| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၂၂. ပဝာရဏာဒာနာနုဇာနနာ
122. Pavāraṇādānānujānanā
၂၁၃. အထ ခော ဘဂဝာ ဘိက္ခူ အာမန္တေသိ – ‘‘သန္နိပတထ, ဘိက္ခဝေ။ သင္ဃော ပဝာရေသ္သတီ’’တိ။ ဧဝံ ဝုတ္တေ အညတရော ဘိက္ခု ဘဂဝန္တံ ဧတဒဝောစ – ‘‘အတ္ထိ, ဘန္တေ, ဘိက္ခု ဂိလာနော , သော အနာဂတော’’တိ။ အနုဇာနာမိ, ဘိက္ခဝေ, ဂိလာနေန ဘိက္ခုနာ ပဝာရဏံ ဒာတုံ။ ဧဝဉ္စ ပန, ဘိက္ခဝေ, ဒာတဗ္ဗာ – တေန ဂိလာနေန ဘိက္ခုနာ ဧကံ ဘိက္ခုံ ဥပသင္ကမိတ္ဝာ ဧကံသံ ဥတ္တရာသင္ဂံ ကရိတ္ဝာ ဥက္ကုဋိကံ နိသီဒိတ္ဝာ အဉ္ဇလိံ ပဂ္ဂဟေတ္ဝာ ဧဝမသ္သ ဝစနီယော – ‘‘ပဝာရဏံ ဒမ္မိ, ပဝာရဏံ မေ ဟရ, ပဝာရဏံ မေ အာရောစေဟိ, မမတ္ထာယ ပဝာရေဟီ’’တိ ကာယေန ဝိညာပေတိ, ဝာစာယ ဝိညာပေတိ, ကာယေန ဝာစာယ ဝိညာပေတိ, ဒိန္နာ ဟောတိ ပဝာရဏာ; န ကာယေန ဝိညာပေတိ, န ဝာစာယ ဝိညာပေတိ, န ကာယေန ဝာစာယ ဝိညာပေတိ, န ဒိန္နာ ဟောတိ ပဝာရဏာ။ ဧဝဉ္စေတံ လဘေထ, ဣစ္စေတံ ကုသလံ။ နော စေ လဘေထ, သော, ဘိက္ခဝေ, ဂိလာနော ဘိက္ခု မဉ္စေန ဝာ ပီဌေန ဝာ သင္ဃမဇ္ဈေ အာနေတ္ဝာ ပဝာရေတဗ္ဗံ။ သစေ, ဘိက္ခဝေ, ဂိလာနုပဋ္ဌာကာနံ ဘိက္ခူနံ ဧတဒဟောသိ – ‘‘သစေ ခော မယံ ဂိလာနံ ဌာနာ စာဝေသ္သာမ, အာဗာဓော ဝာ အဘိဝဍ္ဎိသ္သတိ, ကာလံကိရိယာ ဝာ ဘဝိသ္သတီ’’တိ န, ဘိက္ခဝေ, ဂိလာနော ဘိက္ခု ဌာနာ စာဝေတဗ္ဗော။ သင္ဃေန တတ္ထ ဂန္တ္ဝာ ပဝာရေတဗ္ဗံ; န တ္ဝေဝ ဝဂ္ဂေန သင္ဃေန ပဝာရေတဗ္ဗံ။ ပဝာရေယ္ယ စေ, အာပတ္တိ ဒုက္ကဋသ္သ။
213. Atha kho bhagavā bhikkhū āmantesi – ‘‘sannipatatha, bhikkhave. Saṅgho pavāressatī’’ti. Evaṃ vutte aññataro bhikkhu bhagavantaṃ etadavoca – ‘‘atthi, bhante, bhikkhu gilāno , so anāgato’’ti. Anujānāmi, bhikkhave, gilānena bhikkhunā pavāraṇaṃ dātuṃ. Evañca pana, bhikkhave, dātabbā – tena gilānena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘pavāraṇaṃ dammi, pavāraṇaṃ me hara, pavāraṇaṃ me ārocehi, mamatthāya pavārehī’’ti kāyena viññāpeti, vācāya viññāpeti, kāyena vācāya viññāpeti, dinnā hoti pavāraṇā; na kāyena viññāpeti, na vācāya viññāpeti, na kāyena vācāya viññāpeti, na dinnā hoti pavāraṇā. Evañcetaṃ labhetha, iccetaṃ kusalaṃ. No ce labhetha, so, bhikkhave, gilāno bhikkhu mañcena vā pīṭhena vā saṅghamajjhe ānetvā pavāretabbaṃ. Sace, bhikkhave, gilānupaṭṭhākānaṃ bhikkhūnaṃ etadahosi – ‘‘sace kho mayaṃ gilānaṃ ṭhānā cāvessāma, ābādho vā abhivaḍḍhissati, kālaṃkiriyā vā bhavissatī’’ti na, bhikkhave, gilāno bhikkhu ṭhānā cāvetabbo. Saṅghena tattha gantvā pavāretabbaṃ; na tveva vaggena saṅghena pavāretabbaṃ. Pavāreyya ce, āpatti dukkaṭassa.
