| Library / Tipiṭaka / ติปิฎก • Tipiṭaka / มหาวคฺคปาฬิ • Mahāvaggapāḷi |
๑๒๒. ปวารณาทานานุชานนา
122. Pavāraṇādānānujānanā
๒๑๓. อถ โข ภควา ภิกฺขู อามเนฺตสิ – ‘‘สนฺนิปตถ, ภิกฺขเวฯ สโงฺฆ ปวาเรสฺสตี’’ติฯ เอวํ วุเตฺต อญฺญตโร ภิกฺขุ ภควนฺตํ เอตทโวจ – ‘‘อตฺถิ, ภเนฺต, ภิกฺขุ คิลาโน , โส อนาคโต’’ติฯ อนุชานามิ, ภิกฺขเว, คิลาเนน ภิกฺขุนา ปวารณํ ทาตุํฯ เอวญฺจ ปน, ภิกฺขเว, ทาตพฺพา – เตน คิลาเนน ภิกฺขุนา เอกํ ภิกฺขุํ อุปสงฺกมิตฺวา เอกํสํ อุตฺตราสงฺคํ กริตฺวา อุกฺกุฎิกํ นิสีทิตฺวา อญฺชลิํ ปคฺคเหตฺวา เอวมสฺส วจนีโย – ‘‘ปวารณํ ทมฺมิ, ปวารณํ เม หร, ปวารณํ เม อาโรเจหิ, มมตฺถาย ปวาเรหี’’ติ กาเยน วิญฺญาเปติ, วาจาย วิญฺญาเปติ, กาเยน วาจาย วิญฺญาเปติ, ทินฺนา โหติ ปวารณา; น กาเยน วิญฺญาเปติ, น วาจาย วิญฺญาเปติ, น กาเยน วาจาย วิญฺญาเปติ, น ทินฺนา โหติ ปวารณาฯ เอวเญฺจตํ ลเภถ, อิเจฺจตํ กุสลํฯ โน เจ ลเภถ, โส, ภิกฺขเว, คิลาโน ภิกฺขุ มเญฺจน วา ปีเฐน วา สงฺฆมเชฺฌ อาเนตฺวา ปวาเรตพฺพํฯ สเจ, ภิกฺขเว, คิลานุปฎฺฐากานํ ภิกฺขูนํ เอตทโหสิ – ‘‘สเจ โข มยํ คิลานํ ฐานา จาเวสฺสาม, อาพาโธ วา อภิวฑฺฒิสฺสติ, กาลํกิริยา วา ภวิสฺสตี’’ติ น, ภิกฺขเว, คิลาโน ภิกฺขุ ฐานา จาเวตโพฺพฯ สเงฺฆน ตตฺถ คนฺตฺวา ปวาเรตพฺพํ; น เตฺวว วเคฺคน สเงฺฆน ปวาเรตพฺพํฯ ปวาเรยฺย เจ, อาปตฺติ ทุกฺกฎสฺสฯ
213. Atha kho bhagavā bhikkhū āmantesi – ‘‘sannipatatha, bhikkhave. Saṅgho pavāressatī’’ti. Evaṃ vutte aññataro bhikkhu bhagavantaṃ etadavoca – ‘‘atthi, bhante, bhikkhu gilāno , so anāgato’’ti. Anujānāmi, bhikkhave, gilānena bhikkhunā pavāraṇaṃ dātuṃ. Evañca pana, bhikkhave, dātabbā – tena gilānena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘pavāraṇaṃ dammi, pavāraṇaṃ me hara, pavāraṇaṃ me ārocehi, mamatthāya pavārehī’’ti kāyena viññāpeti, vācāya viññāpeti, kāyena vācāya viññāpeti, dinnā hoti pavāraṇā; na kāyena viññāpeti, na vācāya viññāpeti, na kāyena vācāya viññāpeti, na dinnā hoti pavāraṇā. Evañcetaṃ labhetha, iccetaṃ kusalaṃ. No ce labhetha, so, bhikkhave, gilāno bhikkhu mañcena vā pīṭhena vā saṅghamajjhe ānetvā pavāretabbaṃ. Sace, bhikkhave, gilānupaṭṭhākānaṃ bhikkhūnaṃ etadahosi – ‘‘sace kho mayaṃ gilānaṃ ṭhānā cāvessāma, ābādho vā abhivaḍḍhissati, kālaṃkiriyā vā bhavissatī’’ti na, bhikkhave, gilāno bhikkhu ṭhānā cāvetabbo. Saṅghena tattha gantvā pavāretabbaṃ; na tveva vaggena saṅghena pavāretabbaṃ. Pavāreyya ce, āpatti dukkaṭassa.
