| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
7. பவாரணானித்³தே³ஸவண்ணனா
7. Pavāraṇāniddesavaṇṇanā
73. யேன இரியாபதே²ன உபலக்கி²தோ பஞ்சன்னங் போ⁴ஜனானங் யங் கிஞ்சி போ⁴ஜனங் பு⁴ஞ்ஜமானோ அயங் பி⁴க்கு² கப்பியானங் பஞ்சன்னங் போ⁴ஜனானங் ஹத்த²பாஸோபனீதானங் பவாரிதோ, ததோ இரியாபத²தோ அஞ்ஞேன இரியாபதே²ன அனதிரித்தகங் யாவகாலிகங் பு⁴ஞ்ஜெய்ய சே, இமஸ்ஸ பாசித்தி ஹோதீதி பத³த்த²யோஜனா. பு⁴ஞ்ஜனத்தா²ய படிக்³க³ஹணே பன து³க்கடங். தத்த² இரியாய காயிககிரியாய பதோ² பவத்தனூபாயோ இரியாபதோ², டா²னக³மனநிஸஜ்ஜனஸயனானி. பவாரேதி படிக்கி²பதீதி பவாரிதோ, அத² வா பவாரணங் படிக்கி²பனங் பவாரிதங், தமஸ்ஸ அத்தீ²தி பவாரிதோ, கதப்பவாரணோ கதப்படிக்கே²போதி அத்தோ², அத² வா பரிவேஸகேன வாரீயதீதி பவாரிதோ படிக்கே²பிதோ. அனதிரித்தகந்தி யங் பவாரெத்வா ஆஸனா வுட்ட²ஹந்தஸ்ஸ ‘‘அலமேதங் ஸப்³ப³’’ந்தி ஏவங் அதிரித்தகரணாதீ³ஹி ஸத்தஹி வினயகம்மாகாரேஹி கப்பியங் கதங், தஞ்ச ‘‘அஜ்ஜ வா யதா³ வா இச்ச²தி, ததா³ கா²தி³ஸ்ஸதீ’’தி ஆஹடங், கி³லானாதிரித்தஞ்ச அதிரித்தங் அதி⁴கந்தி வுச்சதி, ததோ அஞ்ஞங் அனதிரித்தகங் அனதி⁴கந்தி அத்தோ². குஸலங் சித்தங் பாதேதீதி பாசித்தி, தஸ்மா இத்தி²யங் திம்ஹி த-காரஸ்ஸ ச-காரே, த்³வித்தே ச பாசித்தி. யாமகாலிகங் ஸத்தாஹகாலிகங் யாவஜீவிகங் ஆஹாரத்தா²ய படிக்³க³ண்ஹதோ ஆபத்தி து³க்கடஸ்ஸ, அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ.
73. Yena iriyāpathena upalakkhito pañcannaṃ bhojanānaṃ yaṃ kiñci bhojanaṃ bhuñjamāno ayaṃ bhikkhu kappiyānaṃ pañcannaṃ bhojanānaṃ hatthapāsopanītānaṃ pavārito, tato iriyāpathato aññena iriyāpathena anatirittakaṃ yāvakālikaṃ bhuñjeyya ce, imassa pācitti hotīti padatthayojanā. Bhuñjanatthāya paṭiggahaṇe pana dukkaṭaṃ. Tattha iriyāya kāyikakiriyāya patho pavattanūpāyo iriyāpatho, ṭhānagamananisajjanasayanāni. Pavāreti paṭikkhipatīti pavārito, atha vā pavāraṇaṃ paṭikkhipanaṃ pavāritaṃ, tamassa atthīti pavārito, katappavāraṇo katappaṭikkhepoti attho, atha vā parivesakena vārīyatīti pavārito paṭikkhepito. Anatirittakanti yaṃ pavāretvā āsanā vuṭṭhahantassa ‘‘alametaṃ sabba’’nti evaṃ atirittakaraṇādīhi sattahi vinayakammākārehi kappiyaṃ kataṃ, tañca ‘‘ajja vā yadā vā icchati, tadā khādissatī’’ti āhaṭaṃ, gilānātirittañca atirittaṃ adhikanti vuccati, tato aññaṃ anatirittakaṃ anadhikanti attho. Kusalaṃ cittaṃ pātetīti pācitti, tasmā itthiyaṃ timhi ta-kārassa ca-kāre, dvitte ca pācitti. Yāmakālikaṃ sattāhakālikaṃ yāvajīvikaṃ āhāratthāya paṭiggaṇhato āpatti dukkaṭassa, ajjhohāre ajjhohāre āpatti dukkaṭassa.