ပဝာရဏဟာရကော 1 စေ, ဘိက္ခဝေ, ဒိန္နာယ ပဝာရဏာယ တတ္ထေဝ ပက္ကမတိ, အညသ္သ ဒာတဗ္ဗာ ပဝာရဏာ။ ပဝာရဏဟာရကော စေ, ဘိက္ခဝေ, ဒိန္နာယ ပဝာရဏာယ တတ္ထေဝ ဝိဗ္ဘမတိ။ပေ.။ ကာလံကရောတိ။ သာမဏေရော ပဋိဇာနာတိ။ သိက္ခံ ပစ္စက္ခာတကော ပဋိဇာနာတိ။ အန္တိမဝတ္ထုံ အဇ္ဈာပန္နကော ပဋိဇာနာတိ။ ဥမ္မတ္တကော ပဋိဇာနာတိ။ ခိတ္တစိတ္တော ပဋိဇာနာတိ။ ဝေဒနာဋ္ဋော ပဋိဇာနာတိ။ အာပတ္တိယာ အဒသ္သနေ ဥက္ခိတ္တကော ပဋိဇာနာတိ။ အာပတ္တိယာ အပ္ပဋိကမ္မေ ဥက္ခိတ္တကော ပဋိဇာနာတိ။ ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခိတ္တကော ပဋိဇာနာတိ။ ပဏ္ဍကော ပဋိဇာနာတိ။ ထေယ္ယသံဝာသကော ပဋိဇာနာတိ။ တိတ္ထိယပက္ကန္တကော ပဋိဇာနာတိ။ တိရစ္ဆာနဂတော ပဋိဇာနာတိ။ မာတုဃာတကော ပဋိဇာနာတိ။ ပိတုဃာတကော ပဋိဇာနာတိ။ အရဟန္တဃာတကော ပဋိဇာနာတိ။ ဘိက္ခုနိဒူသကော ပဋိဇာနာတိ။ သင္ဃဘေဒကော ပဋိဇာနာတိ ။ လောဟိတုပ္ပာဒကော ပဋိဇာနာတိ။ ဥဘတောဗ္ယဉ္ဇနကော ပဋိဇာနာတိ, အညသ္သ ဒာတဗ္ဗာ ပဝာရဏာ။
Pavāraṇahārako 2 ce, bhikkhave, dinnāya pavāraṇāya tattheva pakkamati, aññassa dātabbā pavāraṇā. Pavāraṇahārako ce, bhikkhave, dinnāya pavāraṇāya tattheva vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti … lohituppādako paṭijānāti… ubhatobyañjanako paṭijānāti, aññassa dātabbā pavāraṇā.
