| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
7. பவாரணானித்³தே³ஸவண்ணனா
7. Pavāraṇāniddesavaṇṇanā
73. இதா³னி பவாரணாவிதி⁴ங் த³ஸ்ஸேதுங் ‘‘பவாரணா’’தி (பாசி॰ 238-239; பாசி॰ அட்ட²॰ 238-239; கங்கா²॰ அட்ட²॰ பட²மபவாரணாஸிக்கா²பத³வண்ணனா) பத³ங் உத்³த⁴டங். தத்த² இரியாபதே²னாதி டா²னக³மனஸயனநிஸஜ்ஜானங் அஞ்ஞதரேன இரியாபதே²னாதி அத்தோ². ததோ இரியாபத²தோ அஞ்ஞேன இரியாபதே²ன அனதிரித்தகங் பரிபு⁴ஞ்ஜெய்ய சே, பாசித்தியந்தி அத்தோ². பாசித்தினதிரித்தகந்தி பாசித்தி அனதிரித்தகங்.
73. Idāni pavāraṇāvidhiṃ dassetuṃ ‘‘pavāraṇā’’ti (pāci. 238-239; pāci. aṭṭha. 238-239; kaṅkhā. aṭṭha. paṭhamapavāraṇāsikkhāpadavaṇṇanā) padaṃ uddhaṭaṃ. Tattha iriyāpathenāti ṭhānagamanasayananisajjānaṃ aññatarena iriyāpathenāti attho. Tato iriyāpathato aññena iriyāpathena anatirittakaṃ paribhuñjeyya ce, pācittiyanti attho. Pācittinatirittakanti pācitti anatirittakaṃ.
74. இதா³னி யேஹி அங்கே³ஹி பவாரணா ஹோதி, தானி அங்கா³னி த³ஸ்ஸேதுங் ‘‘அஸன’’ந்திஆதி³மாஹ. தத்த² அஸனந்தி ஏதேன அவிப்பகதபோ⁴ஜனதா வுத்தா, பு⁴ஞ்ஜமானோ ச ஸோ புக்³க³லோ ஹோதீதி அத்தோ². போ⁴ஜனஞ்சேவாதி யங் பு⁴ஞ்ஜந்தோ பவாரேதி, தங் ஓத³னோ கும்மாஸோ ஸத்து மச்சோ² மங்ஸந்தி இமேஸு அஞ்ஞதரங் ஹோதீதி அத்தோ². அபி⁴ஹாரோதி தா³யகோ தஸ்ஸ தங் ப⁴த்தங் காயேன அபி⁴ஹரதீதி அத்தோ², வாசாபி⁴ஹாரோ பன ந க³ஹேதப்³போ³. ஸமீபதாதி தா³யகோ பவாரணப்பஹோனகபோ⁴ஜனங் க³ஹெத்வா அட்³ட⁴தெய்யஹத்த²ப்பமாணே ஓகாஸே ஹோதீதி அத்தோ². காயவாசாபடிக்கே²போதி ஹத்த²பாஸே டி²தேன அபி⁴ஹடங் பி⁴க்க²ங் காயேன வா வாசாய வா படிக்கி²பெய்யாதி அத்தோ². எத்த² பன ஸசே பி⁴க்கு² நிஸின்னோ ஹோதி, ஆனிஸத³ஸ்ஸ பாரிமந்ததோ பட்டா²ய, ஸசே டி²தோ, பண்ஹிஅந்ததோ பட்டா²ய, ஸசே நிபன்னோ, யேன பஸ்ஸேன நிபன்னோ, தஸ்ஸ பாரிமந்ததோ பட்டா²ய தா³யகஸ்ஸாபி ததா²வித⁴ஸ்ஸ ட²பெத்வா பஸாரிதஹத்த²ங் யங் தஸ்ஸ ஆஸன்னதரங் அங்க³ங், தஸ்ஸ வஸேன பரிச்சே²தோ³ காதப்³போ³. பஞ்ச அங்கா³ பவாரணாதி ‘‘அஸனங் பஞ்ஞாயதி, போ⁴ஜனங் பஞ்ஞாயதி, ஹத்த²பாஸே டி²தோ அபி⁴ஹரதி, படிக்கே²போ பஞ்ஞாயதீ’’தி (பாசி॰ 239; பரி॰ 428) பாளியங் வுத்தேஹி இமேஹி பஞ்சஹி அங்கே³ஹி பவாரணா ஹோதீதி அத்தோ².
