| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೧೨೧. ಪವಾರಣಾಭೇದಕಥಾ
121. Pavāraṇābhedakathā
೨೧೨. ಚಾತುದ್ದಸಿಕಾಯಾತಿ ಭಣ್ಡನಕಾರಕೇಹಿ ಉಪದ್ದುತತ್ತಾ ಪಚ್ಚುಕ್ಕಡ್ಢಿತಾಯ ಪುಬ್ಬಕತ್ತಿಕಮಾಸಸ್ಸ ಕಾಳಪಕ್ಖಚಾತುದ್ದಸಿಕಾಯ। ‘‘ಅಜ್ಜ ಪವಾರಣಾ ಪನ್ನರಸೀ’’ತಿ ಪುಬ್ಬಕಿಚ್ಚಂ ಕಾತಬ್ಬನ್ತಿ ಯೋಜನಾ।
212.Cātuddasikāyāti bhaṇḍanakārakehi upaddutattā paccukkaḍḍhitāya pubbakattikamāsassa kāḷapakkhacātuddasikāya. ‘‘Ajja pavāraṇā pannarasī’’ti pubbakiccaṃ kātabbanti yojanā.
ಪವಾರಣಾಕಮ್ಮೇಸೂತಿ ನಿದ್ಧಾರಣೇ ಭುಮ್ಮಂ, ‘‘ಅಧಮ್ಮೇನ ವಗ್ಗಂ ಪವಾರಣಾಕಮ್ಮ’’ನ್ತಿಆದೀಸು ಸಮ್ಬನ್ಧಿತಬ್ಬಂ। ಅಧಮ್ಮೇನ ವಗ್ಗನ್ತಿ ಏತ್ಥ ಅಧಮ್ಮಂ ನಾಮ ಸಙ್ಘೋ ಹುತ್ವಾಪಿ ಸಙ್ಘಪವಾರಣಮಕತ್ವಾ ಗಣಪವಾರಣಾಯ ಕರಣಂ, ಗಣೋ ಹುತ್ವಾಪಿ ಗಣಪವಾರಣಮಕತ್ವಾ ಸಙ್ಘಪವಾರಣಾಯ ಕರಣಞ್ಚ। ವಗ್ಗಂ ನಾಮ ಏಕಸೀಮಾಯಂ ವಸನ್ತಾನಮ್ಪಿ ಸಬ್ಬೇಸಂ ಏಕತೋ ಅಸನ್ನಿಪತನಂ।
Pavāraṇākammesūti niddhāraṇe bhummaṃ, ‘‘adhammena vaggaṃ pavāraṇākamma’’ntiādīsu sambandhitabbaṃ. Adhammena vagganti ettha adhammaṃ nāma saṅgho hutvāpi saṅghapavāraṇamakatvā gaṇapavāraṇāya karaṇaṃ, gaṇo hutvāpi gaṇapavāraṇamakatvā saṅghapavāraṇāya karaṇañca. Vaggaṃ nāma ekasīmāyaṃ vasantānampi sabbesaṃ ekato asannipatanaṃ.
ಅಧಮ್ಮೇನ ಸಮಗ್ಗನ್ತಿ ಏತ್ಥ ಅಧಮ್ಮಂ ವುತ್ತನಯಮೇವ। ಸಮಗ್ಗಂ ನಾಮ ಸಬ್ಬೇಸಂ ಏಕತೋ ಸನ್ನಿಪತನಂ।
Adhammena samagganti ettha adhammaṃ vuttanayameva. Samaggaṃ nāma sabbesaṃ ekato sannipatanaṃ.
ಧಮ್ಮೇನ ವಗ್ಗನ್ತಿ ಏತ್ಥ ಧಮ್ಮಂ ನಾಮ ಸಙ್ಘೋ ಹುತ್ವಾ ಸಙ್ಘಪವಾರಣಾಯ ಕರಣಂ, ಗಣೋ ಹುತ್ವಾ ಗಣಪವಾರಣಾಯ ಕರಣಞ್ಚ। ವಗ್ಗಂ ವುತ್ತನಯಮೇವ। ಧಮ್ಮೇನ ಸಮಗ್ಗಂ ಸುವಿಞ್ಞೇಯ್ಯಮೇವ। ಇತಿಸದ್ದೋ ಪರಿಸಮಾಪನತ್ಥೋ।
Dhammena vagganti ettha dhammaṃ nāma saṅgho hutvā saṅghapavāraṇāya karaṇaṃ, gaṇo hutvā gaṇapavāraṇāya karaṇañca. Vaggaṃ vuttanayameva. Dhammena samaggaṃ suviññeyyameva. Itisaddo parisamāpanattho.