ปวารณหารโก 1 เจ, ภิกฺขเว, ทินฺนาย ปวารณาย ตเตฺถว ปกฺกมติ, อญฺญสฺส ทาตพฺพา ปวารณาฯ ปวารณหารโก เจ, ภิกฺขเว, ทินฺนาย ปวารณาย ตเตฺถว วิพฺภมติ…เป.… กาลํกโรติ… สามเณโร ปฎิชานาติ… สิกฺขํ ปจฺจกฺขาตโก ปฎิชานาติ… อนฺติมวตฺถุํ อชฺฌาปนฺนโก ปฎิชานาติ… อุมฺมตฺตโก ปฎิชานาติ… ขิตฺตจิโตฺต ปฎิชานาติ… เวทนาโฎฺฎ ปฎิชานาติ… อาปตฺติยา อทสฺสเน อุกฺขิตฺตโก ปฎิชานาติ… อาปตฺติยา อปฺปฎิกเมฺม อุกฺขิตฺตโก ปฎิชานาติ… ปาปิกาย ทิฎฺฐิยา อปฺปฎินิสฺสเคฺค อุกฺขิตฺตโก ปฎิชานาติ… ปณฺฑโก ปฎิชานาติ… เถยฺยสํวาสโก ปฎิชานาติ… ติตฺถิยปกฺกนฺตโก ปฎิชานาติ… ติรจฺฉานคโต ปฎิชานาติ… มาตุฆาตโก ปฎิชานาติ… ปิตุฆาตโก ปฎิชานาติ… อรหนฺตฆาตโก ปฎิชานาติ… ภิกฺขุนิทูสโก ปฎิชานาติ… สงฺฆเภทโก ปฎิชานาติ … โลหิตุปฺปาทโก ปฎิชานาติ… อุภโตพฺยญฺชนโก ปฎิชานาติ, อญฺญสฺส ทาตพฺพา ปวารณาฯ
Pavāraṇahārako 2 ce, bhikkhave, dinnāya pavāraṇāya tattheva pakkamati, aññassa dātabbā pavāraṇā. Pavāraṇahārako ce, bhikkhave, dinnāya pavāraṇāya tattheva vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti … lohituppādako paṭijānāti… ubhatobyañjanako paṭijānāti, aññassa dātabbā pavāraṇā.
ปวารณหารโก เจ, ภิกฺขเว, ทินฺนาย ปวารณาย อนฺตรามเคฺค ปกฺกมติ, อนาหฎา โหติ ปวารณาฯ ปวารณหารโก เจ, ภิกฺขเว, ทินฺนาย ปวารณาย อนฺตรามเคฺค วิพฺภมติ…เป.… กาลํกโรติ… สามเณโร ปฎิชานาติ… สิกฺขํ ปจฺจกฺขาตโก ปฎิชานาติ… อนฺติมวตฺถุํ อชฺฌาปนฺนโก ปฎิชานาติ… อุมฺมตฺตโก ปฎิชานาติ… ขิตฺตจิโตฺต ปฎิชานาติ… เวทนาโฎฺฎ ปฎิชานาติ… อาปตฺติยา อทสฺสเน อุกฺขิตฺตโก ปฎิชานาติ… อาปตฺติยา อปฺปฎิกเมฺม อุกฺขิตฺตโก ปฎิชานาติ… ปาปิกาย ทิฎฺฐิยา อปฺปฎินิสฺสเคฺค อุกฺขิตฺตโก ปฎิชานาติ… ปณฺฑโก ปฎิชานาติ… เถยฺยสํวาสโก ปฎิชานาติ… ติตฺถิยปกฺกนฺตโก ปฎิชานาติ… ติรจฺฉานคโต ปฎิชานาติ… มาตุฆาตโก ปฎิชานาติ… ปิตุฆาตโก ปฎิชานาติ… อรหนฺตฆาตโก ปฎิชานาติ… ภิกฺขุนิทูสโก ปฎิชานาติ… สงฺฆเภทโก ปฎิชานาติ… โลหิตุปฺปาทโก ปฎิชานาติ… อุภโตพฺยญฺชนโก ปฎิชานาติ, อนาหฎา โหติ ปวารณาฯ
Pavāraṇahārako ce, bhikkhave, dinnāya pavāraṇāya antarāmagge pakkamati, anāhaṭā hoti pavāraṇā. Pavāraṇahārako ce, bhikkhave, dinnāya pavāraṇāya antarāmagge vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, anāhaṭā hoti pavāraṇā.
