| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
পৰারণক্খন্ধককথাৰণ্ণনা
Pavāraṇakkhandhakakathāvaṇṇanā
২৬৩৩. ‘‘পৰারণা’’তি ইদং ‘‘চাতুদ্দসী’’তিআদীহি পচ্চেকং যোজেতব্বং। তস্মিং তস্মিং দিনে কাতব্বা পৰারণা অভেদোপচারেন তথা ৰুত্তা। সামগ্গী উপোসথক্খন্ধককথাৰণ্ণনায ৰুত্তসরূপাৰ। সামগ্গিপৰারণং করোন্তেহি চ পঠমং পৰারণং ঠপেত্ৰা পাটিপদতো পট্ঠায যাৰ কত্তিকচাতুমাসিপুণ্ণমা এত্থন্তরে কাতব্বা, ততো পচ্ছা ৰা পুরে ৰা ন ৰট্টতি। তেৰাচী দ্ৰেকৰাচীতি ‘‘সুণাতু মে, ভন্তে…পে॰… তেৰাচিকং পৰারেয্য, দ্ৰেৰাচিকং পৰারেয্য, একৰাচিকং পৰারেয্যা’’তি তং তং ঞত্তিং ঠপেত্ৰা কাতব্বা পৰারণা ৰুচ্চতি।
2633.‘‘Pavāraṇā’’ti idaṃ ‘‘cātuddasī’’tiādīhi paccekaṃ yojetabbaṃ. Tasmiṃ tasmiṃ dine kātabbā pavāraṇā abhedopacārena tathā vuttā. Sāmaggī uposathakkhandhakakathāvaṇṇanāya vuttasarūpāva. Sāmaggipavāraṇaṃ karontehi ca paṭhamaṃ pavāraṇaṃ ṭhapetvā pāṭipadato paṭṭhāya yāva kattikacātumāsipuṇṇamā etthantare kātabbā, tato pacchā vā pure vā na vaṭṭati. Tevācī dvekavācīti ‘‘suṇātu me, bhante…pe… tevācikaṃ pavāreyya, dvevācikaṃ pavāreyya, ekavācikaṃ pavāreyyā’’ti taṃ taṃ ñattiṃ ṭhapetvā kātabbā pavāraṇā vuccati.
২৬৩৪. তীণি কম্মানি মুঞ্চিত্ৰা, অন্তেনেৰ পৰারযেতি ‘‘চত্তারিমানি, ভিক্খৰে, পৰারণকম্মানি, অধম্মেন ৰগ্গং পৰারণকম্মং…পে॰… ধম্মেন সমগ্গং পৰারণকম্ম’’ন্তি (মহাৰ॰ ২১২) ৰত্ৰা ‘‘তত্র, ভিক্খৰে , যদিদং অধম্মেন ৰগ্গং পৰারণকম্মং, ন, ভিক্খৰে, এৰরূপং পৰারণকম্মং কাতব্বং…পে॰… তত্র, ভিক্খৰে, যদিদং ধম্মেন সমগ্গং পৰারণকম্মং, এৰরূপং, ভিক্খৰে, পৰারণকম্মং কাতব্ব’’ন্তিআদিৰচনতো (মহাৰ॰ ২১২) তীণি অকত্তব্বানি পৰারণকম্মানি মুঞ্চিত্ৰা কাতুং অনুঞ্ঞাতেন চতুত্থেন পৰারণকম্মেন পৰারেয্যাতি অত্থো। তস্স ৰিভাগেকদেসং ‘‘পঞ্চ যস্মিং পনাৰাসে’’তিআদিনা ৰক্খতি।
2634.Tīṇi kammāni muñcitvā, anteneva pavārayeti ‘‘cattārimāni, bhikkhave, pavāraṇakammāni, adhammena vaggaṃ pavāraṇakammaṃ…pe… dhammena samaggaṃ pavāraṇakamma’’nti (mahāva. 212) vatvā ‘‘tatra, bhikkhave , yadidaṃ adhammena vaggaṃ pavāraṇakammaṃ, na, bhikkhave, evarūpaṃ pavāraṇakammaṃ kātabbaṃ…pe… tatra, bhikkhave, yadidaṃ dhammena samaggaṃ pavāraṇakammaṃ, evarūpaṃ, bhikkhave, pavāraṇakammaṃ kātabba’’ntiādivacanato (mahāva. 212) tīṇi akattabbāni pavāraṇakammāni muñcitvā kātuṃ anuññātena catutthena pavāraṇakammena pavāreyyāti attho. Tassa vibhāgekadesaṃ ‘‘pañca yasmiṃ panāvāse’’tiādinā vakkhati.
২৬৩৫. পুব্বকিচ্চং সমাপেত্ৰাতি –
2635.Pubbakiccaṃ samāpetvāti –
‘‘সম্মজ্জনী পদীপো চ, উদকং আসনেন চ।
‘‘Sammajjanī padīpo ca, udakaṃ āsanena ca;
পৰারণায এতানি, ‘পুব্বকরণ’ন্তি ৰুচ্চতি॥
Pavāraṇāya etāni, ‘pubbakaraṇa’nti vuccati.