೨೧೩. ಏವಂ ದಿನ್ನಾಯಾತಿ ಏವಂ ಪಾಳಿಯಂ ವುತ್ತನಯೇನೇವ ದಿನ್ನಾಯ। ಪವಾರೇತಬ್ಬನ್ತಿ ವಸ್ಸಂವುತ್ಥಪವಾರಣಾಯ ಪವಾರೇತಬ್ಬಂ। ತಿಸ್ಸೋತಿ ತಿಸ್ಸನಾಮಕೋ। ದಿಟ್ಠೇನ ವಾ ವದತೂತಿ ಸಮ್ಬನ್ಧೋ। ತನ್ತಿ ತಿಸ್ಸನಾಮಕಂ ಭಿಕ್ಖುಂ। ಸಙ್ಘೋ ಅನುಕಮ್ಪಂ ಉಪಾದಾಯ ವದತೂತಿ ಯೋಜನಾ। ವುಡ್ಢತರೋತಿ ಪವಾರಣಾದಾಯಕೋ ತಂಹಾರಕತೋ ವುಡ್ಢತರೋ। ಹೀತಿ ಲದ್ಧಗುಣೋ। ತೇನಾತಿ ಪವಾರಣಾಹಾರಕೇನ। ತಸ್ಸಾತಿ ಪವಾರಣಾದಾಯಕಸ್ಸ।
213.Evaṃ dinnāyāti evaṃ pāḷiyaṃ vuttanayeneva dinnāya. Pavāretabbanti vassaṃvutthapavāraṇāya pavāretabbaṃ. Tissoti tissanāmako. Diṭṭhena vā vadatūti sambandho. Tanti tissanāmakaṃ bhikkhuṃ. Saṅgho anukampaṃ upādāya vadatūti yojanā. Vuḍḍhataroti pavāraṇādāyako taṃhārakato vuḍḍhataro. Hīti laddhaguṇo. Tenāti pavāraṇāhārakena. Tassāti pavāraṇādāyakassa.
ಇಧಾಪಿ ಚಾತಿ ಇಮಸ್ಮಿಂ ಪವಾರಣಾಕ್ಖನ್ಧಕೇಪಿ ಚ। ಅಪಿಸದ್ದೋ ಉಪೋಸಥಕ್ಖನ್ಧಕಂ ಅಪೇಕ್ಖತಿ। ಅವಸೇಸಕಮ್ಮತ್ಥಾಯಾತಿ ಪವಾರಣಾಕಮ್ಮತೋ ಅವಸೇಸಾನಂ ಕಮ್ಮಾನಮತ್ಥಾಯ ಹೋತೀತಿ ಸಮ್ಬನ್ಧೋ। ಪವಾರಣಾಯ ಆಹಟಾಯ ಸತಿಯಾತಿ ಯೋಜನಾ। ತಸ್ಸ ಚಾತಿ ಪವಾರಣಾದಾಯಕಸ್ಸ ಚ। ಸಬ್ಬೇಸನ್ತಿ ಪವಾರಣಾದಾಯಕಸ್ಸ ಚ ಸಙ್ಘಸ್ಸ ಚಾತಿ ಸಬ್ಬೇಸಂ। ಅಞ್ಞಂ ಪನ ಕಮ್ಮನ್ತಿ ಪವಾರಣಾಕಮ್ಮತೋ ಅಞ್ಞಂ ಕಮ್ಮಂ ಪನ। ತೇನ ಪನ ಭಿಕ್ಖುನಾತಿ ಪವಾರಣಾದಾಯಕೇನ ಭಿಕ್ಖುನಾ ಪನ। ಏತ್ಥ ಚ ತದಹುಪವಾರಣಾಯ ಅತ್ತನೋ ಚ ಸಙ್ಘಸ್ಸ ಚ ಸಚೇ ಪವಾರಣಾಕಮ್ಮಮೇವ ಹೋತಿ, ಪವಾರಣಾಯೇವ ದಾತಬ್ಬಾ। ಅಥ ಅಞ್ಞಮೇವ ಕಮ್ಮಂ ಹೋತಿ, ಛನ್ದೋಯೇವ ದಾತಬ್ಬೋ। ಯದಿ ಪವಾರಣಾಕಮ್ಮಞ್ಚ ಅಞ್ಞಕಮ್ಮಞ್ಚ ಹೋತಿ, ಪವಾರಣಾ ಚ ಛನ್ದೋ ಚ ದಾತಬ್ಬೋ । ತಂ ಸನ್ಧಾಯ ವುತ್ತಂ ‘‘ತದಹು ಪವಾರಣಾಯ ಪವಾರಣಂ ದೇನ್ತೇನ ಛನ್ದಮ್ಪಿ ದಾತು’’ನ್ತಿ (ಮಹಾವ॰ ೨೧೩)। ತೇನಾತಿ ದಾನಹೇತುನಾ।
