| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১২২. পৰারণাদানানুজাননা
122. Pavāraṇādānānujānanā
২১৩. অথ খো ভগৰা ভিক্খূ আমন্তেসি – ‘‘সন্নিপতথ, ভিক্খৰে। সঙ্ঘো পৰারেস্সতী’’তি। এৰং ৰুত্তে অঞ্ঞতরো ভিক্খু ভগৰন্তং এতদৰোচ – ‘‘অত্থি, ভন্তে, ভিক্খু গিলানো , সো অনাগতো’’তি। অনুজানামি, ভিক্খৰে, গিলানেন ভিক্খুনা পৰারণং দাতুং। এৰঞ্চ পন, ভিক্খৰে, দাতব্বা – তেন গিলানেন ভিক্খুনা একং ভিক্খুং উপসঙ্কমিত্ৰা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘পৰারণং দম্মি, পৰারণং মে হর, পৰারণং মে আরোচেহি, মমত্থায পৰারেহী’’তি কাযেন ৰিঞ্ঞাপেতি, ৰাচায ৰিঞ্ঞাপেতি, কাযেন ৰাচায ৰিঞ্ঞাপেতি, দিন্না হোতি পৰারণা; ন কাযেন ৰিঞ্ঞাপেতি, ন ৰাচায ৰিঞ্ঞাপেতি, ন কাযেন ৰাচায ৰিঞ্ঞাপেতি, ন দিন্না হোতি পৰারণা। এৰঞ্চেতং লভেথ, ইচ্চেতং কুসলং। নো চে লভেথ, সো, ভিক্খৰে, গিলানো ভিক্খু মঞ্চেন ৰা পীঠেন ৰা সঙ্ঘমজ্ঝে আনেত্ৰা পৰারেতব্বং। সচে, ভিক্খৰে, গিলানুপট্ঠাকানং ভিক্খূনং এতদহোসি – ‘‘সচে খো মযং গিলানং ঠানা চাৰেস্সাম, আবাধো ৰা অভিৰড্ঢিস্সতি, কালংকিরিযা ৰা ভৰিস্সতী’’তি ন, ভিক্খৰে, গিলানো ভিক্খু ঠানা চাৰেতব্বো। সঙ্ঘেন তত্থ গন্ত্ৰা পৰারেতব্বং; ন ত্ৰেৰ ৰগ্গেন সঙ্ঘেন পৰারেতব্বং। পৰারেয্য চে, আপত্তি দুক্কটস্স।
213. Atha kho bhagavā bhikkhū āmantesi – ‘‘sannipatatha, bhikkhave. Saṅgho pavāressatī’’ti. Evaṃ vutte aññataro bhikkhu bhagavantaṃ etadavoca – ‘‘atthi, bhante, bhikkhu gilāno , so anāgato’’ti. Anujānāmi, bhikkhave, gilānena bhikkhunā pavāraṇaṃ dātuṃ. Evañca pana, bhikkhave, dātabbā – tena gilānena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘pavāraṇaṃ dammi, pavāraṇaṃ me hara, pavāraṇaṃ me ārocehi, mamatthāya pavārehī’’ti kāyena viññāpeti, vācāya viññāpeti, kāyena vācāya viññāpeti, dinnā hoti pavāraṇā; na kāyena viññāpeti, na vācāya viññāpeti, na kāyena vācāya viññāpeti, na dinnā hoti pavāraṇā. Evañcetaṃ labhetha, iccetaṃ kusalaṃ. No ce labhetha, so, bhikkhave, gilāno bhikkhu mañcena vā pīṭhena vā saṅghamajjhe ānetvā pavāretabbaṃ. Sace, bhikkhave, gilānupaṭṭhākānaṃ bhikkhūnaṃ etadahosi – ‘‘sace kho mayaṃ gilānaṃ ṭhānā cāvessāma, ābādho vā abhivaḍḍhissati, kālaṃkiriyā vā bhavissatī’’ti na, bhikkhave, gilāno bhikkhu ṭhānā cāvetabbo. Saṅghena tattha gantvā pavāretabbaṃ; na tveva vaggena saṅghena pavāretabbaṃ. Pavāreyya ce, āpatti dukkaṭassa.
