| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১২১. পৰারণাভেদকথা
121. Pavāraṇābhedakathā
২১২. চাতুদ্দসিকাযাতি ভণ্ডনকারকেহি উপদ্দুতত্তা পচ্চুক্কড্ঢিতায পুব্বকত্তিকমাসস্স কাল়পক্খচাতুদ্দসিকায। ‘‘অজ্জ পৰারণা পন্নরসী’’তি পুব্বকিচ্চং কাতব্বন্তি যোজনা।
212.Cātuddasikāyāti bhaṇḍanakārakehi upaddutattā paccukkaḍḍhitāya pubbakattikamāsassa kāḷapakkhacātuddasikāya. ‘‘Ajja pavāraṇā pannarasī’’ti pubbakiccaṃ kātabbanti yojanā.
পৰারণাকম্মেসূতি নিদ্ধারণে ভুম্মং, ‘‘অধম্মেন ৰগ্গং পৰারণাকম্ম’’ন্তিআদীসু সম্বন্ধিতব্বং। অধম্মেন ৰগ্গন্তি এত্থ অধম্মং নাম সঙ্ঘো হুত্ৰাপি সঙ্ঘপৰারণমকত্ৰা গণপৰারণায করণং, গণো হুত্ৰাপি গণপৰারণমকত্ৰা সঙ্ঘপৰারণায করণঞ্চ। ৰগ্গং নাম একসীমাযং ৰসন্তানম্পি সব্বেসং একতো অসন্নিপতনং।
Pavāraṇākammesūti niddhāraṇe bhummaṃ, ‘‘adhammena vaggaṃ pavāraṇākamma’’ntiādīsu sambandhitabbaṃ. Adhammena vagganti ettha adhammaṃ nāma saṅgho hutvāpi saṅghapavāraṇamakatvā gaṇapavāraṇāya karaṇaṃ, gaṇo hutvāpi gaṇapavāraṇamakatvā saṅghapavāraṇāya karaṇañca. Vaggaṃ nāma ekasīmāyaṃ vasantānampi sabbesaṃ ekato asannipatanaṃ.
অধম্মেন সমগ্গন্তি এত্থ অধম্মং ৰুত্তনযমেৰ। সমগ্গং নাম সব্বেসং একতো সন্নিপতনং।
Adhammena samagganti ettha adhammaṃ vuttanayameva. Samaggaṃ nāma sabbesaṃ ekato sannipatanaṃ.
ধম্মেন ৰগ্গন্তি এত্থ ধম্মং নাম সঙ্ঘো হুত্ৰা সঙ্ঘপৰারণায করণং, গণো হুত্ৰা গণপৰারণায করণঞ্চ। ৰগ্গং ৰুত্তনযমেৰ। ধম্মেন সমগ্গং সুৰিঞ্ঞেয্যমেৰ। ইতিসদ্দো পরিসমাপনত্থো।
Dhammena vagganti ettha dhammaṃ nāma saṅgho hutvā saṅghapavāraṇāya karaṇaṃ, gaṇo hutvā gaṇapavāraṇāya karaṇañca. Vaggaṃ vuttanayameva. Dhammena samaggaṃ suviññeyyameva. Itisaddo parisamāpanattho.
২১৩. এৰং দিন্নাযাতি এৰং পাল়িযং ৰুত্তনযেনেৰ দিন্নায। পৰারেতব্বন্তি ৰস্সংৰুত্থপৰারণায পৰারেতব্বং। তিস্সোতি তিস্সনামকো। দিট্ঠেন ৰা ৰদতূতি সম্বন্ধো। তন্তি তিস্সনামকং ভিক্খুং। সঙ্ঘো অনুকম্পং উপাদায ৰদতূতি যোজনা। ৰুড্ঢতরোতি পৰারণাদাযকো তংহারকতো ৰুড্ঢতরো। হীতি লদ্ধগুণো। তেনাতি পৰারণাহারকেন। তস্সাতি পৰারণাদাযকস্স।
213.Evaṃ dinnāyāti evaṃ pāḷiyaṃ vuttanayeneva dinnāya. Pavāretabbanti vassaṃvutthapavāraṇāya pavāretabbaṃ. Tissoti tissanāmako. Diṭṭhena vā vadatūti sambandho. Tanti tissanāmakaṃ bhikkhuṃ. Saṅgho anukampaṃ upādāya vadatūti yojanā. Vuḍḍhataroti pavāraṇādāyako taṃhārakato vuḍḍhataro. Hīti laddhaguṇo. Tenāti pavāraṇāhārakena. Tassāti pavāraṇādāyakassa.