74. இதா³னி யாய பவாரிதா, ஸா பஞ்சங்க³ஸம்பன்னாயேவ பவாரணா நாம ஹோதீதி த³ஸ்ஸேதுங் ‘‘அஸன’’ந்திஆதி³மாஹ. தத்த² அஸனந்தி பு⁴ஞ்ஜமானஸ்ஸ பு⁴ஞ்ஜனங். இமினா யங் விப்பகதங் போ⁴ஜனங், தங் த³ஸ்ஸேதி. போ⁴ஜனஞ்சேவாதி பவாரணப்பஹோனகங் போ⁴ஜனஞ்சேவ ஹோதீதி. அபி⁴ஹாரோதி தா³யகஸ்ஸ காயேன பவாரணப்பஹோனகஸ்ஸ அபி⁴ஹரணங், ந வாசாய. ஸமீபதாதி அட்³ட⁴தெய்யஹத்த²ப்பமாணஸங்கா²தா ஸமீபதா ச. எத்த² பன ஸசே பி⁴க்கு² நிஸின்னோ ஹோதி, ஆஸனஸ்ஸ பச்சி²மந்ததோ பட்டா²ய, ஸசே டி²தோ, பண்ஹிஅந்ததோ பட்டா²ய, ஸசே நிபன்னோ, யேன பஸ்ஸேன நிபன்னோ, தஸ்ஸ பாரிமந்ததோ பட்டா²ய தா³யகஸ்ஸ டி²தஸ்ஸ வா நிஸின்னஸ்ஸ வா நிபன்னஸ்ஸ வா ட²பெத்வா பஸாரிதஹத்த²ங் யங் ஆஸன்னதரங் அங்க³ங், தஸ்ஸ ஓரிமந்தேன பரிச்சி²ந்தி³த்வா அட்³ட⁴தெய்யஹத்த²பாஸோ வேதி³தப்³போ³. காயவாசாபடிக்கே²போதி தஸ்ஸ அபி⁴ஹடபோ⁴ஜனஸ்ஸ அங்கு³லிசலனாதி³காயவிகாரேன வா ‘‘அல’’ந்திஆதி³னா வசீவிகாரேன வா படிக்கி²பனங். இதி இமேஹி பஞ்சஹங்கே³ஹி பவாரணா பகாரயுத்தவாரணா பஞ்சஅங்கா³தி ஸம்ப³ந்தோ⁴. பஞ்ச அங்கா³னி யஸ்ஸா ஸா பஞ்சஅங்கா³.