74. Idāni yehi aṅgehi pavāraṇā hoti, tāni aṅgāni dassetuṃ ‘‘asana’’ntiādimāha. Tattha asananti etena avippakatabhojanatā vuttā, bhuñjamāno ca so puggalo hotīti attho. Bhojanañcevāti yaṃ bhuñjanto pavāreti, taṃ odano kummāso sattu maccho maṃsanti imesu aññataraṃ hotīti attho. Abhihāroti dāyako tassa taṃ bhattaṃ kāyena abhiharatīti attho, vācābhihāro pana na gahetabbo. Samīpatāti dāyako pavāraṇappahonakabhojanaṃ gahetvā aḍḍhateyyahatthappamāṇe okāse hotīti attho. Kāyavācāpaṭikkhepoti hatthapāse ṭhitena abhihaṭaṃ bhikkhaṃ kāyena vā vācāya vā paṭikkhipeyyāti attho. Ettha pana sace bhikkhu nisinno hoti, ānisadassa pārimantato paṭṭhāya, sace ṭhito, paṇhiantato paṭṭhāya, sace nipanno, yena passena nipanno, tassa pārimantato paṭṭhāya dāyakassāpi tathāvidhassa ṭhapetvā pasāritahatthaṃ yaṃ tassa āsannataraṃ aṅgaṃ, tassa vasena paricchedo kātabbo. Pañca aṅgā pavāraṇāti ‘‘asanaṃ paññāyati, bhojanaṃ paññāyati, hatthapāse ṭhito abhiharati, paṭikkhepo paññāyatī’’ti (pāci. 239; pari. 428) pāḷiyaṃ vuttehi imehi pañcahi aṅgehi pavāraṇā hotīti attho.
75. இதா³னி ஏதேஸு பஞ்சஸு போ⁴ஜனங் த³ஸ்ஸேதுங் ‘‘ஓத³னோ’’திஆதி³ வுத்தங். இதா³னி ஓத³னாத³யோ இமேஹி நிப்³ப³த்தாதி த³ஸ்ஸேதுங் ‘‘ஸாலீ’’திஆதி³மாஹ. தத்த² ஸேதரத்தகாளபே⁴தா³ ஸப்³பா³பி கங்கு³ஜாதியோ கங்கூ³தி க³ஹேதப்³பா³. காளஸேதா குத்³ரூஸவரகா. இமேஸங் ஸத்தன்னங் த⁴ஞ்ஞானங் ஓத³னோ ச போ⁴ஜ்ஜயாகு³ ச ஓத³னோ நாமாதி அத்தோ².
75. Idāni etesu pañcasu bhojanaṃ dassetuṃ ‘‘odano’’tiādi vuttaṃ. Idāni odanādayo imehi nibbattāti dassetuṃ ‘‘sālī’’tiādimāha. Tattha setarattakāḷabhedā sabbāpi kaṅgujātiyo kaṅgūti gahetabbā. Kāḷasetā kudrūsavarakā. Imesaṃ sattannaṃ dhaññānaṃ odano ca bhojjayāgu ca odano nāmāti attho.