ইধাপি চাতি ইমস্মিং পৰারণাক্খন্ধকেপি চ। অপিসদ্দো উপোসথক্খন্ধকং অপেক্খতি। অৰসেসকম্মত্থাযাতি পৰারণাকম্মতো অৰসেসানং কম্মানমত্থায হোতীতি সম্বন্ধো। পৰারণায আহটায সতিযাতি যোজনা। তস্স চাতি পৰারণাদাযকস্স চ। সব্বেসন্তি পৰারণাদাযকস্স চ সঙ্ঘস্স চাতি সব্বেসং। অঞ্ঞং পন কম্মন্তি পৰারণাকম্মতো অঞ্ঞং কম্মং পন। তেন পন ভিক্খুনাতি পৰারণাদাযকেন ভিক্খুনা পন। এত্থ চ তদহুপৰারণায অত্তনো চ সঙ্ঘস্স চ সচে পৰারণাকম্মমেৰ হোতি, পৰারণাযেৰ দাতব্বা। অথ অঞ্ঞমেৰ কম্মং হোতি, ছন্দোযেৰ দাতব্বো। যদি পৰারণাকম্মঞ্চ অঞ্ঞকম্মঞ্চ হোতি, পৰারণা চ ছন্দো চ দাতব্বো । তং সন্ধায ৰুত্তং ‘‘তদহু পৰারণায পৰারণং দেন্তেন ছন্দম্পি দাতু’’ন্তি (মহাৰ॰ ২১৩)। তেনাতি দানহেতুনা।
Idhāpi cāti imasmiṃ pavāraṇākkhandhakepi ca. Apisaddo uposathakkhandhakaṃ apekkhati. Avasesakammatthāyāti pavāraṇākammato avasesānaṃ kammānamatthāya hotīti sambandho. Pavāraṇāya āhaṭāya satiyāti yojanā. Tassa cāti pavāraṇādāyakassa ca. Sabbesanti pavāraṇādāyakassa ca saṅghassa cāti sabbesaṃ. Aññaṃ pana kammanti pavāraṇākammato aññaṃ kammaṃ pana. Tena pana bhikkhunāti pavāraṇādāyakena bhikkhunā pana. Ettha ca tadahupavāraṇāya attano ca saṅghassa ca sace pavāraṇākammameva hoti, pavāraṇāyeva dātabbā. Atha aññameva kammaṃ hoti, chandoyeva dātabbo. Yadi pavāraṇākammañca aññakammañca hoti, pavāraṇā ca chando ca dātabbo . Taṃ sandhāya vuttaṃ ‘‘tadahu pavāraṇāya pavāraṇaṃ dentena chandampi dātu’’nti (mahāva. 213). Tenāti dānahetunā.
২১৮. অজ্জ মে পৰারণাতি এত্থ পাল়িনযতো অঞ্ঞং অট্ঠকথানযং দস্সেন্তো আহ ‘‘সচে’’তিআদি।
218.Ajja me pavāraṇāti ettha pāḷinayato aññaṃ aṭṭhakathānayaṃ dassento āha ‘‘sace’’tiādi.
২১৯. ৰুত্তনযমেৰাতি উপোসথক্খন্ধকে (মহাৰ॰ অট্ঠ॰ ১৬৯) ৰুত্তনযমেৰ।
219.Vuttanayamevāti uposathakkhandhake (mahāva. aṭṭha. 169) vuttanayameva.
২২২. পুন পৰারেতব্বন্তি এত্থ ন কেৰলং পৰারণাযেৰ পুন কাতব্বা, পুব্বকিচ্চাদীনিপি পুন কাতব্বানীতি দস্সেন্তো আহ ‘‘পুন পুব্বকিচ্চ’’ন্তিআদি।
222.Puna pavāretabbanti ettha na kevalaṃ pavāraṇāyeva puna kātabbā, pubbakiccādīnipi puna kātabbānīti dassento āha ‘‘puna pubbakicca’’ntiādi.