Idhāpi cāti imasmiṃ pavāraṇākkhandhakepi ca. Apisaddo uposathakkhandhakaṃ apekkhati. Avasesakammatthāyāti pavāraṇākammato avasesānaṃ kammānamatthāya hotīti sambandho. Pavāraṇāya āhaṭāya satiyāti yojanā. Tassa cāti pavāraṇādāyakassa ca. Sabbesanti pavāraṇādāyakassa ca saṅghassa cāti sabbesaṃ. Aññaṃ pana kammanti pavāraṇākammato aññaṃ kammaṃ pana. Tena pana bhikkhunāti pavāraṇādāyakena bhikkhunā pana. Ettha ca tadahupavāraṇāya attano ca saṅghassa ca sace pavāraṇākammameva hoti, pavāraṇāyeva dātabbā. Atha aññameva kammaṃ hoti, chandoyeva dātabbo. Yadi pavāraṇākammañca aññakammañca hoti, pavāraṇā ca chando ca dātabbo . Taṃ sandhāya vuttaṃ ‘‘tadahu pavāraṇāya pavāraṇaṃ dentena chandampi dātu’’nti (mahāva. 213). Tenāti dānahetunā.
೨೧೮. ಅಜ್ಜ ಮೇ ಪವಾರಣಾತಿ ಏತ್ಥ ಪಾಳಿನಯತೋ ಅಞ್ಞಂ ಅಟ್ಠಕಥಾನಯಂ ದಸ್ಸೇನ್ತೋ ಆಹ ‘‘ಸಚೇ’’ತಿಆದಿ।
218.Ajja me pavāraṇāti ettha pāḷinayato aññaṃ aṭṭhakathānayaṃ dassento āha ‘‘sace’’tiādi.
೨೧೯. ವುತ್ತನಯಮೇವಾತಿ ಉಪೋಸಥಕ್ಖನ್ಧಕೇ (ಮಹಾವ॰ ಅಟ್ಠ॰ ೧೬೯) ವುತ್ತನಯಮೇವ।
219.Vuttanayamevāti uposathakkhandhake (mahāva. aṭṭha. 169) vuttanayameva.
೨೨೨. ಪುನ ಪವಾರೇತಬ್ಬನ್ತಿ ಏತ್ಥ ನ ಕೇವಲಂ ಪವಾರಣಾಯೇವ ಪುನ ಕಾತಬ್ಬಾ, ಪುಬ್ಬಕಿಚ್ಚಾದೀನಿಪಿ ಪುನ ಕಾತಬ್ಬಾನೀತಿ ದಸ್ಸೇನ್ತೋ ಆಹ ‘‘ಪುನ ಪುಬ್ಬಕಿಚ್ಚ’’ನ್ತಿಆದಿ।
222.Puna pavāretabbanti ettha na kevalaṃ pavāraṇāyeva puna kātabbā, pubbakiccādīnipi puna kātabbānīti dassento āha ‘‘puna pubbakicca’’ntiādi.