76. ஸாமாகாதி³திணங் (பாசி॰ அட்ட²॰ 238-239) குத்³ரூஸகே ஸங்க³ஹங் க³தந்தி அத்தோ². வரகசோரகோ வரகே ஸங்க³ஹங் க³தோ, ஸாலியஞ்சேவ நீவாரோ ஸங்க³ஹங் க³தோ ஸேதத்தாதி வத³ந்தி. இமேஸங் வுத்தப்பகாரானங் ஸானுலோமானங் ஸத்தன்னங் த⁴ஞ்ஞானங் தண்டு³லே க³ஹெத்வா ‘‘யாகு³ங் பசிஸ்ஸாமா’’தி வா ‘‘ப⁴த்தங் பசிஸ்ஸாமா’’தி வா யங் கிஞ்சி ஸந்தா⁴ய பசந்தி, ஸசே உண்ஹங் வா ஸீதலங் வா பு⁴ஞ்ஜந்தானங் போ⁴ஜனகாலே க³ஹிதக³ஹிதட்டா²னே ஓதி⁴ பஞ்ஞாயதி, அயங் ஓத³னோ நாம, பவாரணங் ஜனேதி. யோபி பாயாஸோ வா அம்பி³லயாகு³ வா உத்³த⁴னதோ ஓதாரிதமத்தா அப்³பு⁴ண்ஹா ஆவிஜ்ஜி²த்வா பிவிதுங் ஸக்கா, க³ஹிதோகாஸேபி ஓதி⁴ங் ந த³ஸ்ஸேதி, அயங் பவாரணங் ந ஜனேதி. உஸுமாய பன விக³தாய க⁴னபா⁴வங் க³ச்ச²தி, ஓதி⁴ பஞ்ஞாயதி, புன பவாரணங் ஜனேதி, புப்³பே³ தனுகபா⁴வோ ந ரக்க²தி. ப⁴த்தே பன உத³ககஞ்ஜிககீ²ராதீ³னி ஆகிரித்வா ‘‘யாகு³ங் க³ண்ஹதா²’’தி வத³ந்தி, கிஞ்சாபி தனுகா ஹோதி, பவாரணங் ஜனேதியேவ தஸ்மிங் யாகு³யா நத்தி²பா⁴வதோ. ஸசே பன பக்குதி²தேஸு உத³காதீ³ஸு பக்கி²பித்வா பசித்வா தெ³ந்தி, யாகு³ஸங்க³ஹமேவ க³ச்ச²தி.
76. Sāmākāditiṇaṃ (pāci. aṭṭha. 238-239) kudrūsake saṅgahaṃ gatanti attho. Varakacorako varake saṅgahaṃ gato, sāliyañceva nīvāro saṅgahaṃ gato setattāti vadanti. Imesaṃ vuttappakārānaṃ sānulomānaṃ sattannaṃ dhaññānaṃ taṇḍule gahetvā ‘‘yāguṃ pacissāmā’’ti vā ‘‘bhattaṃ pacissāmā’’ti vā yaṃ kiñci sandhāya pacanti, sace uṇhaṃ vā sītalaṃ vā bhuñjantānaṃ bhojanakāle gahitagahitaṭṭhāne odhi paññāyati, ayaṃ odano nāma, pavāraṇaṃ janeti. Yopi pāyāso vā ambilayāgu vā uddhanato otāritamattā abbhuṇhā āvijjhitvā pivituṃ sakkā, gahitokāsepi odhiṃ na dasseti, ayaṃ pavāraṇaṃ na janeti. Usumāya pana vigatāya ghanabhāvaṃ gacchati, odhi paññāyati, puna pavāraṇaṃ janeti, pubbe tanukabhāvo na rakkhati. Bhatte pana udakakañjikakhīrādīni ākiritvā ‘‘yāguṃ gaṇhathā’’ti vadanti, kiñcāpi tanukā hoti, pavāraṇaṃ janetiyeva tasmiṃ yāguyā natthibhāvato. Sace pana pakkuthitesu udakādīsu pakkhipitvā pacitvā denti, yāgusaṅgahameva gacchati.
