| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೧೨೨. ಪವಾರಣಾದಾನಾನುಜಾನನಾ
122. Pavāraṇādānānujānanā
೨೧೩. ಅಥ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಸನ್ನಿಪತಥ, ಭಿಕ್ಖವೇ। ಸಙ್ಘೋ ಪವಾರೇಸ್ಸತೀ’’ತಿ। ಏವಂ ವುತ್ತೇ ಅಞ್ಞತರೋ ಭಿಕ್ಖು ಭಗವನ್ತಂ ಏತದವೋಚ – ‘‘ಅತ್ಥಿ, ಭನ್ತೇ, ಭಿಕ್ಖು ಗಿಲಾನೋ , ಸೋ ಅನಾಗತೋ’’ತಿ। ಅನುಜಾನಾಮಿ, ಭಿಕ್ಖವೇ, ಗಿಲಾನೇನ ಭಿಕ್ಖುನಾ ಪವಾರಣಂ ದಾತುಂ। ಏವಞ್ಚ ಪನ, ಭಿಕ್ಖವೇ, ದಾತಬ್ಬಾ – ತೇನ ಗಿಲಾನೇನ ಭಿಕ್ಖುನಾ ಏಕಂ ಭಿಕ್ಖುಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಪವಾರಣಂ ದಮ್ಮಿ, ಪವಾರಣಂ ಮೇ ಹರ, ಪವಾರಣಂ ಮೇ ಆರೋಚೇಹಿ, ಮಮತ್ಥಾಯ ಪವಾರೇಹೀ’’ತಿ ಕಾಯೇನ ವಿಞ್ಞಾಪೇತಿ, ವಾಚಾಯ ವಿಞ್ಞಾಪೇತಿ, ಕಾಯೇನ ವಾಚಾಯ ವಿಞ್ಞಾಪೇತಿ, ದಿನ್ನಾ ಹೋತಿ ಪವಾರಣಾ; ನ ಕಾಯೇನ ವಿಞ್ಞಾಪೇತಿ, ನ ವಾಚಾಯ ವಿಞ್ಞಾಪೇತಿ, ನ ಕಾಯೇನ ವಾಚಾಯ ವಿಞ್ಞಾಪೇತಿ, ನ ದಿನ್ನಾ ಹೋತಿ ಪವಾರಣಾ। ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ। ನೋ ಚೇ ಲಭೇಥ, ಸೋ, ಭಿಕ್ಖವೇ, ಗಿಲಾನೋ ಭಿಕ್ಖು ಮಞ್ಚೇನ ವಾ ಪೀಠೇನ ವಾ ಸಙ್ಘಮಜ್ಝೇ ಆನೇತ್ವಾ ಪವಾರೇತಬ್ಬಂ। ಸಚೇ, ಭಿಕ್ಖವೇ, ಗಿಲಾನುಪಟ್ಠಾಕಾನಂ ಭಿಕ್ಖೂನಂ ಏತದಹೋಸಿ – ‘‘ಸಚೇ ಖೋ ಮಯಂ ಗಿಲಾನಂ ಠಾನಾ ಚಾವೇಸ್ಸಾಮ, ಆಬಾಧೋ ವಾ ಅಭಿವಡ್ಢಿಸ್ಸತಿ, ಕಾಲಂಕಿರಿಯಾ ವಾ ಭವಿಸ್ಸತೀ’’ತಿ ನ, ಭಿಕ್ಖವೇ, ಗಿಲಾನೋ ಭಿಕ್ಖು ಠಾನಾ ಚಾವೇತಬ್ಬೋ। ಸಙ್ಘೇನ ತತ್ಥ ಗನ್ತ್ವಾ ಪವಾರೇತಬ್ಬಂ; ನ ತ್ವೇವ ವಗ್ಗೇನ ಸಙ್ಘೇನ ಪವಾರೇತಬ್ಬಂ। ಪವಾರೇಯ್ಯ ಚೇ, ಆಪತ್ತಿ ದುಕ್ಕಟಸ್ಸ।
213. Atha kho bhagavā bhikkhū āmantesi – ‘‘sannipatatha, bhikkhave. Saṅgho pavāressatī’’ti. Evaṃ vutte aññataro bhikkhu bhagavantaṃ etadavoca – ‘‘atthi, bhante, bhikkhu gilāno , so anāgato’’ti. Anujānāmi, bhikkhave, gilānena bhikkhunā pavāraṇaṃ dātuṃ. Evañca pana, bhikkhave, dātabbā – tena gilānena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo – ‘‘pavāraṇaṃ dammi, pavāraṇaṃ me hara, pavāraṇaṃ me ārocehi, mamatthāya pavārehī’’ti kāyena viññāpeti, vācāya viññāpeti, kāyena vācāya viññāpeti, dinnā hoti pavāraṇā; na kāyena viññāpeti, na vācāya viññāpeti, na kāyena vācāya viññāpeti, na dinnā hoti pavāraṇā. Evañcetaṃ labhetha, iccetaṃ kusalaṃ. No ce labhetha, so, bhikkhave, gilāno bhikkhu mañcena vā pīṭhena vā saṅghamajjhe ānetvā pavāretabbaṃ. Sace, bhikkhave, gilānupaṭṭhākānaṃ bhikkhūnaṃ etadahosi – ‘‘sace kho mayaṃ gilānaṃ ṭhānā cāvessāma, ābādho vā abhivaḍḍhissati, kālaṃkiriyā vā bhavissatī’’ti na, bhikkhave, gilāno bhikkhu ṭhānā cāvetabbo. Saṅghena tattha gantvā pavāretabbaṃ; na tveva vaggena saṅghena pavāretabbaṃ. Pavāreyya ce, āpatti dukkaṭassa.