‘‘ছন্দপারিসুদ্ধিউতুক্খানং, ভিক্খুগণনা চ ওৰাদো।
‘‘Chandapārisuddhiutukkhānaṃ, bhikkhugaṇanā ca ovādo;
পৰারণায এতানি, ‘পুব্বকিচ্চ’ন্তি ৰুচ্চতী’’তি॥ –
Pavāraṇāya etāni, ‘pubbakicca’nti vuccatī’’ti. –
ৰুত্তং নৰৰিধং পুব্বকিচ্চং নিট্ঠাপেত্ৰা।
Vuttaṃ navavidhaṃ pubbakiccaṃ niṭṭhāpetvā.
পত্তকল্লে সমানিতেতি –
Pattakalle samāniteti –
‘‘পৰারণা যাৰতিকা চ ভিক্খূ কম্মপ্পত্তা,
‘‘Pavāraṇā yāvatikā ca bhikkhū kammappattā,
সভাগাপত্তিযো চ ন ৰিজ্জন্তি।
Sabhāgāpattiyo ca na vijjanti;
ৰজ্জনীযা চ পুগ্গলা তস্মিং ন হোন্তি,
Vajjanīyā ca puggalā tasmiṃ na honti,
‘পত্তকল্ল’ন্তি ৰুচ্চতী’’তি॥ –
‘Pattakalla’nti vuccatī’’ti. –
ৰুত্তে চতুব্বিধে পত্তকল্লে সমোধানিতে পরিসমাপিতে।
Vutte catubbidhe pattakalle samodhānite parisamāpite.
ঞত্তিং ঠপেত্ৰাতি ‘‘সুণাতু মে, ভন্তে সঙ্ঘো, অজ্জ পৰারণা, যদি সঙ্ঘস্স পত্তকল্লং, সঙ্ঘো পৰারেয্যা’’তি (মহাৰ॰ ২১০) এৰং সব্বসঙ্গাহিকৰসেন চ ‘‘তেৰাচিকং পৰারেয্যা’’তি চ দানাদিকরণেন যেভুয্যেন রত্তিযা খেপিতায চ রাজাদিঅন্তরাযে সতি চ তদনুরূপতো ‘‘দ্ৰেৰাচিকং, একৰাচিকং, সমানৰস্সিকং পৰারেয্যা’’তি চ ঞত্তিং ঠপেত্ৰা , তাসং ৰিসেসো অট্ঠকথাযং দস্সিতোযেৰ। যথাহ –
Ñattiṃ ṭhapetvāti ‘‘suṇātu me, bhante saṅgho, ajja pavāraṇā, yadi saṅghassa pattakallaṃ, saṅgho pavāreyyā’’ti (mahāva. 210) evaṃ sabbasaṅgāhikavasena ca ‘‘tevācikaṃ pavāreyyā’’ti ca dānādikaraṇena yebhuyyena rattiyā khepitāya ca rājādiantarāye sati ca tadanurūpato ‘‘dvevācikaṃ, ekavācikaṃ, samānavassikaṃ pavāreyyā’’ti ca ñattiṃ ṭhapetvā , tāsaṃ viseso aṭṭhakathāyaṃ dassitoyeva. Yathāha –
‘‘এৰঞ্হি ৰুত্তে তেৰাচিকঞ্চ দ্ৰেৰাচিকঞ্চ একৰাচিকঞ্চ পৰারেতুং ৰট্টতি, সমানৰস্সিকং ন ৰট্টতি। ‘তেৰাচিকং পৰারেয্যা’তি ৰুত্তে পন তেৰাচিকমেৰ ৰট্টতি, অঞ্ঞং ন ৰট্টতি, ‘দ্ৰেৰাচিকং পৰারেয্যা’তি ৰুত্তে দ্ৰেৰাচিকঞ্চ তেৰাচিকঞ্চ ৰট্টতি, একৰাচিকঞ্চ সমানৰস্সিকঞ্চ ন ৰট্টতি। ‘একৰাচিকং পৰারেয্যা’তি ৰুত্তে পন একৰাচিকদ্ৰেৰাচিকতেৰাচিকানি ৰট্টন্তি, সমানৰস্সিকমেৰ ন ৰট্টতি। ‘সমানৰস্সিক’ন্তি ৰুত্তে সব্বং ৰট্টতী’’তি (মহাৰ॰ অট্ঠ॰ ২১০)।
‘‘Evañhi vutte tevācikañca dvevācikañca ekavācikañca pavāretuṃ vaṭṭati, samānavassikaṃ na vaṭṭati. ‘Tevācikaṃ pavāreyyā’ti vutte pana tevācikameva vaṭṭati, aññaṃ na vaṭṭati, ‘dvevācikaṃ pavāreyyā’ti vutte dvevācikañca tevācikañca vaṭṭati, ekavācikañca samānavassikañca na vaṭṭati. ‘Ekavācikaṃ pavāreyyā’ti vutte pana ekavācikadvevācikatevācikāni vaṭṭanti, samānavassikameva na vaṭṭati. ‘Samānavassika’nti vutte sabbaṃ vaṭṭatī’’ti (mahāva. aṭṭha. 210).