೨೨೮. ಏಸೇವ ನಯೋತಿ ‘‘ಅಜ್ಜ ಪವಾರಣಾ ಪನ್ನರಸೀ’’ತಿ ಪುಬ್ಬಕಿಚ್ಚಂ ಅತಿದಿಸತಿ। ಅಸ್ಸಾತಿ ವಚನಸ್ಸ। ಞತ್ತಿನ್ತಿ ‘‘ಸುಣಾತು ಮೇ ಭನ್ತೇ ಸಙ್ಘೋ ಅಜ್ಜ ಪವಾರಣಾ’’ತಿ ಞತ್ತಿಂ। ಪಚ್ಛಿಮೇಹೀತಿ ಪಚ್ಛಿಮವಸ್ಸಂ ಉಪಗತೇಹಿ ಭಿಕ್ಖೂಹಿ। ಉಪೋಸಥಗ್ಗೇತಿ ಉಪೋಸಥಸ್ಸ ಗಣ್ಹನಟ್ಠಾನೇ ಗೇಹೇ। ದ್ವೇ ಞತ್ತಿಯೋತಿ ಪವಾರಣಾಞತ್ತಿ ಚ ಉಪೋಸಥಞತ್ತಿ ಚಾತಿ ದ್ವೇ ಞತ್ತಿಯೋ। ಇದಞ್ಚಾತಿ ಇದಂ ವಕ್ಖಮಾನಂ ಪನ। ಏತ್ಥಾತಿ ಪುರಿಮಿಕಪಚ್ಛಿಮಿಕಭಿಕ್ಖೂನಂ ಸಂಸಗ್ಗಟ್ಠಾನೇ। ಪುರಿಮಿಕಾಯ ಉಪಗತೇಹೀತಿ ವಿಭತ್ತಅಪಾದಾನಂ ಅನುಮೇಯ್ಯವಿಸಯಅಪಾದಾನಂ, ಥೋಕತರಾತಿ ಸಮ್ಬನ್ಧೋ, ಸಹಾದಿಯೋಗೋ ವಾ, ಸಮಸಮಾತಿ ಸಮ್ಬನ್ಧೋ। ಸಮಸಮಾತಿ ಸಮೇನ, ಸಮತೋ ವಾ ಸಮಾ ಸಮಸಮಾ, ಅತಿರೇಕಸಮಾತಿ ಅತ್ಥೋ। ಕಿಞ್ಚಿ ಊನಂ ವಾ ಅಧಿಕಂ ವಾ ನತ್ಥೀತಿ ಅಧಿಪ್ಪಾಯೋ। ಇತೀತಿ ಇದಂ ಲಕ್ಖಣಂ।
228.Eseva nayoti ‘‘ajja pavāraṇā pannarasī’’ti pubbakiccaṃ atidisati. Assāti vacanassa. Ñattinti ‘‘suṇātu me bhante saṅgho ajja pavāraṇā’’ti ñattiṃ. Pacchimehīti pacchimavassaṃ upagatehi bhikkhūhi. Uposathaggeti uposathassa gaṇhanaṭṭhāne gehe. Dve ñattiyoti pavāraṇāñatti ca uposathañatti cāti dve ñattiyo. Idañcāti idaṃ vakkhamānaṃ pana. Etthāti purimikapacchimikabhikkhūnaṃ saṃsaggaṭṭhāne. Purimikāya upagatehīti vibhattaapādānaṃ anumeyyavisayaapādānaṃ, thokatarāti sambandho, sahādiyogo vā, samasamāti sambandho. Samasamāti samena, samato vā samā samasamā, atirekasamāti attho. Kiñci ūnaṃ vā adhikaṃ vā natthīti adhippāyo. Itīti idaṃ lakkhaṇaṃ.
ಸೋತಿ ಪಚ್ಛಿಮಿಕೋ ಭಿಕ್ಖು। ಇತರೇನಾತಿ ಪಚ್ಛಿಮಿಕೇನ। ತೇಸನ್ತಿ ಪುರಿಮಿಕಾನಂ। ಏಕೇನಾತಿ ಪುರಿಮಿಕೇನ। ಏಕಸ್ಸಾತಿ ಪಚ್ಛಿಮಿಕಸ್ಸ। ಪುನ ಏಕೇನಾತಿ ಪಚ್ಛಿಮಿಕೇನ। ‘‘ಏಕಸ್ಸಾ’’ತಿ ಅನುವತ್ತೇತಬ್ಬೋ, ಪುರಿಮಿಕಸ್ಸಾತಿ ಅತ್ಥೋ। ಪುರಿಮವಸ್ಸೂಪಗತೇಹಿ ಅಧಿಕತರಾತಿ ಸಮ್ಬನ್ಧೋ। ಥೋಕತರೇಹೀತಿ ಪಚ್ಛಿಮವಸ್ಸೂಪಗತೇಹಿ ಥೋಕತರೇಹಿ ಪುರಿಮವಸ್ಸೂಪಗತೇಹೀತಿ ಯೋಜನಾ।
Soti pacchimiko bhikkhu. Itarenāti pacchimikena. Tesanti purimikānaṃ. Ekenāti purimikena. Ekassāti pacchimikassa. Puna ekenāti pacchimikena. ‘‘Ekassā’’ti anuvattetabbo, purimikassāti attho. Purimavassūpagatehi adhikatarāti sambandho. Thokatarehīti pacchimavassūpagatehi thokatarehi purimavassūpagatehīti yojanā.