ปวารณหารโก เจ, ภิกฺขเว, ทินฺนาย ปวารณาย สงฺฆปฺปโตฺต ปกฺกมติ, อาหฎา โหติ ปวารณาฯ ปวารณหารโก เจ, ภิกฺขเว, ทินฺนาย ปวารณาย สงฺฆปฺปโตฺต วิพฺภมติ…เป.… กาลํกโรติ… สามเณโร ปฎิชานาติ… สิกฺขํ ปจฺจกฺขาตโก ปฎิชานาติ… อนฺติมวตฺถุํ อชฺฌาปนฺนโก ปฎิชานาติ… อุมฺมตฺตโก ปฎิชานาติ… ขิตฺตจิโตฺต ปฎิชานาติ… เวทนาโฎฺฎ ปฎิชานาติ… อาปตฺติยา อทสฺสเน อุกฺขิตฺตโก ปฎิชานาติ… อาปตฺติยา อปฺปฎิกเมฺม อุกฺขิตฺตโก ปฎิชานาติ… ปาปิกาย ทิฎฺฐิยา อปฺปฎินิสฺสเคฺค อุกฺขิตฺตโก ปฎิชานาติ… ปณฺฑโก ปฎิชานาติ… เถยฺยสํวาสโก ปฎิชานาติ… ติตฺถิยปกฺกนฺตโก ปฎิชานาติ… ติรจฺฉานคโต ปฎิชานาติ… มาตุฆาตโก ปฎิชานาติ… ปิตุฆาตโก ปฎิชานาติ… อรหนฺตฆาตโก ปฎิชานาติ… ภิกฺขุนิทูสโก ปฎิชานาติ… สงฺฆเภทโก ปฎิชานาติ… โลหิตุปฺปาทโก ปฎิชานาติ… อุภโตพฺยญฺชนโก ปฎิชานาติ, อาหฎา โหติ ปวารณาฯ
Pavāraṇahārako ce, bhikkhave, dinnāya pavāraṇāya saṅghappatto pakkamati, āhaṭā hoti pavāraṇā. Pavāraṇahārako ce, bhikkhave, dinnāya pavāraṇāya saṅghappatto vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, āhaṭā hoti pavāraṇā.
ปวารณหารโก เจ, ภิกฺขเว, ทินฺนาย ปวารณาย สงฺฆปฺปโตฺต สุโตฺต นาโรเจติ, อาหฎา โหติ ปวารณาฯ ปวารณหารกสฺส อนาปตฺติ ฯ ปวารณหารโก เจ, ภิกฺขเว, ทินฺนาย ปวารณาย สงฺฆปฺปโตฺต ปมโตฺต นาโรเจติ…เป.… สมาปโนฺน นาโรเจติ, อาหฎา โหติ ปวารณาฯ ปวารณหารกสฺส อนาปตฺติฯ
Pavāraṇahārako ce, bhikkhave, dinnāya pavāraṇāya saṅghappatto sutto nāroceti, āhaṭā hoti pavāraṇā. Pavāraṇahārakassa anāpatti . Pavāraṇahārako ce, bhikkhave, dinnāya pavāraṇāya saṅghappatto pamatto nāroceti…pe… samāpanno nāroceti, āhaṭā hoti pavāraṇā. Pavāraṇahārakassa anāpatti.
ปวารณหารโก เจ, ภิกฺขเว , ทินฺนาย ปวารณาย สงฺฆปฺปโตฺต สญฺจิจฺจ นาโรเจติ, อาหฎา โหติ ปวารณาฯ ปวารณหารกสฺส อาปตฺติ ทุกฺกฎสฺสฯ อนุชานามิ, ภิกฺขเว, ตทหุ ปวารณาย ปวารณํ เทเนฺตน ฉนฺทมฺปิ ทาตุํ, สนฺติ สงฺฆสฺส กรณียนฺติฯ
Pavāraṇahārako ce, bhikkhave , dinnāya pavāraṇāya saṅghappatto sañcicca nāroceti, āhaṭā hoti pavāraṇā. Pavāraṇahārakassa āpatti dukkaṭassa. Anujānāmi, bhikkhave, tadahu pavāraṇāya pavāraṇaṃ dentena chandampi dātuṃ, santi saṅghassa karaṇīyanti.
ปวารณาทานานุชานนา นิฎฺฐิตาฯ
Pavāraṇādānānujānanā niṭṭhitā.
Footnotes:
Related texts:
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / ปวารณาทานานุชานนกถา • Pavāraṇādānānujānanakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ปวารณาทานานุชานนกถาวณฺณนา • Pavāraṇādānānujānanakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ปวารณาทานานุชานนกถาวณฺณนา • Pavāraṇādānānujānanakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / อผาสุวิหารกถาทิวณฺณนา • Aphāsuvihārakathādivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ๑๒๑. ปวารณาเภทกถา • 121. Pavāraṇābhedakathā