২২৮. এসেৰ নযোতি ‘‘অজ্জ পৰারণা পন্নরসী’’তি পুব্বকিচ্চং অতিদিসতি। অস্সাতি ৰচনস্স। ঞত্তিন্তি ‘‘সুণাতু মে ভন্তে সঙ্ঘো অজ্জ পৰারণা’’তি ঞত্তিং। পচ্ছিমেহীতি পচ্ছিমৰস্সং উপগতেহি ভিক্খূহি। উপোসথগ্গেতি উপোসথস্স গণ্হনট্ঠানে গেহে। দ্ৰে ঞত্তিযোতি পৰারণাঞত্তি চ উপোসথঞত্তি চাতি দ্ৰে ঞত্তিযো। ইদঞ্চাতি ইদং ৰক্খমানং পন। এত্থাতি পুরিমিকপচ্ছিমিকভিক্খূনং সংসগ্গট্ঠানে। পুরিমিকায উপগতেহীতি ৰিভত্তঅপাদানং অনুমেয্যৰিসযঅপাদানং, থোকতরাতি সম্বন্ধো, সহাদিযোগো ৰা, সমসমাতি সম্বন্ধো। সমসমাতি সমেন, সমতো ৰা সমা সমসমা, অতিরেকসমাতি অত্থো। কিঞ্চি ঊনং ৰা অধিকং ৰা নত্থীতি অধিপ্পাযো। ইতীতি ইদং লক্খণং।
228.Eseva nayoti ‘‘ajja pavāraṇā pannarasī’’ti pubbakiccaṃ atidisati. Assāti vacanassa. Ñattinti ‘‘suṇātu me bhante saṅgho ajja pavāraṇā’’ti ñattiṃ. Pacchimehīti pacchimavassaṃ upagatehi bhikkhūhi. Uposathaggeti uposathassa gaṇhanaṭṭhāne gehe. Dve ñattiyoti pavāraṇāñatti ca uposathañatti cāti dve ñattiyo. Idañcāti idaṃ vakkhamānaṃ pana. Etthāti purimikapacchimikabhikkhūnaṃ saṃsaggaṭṭhāne. Purimikāya upagatehīti vibhattaapādānaṃ anumeyyavisayaapādānaṃ, thokatarāti sambandho, sahādiyogo vā, samasamāti sambandho. Samasamāti samena, samato vā samā samasamā, atirekasamāti attho. Kiñci ūnaṃ vā adhikaṃ vā natthīti adhippāyo. Itīti idaṃ lakkhaṇaṃ.
সোতি পচ্ছিমিকো ভিক্খু। ইতরেনাতি পচ্ছিমিকেন। তেসন্তি পুরিমিকানং। একেনাতি পুরিমিকেন। একস্সাতি পচ্ছিমিকস্স। পুন একেনাতি পচ্ছিমিকেন। ‘‘একস্সা’’তি অনুৰত্তেতব্বো, পুরিমিকস্সাতি অত্থো। পুরিমৰস্সূপগতেহি অধিকতরাতি সম্বন্ধো। থোকতরেহীতি পচ্ছিমৰস্সূপগতেহি থোকতরেহি পুরিমৰস্সূপগতেহীতি যোজনা।
Soti pacchimiko bhikkhu. Itarenāti pacchimikena. Tesanti purimikānaṃ. Ekenāti purimikena. Ekassāti pacchimikassa. Puna ekenāti pacchimikena. ‘‘Ekassā’’ti anuvattetabbo, purimikassāti attho. Purimavassūpagatehi adhikatarāti sambandho. Thokatarehīti pacchimavassūpagatehi thokatarehi purimavassūpagatehīti yojanā.
কত্তিকাযাতি পচ্ছিমকত্তিকায। চাতুমাসিনিযা পৰারণাযাতি চতুন্নং মাসানং পূরণিযা পৰারণায। পৰারণাঞত্তিং ঠপেত্ৰাতি সমসমা হুত্ৰাপি পৰারণাদিৰসত্তা পৰারণাঞত্তিং ঠপেত্ৰা। তেহীতি পচ্ছিমিকেহি। ইতরেহীতি পুরিমিকেহি। তেসন্তি পচ্ছিমিকানং। থোকতরা ৰাতি একাদিনা থোকতরা ৰা। তেসন্তি পুরিমিকানং। তেহীতি পচ্ছিমিকেহি।
Kattikāyāti pacchimakattikāya. Cātumāsiniyā pavāraṇāyāti catunnaṃ māsānaṃ pūraṇiyā pavāraṇāya. Pavāraṇāñattiṃ ṭhapetvāti samasamā hutvāpi pavāraṇādivasattā pavāraṇāñattiṃ ṭhapetvā. Tehīti pacchimikehi. Itarehīti purimikehi. Tesanti pacchimikānaṃ. Thokatarā vāti ekādinā thokatarā vā. Tesanti purimikānaṃ. Tehīti pacchimikehi.