77. ப⁴ட்ட²த⁴ஞ்ஞமயோதி ஸத்தவிதா⁴னிபி த⁴ஞ்ஞானி க³ஹெத்வா க²ரபாகப⁴ஜ்ஜிதானங் தேஸங் தண்டு³லே கொட்டெத்வா கதசுண்ணகுண்ட³கானி ஸத்து நாம. ஸமபாகப⁴ஜ்ஜிதானங் பன ஆதபஸுக்கா²னங் வா தண்டு³லானங் சுண்ணகுண்ட³கானி ஸத்துஸங்க்²யங் ந க³ச்ச²ந்தி. யவஸம்ப⁴வோதி அஞ்ஞேஹி பன முக்³கா³தீ³ஹி கதகும்மாஸோ ந பவாரேதீதி அதி⁴ப்பாயோ. உத³கஸம்ப⁴வோதி இமினா கக்கடகஸிப்பிகஸம்பு³காத³யோபி ஸங்க³ஹங் க³ச்ச²ந்தி. ஸசே யாகு³பானகாலே ஏகஸ்மிங் பா⁴ஜனே ட²பெத்வா மச்ச²மங்ஸங் வா கா²த³ந்தி, தே சே அகா²த³ந்தோ அஞ்ஞங் பவாரணப்பஹோனகங் படிக்கி²பதி, ந பவாரேதி. கா²தி³தேபி ஸசே முகே² அவஸிட்ட²ங் நத்தி², ததா³ படிக்கி²பந்தோபி ந பவாரேதியேவ. ஸசே பத்தே அவஸிட்ட²ங் அத்தி², முகே² நத்தி², தஞ்சே அகா²தி³துகாமோ ஹோதி, அஞ்ஞத்த² வா க³ந்த்வா கா²தி³துகாமோ, தஸ்மிங் க²ணே படிக்கி²பந்தோபி ந பவாரேதியேவ.
77.Bhaṭṭhadhaññamayoti sattavidhānipi dhaññāni gahetvā kharapākabhajjitānaṃ tesaṃ taṇḍule koṭṭetvā katacuṇṇakuṇḍakāni sattu nāma. Samapākabhajjitānaṃ pana ātapasukkhānaṃ vā taṇḍulānaṃ cuṇṇakuṇḍakāni sattusaṅkhyaṃ na gacchanti. Yavasambhavoti aññehi pana muggādīhi katakummāso na pavāretīti adhippāyo. Udakasambhavoti iminā kakkaṭakasippikasambukādayopi saṅgahaṃ gacchanti. Sace yāgupānakāle ekasmiṃ bhājane ṭhapetvā macchamaṃsaṃ vā khādanti, te ce akhādanto aññaṃ pavāraṇappahonakaṃ paṭikkhipati, na pavāreti. Khāditepi sace mukhe avasiṭṭhaṃ natthi, tadā paṭikkhipantopi na pavāretiyeva. Sace patte avasiṭṭhaṃ atthi, mukhe natthi, tañce akhāditukāmo hoti, aññattha vā gantvā khāditukāmo, tasmiṃ khaṇe paṭikkhipantopi na pavāretiyeva.