ಕತ್ತಿಕಾಯಾತಿ ಪಚ್ಛಿಮಕತ್ತಿಕಾಯ। ಚಾತುಮಾಸಿನಿಯಾ ಪವಾರಣಾಯಾತಿ ಚತುನ್ನಂ ಮಾಸಾನಂ ಪೂರಣಿಯಾ ಪವಾರಣಾಯ। ಪವಾರಣಾಞತ್ತಿಂ ಠಪೇತ್ವಾತಿ ಸಮಸಮಾ ಹುತ್ವಾಪಿ ಪವಾರಣಾದಿವಸತ್ತಾ ಪವಾರಣಾಞತ್ತಿಂ ಠಪೇತ್ವಾ। ತೇಹೀತಿ ಪಚ್ಛಿಮಿಕೇಹಿ। ಇತರೇಹೀತಿ ಪುರಿಮಿಕೇಹಿ। ತೇಸನ್ತಿ ಪಚ್ಛಿಮಿಕಾನಂ। ಥೋಕತರಾ ವಾತಿ ಏಕಾದಿನಾ ಥೋಕತರಾ ವಾ। ತೇಸನ್ತಿ ಪುರಿಮಿಕಾನಂ। ತೇಹೀತಿ ಪಚ್ಛಿಮಿಕೇಹಿ।
Kattikāyāti pacchimakattikāya. Cātumāsiniyā pavāraṇāyāti catunnaṃ māsānaṃ pūraṇiyā pavāraṇāya. Pavāraṇāñattiṃ ṭhapetvāti samasamā hutvāpi pavāraṇādivasattā pavāraṇāñattiṃ ṭhapetvā. Tehīti pacchimikehi. Itarehīti purimikehi. Tesanti pacchimikānaṃ. Thokatarā vāti ekādinā thokatarā vā. Tesanti purimikānaṃ. Tehīti pacchimikehi.
೨೩೩. ಸಙ್ಘಸಾಮಗ್ಗಿಯಾತಿ ಏತ್ಥ ಕೀದಿಸೀ ಸಙ್ಘಸಾಮಗ್ಗೀ ವೇದಿತಬ್ಬಾತಿ ಆಹ ‘‘ಕೋಸಮ್ಬಕಸಾಮಗ್ಗೀಸದಿಸಾವ ವೇದಿತಬ್ಬಾ’’ತಿ। ಏತ್ಥಾತಿ ಸಾಮಗ್ಗೀಪವಾರಣಾಯಂ। ಅಪ್ಪಮತ್ತಕೇತಿ ಪತ್ತಚೀವರಾದಿಂ ಪಟಿಚ್ಚ ಉಪ್ಪನ್ನೇ ಅಪ್ಪಮತ್ತಕೇ ವಿವಾದೇ। ಪವಾರಣಾಯಮೇವಾತಿ ಪವಾರಣಾದಿವಸೇಯೇವ। ಕಸ್ಮಿಂ ದಿವಸೇ ಸಾಮಗ್ಗೀಪವಾರಣಾ ಕಾತಬ್ಬಾತಿ ಆಹ ‘‘ಸಾಮಗ್ಗೀಪವಾರಣ’’ನ್ತಿಆದಿ। ಪಠಮಪವಾರಣನ್ತಿ ಪುಬ್ಬಕತ್ತಿಕಪುಣ್ಣಮಿಂ। ಯಾವ ಕತ್ತಿಕಚಾತುಮಾಸಿನೀ ಪುಣ್ಣಮಾತಿ ಅಯಂ ಅವಧಿ ಅನಭಿವಿಧಿಅವಧಿ ನಾಮ। ಕಸ್ಮಾ? ಕತ್ತಿಕಚಾತುಮಾಸಿನಿಪುಣ್ಣಮಿಂ ಠಪೇತ್ವಾ ಅನ್ತೋಯೇವ ಗಹೇತಬ್ಬತ್ತಾ। ಏತ್ಥನ್ತರೇತಿ ಏತಸ್ಮಿಂ ದ್ವಿನ್ನಂ ಪುಣ್ಣಮಿನಮನ್ತರೇ ಅಟ್ಠವೀಸತಿಪಮಾಣೇ ದಿವಸೇ ಕಾತಬ್ಬಾ। ತತೋತಿ ಏತ್ಥನ್ತರಸಙ್ಖಾತಾ ಅಟ್ಠವೀಸದಿವಸತೋ।
233.Saṅghasāmaggiyāti ettha kīdisī saṅghasāmaggī veditabbāti āha ‘‘kosambakasāmaggīsadisāva veditabbā’’ti. Etthāti sāmaggīpavāraṇāyaṃ. Appamattaketi pattacīvarādiṃ paṭicca uppanne appamattake vivāde. Pavāraṇāyamevāti pavāraṇādivaseyeva. Kasmiṃ divase sāmaggīpavāraṇā kātabbāti