পৰারণহারকো 1 চে, ভিক্খৰে, দিন্নায পৰারণায তত্থেৰ পক্কমতি, অঞ্ঞস্স দাতব্বা পৰারণা। পৰারণহারকো চে, ভিক্খৰে, দিন্নায পৰারণায তত্থেৰ ৰিব্ভমতি…পে॰… কালংকরোতি… সামণেরো পটিজানাতি… সিক্খং পচ্চক্খাতকো পটিজানাতি… অন্তিমৰত্থুং অজ্ঝাপন্নকো পটিজানাতি… উম্মত্তকো পটিজানাতি… খিত্তচিত্তো পটিজানাতি… ৰেদনাট্টো পটিজানাতি… আপত্তিযা অদস্সনে উক্খিত্তকো পটিজানাতি… আপত্তিযা অপ্পটিকম্মে উক্খিত্তকো পটিজানাতি… পাপিকায দিট্ঠিযা অপ্পটিনিস্সগ্গে উক্খিত্তকো পটিজানাতি… পণ্ডকো পটিজানাতি… থেয্যসংৰাসকো পটিজানাতি… তিত্থিযপক্কন্তকো পটিজানাতি… তিরচ্ছানগতো পটিজানাতি… মাতুঘাতকো পটিজানাতি… পিতুঘাতকো পটিজানাতি… অরহন্তঘাতকো পটিজানাতি… ভিক্খুনিদূসকো পটিজানাতি… সঙ্ঘভেদকো পটিজানাতি … লোহিতুপ্পাদকো পটিজানাতি… উভতোব্যঞ্জনকো পটিজানাতি, অঞ্ঞস্স দাতব্বা পৰারণা।
Pavāraṇahārako 2 ce, bhikkhave, dinnāya pavāraṇāya tattheva pakkamati, aññassa dātabbā pavāraṇā. Pavāraṇahārako ce, bhikkhave, dinnāya pavāraṇāya tattheva vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti … lohituppādako paṭijānāti… ubhatobyañjanako paṭijānāti, aññassa dātabbā pavāraṇā.
পৰারণহারকো চে, ভিক্খৰে, দিন্নায পৰারণায অন্তরামগ্গে পক্কমতি, অনাহটা হোতি পৰারণা। পৰারণহারকো চে, ভিক্খৰে, দিন্নায পৰারণায অন্তরামগ্গে ৰিব্ভমতি…পে॰… কালংকরোতি… সামণেরো পটিজানাতি… সিক্খং পচ্চক্খাতকো পটিজানাতি… অন্তিমৰত্থুং অজ্ঝাপন্নকো পটিজানাতি… উম্মত্তকো পটিজানাতি… খিত্তচিত্তো পটিজানাতি… ৰেদনাট্টো পটিজানাতি… আপত্তিযা অদস্সনে উক্খিত্তকো পটিজানাতি… আপত্তিযা অপ্পটিকম্মে উক্খিত্তকো পটিজানাতি… পাপিকায দিট্ঠিযা অপ্পটিনিস্সগ্গে উক্খিত্তকো পটিজানাতি… পণ্ডকো পটিজানাতি… থেয্যসংৰাসকো পটিজানাতি… তিত্থিযপক্কন্তকো পটিজানাতি… তিরচ্ছানগতো পটিজানাতি… মাতুঘাতকো পটিজানাতি… পিতুঘাতকো পটিজানাতি… অরহন্তঘাতকো পটিজানাতি… ভিক্খুনিদূসকো পটিজানাতি… সঙ্ঘভেদকো পটিজানাতি… লোহিতুপ্পাদকো পটিজানাতি… উভতোব্যঞ্জনকো পটিজানাতি, অনাহটা হোতি পৰারণা।
Pavāraṇahārako ce, bhikkhave, dinnāya pavāraṇāya antarāmagge pakkamati, anāhaṭā hoti pavāraṇā. Pavāraṇahārako ce, bhikkhave, dinnāya pavāraṇāya antarāmagge vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, anāhaṭā hoti pavāraṇā.