78. போ⁴ஜனந்தி (பாசி॰ அட்ட²॰ 238-239) பஞ்சஸு போ⁴ஜனேஸு யங் கிஞ்சி போ⁴ஜனங். கப்பியங் வா அகப்பியங் வா பு⁴ஞ்ஜந்தோதி ஸம்ப³ந்தோ⁴. நிஸேத⁴யந்தி காயேனாபி⁴ஹடங் அங்கு³லிசலனாதி³னா வா ப⁴முகவிகாரேன வா குத்³த⁴பா⁴வேன ஓலோகேன வா படிக்கி²பந்தோ காயேன வா ‘‘அல’’ந்தி வா ‘‘ந க³ண்ஹாமீ’’தி வா ‘‘மா ஆகிரா’’தி வா ‘‘அபக³ச்சா²’’தி வா ஆதி³னா நயேன படிக்கி²பந்தோ வாசாய வா நிஸேத⁴யந்தோதி அத்தோ². கப்பந்தி கப்பியபோ⁴ஜனமேவ படிக்கி²பந்தோ ஸோ பவாரேதி, அகப்பியமங்ஸங் வா போ⁴ஜனங் வா படிக்கி²பந்தோ ந பவாரேதி. கஸ்மா? தஸ்ஸ படிக்கி²பிதப்³ப³ட்டா²னே டி²தத்தா. ஸசே கப்பியபோ⁴ஜனங் பு⁴ஞ்ஜமானோ அகப்பியங் படிக்கி²பதி, ந பவாரேதி. கஸ்மா? தஸ்ஸ படிக்கி²பிதப்³ப³தோ. இதா³னி மிஸ்ஸகனயங் த³ஸ்ஸேதுங் ‘‘தன்னாமேனா’’திஆதி³ வுத்தங். தத்ராயங் பிண்ட³த்தோ² – தன்னாமேன வா இமந்தி வா அபி⁴ஹடங் கப்பியங் நிஸேத⁴யங் பவாரெய்யாதி. கிங் வுத்தங் ஹோதி? யோ பன மச்ச²மங்ஸமிஸ்ஸங் (கங்கா²॰ அட்ட²॰ பட²மபவாரணாஸிக்கா²பத³வண்ணனா; பாசி॰ அட்ட²॰ 238-239) யாகு³ங் ப்³யஞ்ஜனங் வா ஆஹரித்வா ‘‘மச்ச²ங் க³ண்ஹத², மங்ஸங் க³ண்ஹதா²’’தி வத³தி, தங் படிக்கி²பதோ பவாரணா ஹோதி. ஸசே ‘‘யாகு³ங் க³ண்ஹத², ரஸப்³யஞ்ஜனங் க³ண்ஹதா²’’தி வத³தி, தங் படிக்கி²பதோ பவாரணா ந ஹோதி. கஸ்மா? தஸ்ஸாபி அத்தி²தாய. ஸசே ‘‘இமங் க³ண்ஹதா²’’தி ஸவத்து²கங் கத்வா தே³தி, தங் படிக்கி²பதோ பவாரணா ஹோதி. ப⁴த்தமிஸ்ஸகேபி ஏஸேவ நயோ. ஸசே அஞ்ஞஸ்ஸ அபி⁴ஹடங் படிக்கி²பதி, பவாரணா நத்தி²யேவ.
78.Bhojananti (pāci. aṭṭha. 238-239) pañcasu bhojanesu yaṃ kiñci bhojanaṃ. Kappiyaṃ vā akappiyaṃ vā bhuñjantoti sambandho. Nisedhayanti kāyenābhihaṭaṃ aṅgulicalanādinā vā bhamukavikārena vā kuddhabhāvena olokena vā paṭikkhipanto kāyena vā ‘‘ala’’nti vā ‘‘na gaṇhāmī’’ti vā ‘‘mā ākirā’’ti vā ‘‘apagacchā’’ti vā ādinā nayena paṭikkhipanto vācāya vā nisedhayantoti attho. Kappanti kappiyabhojanameva paṭikkhipanto so pavāreti, akappiyamaṃsaṃ vā bhojanaṃ vā paṭikkhipanto na pavāreti. Kasmā? Tassa paṭikkhipitabbaṭṭhāne ṭhitattā. Sace kappiyabhojanaṃ bhuñjamāno akappiyaṃ paṭikkhipati, na pavāreti. Kasmā? Tassa paṭikkhipitabbato. Idāni missakanayaṃ dassetuṃ ‘‘tannāmenā’’tiādi vuttaṃ. Tatrāyaṃ piṇḍattho – tannāmena vā imanti vā abhihaṭaṃ kappiyaṃ nisedhayaṃ pavāreyyāti. Kiṃ vuttaṃ hoti? Yo pana macchamaṃsamissaṃ (kaṅkhā. aṭṭha. paṭhamapavāraṇāsikkhāpadavaṇṇanā; pāci. aṭṭha. 238-239) yāguṃ byañjanaṃ vā āharitvā ‘‘macchaṃ gaṇhatha, maṃsaṃ gaṇhathā’’ti vadati, taṃ paṭikkhipato pavāraṇā hoti. Sace ‘‘yāguṃ gaṇhatha, rasabyañjanaṃ gaṇhathā’’ti vadati, taṃ paṭikkhipato pavāraṇā na hoti. Kasmā? Tassāpi atthitāya. Sace ‘‘imaṃ gaṇhathā’’ti savatthukaṃ katvā deti, taṃ paṭikkhipato pavāraṇā hoti. Bhattamissakepi eseva nayo. Sace aññassa abhihaṭaṃ paṭikkhipati, pavāraṇā natthiyeva.