কাতব্বাতি থেরেন ভিক্খুনা একংসং উত্তরাসঙ্গং করিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো ‘‘সঙ্ঘং, আৰুসো, পৰারেমি দিট্ঠেন ৰা…পে॰… ততিযম্পি আৰুসো, সঙ্ঘং পৰারেমি দিট্ঠেন ৰা…পে॰… পস্সন্তো পটিকরিস্সামী’’তি (মহাৰ॰ ২১০) ৰুত্তনযেন কাতব্বা। নৰকেন ভিক্খুনা একংসং উত্তরাসঙ্গং করিত্ৰা…পে॰… ততিযম্পি, ভন্তে, সঙ্ঘং পৰারেমি দিট্ঠেন ৰা…পে॰… পস্সন্তো পটিকরিস্সামীতি (মহাৰ॰ ২১০) ৰুত্তনযেন কাতব্বা।
Kātabbāti therena bhikkhunā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo ‘‘saṅghaṃ, āvuso, pavāremi diṭṭhena vā…pe… tatiyampi āvuso, saṅghaṃ pavāremi diṭṭhena vā…pe… passanto paṭikarissāmī’’ti (mahāva. 210) vuttanayena kātabbā. Navakena bhikkhunā ekaṃsaṃ uttarāsaṅgaṃ karitvā…pe… tatiyampi, bhante, saṅghaṃ pavāremi diṭṭhena vā…pe… passanto paṭikarissāmīti (mahāva. 210) vuttanayena kātabbā.
২৬৩৬. থেরেসু পৰারেন্তেসু যো পন নৰো, সো সযং যাৰ পৰারেতি, তাৰ উক্কুটিকং নিসীদেয্যাতি যোজনা।
2636. Theresu pavārentesu yo pana navo, so sayaṃ yāva pavāreti, tāva ukkuṭikaṃ nisīdeyyāti yojanā.
২৬৩৭. চত্তারো ৰা তযোপি ৰা একাৰাসে একসীমাযং ৰসন্তি চে, ঞত্তিং ৰত্ৰা ‘‘সুণন্তু মে, আযস্মন্তো, অজ্জ পৰারণা, যদাযস্মন্তানং পত্তকল্লং, মযং অঞ্ঞমঞ্ঞং পৰারেয্যামা’’তি (মহাৰ॰ ২১৬) গণঞত্তিং ঠপেত্ৰা পৰারেয্যুন্তি যোজনা।
2637. Cattāro vā tayopi vā ekāvāse ekasīmāyaṃ vasanti ce, ñattiṃ vatvā ‘‘suṇantu me, āyasmanto, ajja pavāraṇā, yadāyasmantānaṃ pattakallaṃ, mayaṃ aññamaññaṃ pavāreyyāmā’’ti (mahāva. 216) gaṇañattiṃ ṭhapetvā pavāreyyunti yojanā.
পৰারেয্যুন্তি এত্থ থেরেন ভিক্খুনা একংসং উত্তরাসঙ্গং কত্ৰা উক্কুটিকং নিসীদিত্ৰা অঞ্জলিং পগ্গহেত্ৰা তে তযো ৰা দ্ৰে ৰা ভিক্খূ এৰমস্সু ৰচনীযা ‘‘অহং, আৰুসো, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা, ৰদন্তু মং আযস্মন্তো অনুকম্পং উপাদায, পস্সন্তো পটিকরিস্সামি। দুতিযম্পি…পে॰… ততিযম্পি অহং, আৰুসো, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা, ৰদন্তু মং আযস্মন্তো অনুকম্পং উপাদায, পস্সন্তো পটিকরিস্সামী’’তি (মহাৰ॰ ২১৬) পৰারেতব্বং। নৰেনপি ‘‘অহং, ভন্তে, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা, ৰদন্তু মং আযস্মন্তো অনুকম্পং উপাদায , পস্সন্তো পটিকরিস্সামি। দুতিযম্পি…পে॰… ততিযম্পি অহং, ভন্তে, আযস্মন্তে পৰারেমি দিট্ঠেন ৰা সুতেন ৰা পরিসঙ্কায ৰা, ৰদন্তু মং আযস্মন্তো অনুকম্পং উপাদায, পস্সন্তো পটিকরিস্সামী’’তি পৰারেতব্বং।
Pavāreyyunti ettha therena bhikkhunā ekaṃsaṃ uttarāsaṅgaṃ katvā ukkuṭikaṃ nisīditvā añjaliṃ paggahetvā te tayo vā dve vā bhikkhū evamassu vacanīyā ‘‘ahaṃ, āvuso, āyasmante pavāremi diṭṭhena vā sutena vā parisaṅkāya vā, vadantu maṃ āyasmanto anukampaṃ upādāya, passanto paṭikarissāmi. Dutiyampi…pe… tatiyampi ahaṃ, āvuso, āyasmante pavāremi diṭṭhena vā sutena vā parisaṅkāya vā, vadantu maṃ āyasmanto anukampaṃ upādāya, passanto paṭikarissāmī’’ti (mahāva. 216) pavāretabbaṃ. Navenapi ‘‘ahaṃ, bhante, āyasmante pavāremi diṭṭhena vā sutena vā parisaṅkāya vā, vadantu maṃ āyasmanto anukampaṃ upādāya , passanto paṭikarissāmi. Dutiyampi…pe… tatiyampi ahaṃ, bhante, āyasmante pavāremi diṭṭhena vā sutena vā parisaṅkāya vā, vadantu maṃ āyasmanto anukampaṃ upādāya, passanto paṭikarissāmī’’ti pavāretabbaṃ.