74. Idāni yāya pavāritā, sā pañcaṅgasampannāyeva pavāraṇā nāma hotīti dassetuṃ ‘‘asana’’ntiādimāha. Tattha asananti bhuñjamānassa bhuñjanaṃ. Iminā yaṃ vippakataṃ bhojanaṃ, taṃ dasseti. Bhojanañcevāti pavāraṇappahonakaṃ bhojanañceva hotīti. Abhihāroti dāyakassa kāyena pavāraṇappahonakassa abhiharaṇaṃ, na vācāya. Samīpatāti aḍḍhateyyahatthappamāṇasaṅkhātā samīpatā ca. Ettha pana sace bhikkhu nisinno hoti, āsanassa pacchimantato paṭṭhāya, sace ṭhito, paṇhiantato paṭṭhāya, sace nipanno, yena passena nipanno, tassa pārimantato paṭṭhāya dāyakassa ṭhitassa vā nisinnassa vā nipannassa vā ṭhapetvā pasāritahatthaṃ yaṃ āsannataraṃ aṅgaṃ, tassa orimantena paricchinditvā aḍḍhateyyahatthapāso veditabbo. Kāyavācāpaṭikkhepoti tassa abhihaṭabhojanassa aṅgulicalanādikāyavikārena vā ‘‘ala’’ntiādinā vacīvikārena vā paṭikkhipanaṃ. Iti imehi pañcahaṅgehi pavāraṇā pakārayuttavāraṇā pañcaaṅgāti sambandho. Pañca aṅgāni yassā sā pañcaaṅgā.
75. இதா³னி ஏதேஸு ஓத³னாதி³பஞ்சவித⁴ங் போ⁴ஜனங் த³ஸ்ஸெத்வா தானி ச புன விப⁴ஜித்வா த³ஸ்ஸேதுங் ‘‘ஓத³னோ’’திஆதி³ ஆரத்³த⁴ங். தத்த² ஸாலீதி ரத்தஸாலிஆதி³கா ஸப்³பா³பி ஸாலிஜாதி. வீஹீதி ஸப்³பா³பி வீஹினாமிகா வீஹிஜாதி. கங்கூ³தி ஸேதரத்தகாளபே⁴தா³ ஸப்³பா³பி கங்கு³ஜாதி. குத்³ரூஸோ நாம காளகொத்³ரவோ. வரகோ நாம ஸேதவண்ணோ கொத்³ரவோ. யவகோ³து⁴மேஸு பன பே⁴தோ³ நத்தி². ஏவங் யதா²வுத்தானங் ஸானுலோமானங் ஸத்தன்னங் த⁴ஞ்ஞானங் போ⁴ஜ்ஜயாகு³ சாதி ஸம்ப³ந்தோ⁴. போ⁴ஜ்ஜயாகு³ சாதி உண்ஹங் வா ஸீதலங் வா பு⁴ஞ்ஜந்தானங் போ⁴ஜனகாலே க³ஹிதட்டா²னே ஓதி⁴ பஞ்ஞாயதி, ஸா போ⁴ஜ்ஜயாகு³. ச-ஸத்³தே³ன ஓத³னோ சாதி ஸம்ப³ந்தோ⁴ , ஓத³னோ நாமாதி அத்தோ². ஸசே பன ப⁴த்தே உத³ககஞ்ஜிககீ²ராதீ³னி ஆகிரித்வா ‘‘யாகு³ங் க³ண்ஹதா²’’தி தெ³ந்தி, கிஞ்சாபி தனுகா ஹோதி, பவாரணங் ஜனேதி. ஸசே பன உத³காதீ³ஸு பக்கி²பித்வா பசித்வா தெ³ந்தி, யாகு³ஸங்க³ஹமேவ க³ச்ச²தி. ஸசே பன தனுகாயபி யாகு³யா ஸாஸபமத்தம்பி மச்ச²மங்ஸக²ண்ட³ங் வா ந்ஹாரு வா பக்கி²த்தங் ஹோதி, பவாரணங் ஜனேதி.