79-80. இதா³னி பவாரணங் அஜனெந்தே த³ஸ்ஸேதுங் ‘‘லாஜா’’திஆதி³ வுத்தங். எத்த² லாஜா தங்ஸத்துப⁴த்தானீதி (கங்கா²॰ அட்ட²॰ பட²மபவாரணாஸிக்கா²பத³வண்ணனா) லாஜா ச லாஜேஹி கதஸத்துப⁴த்தானி சாதி அத்தோ². மச்ச²மங்ஸபூவேஸு பன பவாரணா ஹோதி, தஸ்மா ‘‘ஸுத்³த⁴க²ஜ்ஜகோ’’தி வுத்தங். ப⁴ட்ட²பிட்ட²ந்தி புப்³பே³ ஆமகங் பச்சா² ப⁴ஜ்ஜிதப்³ப³ந்தி வுத்தங் ஹோதி. வேளுஆதீ³னங் வுத்தாவஸேஸானங் ப⁴த்தந்தி ஸம்ப³ந்தோ⁴. ரஸயாகு³ ரஸோ பக்கயாகு³. மங்ஸாதீ³ஹி அமிஸ்ஸிதா ஸுத்³த⁴யாகு³. புது²காமயங் பன யங் கிஞ்சி பவாரணங் ந ஜனேதி.
79-80. Idāni pavāraṇaṃ ajanente dassetuṃ ‘‘lājā’’tiādi vuttaṃ. Ettha lājā taṃsattubhattānīti (kaṅkhā. aṭṭha. paṭhamapavāraṇāsikkhāpadavaṇṇanā) lājā ca lājehi katasattubhattāni cāti attho. Macchamaṃsapūvesu pana pavāraṇā hoti, tasmā ‘‘suddhakhajjako’’ti vuttaṃ. Bhaṭṭhapiṭṭhanti pubbe āmakaṃ pacchā bhajjitabbanti vuttaṃ hoti. Veḷuādīnaṃ vuttāvasesānaṃ bhattanti sambandho. Rasayāgu raso pakkayāgu. Maṃsādīhi amissitā suddhayāgu. Puthukāmayaṃ pana yaṃ kiñci pavāraṇaṃ na janeti.