২৬৩৮. অঞ্ঞমঞ্ঞং পৰারেয্যুং, ৰিনা ঞত্তিং দুৰে জনা। তেসু থেরেন ‘‘অহং, আৰুসো, আযস্মন্তং পৰারেমি দিট্ঠেন ৰা সুতেন ৰা পরিসঙ্কায ৰা, ৰদতু মং আযস্মা অনুকম্পং উপাদায, পস্সন্তো পটিকরিস্সামি। দুতিযম্পি…পে॰… ততিযম্পি অহং, আৰুসো, আযস্মন্তং পৰারেমি…পে॰… পটিকরিস্সামী’’তি (মহাৰ॰ ২১৭) পৰারেতব্বং। নৰেনপি ‘‘অহং, ভন্তে, আযস্মন্তং পৰারেমি…পে॰… ৰদতু মং আযস্মা অনুকম্পং উপাদায, পস্সন্তো পটিকরিস্সামি। দুতিযম্পি…পে॰… ততিযম্পি অহং, ভন্তে, আযস্মন্তং পৰারেমি…পে॰… পটিকরিস্সামী’’তি পৰারেতব্বং।
2638.Aññamaññaṃ pavāreyyuṃ, vinā ñattiṃ duve janā. Tesu therena ‘‘ahaṃ, āvuso, āyasmantaṃ pavāremi diṭṭhena vā sutena vā parisaṅkāya vā, vadatu maṃ āyasmā anukampaṃ upādāya, passanto paṭikarissāmi. Dutiyampi…pe… tatiyampi ahaṃ, āvuso, āyasmantaṃ pavāremi…pe… paṭikarissāmī’’ti (mahāva. 217) pavāretabbaṃ. Navenapi ‘‘ahaṃ, bhante, āyasmantaṃ pavāremi…pe… vadatu maṃ āyasmā anukampaṃ upādāya, passanto paṭikarissāmi. Dutiyampi…pe… tatiyampi ahaṃ, bhante, āyasmantaṃ pavāremi…pe… paṭikarissāmī’’ti pavāretabbaṃ.
অধিট্ঠেয্যাতি পুব্বকিচ্চং সমাপেত্ৰা ‘‘অজ্জ মে পৰারণা চাতুদ্দসী’’তি ৰা ‘‘পন্নরসী’’তি ৰা ৰত্ৰা ‘‘অধিট্ঠামী’’তি অধিট্ঠেয্য । যথাহ ‘‘অজ্জ মে পৰারণাতি এত্থ সচে চাতুদ্দসিকা হোতি, ‘অজ্জ মে পৰারণা চাতুদ্দসী’তি, সচে পন্নরসিকা, ‘অজ্জ মে পৰারণা পন্নরসী’তি এৰং অধিট্ঠাতব্ব’’ন্তি (মহাৰ॰ অট্ঠ॰ ২১৮), ইমিনা সব্বসঙ্গাহাদিঞত্তীসু চ তস্মিং তস্মিং দিৰসে সো সো ৰোহারো কাতব্বোতি দীপিতমেৰ।
Adhiṭṭheyyāti pubbakiccaṃ samāpetvā ‘‘ajja me pavāraṇā cātuddasī’’ti vā ‘‘pannarasī’’ti vā vatvā ‘‘adhiṭṭhāmī’’ti adhiṭṭheyya . Yathāha ‘‘ajja me pavāraṇāti ettha sace cātuddasikā hoti, ‘ajja me pavāraṇā cātuddasī’ti, sace pannarasikā, ‘ajja me pavāraṇā pannarasī’ti evaṃ adhiṭṭhātabba’’nti (mahāva. aṭṭha. 218), iminā sabbasaṅgāhādiñattīsu ca tasmiṃ tasmiṃ divase so so vohāro kātabboti dīpitameva.