75. Idāni etesu odanādipañcavidhaṃ bhojanaṃ dassetvā tāni ca puna vibhajitvā dassetuṃ ‘‘odano’’tiādi āraddhaṃ. Tattha sālīti rattasāliādikā sabbāpi sālijāti. Vīhīti sabbāpi vīhināmikā vīhijāti. Kaṅgūti setarattakāḷabhedā sabbāpi kaṅgujāti. Kudrūso nāma kāḷakodravo. Varako nāma setavaṇṇo kodravo. Yavagodhumesu pana bhedo natthi. Evaṃ yathāvuttānaṃ sānulomānaṃ sattannaṃ dhaññānaṃ bhojjayāgu cāti sambandho. Bhojjayāgu cāti uṇhaṃ vā sītalaṃ vā bhuñjantānaṃ bhojanakāle gahitaṭṭhāne odhi paññāyati, sā bhojjayāgu. Ca-saddena odano cāti sambandho , odano nāmāti attho. Sace pana bhatte udakakañjikakhīrādīni ākiritvā ‘‘yāguṃ gaṇhathā’’ti denti, kiñcāpi tanukā hoti, pavāraṇaṃ janeti. Sace pana udakādīsu pakkhipitvā pacitvā denti, yāgusaṅgahameva gacchati. Sace pana tanukāyapi yāguyā sāsapamattampi macchamaṃsakhaṇḍaṃ vā nhāru vā pakkhittaṃ hoti, pavāraṇaṃ janeti.
76. ஸாமாகாதி³திணங் குத்³ரூஸகே ஸங்க³ஹங் க³தங், வரகசோரகோ வரகே ஸங்க³ஹங் க³தோ, நீவாரோ சேவ ஸாலியங் ஸங்க³ஹங் க³தோதி யோஜனா. ஸாமாகாதி³திணந்தி ஸாமாகோ ஆதி³ யஸ்ஸ, தமேவ திணங் திணத⁴ஞ்ஞந்தி ஸமாஸோ.
76. Sāmākāditiṇaṃ kudrūsake saṅgahaṃ gataṃ, varakacorako varake saṅgahaṃ gato, nīvāro ceva sāliyaṃ saṅgahaṃ gatoti yojanā. Sāmākāditiṇanti sāmāko ādi yassa, tameva tiṇaṃ tiṇadhaññanti samāso.
77. ப⁴ட்ட²த⁴ஞ்ஞமயோதி க²ரபாகப⁴ஜ்ஜிதேஹி ஸத்தவிதே⁴ஹி த⁴ஞ்ஞேஹி கொட்டெத்வா கதோ, அந்தமஸோ சுண்ணம்பி குண்ட³கம்பி ஸத்து நாமாதி அத்தோ². ஸமபாகப⁴ஜ்ஜிதானங் பன ஆதபஸுக்கா²னங் வா தண்டு³லானங் ஸத்து வா குண்ட³கானி ஏவ வா ந பவாரெந்தி. யவேன ஸம்ப⁴வோ உப்பத்தி அஸ்ஸாதி யவஸம்ப⁴வோ, கும்மாஸோ கும்மாஸோ நாம. முக்³கா³தீ³ஹி கதோ பன பவாரணங் ந ஜனேதி. கப்பியோ சாதி கப்பியோயேவ மங்ஸோ ‘‘மங்ஸோ’’தி வுத்தோதி யோஜனா. சாதி அவதா⁴ரணே. அகப்பியோ பன படிக்கி²பிதப்³போ³வ. படிக்கி²த்தோபி ந பவாரேதி. உத³கே ஸம்ப⁴வோ யஸ்ஸ ஸோ மச்சோ² நாம. த்³வீஸு பனேதேஸு ஸசே யாகு³ங் பிவந்தஸ்ஸ யாகு³ஸித்த²மத்தேஸுபி மச்ச²க²ண்டே³ஸு வா மங்ஸக²ண்டே³ஸு வா ஏகங் கா²தி³தங் ஏகங் ஹத்தே² வா பத்தே வா ஹோதி, ஸோ சே அஞ்ஞங் படிக்கி²பதி, பவாரேதி. த்³வேபி கா²தி³தானி ஹொந்தி, முகே² ஸாஸபமத்தம்பி அவஸிட்ட²ங் நத்தி², ஸசேபி அஞ்ஞங் படிக்கி²பதி, ந பவாரேதி.
