| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
122. பவாரணாதா³னானுஜானநா
122. Pavāraṇādānānujānanā
213. அத² கோ² ப⁴க³வா பி⁴க்கூ² ஆமந்தேஸி – ‘‘ஸன்னிபதத², பி⁴க்க²வே. ஸங்கோ⁴ பவாரெஸ்ஸதீ’’தி. ஏவங் வுத்தே அஞ்ஞதரோ பி⁴க்கு² ப⁴க³வந்தங் ஏதத³வோச – ‘‘அத்தி², ப⁴ந்தே, பி⁴க்கு² கி³லானோ , ஸோ அனாக³தோ’’தி. அனுஜானாமி, பி⁴க்க²வே, கி³லானேன பி⁴க்கு²னா பவாரணங் தா³துங். ஏவஞ்ச பன, பி⁴க்க²வே, தா³தப்³பா³ – தேன கி³லானேன பி⁴க்கு²னா ஏகங் பி⁴க்கு²ங் உபஸங்கமித்வா ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘பவாரணங் த³ம்மி, பவாரணங் மே ஹர, பவாரணங் மே ஆரோசேஹி, மமத்தா²ய பவாரேஹீ’’தி காயேன விஞ்ஞாபேதி, வாசாய விஞ்ஞாபேதி, காயேன வாசாய விஞ்ஞாபேதி, தி³ன்னா ஹோதி பவாரணா; ந காயேன விஞ்ஞாபேதி, ந வாசாய விஞ்ஞாபேதி, ந காயேன வாசாய விஞ்ஞாபேதி, ந தி³ன்னா ஹோதி பவாரணா. ஏவஞ்சேதங் லபே⁴த², இச்சேதங் குஸலங். நோ சே லபே⁴த², ஸோ, பி⁴க்க²வே, கி³லானோ பி⁴க்கு² மஞ்சேன வா பீடே²ன வா ஸங்க⁴மஜ்ஜே² ஆனெத்வா பவாரேதப்³ப³ங். ஸசே, பி⁴க்க²வே, கி³லானுபட்டா²கானங் பி⁴க்கூ²னங் ஏதத³ஹோஸி – ‘‘ஸசே கோ² மயங் கி³லானங் டா²னா சாவெஸ்ஸாம, ஆபா³தோ⁴ வா அபி⁴வட்³டி⁴ஸ்ஸதி, காலங்கிரியா வா ப⁴விஸ்ஸதீ’’தி ந, பி⁴க்க²வே, கி³லானோ பி⁴க்கு² டா²னா சாவேதப்³போ³. ஸங்கே⁴ன தத்த² க³ந்த்வா பவாரேதப்³ப³ங்; ந த்வேவ வக்³கே³ன ஸங்கே⁴ன பவாரேதப்³ப³ங். பவாரெய்ய சே, ஆபத்தி து³க்கடஸ்ஸ.
213. Atha kho bhagavā bhikkhū āmantesi – ‘‘sannipatatha, bhikkhave. Saṅgho pavāressatī’’ti. Evaṃ vutte aññataro bhikkhu bhagavantaṃ etadavoca – ‘‘atthi, bhante, bhikkhu gilāno , so anāgato’’ti. Anujānāmi, bhikkhave, gilānena bhikkhunā pavāraṇaṃ dātuṃ. Evañca pana, bhikkhave, dātabbā – tena gilānena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘pavāraṇaṃ dammi, pavāraṇaṃ me hara, pavāraṇaṃ me ārocehi, mamatthāya pavārehī’’ti kāyena viññāpeti, vācāya viññāpeti, kāyena vācāya viññāpeti, dinnā hoti pavāraṇā; na kāyena viññāpeti, na vācāya viññāpeti, na kāyena vācāya viññāpeti, na dinnā hoti pavāraṇā. Evañcetaṃ labhetha, iccetaṃ kusalaṃ. No ce labhetha, so, bhikkhave, gilāno bhikkhu mañcena vā pīṭhena vā saṅghamajjhe ānetvā pavāretabbaṃ. Sace, bhikkhave, gilānupaṭṭhākānaṃ bhikkhūnaṃ etadahosi – ‘‘sace kho mayaṃ gilānaṃ ṭhānā cāvessāma, ābādho vā abhivaḍḍhissati, kālaṃkiriyā vā bhavissatī’’ti na, bhikkhave, gilāno bhikkhu ṭhānā cāvetabbo. Saṅghena tattha gantvā pavāretabbaṃ; na tveva vaggena saṅghena pavāretabbaṃ. Pavāreyya ce, āpatti dukkaṭassa.