ಪವಾರಣಹಾರಕೋ 1 ಚೇ, ಭಿಕ್ಖವೇ, ದಿನ್ನಾಯ ಪವಾರಣಾಯ ತತ್ಥೇವ ಪಕ್ಕಮತಿ, ಅಞ್ಞಸ್ಸ ದಾತಬ್ಬಾ ಪವಾರಣಾ। ಪವಾರಣಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪವಾರಣಾಯ ತತ್ಥೇವ ವಿಬ್ಭಮತಿ…ಪೇ॰… ಕಾಲಂಕರೋತಿ… ಸಾಮಣೇರೋ ಪಟಿಜಾನಾತಿ… ಸಿಕ್ಖಂ ಪಚ್ಚಕ್ಖಾತಕೋ ಪಟಿಜಾನಾತಿ… ಅನ್ತಿಮವತ್ಥುಂ ಅಜ್ಝಾಪನ್ನಕೋ ಪಟಿಜಾನಾತಿ… ಉಮ್ಮತ್ತಕೋ ಪಟಿಜಾನಾತಿ… ಖಿತ್ತಚಿತ್ತೋ ಪಟಿಜಾನಾತಿ… ವೇದನಾಟ್ಟೋ ಪಟಿಜಾನಾತಿ… ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕೋ ಪಟಿಜಾನಾತಿ… ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕೋ ಪಟಿಜಾನಾತಿ… ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕೋ ಪಟಿಜಾನಾತಿ… ಪಣ್ಡಕೋ ಪಟಿಜಾನಾತಿ… ಥೇಯ್ಯಸಂವಾಸಕೋ ಪಟಿಜಾನಾತಿ… ತಿತ್ಥಿಯಪಕ್ಕನ್ತಕೋ ಪಟಿಜಾನಾತಿ… ತಿರಚ್ಛಾನಗತೋ ಪಟಿಜಾನಾತಿ… ಮಾತುಘಾತಕೋ ಪಟಿಜಾನಾತಿ… ಪಿತುಘಾತಕೋ ಪಟಿಜಾನಾತಿ… ಅರಹನ್ತಘಾತಕೋ ಪಟಿಜಾನಾತಿ… ಭಿಕ್ಖುನಿದೂಸಕೋ ಪಟಿಜಾನಾತಿ… ಸಙ್ಘಭೇದಕೋ ಪಟಿಜಾನಾತಿ … ಲೋಹಿತುಪ್ಪಾದಕೋ ಪಟಿಜಾನಾತಿ… ಉಭತೋಬ್ಯಞ್ಜನಕೋ ಪಟಿಜಾನಾತಿ, ಅಞ್ಞಸ್ಸ ದಾತಬ್ಬಾ ಪವಾರಣಾ।
Pavāraṇahārako 2 ce, bhikkhave, dinnāya pavāraṇāya tattheva pakkamati, aññassa dātabbā pavāraṇā. Pavāraṇahārako ce, bhikkhave, dinnāya pavāraṇāya tattheva vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti … lohituppādako paṭijānāti… ubhatobyañjanako paṭijānāti, aññassa dātabbā pavāraṇā.
ಪವಾರಣಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪವಾರಣಾಯ ಅನ್ತರಾಮಗ್ಗೇ ಪಕ್ಕಮತಿ, ಅನಾಹಟಾ ಹೋತಿ ಪವಾರಣಾ। ಪವಾರಣಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪವಾರಣಾಯ ಅನ್ತರಾಮಗ್ಗೇ ವಿಬ್ಭಮತಿ…ಪೇ॰… ಕಾಲಂಕರೋತಿ… ಸಾಮಣೇರೋ ಪಟಿಜಾನಾತಿ… ಸಿಕ್ಖಂ ಪಚ್ಚಕ್ಖಾತಕೋ ಪಟಿಜಾನಾತಿ… ಅನ್ತಿಮವತ್ಥುಂ ಅಜ್ಝಾಪನ್ನಕೋ ಪಟಿಜಾನಾತಿ… ಉಮ್ಮತ್ತಕೋ ಪಟಿಜಾನಾತಿ… ಖಿತ್ತಚಿತ್ತೋ ಪಟಿಜಾನಾತಿ… ವೇದನಾಟ್ಟೋ ಪಟಿಜಾನಾತಿ… ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕೋ ಪಟಿಜಾನಾತಿ… ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕೋ ಪಟಿಜಾನಾತಿ… ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕೋ ಪಟಿಜಾನಾತಿ… ಪಣ್ಡಕೋ ಪಟಿಜಾನಾತಿ… ಥೇಯ್ಯಸಂವಾಸಕೋ ಪಟಿಜಾನಾತಿ… ತಿತ್ಥಿಯಪಕ್ಕನ್ತಕೋ ಪಟಿಜಾನಾತಿ… ತಿರಚ್ಛಾನಗತೋ ಪಟಿಜಾನಾತಿ… ಮಾತುಘಾತಕೋ ಪಟಿಜಾನಾತಿ… ಪಿತುಘಾತಕೋ ಪಟಿಜಾನಾತಿ… ಅರಹನ್ತಘಾತಕೋ ಪಟಿಜಾನಾತಿ… ಭಿಕ್ಖುನಿದೂಸಕೋ ಪಟಿಜಾನಾತಿ… ಸಙ್ಘಭೇದಕೋ ಪಟಿಜಾನಾತಿ… ಲೋಹಿತುಪ್ಪಾದಕೋ ಪಟಿಜಾನಾತಿ… ಉಭತೋಬ್ಯಞ್ಜನಕೋ ಪಟಿಜಾನಾತಿ, ಅನಾಹಟಾ ಹೋತಿ ಪವಾರಣಾ।
Pavāraṇahārako ce, bhikkhave, dinnāya pavāraṇāya antarāmagge pakkamati, anāhaṭā hoti pavāraṇā. Pavāraṇahārako ce, bhikkhave, dinnāya pavāraṇāya antarāmagge vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, anāhaṭā hoti pavāraṇā.
ಪವಾರಣಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪವಾರಣಾಯ ಸಙ್ಘಪ್ಪತ್ತೋ ಪಕ್ಕಮತಿ, ಆಹಟಾ ಹೋತಿ ಪವಾರಣಾ। ಪವಾರಣಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪವಾರಣಾಯ ಸಙ್ಘಪ್ಪತ್ತೋ ವಿಬ್ಭಮತಿ…ಪೇ॰… ಕಾಲಂಕರೋತಿ… ಸಾಮಣೇರೋ ಪಟಿಜಾನಾತಿ… ಸಿಕ್ಖಂ ಪಚ್ಚಕ್ಖಾತಕೋ ಪಟಿಜಾನಾತಿ… ಅನ್ತಿಮವತ್ಥುಂ ಅಜ್ಝಾಪನ್ನಕೋ ಪಟಿಜಾನಾತಿ… ಉಮ್ಮತ್ತಕೋ ಪಟಿಜಾನಾತಿ… ಖಿತ್ತಚಿತ್ತೋ ಪಟಿಜಾನಾತಿ… ವೇದನಾಟ್ಟೋ ಪಟಿಜಾನಾತಿ… ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕೋ ಪಟಿಜಾನಾತಿ… ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕೋ ಪಟಿಜಾನಾತಿ… ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕೋ ಪಟಿಜಾನಾತಿ… ಪಣ್ಡಕೋ ಪಟಿಜಾನಾತಿ… ಥೇಯ್ಯಸಂವಾಸಕೋ ಪಟಿಜಾನಾತಿ… ತಿತ್ಥಿಯಪಕ್ಕನ್ತಕೋ ಪಟಿಜಾನಾತಿ… ತಿರಚ್ಛಾನಗತೋ ಪಟಿಜಾನಾತಿ… ಮಾತುಘಾತಕೋ ಪಟಿಜಾನಾತಿ… ಪಿತುಘಾತಕೋ ಪಟಿಜಾನಾತಿ… ಅರಹನ್ತಘಾತಕೋ ಪಟಿಜಾನಾತಿ… ಭಿಕ್ಖುನಿದೂಸಕೋ ಪಟಿಜಾನಾತಿ… ಸಙ್ಘಭೇದಕೋ ಪಟಿಜಾನಾತಿ… ಲೋಹಿತುಪ್ಪಾದಕೋ ಪಟಿಜಾನಾತಿ… ಉಭತೋಬ್ಯಞ್ಜನಕೋ ಪಟಿಜಾನಾತಿ, ಆಹಟಾ ಹೋತಿ ಪವಾರಣಾ।
Pavāraṇahārako ce, bhikkhave, dinnāya pavāraṇāya saṅghappatto pakkamati, āhaṭā hoti pavāraṇā. Pavāraṇahārako ce, bhikkhave, dinnāya pavāraṇāya saṅghappatto vibbhamati…pe… kālaṃkaroti… sāmaṇero paṭijānāti… sikkhaṃ paccakkhātako paṭijānāti… antimavatthuṃ ajjhāpannako paṭijānāti… ummattako paṭijānāti… khittacitto paṭijānāti… vedanāṭṭo paṭijānāti… āpattiyā adassane ukkhittako paṭijānāti… āpattiyā appaṭikamme ukkhittako paṭijānāti… pāpikāya diṭṭhiyā appaṭinissagge ukkhittako paṭijānāti… paṇḍako paṭijānāti… theyyasaṃvāsako paṭijānāti… titthiyapakkantako paṭijānāti… tiracchānagato paṭijānāti… mātughātako paṭijānāti… pitughātako paṭijānāti… arahantaghātako paṭijānāti… bhikkhunidūsako paṭijānāti… saṅghabhedako paṭijānāti… lohituppādako paṭijānāti… ubhatobyañjanako paṭijānāti, āhaṭā hoti pavāraṇā.
ಪವಾರಣಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪವಾರಣಾಯ ಸಙ್ಘಪ್ಪತ್ತೋ ಸುತ್ತೋ ನಾರೋಚೇತಿ, ಆಹಟಾ ಹೋತಿ ಪವಾರಣಾ। ಪವಾರಣಹಾರಕಸ್ಸ ಅನಾಪತ್ತಿ । ಪವಾರಣಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪವಾರಣಾಯ ಸಙ್ಘಪ್ಪತ್ತೋ ಪಮತ್ತೋ ನಾರೋಚೇತಿ…ಪೇ॰… ಸಮಾಪನ್ನೋ ನಾರೋಚೇತಿ, ಆಹಟಾ ಹೋತಿ ಪವಾರಣಾ। ಪವಾರಣಹಾರಕಸ್ಸ ಅನಾಪತ್ತಿ।
Pavāraṇahārako ce, bhikkhave, dinnāya pavāraṇāya saṅghappatto sutto nāroceti, āhaṭā hoti pavāraṇā. Pavāraṇahārakassa anāpatti . Pavāraṇahārako ce, bhikkhave, dinnāya pavāraṇāya saṅghappatto pamatto nāroceti…pe… samāpanno nāroceti, āhaṭā hoti pavāraṇā. Pavāraṇahārakassa anāpatti.
ಪವಾರಣಹಾರಕೋ ಚೇ, ಭಿಕ್ಖವೇ , ದಿನ್ನಾಯ ಪವಾರಣಾಯ ಸಙ್ಘಪ್ಪತ್ತೋ ಸಞ್ಚಿಚ್ಚ ನಾರೋಚೇತಿ, ಆಹಟಾ ಹೋತಿ ಪವಾರಣಾ। ಪವಾರಣಹಾರಕಸ್ಸ ಆಪತ್ತಿ ದುಕ್ಕಟಸ್ಸ। ಅನುಜಾನಾಮಿ, ಭಿಕ್ಖವೇ, ತದಹು ಪವಾರಣಾಯ ಪವಾರಣಂ ದೇನ್ತೇನ ಛನ್ದಮ್ಪಿ ದಾತುಂ, ಸನ್ತಿ ಸಙ್ಘಸ್ಸ ಕರಣೀಯನ್ತಿ।
Pavāraṇahārako ce, bhikkhave , dinnāya pavāraṇāya saṅghappatto sañcicca nāroceti, āhaṭā hoti pavāraṇā. Pavāraṇahārakassa āpatti dukkaṭassa. Anujānāmi, bhikkhave, tadahu pavāraṇāya pavāraṇaṃ dentena chandampi dātuṃ, santi saṅghassa karaṇīyanti.
ಪವಾರಣಾದಾನಾನುಜಾನನಾ ನಿಟ್ಠಿತಾ।
Pavāraṇādānānujānanā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಪವಾರಣಾದಾನಾನುಜಾನನಕಥಾ • Pavāraṇādānānujānanakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪವಾರಣಾದಾನಾನುಜಾನನಕಥಾವಣ್ಣನಾ • Pavāraṇādānānujānanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಪವಾರಣಾದಾನಾನುಜಾನನಕಥಾವಣ್ಣನಾ • Pavāraṇādānānujānanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಫಾಸುವಿಹಾರಕಥಾದಿವಣ್ಣನಾ • Aphāsuvihārakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೨೧. ಪವಾರಣಾಭೇದಕಥಾ • 121. Pavāraṇābhedakathā