সেসা সঙ্ঘপৰারণাতি পঞ্চহি, অতিরেকেহি ৰা ভিক্খূহি কত্তব্বা পৰারণা সঙ্ঘপৰারণা।
Sesā saṅghapavāraṇāti pañcahi, atirekehi vā bhikkhūhi kattabbā pavāraṇā saṅghapavāraṇā.
২৬৩৯. পৰারিতেতি পঠমপৰারণায পৰারিতে। অনাগতোতি কেনচি অন্তরাযেন পুরিমিকায চ পচ্ছিমিকায চ ৰস্সূপনাযিকায ৰস্সং অনুপগতো। অৰুত্থোতি পচ্ছিমিকায উপগতো। ৰুত্তঞ্হি খুদ্দসিক্খাৰণ্ণনায ‘‘অৰুত্থোতি পচ্ছিমিকায উপগতো অপরিনিট্ঠিতত্তা ‘অৰুত্থো’তি ৰুচ্চতী’’তি। পারিসুদ্ধিউপোসথং করেয্যাতি যোজনা। এত্থ ‘‘তেসং সন্তিকে’’তি সেসো।
2639.Pavāriteti paṭhamapavāraṇāya pavārite. Anāgatoti kenaci antarāyena purimikāya ca pacchimikāya ca vassūpanāyikāya vassaṃ anupagato. Avutthoti pacchimikāya upagato. Vuttañhi khuddasikkhāvaṇṇanāya ‘‘avutthoti pacchimikāya upagato apariniṭṭhitattā ‘avuttho’ti vuccatī’’ti. Pārisuddhiuposathaṃ kareyyāti yojanā. Ettha ‘‘tesaṃ santike’’ti seso.
২৬৪০-১. যস্মিং পনাৰাসে পঞ্চ ৰা চত্তারো ৰা তযো ৰা সমণা ৰসন্তি, তে তত্থ একেকস্স পৰারণং হরিত্ৰান সচে অঞ্ঞমঞ্ঞং পৰারেন্তি, আপত্তি দুক্কটন্তি যোজনা।
2640-1. Yasmiṃ panāvāse pañca vā cattāro vā tayo vā samaṇā vasanti, te tattha ekekassa pavāraṇaṃ haritvāna sace aññamaññaṃ pavārenti, āpatti dukkaṭanti yojanā.
সেসন্তি ‘‘অধম্মেন সমগ্গ’’ন্তিআদিকং ৰিনিচ্ছযং। ইধাতি ইমস্মিং পৰারণাধিকারে। বুধোতি ৰিনযধরো। উপোসথে ৰুত্তনযেনাতি উপোসথৰিনিচ্ছযে ৰুত্তক্কমেন। নযেতি জানেয্য।
Sesanti ‘‘adhammena samagga’’ntiādikaṃ vinicchayaṃ. Idhāti imasmiṃ pavāraṇādhikāre. Budhoti vinayadharo. Uposathe vuttanayenāti uposathavinicchaye vuttakkamena. Nayeti jāneyya.
২৬৪২. সম্পাদেতত্তনো সুচিন্তি অত্তনো উপোসথং সম্পাদেতি। সব্বং সাধেতীতি উপোসথাদিসব্বং কম্মং নিপ্ফাদেতি। নত্তনোতি অত্তনো উপোসথং ন নিপ্ফাদেতি।
2642.Sampādetattano sucinti attano uposathaṃ sampādeti. Sabbaṃ sādhetīti uposathādisabbaṃ kammaṃ nipphādeti. Nattanoti attano uposathaṃ na nipphādeti.
২৬৪৩. তস্মাতি যস্মা অত্তনো সুচিং ন সাধেতি, তস্মা। উভিন্নন্তি অত্তনো চ সঙ্ঘস্স চ। কিচ্চসিদ্ধত্থমেৰিধাতি উপোসথাদিকম্মনিপ্পজ্জনত্থং ইধ ইমস্মিং উপোসথকম্মাদিপকরণে। পারিসুদ্ধিপীতি এত্থ পি-সদ্দেন পৰারণা সঙ্গহিতা। তেনেৰ ৰক্খতি ‘‘ছন্দং ৰা পারিসুদ্ধিং ৰা, গহেত্ৰা ৰা পৰারণ’’ন্তি।
2643.Tasmāti yasmā attano suciṃ na sādheti, tasmā. Ubhinnanti attano ca saṅghassa ca. Kiccasiddhatthamevidhāti uposathādikammanippajjanatthaṃ idha imasmiṃ uposathakammādipakaraṇe. Pārisuddhipīti ettha pi-saddena pavāraṇā saṅgahitā. Teneva vakkhati ‘‘chandaṃ vā pārisuddhiṃ vā, gahetvā vā pavāraṇa’’nti.
