோ³ ச தா³தப்³போ³ . தங் ஸந்தா⁴ய வுத்தங் ‘‘தத³ஹு பவாரணாய பவாரணங் தெ³ந்தேன ச²ந்த³ம்பி தா³து’’ந்தி (மஹாவ॰ 213). தேனாதி தா³னஹேதுனா.
Idhāpi cāti imasmiṃ pavāraṇākkhandhakepi ca. Apisaddo uposathakkhandhakaṃ apekkhati. Avasesakammatthāyāti pavāraṇākammato avasesānaṃ kammānamatthāya hotīti sambandho. Pavāraṇāya āhaṭāya satiyāti yojanā. Tassa cāti pavāraṇādāyakassa ca. Sabbesanti pavāraṇādāyakassa ca saṅghassa cāti sabbesaṃ. Aññaṃ pana kammanti pavāraṇākammato aññaṃ kammaṃ pana. Tena pana bhikkhunāti pavāraṇādāyakena bhikkhunā pana. Ettha ca tadahupavāraṇāya attano ca saṅghassa ca sace pavāraṇākammameva hoti, pavāraṇāyeva dātabbā. Atha aññameva kammaṃ hoti, chandoyeva dātabbo. Yadi pavāraṇākammañca aññakammañca hoti, pavāraṇā ca chando ca dātabbo . Taṃ sandhāya vuttaṃ ‘‘tadahu pavāraṇāya pavāraṇaṃ dentena chandampi dātu’’nti (mahāva. 213). Tenāti dānahetunā.
218. அஜ்ஜ மே பவாரணாதி எத்த² பாளினயதோ அஞ்ஞங் அட்ட²கதா²னயங் த³ஸ்ஸெந்தோ ஆஹ ‘‘ஸசே’’திஆதி³.
218.Ajja me pavāraṇāti ettha pāḷinayato aññaṃ aṭṭhakathānayaṃ dassento āha ‘‘sace’’tiādi.
219. வுத்தனயமேவாதி உபோஸத²க்க²ந்த⁴கே (மஹாவ॰ அட்ட²॰ 169) வுத்தனயமேவ.
219.Vuttanayamevāti uposathakkhandhake (mahāva. aṭṭha. 169) vuttanayameva.
222. புன பவாரேதப்³ப³ந்தி எத்த² ந கேவலங் பவாரணாயேவ புன காதப்³பா³, புப்³ப³கிச்சாதீ³னிபி புன காதப்³பா³னீதி த³ஸ்ஸெந்தோ ஆஹ ‘‘புன புப்³ப³கிச்ச’’ந்திஆதி³.
222.Puna pavāretabbanti ettha na kevalaṃ pavāraṇāyeva puna kātabbā, pubbakiccādīnipi puna kātabbānīti dassento āha ‘‘puna pubbakicca’’ntiādi.
228. ஏஸேவ நயோதி ‘‘அஜ்ஜ பவாரணா பன்னரஸீ’’தி புப்³ப³கிச்சங் அதிதி³ஸதி. அஸ்ஸாதி வசனஸ்ஸ. ஞத்திந்தி ‘‘ஸுணாது மே ப⁴ந்தே ஸங்கோ⁴ அஜ்ஜ பவாரணா’’தி ஞத்திங். பச்சி²மேஹீதி பச்சி²மவஸ்ஸங் உபக³தேஹி பி⁴க்கூ²ஹி. உபோஸத²க்³கே³தி உபோஸத²ஸ்ஸ க³ண்ஹனட்டா²னே கே³ஹே. த்³வே ஞத்தியோதி பவாரணாஞத்தி ச உபோஸத²ஞத்தி சாதி த்³வே ஞத்தியோ. இத³ஞ்சாதி இத³ங் வக்க²மானங் பன. எத்தா²தி புரிமிகபச்சி²மிகபி⁴க்கூ²னங் ஸங்ஸக்³க³ட்டா²னே. புரிமிகாய உபக³தேஹீதி விப⁴த்தஅபாதா³னங் அனுமெய்யவிஸயஅபாதா³னங், தோ²கதராதி ஸம்ப³ந்தோ⁴, ஸஹாதி³யோகோ³ வா, ஸமஸமாதி ஸம்ப³ந்தோ⁴. ஸமஸமாதி ஸமேன, ஸமதோ வா ஸமா ஸமஸமா, அதிரேகஸமாதி அத்தோ². கிஞ்சி ஊனங் வா அதி⁴கங் வா நத்தீ²தி அதி⁴ப்பாயோ. இதீதி இத³ங் லக்க²ணங்.