81. வுட்டா²யாதி (பாசி॰ அட்ட²॰ 238-239) ஆஸனா உட்டா²ய அதிரித்தங் ந காதப்³ப³ந்தி ஸம்ப³ந்தோ⁴. ஸசே பவாரெத்வா ஆஸனா ந வுட்டா²தி பி⁴க்கு², தஸ்ஸாபி அதிரித்தங் காதுங் லப⁴தி. அபு⁴த்தேன ச போ⁴ஜனந்தி யேன பஞ்சன்னங் போ⁴ஜனானங் அஞ்ஞதரங் போ⁴ஜனங் அந்தமஸோ குஸக்³கே³னாபி ந பு⁴த்தங், தேனாபி அதிரித்தங் ந காதப்³ப³ந்தி அத்தோ². யேன பன அருணுக்³க³மேபி பு⁴த்தங் ஹோதி, ஸோ சே அபவாரிதோ ஆஸனா வுட்டி²தோபி மஜ்ஜ²ன்ஹிகஸமயேபி புன கிஞ்சி அபு⁴த்வாபி காதுங் லப⁴தி. யேன யங் வா புரே கதந்தி யேன யங் வா புப்³பே³ கதங், தேன தம்பி பச்சா² ந காதப்³ப³ங். அஞ்ஞேன பன தங் காதுங் வட்டதீதி வத³ந்தி.
81.Vuṭṭhāyāti (pāci. aṭṭha. 238-239) āsanā uṭṭhāya atirittaṃ na kātabbanti sambandho. Sace pavāretvā āsanā na vuṭṭhāti bhikkhu, tassāpi atirittaṃ kātuṃ labhati. Abhuttena ca bhojananti yena pañcannaṃ bhojanānaṃ aññataraṃ bhojanaṃ antamaso kusaggenāpi na bhuttaṃ, tenāpi atirittaṃ na kātabbanti attho. Yena pana aruṇuggamepi bhuttaṃ hoti, so ce apavārito āsanā vuṭṭhitopi majjhanhikasamayepi puna kiñci abhutvāpi kātuṃ labhati. Yena yaṃ vāpure katanti yena yaṃ vā pubbe kataṃ, tena tampi pacchā na kātabbaṃ. Aññena pana taṃ kātuṃ vaṭṭatīti vadanti.
82. யங் ப²லங் வா கந்த³மூலங் வா பஞ்சஹி ஸமணகப்பேஹி கதகப்பியங் அஞ்ஞம்பி கப்பியபோ⁴ஜனங் வா கப்பியமங்ஸங் வா, இத³ங் கப்பியங் நாம, வுத்தப்பகாரவிபரீதங் அகப்பியங் நாம, தஸ்மிங் அதிரித்தகரணங் ந ருஹதி, யஞ்ச படிக்³க³ஹெத்வா ந க³ஹிதங், தஸ்மிம்பி ந ருஹதி, தேன வுத்தங் ‘‘கப்பியங் க³ஹிதஞ்சேவா’’தி. உச்சாரிதந்தி கப்பியங் காரேதுங் ஆக³தேன பி⁴க்கு²னா ஈஸகம்பி உக்கி²த்தங் வா அபனமிதங் வாதி அத்தோ². ஹத்த²பாஸதோ ப³ஹி டி²தங் காதுங் ந வட்டதி, தேன வுத்தங் ‘‘ஹத்த²பாஸக³’’ந்தி. அதிரித்தங் கரொந்தேவந்தி அதிரித்தங் கரொந்தோ ‘‘அலமேதங் ஸப்³ப³’’ந்தி வசீபே⁴த³ங் கத்வா ஏவங் பா⁴ஸதூதி அத்தோ². ‘‘அலமேதங் ஸப்³ப³’’ந்தி திக்க²த்துங் வத்தப்³ப³ங், அயங் கிர ஆசிண்ணோ. வினயத⁴ரா கிர பன ‘‘ஸகிங் ஏவ வத்தப்³ப³’’ந்தி வத³ந்தி. அலமேதங் ஸப்³ப³ந்தி இத³ம்பி வோ அதி⁴கங், இதோ அஞ்ஞங் ந லச்ச²ஸீதி அத்தோ².