ছন্দপারিসুদ্ধিপৰারণং দেন্তেন সচে সাপত্তিকো হোতি, আপত্তিং দেসেত্ৰা একংসং উত্তরাসঙ্গং কত্ৰা উক্কুটিকং নিসীদিত্ৰা অঞ্জলিং পগ্গহেত্ৰা ছন্দাদিহারকো ভিক্খু ৰত্তব্বো ‘‘ছন্দং দম্মি, ছন্দং মে হর, ছন্দং মে আরোচেহী’’তি (মহাৰ॰ ১৬৫), ‘‘পারিসুদ্ধিং দম্মি, পারিসুদ্ধিং মে হর, পারিসুদ্ধিং মে আরোচেহী’’তি (মহাৰ॰ ১৬৪), ‘‘পৰারণং দম্মি, পৰারণং মে হর, পৰারণং মে আরোচেহি, মমত্থায পৰারেহী’’তি (মহাৰ॰ ২১৩)।
Chandapārisuddhipavāraṇaṃ dentena sace sāpattiko hoti, āpattiṃ desetvā ekaṃsaṃ uttarāsaṅgaṃ katvā ukkuṭikaṃ nisīditvā añjaliṃ paggahetvā chandādihārako bhikkhu vattabbo ‘‘chandaṃ dammi, chandaṃ me hara, chandaṃ me ārocehī’’ti (mahāva. 165), ‘‘pārisuddhiṃ dammi, pārisuddhiṃ me hara, pārisuddhiṃ me ārocehī’’ti (mahāva. 164), ‘‘pavāraṇaṃ dammi, pavāraṇaṃ me hara, pavāraṇaṃ me ārocehi, mamatthāya pavārehī’’ti (mahāva. 213).
২৬৪৪. ‘‘ছন্দো একেনা’’তি পদচ্ছেদো। একেন বহূনম্পি ছন্দো হাতব্বো, তথা পারিসুদ্ধি হাতব্বা। পি-সদ্দেন পৰারণা হাতব্বাতি যোজনা। পরম্পরাহটো ছন্দোতি বহূনং ৰা একস্স ৰা ছন্দাদিহারকস্স হত্থতো অন্তরা অঞ্ঞেন গহিতা ছন্দপারিসুদ্ধিপৰারণা। ৰিসুদ্ধিযা ন গচ্ছতি অনৰজ্জভাৰায ন পাপুণাতি বিল়ালসঙ্খলিকছন্দাদীনং সঙ্ঘমজ্ঝং অগমনেন ৰগ্গভাৰকরণতো।
2644. ‘‘Chando ekenā’’ti padacchedo. Ekena bahūnampi chando hātabbo, tathā pārisuddhi hātabbā. Pi-saddena pavāraṇā hātabbāti yojanā. Paramparāhaṭo chandoti bahūnaṃ vā ekassa vā chandādihārakassa hatthato antarā aññena gahitā chandapārisuddhipavāraṇā. Visuddhiyā na gacchati anavajjabhāvāya na pāpuṇāti biḷālasaṅkhalikachandādīnaṃ saṅghamajjhaṃ agamanena vaggabhāvakaraṇato.
এত্থ চ যথা বিল়ালসঙ্খলিকায পঠমৰলযং দুতিযৰলযং পাপুণাতি, ন ততিযং, এৰমিমেপি ছন্দাদযো দাযকেন যস্স দিন্না, ততো অঞ্ঞত্থ ন গচ্ছতীতি বিল়ালসঙ্খলিকাসদিসত্তা ‘‘বিল়ালসঙ্খলিকা’’তি ৰুত্তা। বিল়ালসঙ্খলিকাগ্গহণঞ্চেত্থ যাসং কাসঞ্চি সঙ্খলিকানং উপলক্খণমত্তন্তি দট্ঠব্বং।
Ettha ca yathā biḷālasaṅkhalikāya paṭhamavalayaṃ dutiyavalayaṃ pāpuṇāti, na tatiyaṃ, evamimepi chandādayo dāyakena yassa dinnā, tato aññattha na gacchatīti biḷālasaṅkhalikāsadisattā ‘‘biḷālasaṅkhalikā’’ti vuttā. Biḷālasaṅkhalikāggahaṇañcettha yāsaṃ kāsañci saṅkhalikānaṃ upalakkhaṇamattanti daṭṭhabbaṃ.