228.Eseva nayoti ‘‘ajja pavāraṇā pannarasī’’ti pubbakiccaṃ atidisati. Assāti vacanassa. Ñattinti ‘‘suṇātu me bhante saṅgho ajja pavāraṇā’’ti ñattiṃ. Pacchimehīti pacchimavassaṃ upagatehi bhikkhūhi. Uposathaggeti uposathassa gaṇhanaṭṭhāne gehe. Dve ñattiyoti pavāraṇāñatti ca uposathañatti cāti dve ñattiyo. Idañcāti idaṃ vakkhamānaṃ pana. Etthāti purimikapacchimikabhikkhūnaṃ saṃsaggaṭṭhāne. Purimikāya upagatehīti vibhattaapādānaṃ anumeyyavisayaapādānaṃ, thokatarāti sambandho, sahādiyogo vā, samasamāti sambandho. Samasamāti samena, samato vā samā samasamā, atirekasamāti attho. Kiñci ūnaṃ vā adhikaṃ vā natthīti adhippāyo. Itīti idaṃ lakkhaṇaṃ.
ஸோதி பச்சி²மிகோ பி⁴க்கு². இதரேனாதி பச்சி²மிகேன. தேஸந்தி புரிமிகானங். ஏகேனாதி புரிமிகேன. ஏகஸ்ஸாதி பச்சி²மிகஸ்ஸ. புன ஏகேனாதி பச்சி²மிகேன. ‘‘ஏகஸ்ஸா’’தி அனுவத்தேதப்³போ³, புரிமிகஸ்ஸாதி அத்தோ². புரிமவஸ்ஸூபக³தேஹி அதி⁴கதராதி ஸம்ப³ந்தோ⁴. தோ²கதரேஹீதி பச்சி²மவஸ்ஸூபக³தேஹி தோ²கதரேஹி புரிமவஸ்ஸூபக³தேஹீதி யோஜனா.
Soti pacchimiko bhikkhu. Itarenāti pacchimikena. Tesanti purimikānaṃ. Ekenāti purimikena. Ekassāti pacchimikassa. Puna ekenāti pacchimikena. ‘‘Ekassā’’ti anuvattetabbo, purimikassāti attho. Purimavassūpagatehi adhikatarāti sambandho. Thokatarehīti pacchimavassūpagatehi thokatarehi purimavassūpagatehīti yojanā.
கத்திகாயாதி பச்சி²மகத்திகாய. சாதுமாஸினியா பவாரணாயாதி சதுன்னங் மாஸானங் பூரணியா பவாரணாய. பவாரணாஞத்திங் ட²பெத்வாதி ஸமஸமா ஹுத்வாபி பவாரணாதி³வஸத்தா பவாரணாஞத்திங் ட²பெத்வா. தேஹீதி பச்சி²மிகேஹி. இதரேஹீதி புரிமிகேஹி. தேஸந்தி பச்சி²மிகானங். தோ²கதரா வாதி ஏகாதி³னா தோ²கதரா வா. தேஸந்தி புரிமிகானங். தேஹீதி பச்சி²மிகேஹி.
Kattikāyāti pacchimakattikāya. Cātumāsiniyā pavāraṇāyāti catunnaṃ māsānaṃ pūraṇiyā pavāraṇāya. Pavāraṇāñattiṃ ṭhapetvāti samasamā hutvāpi pavāraṇādivasattā pavāraṇāñattiṃ ṭhapetvā. Tehīti pacchimikehi. Itarehīti purimikehi. Tesanti pacchimikānaṃ. Thokatarā vāti ekādinā thokatarā vā. Tesanti purimikānaṃ. Tehīti pacchimikehi.