āha ‘‘sāmaggīpavāraṇa’’ntiādi. Paṭhamapavāraṇanti pubbakattikapuṇṇamiṃ. Yāva kattikacātumāsinī puṇṇamāti ayaṃ avadhi anabhividhiavadhi nāma. Kasmā? Kattikacātumāsinipuṇṇamiṃ ṭhapetvā antoyeva gahetabbattā. Etthantareti etasmiṃ dvinnaṃ puṇṇaminamantare aṭṭhavīsatipamāṇe divase kātabbā. Tatoti etthantarasaṅkhātā aṭṭhavīsadivasato.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi
೧೨೧. ಪವಾರಣಾಭೇದಾ • 121. Pavāraṇābhedā
೧೨೨. ಪವಾರಣಾದಾನಾನುಜಾನನಾ • 122. Pavāraṇādānānujānanā
೧೨೪. ಸಙ್ಘಪವಾರಣಾದಿಪ್ಪಭೇದಾ • 124. Saṅghapavāraṇādippabhedā
೧೨೫. ಆಪತ್ತಿಪಟಿಕಮ್ಮವಿಧಿ • 125. Āpattipaṭikammavidhi
೧೨೮. ಅನಾಪತ್ತಿಪನ್ನರಸಕಂ • 128. Anāpattipannarasakaṃ
೧೩೪. ದಿವಸನಾನತ್ತಂ • 134. Divasanānattaṃ
೧೩೯. ವಜ್ಜನೀಯಪುಗ್ಗಲಸನ್ದಸ್ಸನಾ • 139. Vajjanīyapuggalasandassanā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā
ಪವಾರಣಾಭೇದಕಥಾ • Pavāraṇābhedakathā
ಪವಾರಣಾದಾನಾನುಜಾನನಕಥಾ • Pavāraṇādānānujānanakathā
ಅನಾಪತ್ತಿಪನ್ನರಸಕಾದಿಕಥಾ • Anāpattipannarasakādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā
ಪವಾರಣಾಭೇದಕಥಾವಣ್ಣನಾ • Pavāraṇābhedakathāvaṇṇanā
ಪವಾರಣಾದಾನಾನುಜಾನನಕಥಾವಣ್ಣನಾ • Pavāraṇādānānujānanakathāvaṇṇanā
ಅನಾಪತ್ತಿಪನ್ನರಸಕಕಥಾವಣ್ಣನಾ • Anāpattipannarasakakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā
ಪವಾರಣಾಭೇದವಣ್ಣನಾ • Pavāraṇābhedavaṇṇanā
ಪವಾರಣಾದಾನಾನುಜಾನನಕಥಾವಣ್ಣನಾ • Pavāraṇādānānujānanakathāvaṇṇanā
ಅನಾಪತ್ತಿಪನ್ನರಸಕಾದಿಕಥಾವಣ್ಣನಾ • Anāpattipannarasakādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಫಾಸುವಿಹಾರಕಥಾದಿವಣ್ಣನಾ • Aphāsuvihārakathādivaṇṇanā