ပဝာရဏဟာရကော စေ, ဘိက္ခဝေ, ဒိန္နာယ ပဝာရဏာယ အန္တရာမဂ္ဂေ ပက္ကမတိ, အနာဟဋာ ဟောတိ ပဝာရဏာ။ ပဝာရဏဟာရကော စေ, ဘိက္ခဝေ, ဒိန္နာယ ပဝာရဏာယ အန္တရာမဂ္ဂေ ဝိဗ္ဘမတိ။ပေ.။ ကာလံကရောတိ။ သာမဏေရော ပဋိဇာနာတိ။ သိက္ခံ ပစ္စက္ခာတကော ပဋိဇာနာတိ။ အန္တိမဝတ္ထုံ အဇ္ဈာပန္နကော ပဋိဇာနာတိ။ ဥမ္မတ္တကော ပဋိဇာနာတိ။ ခိတ္တစိတ္တော ပဋိဇာနာတိ။ ဝေဒနာဋ္ဋော ပဋိဇာနာတိ။ အာပတ္တိယာ အဒသ္သနေ ဥက္ခိတ္တကော ပဋိဇာနာတိ။ အာပတ္တိယာ အပ္ပဋိကမ္မေ ဥက္ခိတ္တကော ပဋိဇာနာတိ။ ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခိတ္တကော ပဋိဇာနာတိ။ ပဏ္ဍကော ပဋိဇာနာတိ။ ထေယ္ယသံဝာသကော ပဋိဇာနာတိ။ တိတ္ထိယပက္ကန္တကော ပဋိဇာနာတိ။ တိရစ္ဆာနဂတော ပဋိဇာနာတိ။ မာတုဃာတကော ပဋိဇာနာတိ။ ပိတုဃာတကော ပဋိဇာနာတိ။ အရဟန္တဃာတကော ပဋိဇာနာတိ။ ဘိက္ခုနိဒူသကော ပဋိဇာနာတိ။ သင္ဃဘေဒကော ပဋိဇာနာတိ။ လောဟိတုပ္ပာဒကော ပဋိဇာနာတိ။ ဥဘတောဗ္ယဉ္ဇနကော ပဋိဇာနာတိ, အနာဟဋာ ဟောတိ ပဝာရဏာ။
Pavāraṇahārako ce, bhikkhave, dinnāya pavāraṇāya antarāmagge pakkamati, anāhaṭā hoti pavāraṇā. Pavāraṇahārako ce, bhikkhave, dinnāya pavāraṇāya antarāmagge vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, anāhaṭā hoti pavāraṇā.
ပဝာရဏဟာရကော စေ, ဘိက္ခဝေ, ဒိန္နာယ ပဝာရဏာယ သင္ဃပ္ပတ္တော ပက္ကမတိ, အာဟဋာ ဟောတိ ပဝာရဏာ။ ပဝာရဏဟာရကော စေ, ဘိက္ခဝေ, ဒိန္နာယ ပဝာရဏာယ သင္ဃပ္ပတ္တော ဝိဗ္ဘမတိ။ပေ.။ ကာလံကရောတိ။ သာမဏေရော ပဋိဇာနာတိ။ သိက္ခံ ပစ္စက္ခာတကော ပဋိဇာနာတိ။ အန္တိမဝတ္ထုံ အဇ္ဈာပန္နကော ပဋိဇာနာတိ။ ဥမ္မတ္တကော ပဋိဇာနာတိ။ ခိတ္တစိတ္တော ပဋိဇာနာတိ။ ဝေဒနာဋ္ဋော ပဋိဇာနာတိ။ အာပတ္တိယာ အဒသ္သနေ ဥက္ခိတ္တကော ပဋိဇာနာတိ။ အာပတ္တိယာ အပ္ပဋိကမ္မေ ဥက္ခိတ္တကော ပဋိဇာနာတိ။ ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခိတ္တကော ပဋိဇာနာတိ။ ပဏ္ဍကော ပဋိဇာနာတိ။ ထေယ္ယသံဝာသကော ပဋိဇာနာတိ။ တိတ္ထိယပက္ကန္တကော ပဋိဇာနာတိ။ တိရစ္ဆာနဂတော ပဋိဇာနာတိ။ မာတုဃာတကော ပဋိဇာနာတိ။ ပိတုဃာတကော ပဋိဇာနာတိ။ အရဟန္တဃာတကော ပဋိဇာနာတိ။ ဘိက္ခုနိဒူသကော ပဋိဇာနာတိ။ သင္ဃဘေဒကော ပဋိဇာနာတိ။ လောဟိတုပ္ပာဒကော ပဋိဇာနာတိ။ ဥဘတောဗ္ယဉ္ဇနကော ပဋိဇာနာတိ, အာဟဋာ ဟောတိ ပဝာရဏာ။
Pavāraṇahārako ce, bhikkhave, dinnāya pavāraṇāya saṅghappatto pakkamati, āhaṭā hoti pavāraṇā. Pavāraṇahārako ce, bhikkhave, dinnāya pavāraṇāya saṅghappatto vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, āhaṭā hoti pavāraṇā.