பவாரணஹாரகோ 1 சே, பி⁴க்க²வே, தி³ன்னாய பவாரணாய தத்தே²வ பக்கமதி, அஞ்ஞஸ்ஸ தா³தப்³பா³ பவாரணா. பவாரணஹாரகோ சே, பி⁴க்க²வே, தி³ன்னாய பவாரணாய தத்தே²வ விப்³ப⁴மதி…பே॰… காலங்கரோதி… ஸாமணேரோ படிஜானாதி… ஸிக்க²ங் பச்சக்கா²தகோ படிஜானாதி… அந்திமவத்து²ங் அஜ்ஜா²பன்னகோ படிஜானாதி… உம்மத்தகோ படிஜானாதி… கி²த்தசித்தோ படிஜானாதி… வேத³னாட்டோ படிஜானாதி… ஆபத்தியா அத³ஸ்ஸனே உக்கி²த்தகோ படிஜானாதி… ஆபத்தியா அப்படிகம்மே உக்கி²த்தகோ படிஜானாதி… பாபிகாய தி³ட்டி²யா அப்படினிஸ்ஸக்³கே³ உக்கி²த்தகோ படிஜானாதி… பண்ட³கோ படிஜானாதி… தெ²ய்யஸங்வாஸகோ படிஜானாதி… தித்தி²யபக்கந்தகோ படிஜானாதி… திரச்சா²னக³தோ படிஜானாதி… மாதுகா⁴தகோ படிஜானாதி… பிதுகா⁴தகோ படிஜானாதி… அரஹந்தகா⁴தகோ படிஜானாதி… பி⁴க்கு²னிதூ³ஸகோ படிஜானாதி… ஸங்க⁴பே⁴த³கோ படிஜானாதி … லோஹிதுப்பாத³கோ படிஜானாதி… உப⁴தொப்³யஞ்ஜனகோ படிஜானாதி, அஞ்ஞஸ்ஸ தா³தப்³பா³ பவாரணா.
Pavāraṇahārako 2 ce, bhikkhave, dinnāya pavāraṇāya tattheva pakkamati, aññassa dātabbā pavāraṇā. Pavāraṇahārako ce, bhikkhave, dinnāya pavāraṇāya tattheva vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti … lohituppādako paṭijānāti… ubhatobyañjanako paṭijānāti, aññassa dātabbā pavāraṇā.
பவாரணஹாரகோ சே, பி⁴க்க²வே, தி³ன்னாய பவாரணாய அந்தராமக்³கே³ பக்கமதி, அனாஹடா ஹோதி பவாரணா. பவாரணஹாரகோ சே, பி⁴க்க²வே, தி³ன்னாய பவாரணாய அந்தராமக்³கே³ விப்³ப⁴மதி…பே॰… காலங்கரோதி… ஸாமணேரோ படிஜானாதி… ஸிக்க²ங் பச்சக்கா²தகோ படிஜானாதி… அந்திமவத்து²ங் அஜ்ஜா²பன்னகோ படிஜானாதி… உம்மத்தகோ படிஜானாதி… கி²த்தசித்தோ படிஜானாதி… வேத³னாட்டோ படிஜானாதி… ஆபத்தியா அத³ஸ்ஸனே உக்கி²த்தகோ படிஜானாதி… ஆபத்தியா அப்படிகம்மே உக்கி²த்தகோ படிஜானாதி… பாபிகாய தி³ட்டி²யா அப்படினிஸ்ஸக்³கே³ உக்கி²த்தகோ படிஜானாதி… பண்ட³கோ படிஜானாதி… தெ²ய்யஸங்வாஸகோ படிஜானாதி… தித்தி²யபக்கந்தகோ படிஜானாதி… திரச்சா²னக³தோ படிஜானாதி… மாதுகா⁴தகோ படிஜானாதி… பிதுகா⁴தகோ படிஜானாதி… அரஹந்தகா⁴தகோ படிஜானாதி… பி⁴க்கு²னிதூ³ஸகோ படிஜானாதி… ஸங்க⁴பே⁴த³கோ படிஜானாதி… லோஹிதுப்பாத³கோ படிஜானாதி… உப⁴தொப்³யஞ்ஜனகோ படிஜானாதி, அனாஹடா ஹோதி பவாரணா.
Pavāraṇahārako ce, bhikkhave, dinnāya pavāraṇāya antarāmagge pakkamati, anāhaṭā hoti pavāraṇā. Pavāraṇahārako ce, bhikkhave, dinnāya pavāraṇāya antarāmagge vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, anāhaṭā hoti pavāraṇā.