233. ஸங்க⁴ஸாமக்³கி³யாதி எத்த² கீதி³ஸீ ஸங்க⁴ஸாமக்³கீ³ வேதி³தப்³பா³தி ஆஹ ‘‘கோஸம்ப³கஸாமக்³கீ³ஸதி³ஸாவ வேதி³தப்³பா³’’தி. எத்தா²தி ஸாமக்³கீ³பவாரணாயங். அப்பமத்தகேதி பத்தசீவராதி³ங் படிச்ச உப்பன்னே அப்பமத்தகே விவாதே³. பவாரணாயமேவாதி பவாரணாதி³வஸேயேவ. கஸ்மிங் தி³வஸே ஸாமக்³கீ³பவாரணா காதப்³பா³தி ஆஹ ‘‘ஸாமக்³கீ³பவாரண’’ந்திஆதி³. பட²மபவாரணந்தி புப்³ப³கத்திகபுண்ணமிங். யாவ கத்திகசாதுமாஸினீ புண்ணமாதி அயங் அவதி⁴ அனபி⁴விதி⁴அவதி⁴ நாம. கஸ்மா? கத்திகசாதுமாஸினிபுண்ணமிங் ட²பெத்வா அந்தோயேவ க³ஹேதப்³ப³த்தா. எத்த²ந்தரேதி ஏதஸ்மிங் த்³வின்னங் புண்ணமினமந்தரே அட்ட²வீஸதிபமாணே தி³வஸே காதப்³பா³. ததோதி எத்த²ந்தரஸங்கா²தா அட்ட²வீஸதி³வஸதோ.
233.Saṅghasāmaggiyāti ettha kīdisī saṅghasāmaggī veditabbāti āha ‘‘kosambakasāmaggīsadisāva veditabbā’’ti. Etthāti sāmaggīpavāraṇāyaṃ. Appamattaketi pattacīvarādiṃ paṭicca uppanne appamattake vivāde. Pavāraṇāyamevāti pavāraṇādivaseyeva. Kasmiṃ divase sāmaggīpavāraṇā kātabbāti āha ‘‘sāmaggīpavāraṇa’’ntiādi. Paṭhamapavāraṇanti pubbakattikapuṇṇamiṃ. Yāva kattikacātumāsinī puṇṇamāti ayaṃ avadhi anabhividhiavadhi nāma. Kasmā? Kattikacātumāsinipuṇṇamiṃ ṭhapetvā antoyeva gahetabbattā. Etthantareti etasmiṃ dvinnaṃ puṇṇaminamantare aṭṭhavīsatipamāṇe divase kātabbā. Tatoti etthantarasaṅkhātā aṭṭhavīsadivasato.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
121. பவாரணாபே⁴தா³ • 121. Pavāraṇābhedā
122. பவாரணாதா³னானுஜானநா • 122. Pavāraṇādānānujānanā
124. ஸங்க⁴பவாரணாதி³ப்பபே⁴தா³ • 124. Saṅghapavāraṇādippabhedā
125. ஆபத்திபடிகம்மவிதி⁴ • 125. Āpattipaṭikammavidhi
128. அனாபத்திபன்னரஸகங் • 128. Anāpattipannarasakaṃ
134. தி³வஸனானத்தங் • 134. Divasanānattaṃ
139. வஜ்ஜனீயபுக்³க³லஸந்த³ஸ்ஸனா • 139. Vajjanīyapuggalasandassanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā
பவாரணாபே⁴த³கதா² • Pavāraṇābhedakathā
பவாரணாதா³னானுஜானநகதா² • Pavāraṇādānānujānanakathā
அனாபத்திபன்னரஸகாதி³கதா² • Anāpattipannarasakādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
பவாரணாபே⁴த³கதா²வண்ணனா • Pavāraṇābhedakathāvaṇṇanā
பவாரணாதா³னானுஜானநகதா²வண்ணனா • Pavāraṇādānānujānanakathāvaṇṇanā
அனாபத்திபன்னரஸககதா²வண்ணனா • Anāpattipannarasakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
பவாரணாபே⁴த³வண்ணனா • Pavāraṇābhedavaṇṇanā
பவாரணாதா³னானுஜானநகதா²வண்ணனா • Pavāraṇādānānujānanakathāvaṇṇanā
அனாபத்திபன்னரஸகாதி³கதா²வண்ணனா • Anāpattipannarasakādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அபா²ஸுவிஹாரகதா²தி³வண்ணனா • Aphāsuvihārakathādivaṇṇanā