২৬৪৫-৬. ছন্দং ৰা পারিসুদ্ধিং ৰা পৰারণং ৰা গহেত্ৰা ছন্দাদিহারকো সঙ্ঘমপ্পত্ৰা সচে সামণেরাদিভাৰং পটিজানেয্য ৰা ৰিব্ভমেয্য ৰা মরেয্য ৰা, তং সব্বং ছন্দাদিভাৰং নাহটং হোতি, সঙ্ঘং পত্ৰা এৰং সিযা সামণেরাদিভাৰং পটিজানন্তো, ৰিব্ভন্তো, কালকতো ৰা ভৰেয্য, তং সব্বং হটং আনীতং হোতীতি যোজনা।
2645-6. Chandaṃ vā pārisuddhiṃ vā pavāraṇaṃ vā gahetvā chandādihārako saṅghamappatvā sace sāmaṇerādibhāvaṃ paṭijāneyya vā vibbhameyya vā mareyya vā, taṃ sabbaṃ chandādibhāvaṃ nāhaṭaṃ hoti, saṅghaṃ patvā evaṃ siyā sāmaṇerādibhāvaṃ paṭijānanto, vibbhanto, kālakato vā bhaveyya, taṃ sabbaṃ haṭaṃ ānītaṃ hotīti yojanā.
তত্থ সামণেরাদিভাৰং ৰা পটিজানেয্যাতি ‘‘অহং সামণেরো’’তিআদিনা ভূতং সামণেরাদিভাৰং কথেয্য, পচ্ছা সামণেরভূমিযং পতিট্ঠহেয্যাতি অত্থো। আদি-সদ্দেন অন্তিমৰত্থুং অজ্ঝাপন্নো গহিতো।
Tattha sāmaṇerādibhāvaṃ vā paṭijāneyyāti ‘‘ahaṃ sāmaṇero’’tiādinā bhūtaṃ sāmaṇerādibhāvaṃ katheyya, pacchā sāmaṇerabhūmiyaṃ patiṭṭhaheyyāti attho. Ādi-saddena antimavatthuṃ ajjhāpanno gahito.
২৬৪৭. সঙ্ঘং পত্ৰাতি অন্তমসো তংতংকম্মপ্পত্তস্স চতুৰগ্গাদিসঙ্ঘস্স হত্থপাসং পত্ৰাতি অত্থো। পমত্তোতি পমাদং সতিসম্মোসং পত্তো। সুত্তোতি নিদ্দূপগতো। খিত্তচিত্তকোতি যক্খাদীহি ৰিক্খেপমাপাদিতচিত্তো। নারোচেতীতি অত্তনো ছন্দাদীনং আহটভাৰং একস্সাপি ভিক্খুনো ন কথেতি। সঞ্চিচ্চাতি সঞ্চেতেত্ৰা জানন্তোযেৰ অনাদরিযো নারোচেতি, দুক্কটং হোতি।
2647.Saṅghaṃ patvāti antamaso taṃtaṃkammappattassa catuvaggādisaṅghassa hatthapāsaṃ patvāti attho. Pamattoti pamādaṃ satisammosaṃ patto. Suttoti niddūpagato. Khittacittakoti yakkhādīhi vikkhepamāpāditacitto. Nārocetīti attano chandādīnaṃ āhaṭabhāvaṃ ekassāpi bhikkhuno na katheti. Sañciccāti sañcetetvā jānantoyeva anādariyo nāroceti, dukkaṭaṃ hoti.
২৬৪৮. যে তেতি যে তে ভিক্খূ থেরা ৰা নৰা ৰা মজ্ঝিমা ৰা। ৰিপস্সনাতি সহচরিযেন সমথোপি গয্হতি। সমথৰিপস্সনা চ ইধ তরুণাযেৰ অধিপ্পেতা, তস্মা ৰিপস্সনাযুত্তাতি এত্থ তরুণাহি সমথৰিপস্সনাহি সমন্নাগতাতি অত্থো। রত্তিন্দিৰন্তি অচ্চন্তসংযোগে উপযোগৰচনং। অতন্দিতাতি অনলসা।
2648.Ye teti ye te bhikkhū therā vā navā vā majjhimā vā. Vipassanāti sahacariyena samathopi gayhati. Samathavipassanā ca idha taruṇāyeva adhippetā, tasmā vipassanāyuttāti ettha taruṇāhi samathavipassanāhi samannāgatāti attho. Rattindivanti accantasaṃyoge upayogavacanaṃ. Atanditāti analasā.