পৰারণহারকো চে, ভিক্খৰে, দিন্নায পৰারণায সঙ্ঘপ্পত্তো পক্কমতি, আহটা হোতি পৰারণা। পৰারণহারকো চে, ভিক্খৰে, দিন্নায পৰারণায সঙ্ঘপ্পত্তো ৰিব্ভমতি…পে॰… কালংকরোতি… সামণেরো পটিজানাতি… সিক্খং পচ্চক্খাতকো পটিজানাতি… অন্তিমৰত্থুং অজ্ঝাপন্নকো পটিজানাতি… উম্মত্তকো পটিজানাতি… খিত্তচিত্তো পটিজানাতি… ৰেদনাট্টো পটিজানাতি… আপত্তিযা অদস্সনে উক্খিত্তকো পটিজানাতি… আপত্তিযা অপ্পটিকম্মে উক্খিত্তকো পটিজানাতি… পাপিকায দিট্ঠিযা অপ্পটিনিস্সগ্গে উক্খিত্তকো পটিজানাতি… পণ্ডকো পটিজানাতি… থেয্যসংৰাসকো পটিজানাতি… তিত্থিযপক্কন্তকো পটিজানাতি… তিরচ্ছানগতো পটিজানাতি… মাতুঘাতকো পটিজানাতি… পিতুঘাতকো পটিজানাতি… অরহন্তঘাতকো পটিজানাতি… ভিক্খুনিদূসকো পটিজানাতি… সঙ্ঘভেদকো পটিজানাতি… লোহিতুপ্পাদকো পটিজানাতি… উভতোব্যঞ্জনকো পটিজানাতি, আহটা হোতি পৰারণা।
Pavāraṇahārako ce, bhikkhave, dinnāya pavāraṇāya saṅghappatto pakkamati, āhaṭā hoti pavāraṇā. Pavāraṇahārako ce, bhikkhave, dinnāya pavāraṇāya saṅghappatto vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, āhaṭā hoti pavāraṇā.
পৰারণহারকো চে, ভিক্খৰে, দিন্নায পৰারণায সঙ্ঘপ্পত্তো সুত্তো নারোচেতি, আহটা হোতি পৰারণা। পৰারণহারকস্স অনাপত্তি । পৰারণহারকো চে, ভিক্খৰে, দিন্নায পৰারণায সঙ্ঘপ্পত্তো পমত্তো নারোচেতি…পে॰… সমাপন্নো নারোচেতি, আহটা হোতি পৰারণা। পৰারণহারকস্স অনাপত্তি।
Pavāraṇahārako ce, bhikkhave, dinnāya pavāraṇāya saṅghappatto sutto nāroceti, āhaṭā hoti pavāraṇā. Pavāraṇahārakassa anāpatti . Pavāraṇahārako ce, bhikkhave, dinnāya pavāraṇāya saṅghappatto pamatto nāroceti…pe… samāpanno nāroceti, āhaṭā hoti pavāraṇā. Pavāraṇahārakassa anāpatti.
পৰারণহারকো চে, ভিক্খৰে , দিন্নায পৰারণায সঙ্ঘপ্পত্তো সঞ্চিচ্চ নারোচেতি, আহটা হোতি পৰারণা। পৰারণহারকস্স আপত্তি দুক্কটস্স। অনুজানামি, ভিক্খৰে, তদহু পৰারণায পৰারণং দেন্তেন ছন্দম্পি দাতুং, সন্তি সঙ্ঘস্স করণীযন্তি।
Pavāraṇahārako ce, bhikkhave , dinnāya pavāraṇāya saṅghappatto sañcicca nāroceti, āhaṭā hoti pavāraṇā. Pavāraṇahārakassa āpatti dukkaṭassa. Anujānāmi, bhikkhave, tadahu pavāraṇāya pavāraṇaṃ dentena chandampi dātuṃ, santi saṅghassa karaṇīyanti.
পৰারণাদানানুজাননা নিট্ঠিতা।
Pavāraṇādānānujānanā niṭṭhitā.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পৰারণাদানানুজাননকথা • Pavāraṇādānānujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পৰারণাদানানুজাননকথাৰণ্ণনা • Pavāraṇādānānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পৰারণাদানানুজাননকথাৰণ্ণনা • Pavāraṇādānānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অফাসুৰিহারকথাদিৰণ্ণনা • Aphāsuvihārakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১২১. পৰারণাভেদকথা • 121. Pavāraṇābhedakathā