ပဝာရဏဟာရကော စေ, ဘိက္ခဝေ, ဒိန္နာယ ပဝာရဏာယ သင္ဃပ္ပတ္တော သုတ္တော နာရောစေတိ, အာဟဋာ ဟောတိ ပဝာရဏာ။ ပဝာရဏဟာရကသ္သ အနာပတ္တိ ။ ပဝာရဏဟာရကော စေ, ဘိက္ခဝေ, ဒိန္နာယ ပဝာရဏာယ သင္ဃပ္ပတ္တော ပမတ္တော နာရောစေတိ။ပေ.။ သမာပန္နော နာရောစေတိ, အာဟဋာ ဟောတိ ပဝာရဏာ။ ပဝာရဏဟာရကသ္သ အနာပတ္တိ။
Pavāraṇahārako ce, bhikkhave, dinnāya pavāraṇāya saṅghappatto sutto nāroceti, āhaṭā hoti pavāraṇā. Pavāraṇahārakassa anāpatti . Pavāraṇahārako ce, bhikkhave, dinnāya pavāraṇāya saṅghappatto pamatto nāroceti…pe… samāpanno nāroceti, āhaṭā hoti pavāraṇā. Pavāraṇahārakassa anāpatti.
ပဝာရဏဟာရကော စေ, ဘိက္ခဝေ , ဒိန္နာယ ပဝာရဏာယ သင္ဃပ္ပတ္တော သဉ္စိစ္စ နာရောစေတိ, အာဟဋာ ဟောတိ ပဝာရဏာ။ ပဝာရဏဟာရကသ္သ အာပတ္တိ ဒုက္ကဋသ္သ။ အနုဇာနာမိ, ဘိက္ခဝေ, တဒဟု ပဝာရဏာယ ပဝာရဏံ ဒေန္တေန ဆန္ဒမ္ပိ ဒာတုံ, သန္တိ သင္ဃသ္သ ကရဏီယန္တိ။
Pavāraṇahārako ce, bhikkhave , dinnāya pavāraṇāya saṅghappatto sañcicca nāroceti, āhaṭā hoti pavāraṇā. Pavāraṇahārakassa āpatti dukkaṭassa. Anujānāmi, bhikkhave, tadahu pavāraṇāya pavāraṇaṃ dentena chandampi dātuṃ, santi saṅghassa karaṇīyanti.
ပဝာရဏာဒာနာနုဇာနနာ နိဋ္ဌိတာ။
Pavāraṇādānānujānanā niṭṭhitā.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ပဝာရဏာဒာနာနုဇာနနကထာ • Pavāraṇādānānujānanakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပဝာရဏာဒာနာနုဇာနနကထာဝဏ္ဏနာ • Pavāraṇādānānujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ပဝာရဏာဒာနာနုဇာနနကထာဝဏ္ဏနာ • Pavāraṇādānānujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အဖာသုဝိဟာရကထာဒိဝဏ္ဏနာ • Aphāsuvihārakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၂၁. ပဝာရဏာဘေဒကထာ • 121. Pavāraṇābhedakathā