பவாரணஹாரகோ சே, பி⁴க்க²வே, தி³ன்னாய பவாரணாய ஸங்க⁴ப்பத்தோ பக்கமதி, ஆஹடா ஹோதி பவாரணா. பவாரணஹாரகோ சே, பி⁴க்க²வே, தி³ன்னாய பவாரணாய ஸங்க⁴ப்பத்தோ விப்³ப⁴மதி…பே॰… காலங்கரோதி… ஸாமணேரோ படிஜானாதி… ஸிக்க²ங் பச்சக்கா²தகோ படிஜானாதி… அந்திமவத்து²ங் அஜ்ஜா²பன்னகோ படிஜானாதி… உம்மத்தகோ படிஜானாதி… கி²த்தசித்தோ படிஜானாதி… வேத³னாட்டோ படிஜானாதி… ஆபத்தியா அத³ஸ்ஸனே உக்கி²த்தகோ படிஜானாதி… ஆபத்தியா அப்படிகம்மே உக்கி²த்தகோ படிஜானாதி… பாபிகாய தி³ட்டி²யா அப்படினிஸ்ஸக்³கே³ உக்கி²த்தகோ படிஜானாதி… பண்ட³கோ படிஜானாதி… தெ²ய்யஸங்வாஸகோ படிஜானாதி… தித்தி²யபக்கந்தகோ படிஜானாதி… திரச்சா²னக³தோ படிஜானாதி… மாதுகா⁴தகோ படிஜானாதி… பிதுகா⁴தகோ படிஜானாதி… அரஹந்தகா⁴தகோ படிஜானாதி… பி⁴க்கு²னிதூ³ஸகோ படிஜானாதி… ஸங்க⁴பே⁴த³கோ படிஜானாதி… லோஹிதுப்பாத³கோ படிஜானாதி… உப⁴தொப்³யஞ்ஜனகோ படிஜானாதி, ஆஹடா ஹோதி பவாரணா.
Pavāraṇahārako ce, bhikkhave, dinnāya pavāraṇāya saṅghappatto pakkamati, āhaṭā hoti pavāraṇā. Pavāraṇahārako ce, bhikkhave, dinnāya pavāraṇāya saṅghappatto vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, āhaṭā hoti pavāraṇā.
பவாரணஹாரகோ சே, பி⁴க்க²வே, தி³ன்னாய பவாரணாய ஸங்க⁴ப்பத்தோ ஸுத்தோ நாரோசேதி, ஆஹடா ஹோதி பவாரணா. பவாரணஹாரகஸ்ஸ அனாபத்தி . பவாரணஹாரகோ சே, பி⁴க்க²வே, தி³ன்னாய பவாரணாய ஸங்க⁴ப்பத்தோ பமத்தோ நாரோசேதி…பே॰… ஸமாபன்னோ நாரோசேதி, ஆஹடா ஹோதி பவாரணா. பவாரணஹாரகஸ்ஸ அனாபத்தி.
Pavāraṇahārako ce, bhikkhave, dinnāya pavāraṇāya saṅghappatto sutto nāroceti, āhaṭā hoti pavāraṇā. Pavāraṇahārakassa anāpatti . Pavāraṇahārako ce, bhikkhave, dinnāya pavāraṇāya saṅghappatto pamatto nāroceti…pe… samāpanno nāroceti, āhaṭā hoti pavāraṇā. Pavāraṇahārakassa anāpatti.
பவாரணஹாரகோ சே, பி⁴க்க²வே , தி³ன்னாய பவாரணாய ஸங்க⁴ப்பத்தோ ஸஞ்சிச்ச நாரோசேதி, ஆஹடா ஹோதி பவாரணா. பவாரணஹாரகஸ்ஸ ஆபத்தி து³க்கடஸ்ஸ. அனுஜானாமி, பி⁴க்க²வே, தத³ஹு பவாரணாய பவாரணங் தெ³ந்தேன ச²ந்த³ம்பி தா³துங், ஸந்தி ஸங்க⁴ஸ்ஸ கரணீயந்தி.
Pavāraṇahārako ce, bhikkhave , dinnāya pavāraṇāya saṅghappatto sañcicca nāroceti, āhaṭā hoti pavāraṇā. Pavāraṇahārakassa āpatti dukkaṭassa. Anujānāmi, bhikkhave, tadahu pavāraṇāya pavāraṇaṃ dentena chandampi dātuṃ, santi saṅghassa karaṇīyanti.
பவாரணாதா³னானுஜானநா நிட்டி²தா.
Pavāraṇādānānujānanā niṭṭhitā.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பவாரணாதா³னானுஜானநகதா² • Pavāraṇādānānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பவாரணாதா³னானுஜானநகதா²வண்ணனா • Pavāraṇādānānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பவாரணாதா³னானுஜானநகதா²வண்ணனா • Pavāraṇādānānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அபா²ஸுவிஹாரகதா²தி³வண்ணனா • Aphāsuvihārakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 121. பவாரணாபே⁴த³கதா² • 121. Pavāraṇābhedakathā