২৩৩. সঙ্ঘসামগ্গিযাতি এত্থ কীদিসী সঙ্ঘসামগ্গী ৰেদিতব্বাতি আহ ‘‘কোসম্বকসামগ্গীসদিসাৰ ৰেদিতব্বা’’তি। এত্থাতি সামগ্গীপৰারণাযং। অপ্পমত্তকেতি পত্তচীৰরাদিং পটিচ্চ উপ্পন্নে অপ্পমত্তকে ৰিৰাদে। পৰারণাযমেৰাতি পৰারণাদিৰসেযেৰ। কস্মিং দিৰসে সামগ্গীপৰারণা কাতব্বাতি আহ ‘‘সামগ্গীপৰারণ’’ন্তিআদি। পঠমপৰারণন্তি পুব্বকত্তিকপুণ্ণমিং। যাৰ কত্তিকচাতুমাসিনী পুণ্ণমাতি অযং অৰধি অনভিৰিধিঅৰধি নাম। কস্মা? কত্তিকচাতুমাসিনিপুণ্ণমিং ঠপেত্ৰা অন্তোযেৰ গহেতব্বত্তা। এত্থন্তরেতি এতস্মিং দ্ৰিন্নং পুণ্ণমিনমন্তরে অট্ঠৰীসতিপমাণে দিৰসে কাতব্বা। ততোতি এত্থন্তরসঙ্খাতা অট্ঠৰীসদিৰসতো।
233.Saṅghasāmaggiyāti ettha kīdisī saṅghasāmaggī veditabbāti āha ‘‘kosambakasāmaggīsadisāva veditabbā’’ti. Etthāti sāmaggīpavāraṇāyaṃ. Appamattaketi pattacīvarādiṃ paṭicca uppanne appamattake vivāde. Pavāraṇāyamevāti pavāraṇādivaseyeva. Kasmiṃ divase sāmaggīpavāraṇā kātabbāti āha ‘‘sāmaggīpavāraṇa’’ntiādi. Paṭhamapavāraṇanti pubbakattikapuṇṇamiṃ. Yāva kattikacātumāsinī puṇṇamāti ayaṃ avadhi anabhividhiavadhi nāma. Kasmā? Kattikacātumāsinipuṇṇamiṃ ṭhapetvā antoyeva gahetabbattā. Etthantareti etasmiṃ dvinnaṃ puṇṇaminamantare aṭṭhavīsatipamāṇe divase kātabbā. Tatoti etthantarasaṅkhātā aṭṭhavīsadivasato.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
১২১. পৰারণাভেদা • 121. Pavāraṇābhedā
১২২. পৰারণাদানানুজাননা • 122. Pavāraṇādānānujānanā
১২৪. সঙ্ঘপৰারণাদিপ্পভেদা • 124. Saṅghapavāraṇādippabhedā
১২৫. আপত্তিপটিকম্মৰিধি • 125. Āpattipaṭikammavidhi
১২৮. অনাপত্তিপন্নরসকং • 128. Anāpattipannarasakaṃ
১৩৪. দিৰসনানত্তং • 134. Divasanānattaṃ
১৩৯. ৰজ্জনীযপুগ্গলসন্দস্সনা • 139. Vajjanīyapuggalasandassanā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā
পৰারণাভেদকথা • Pavāraṇābhedakathā
পৰারণাদানানুজাননকথা • Pavāraṇādānānujānanakathā
অনাপত্তিপন্নরসকাদিকথা • Anāpattipannarasakādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
পৰারণাভেদকথাৰণ্ণনা • Pavāraṇābhedakathāvaṇṇanā
পৰারণাদানানুজাননকথাৰণ্ণনা • Pavāraṇādānānujānanakathāvaṇṇanā
অনাপত্তিপন্নরসককথাৰণ্ণনা • Anāpattipannarasakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
পৰারণাভেদৰণ্ণনা • Pavāraṇābhedavaṇṇanā
পৰারণাদানানুজাননকথাৰণ্ণনা • Pavāraṇādānānujānanakathāvaṇṇanā
অনাপত্তিপন্নরসকাদিকথাৰণ্ণনা • Anāpattipannarasakādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অফাসুৰিহারকথাদিৰণ্ণনা • Aphāsuvihārakathādivaṇṇanā