82. Yaṃ phalaṃ vā kandamūlaṃ vā pañcahi samaṇakappehi katakappiyaṃ aññampi kappiyabhojanaṃ vā kappiyamaṃsaṃ vā, idaṃ kappiyaṃ nāma, vuttappakāraviparītaṃ akappiyaṃ nāma, tasmiṃ atirittakaraṇaṃ na ruhati, yañca paṭiggahetvā na gahitaṃ, tasmimpi na ruhati, tena vuttaṃ ‘‘kappiyaṃ gahitañcevā’’ti. Uccāritanti kappiyaṃ kāretuṃ āgatena bhikkhunā īsakampi ukkhittaṃ vā apanamitaṃ vāti attho. Hatthapāsato bahi ṭhitaṃ kātuṃ na vaṭṭati, tena vuttaṃ ‘‘hatthapāsaga’’nti. Atirittaṃ karontevanti atirittaṃ karonto ‘‘alametaṃ sabba’’nti vacībhedaṃ katvā evaṃ bhāsatūti attho. ‘‘Alametaṃ sabba’’nti tikkhattuṃ vattabbaṃ, ayaṃ kira āciṇṇo. Vinayadharā kira pana ‘‘sakiṃ eva vattabba’’nti vadanti. Alametaṃ sabbanti idampi vo adhikaṃ, ito aññaṃ na lacchasīti attho.
83. அனுபஸம்பன்னஹத்த²க³ந்தி கப்பியங் கரொந்தேன பன அனுபஸம்பன்னஸ்ஸ ஹத்தே² டி²தங்யேவ ந காதப்³ப³ங், தங் பன அஞ்ஞேன பி⁴க்கு²னா படிக்³க³ஹாபெத்வா தஸ்ஸ ஹத்தே² டி²தங் அதிரித்தங் கத்வா அனுபஸம்பன்னஸ்ஸ தா³துங் வட்டதி. அத்தனா ஆக³ந்த்வா அஞ்ஞஸ்ஸ ஹத்தே² ச பேஸயித்வாபி காரேதுங் லப்³ப⁴தேதி அத்தோ². தங் பன அதிரித்தகாரகங் ட²பெத்வா அஞ்ஞோ ஸப்³போ³ பவாரிதோபி அப்பவாரிதோபி பு⁴ஞ்ஜிதுங் லப⁴தீதி அத்தோ². ஸசே பவாரிதோ பரிபு⁴ஞ்ஜதி, யதா² அகதேன மிஸ்ஸங் ந ஹோதி, ததா² முக²ஞ்ச ஹத்த²ஞ்ச ஸுத்³த⁴ங் கத்வா பு⁴ஞ்ஜிதப்³ப³ங். கி³லானஸ்ஸ பு⁴த்தாவஸேஸம்பி தஸ்ஸ ‘‘அஜ்ஜ வா ஸ்வே வா கா²தி³ஸ்ஸதீ’’தி ஆஹடம்பி அனதிரித்தகதங் பு⁴ஞ்ஜிதுங் வட்டதீதி. பவாரணாவினிச்ச²யோ.
83.Anupasampannahatthaganti kappiyaṃ karontena pana anupasampannassa hatthe ṭhitaṃyeva na kātabbaṃ, taṃ pana aññena bhikkhunā paṭiggahāpetvā tassa hatthe ṭhitaṃ atirittaṃ katvā anupasampannassa dātuṃ vaṭṭati. Attanā āgantvā aññassa hatthe ca pesayitvāpi kāretuṃ labbhateti attho. Taṃ pana atirittakārakaṃ ṭhapetvā añño sabbo pavāritopi appavāritopi bhuñjituṃ labhatīti attho. Sace pavārito paribhuñjati, yathā akatena missaṃ na hoti, tathā mukhañca hatthañca suddhaṃ katvā bhuñjitabbaṃ. Gilānassa bhuttāvasesampi tassa ‘‘ajja vā sve vā khādissatī’’ti āhaṭampi anatirittakataṃ bhuñjituṃ vaṭṭatīti. Pavāraṇāvinicchayo.
பவாரணானித்³தே³ஸவண்ணனா நிட்டி²தா.
Pavāraṇāniddesavaṇṇanā niṭṭhitā.