‘‘রত্তিন্দিৰ’’ন্তি এত্থ রত্তি-সদ্দেন রত্তিযাযেৰ গহণং, উদাহু একদেসস্সাতি আহ ‘‘পুব্বরত্তাপররত্ত’’ন্তি। পুব্বা চ সা রত্তি চাতি পুব্বরত্তি, পঠমযামো, অপরা চ সা রত্তি চাতি অপররত্তি, পচ্ছিমযামো, পুব্বরত্তি চ অপররত্তি চাতি সমাহারদ্ৰন্দে সমাসন্তে অ-কারপচ্চযং কত্ৰা ‘‘পুব্বরত্তাপররত্ত’’ন্তি ৰুত্তং। ইধাপি অচ্চন্তসংযোগে উপযোগৰচনং। মজ্ঝিমযামে কাযদরথৰূপসমনত্থায সুপনং অনুঞ্ঞাতন্তি তং ৰজ্জেত্ৰা পুরিমপচ্ছিমযামেসু নিরন্তরভাৰনানুযোগো কাতব্বোতি দস্সনত্থমেৰ ৰুত্তং। ৰিপস্সনা পরাযনা সমথৰিপস্সনাৰ পরং অযনং পতিট্ঠা এতেসন্তি ৰিপস্সনাপরাযনা, সমথৰিপস্সনায যুত্তপযুত্তা হোন্তীতি ৰুত্তং হোতি।
‘‘Rattindiva’’nti ettha ratti-saddena rattiyāyeva gahaṇaṃ, udāhu ekadesassāti āha ‘‘pubbarattāpararatta’’nti. Pubbā ca sā ratti cāti pubbaratti, paṭhamayāmo, aparā ca sā ratti cāti apararatti, pacchimayāmo, pubbaratti ca apararatti cāti samāhāradvande samāsante a-kārapaccayaṃ katvā ‘‘pubbarattāpararatta’’nti vuttaṃ. Idhāpi accantasaṃyoge upayogavacanaṃ. Majjhimayāme kāyadarathavūpasamanatthāya supanaṃ anuññātanti taṃ vajjetvā purimapacchimayāmesu nirantarabhāvanānuyogo kātabboti dassanatthameva vuttaṃ. Vipassanā parāyanā samathavipassanāva paraṃ ayanaṃ patiṭṭhā etesanti vipassanāparāyanā, samathavipassanāya yuttapayuttā hontīti vuttaṃ hoti.
২৬৪৯. লদ্ধো ফাসুৰিহারো যেহি তে লদ্ধফাসুৰিহারা, তেসং। ফাসুৰিহারোতি চ সুখৰিহারস্স মূলকারণত্তা তরুণা সমথৰিপস্সনা অধিপ্পেতা, পটিলদ্ধতরুণসমথৰিপস্সনানন্তি অত্থো। সিযা ন পরিহানিতি পরিহানি নাম এৰং কতে ন ভৰেয্য।
2649. Laddho phāsuvihāro yehi te laddhaphāsuvihārā, tesaṃ. Phāsuvihāroti ca sukhavihārassa mūlakāraṇattā taruṇā samathavipassanā adhippetā, paṭiladdhataruṇasamathavipassanānanti attho. Siyā na parihāniti parihāni nāma evaṃ kate na bhaveyya.
কত্তিকমাসকেতি চীৰরমাসসঙ্খাতে কত্তিকমাসে পৰারণায সঙ্গহো ৰুত্তোতি যোজনা। গাথাবন্ধৰসেন ‘‘সঙ্গাহো’’তি দীঘো কতো, পৰারণাসঙ্গহো ৰুত্তোতি অত্থো। যথাহ –
Kattikamāsaketi cīvaramāsasaṅkhāte kattikamāse pavāraṇāya saṅgaho vuttoti yojanā. Gāthābandhavasena ‘‘saṅgāho’’ti dīgho kato, pavāraṇāsaṅgaho vuttoti attho. Yathāha –
‘‘পৰারণাসঙ্গহো চ নামাযং ৰিস্সট্ঠকম্মট্ঠানানং থামগতসমথৰিপস্সনানং সোতাপন্নাদীনঞ্চ ন দাতব্বো। তরুণসমথৰিপস্সনালাভিনো পন সব্বে ৰা হোন্তু, উপড্ঢা ৰা, একপুগ্গলো ৰা, একস্সপি ৰসেন দাতব্বোযেৰ। দিন্নে পৰারণাসঙ্গহে অন্তোৰস্সে পরিহারোৰ হোতি, আগন্তুকা তেসং সেনাসনং গহেতুং ন লভন্তি। তেহিপি ছিন্নৰস্সেহি ন ভৰিতব্বং, পৰারেত্ৰা পন অন্তরাপি চারিকং পক্কমিতুং লভন্তী’’তি (মহাৰ॰ অট্ঠ॰ ২৪১)।
‘‘Pavāraṇāsaṅgaho ca nāmāyaṃ vissaṭṭhakammaṭṭhānānaṃ thāmagatasamathavipassanānaṃ sotāpannādīnañca na dātabbo. Taruṇasamathavipassanālābhino pana sabbe vā hontu, upaḍḍhā vā, ekapuggalo vā, ekassapi vasena dātabboyeva. Dinne pavāraṇāsaṅgahe antovasse parihārova hoti, āgantukā tesaṃ senāsanaṃ gahetuṃ na labhanti. Tehipi chinnavassehi na bhavitabbaṃ, pavāretvā pana antarāpi cārikaṃ pakkamituṃ labhantī’’ti (mahāva. aṭṭha. 241).
পৰারণাসঙ্গহস্স দানপ্পকারো পন পাল়িতো গহেতব্বো।
Pavāraṇāsaṅgahassa dānappakāro pana pāḷito gahetabbo.
পৰারণক্খন্ধককথাৰণ্ণনা।
Pavāraṇakkhandhakakathāvaṇṇanā.