77.Bhaṭṭhadhaññamayoti kharapākabhajjitehi sattavidhehi dhaññehi koṭṭetvā kato, antamaso cuṇṇampi kuṇḍakampi sattu nāmāti attho. Samapākabhajjitānaṃ pana ātapasukkhānaṃ vā taṇḍulānaṃ sattu vā kuṇḍakāni eva vā na pavārenti. Yavena sambhavo uppatti assāti yavasambhavo, kummāso kummāso nāma. Muggādīhi kato pana pavāraṇaṃ na janeti. Kappiyo cāti kappiyoyeva maṃso ‘‘maṃso’’ti vuttoti yojanā. Cāti avadhāraṇe. Akappiyo pana paṭikkhipitabbova. Paṭikkhittopi na pavāreti. Udake sambhavo yassa so maccho nāma. Dvīsu panetesu sace yāguṃ pivantassa yāgusitthamattesupi macchakhaṇḍesu vā maṃsakhaṇḍesu vā ekaṃ khāditaṃ ekaṃ hatthe vā patte vā hoti, so ce aññaṃ paṭikkhipati, pavāreti. Dvepi khāditāni honti, mukhe sāsapamattampi avasiṭṭhaṃ natthi, sacepi aññaṃ paṭikkhipati, na pavāreti.
78. இதா³னி ‘‘கீதி³ஸங் பு⁴ஞ்ஜந்தோ கிந்தி வத்வா உபனீதங் கிங் நாம நிஸேதெ⁴ந்தோ பவாரேதி நாமா’’தி சோத³னங் மனஸி நிதா⁴யாஹ ‘‘பு⁴ஞ்ஜந்தோ’’திஆதி³ . தத்த² கப்பங் வா அகப்பங் வா பஞ்சஸு போ⁴ஜனேஸு யங் கிஞ்சி போ⁴ஜனங் பு⁴ஞ்ஜந்தோ பி⁴க்கு² தன்னாமேன தேஸங் பவாரணாஜனகபோ⁴ஜனானங் நாமேன வா ‘‘இம’’ந்தி ஸாமஞ்ஞேன வா வத்வா அபி⁴ஹடங் ஹத்த²பாஸோபனீதங் கப்பங் கப்பியங் யதா²வுத்தபோ⁴ஜனங் நிஸேத⁴யங் நிஸேத⁴யந்தோ பவாரெய்யாதி பத³த்த²ஸம்ப³ந்தோ⁴. அயமெத்த² அதி⁴ப்பாயோ – யேன சே அகப்பியமங்ஸஞ்ச குலதூ³ஸனவேஜ்ஜகம்மஉத்தரிமனுஸ்ஸத⁴ம்மாரோசனஸாதி³தரூபியாதீ³ஹி நிப்³ப³த்தங் அகப்பியபோ⁴ஜனஞ்ச ததா² அஞ்ஞஞ்ச கப்பியங் வா அகப்பியங் வா ஏகஸித்த²மத்தம்பி அஜ்ஜோ²ஹடங் ஹோதி, ஸோ ஸசே பத்தமுக²ஹத்தே²ஸு யத்த² கத்த²சி போ⁴ஜனே ஸதி ஸாபெக்கோ²வ அஞ்ஞங் ஹத்த²பாஸே டி²தேன ‘‘ஓத³னங் க³ண்ஹதா²’’திஆதி³னா பவாரணப்பஹோனகஸ்ஸேவ நாமேன வா ‘‘இம’’ந்தி ஸாமஞ்ஞவஸேனேவ வா காயேனேவ அபி⁴ஹடங் வுத்தலக்க²ணங் கப்பியமேவ போ⁴ஜனங் கேவலங் வா மிஸ்ஸங் வா காயேன வா வாசாய வா படிக்கி²பதி பவாரேதீதி. ‘‘ஆகிர ஆகிர, கொட்டெத்வா கொட்டெத்வா பூரேஹீ’’தி பன வத்துங் வட்டதி.
78. Idāni ‘‘kīdisaṃ bhuñjanto kinti vatvā upanītaṃ kiṃ nāma nisedhento pavāreti nāmā’’ti codanaṃ manasi nidhāyāha ‘‘bhuñjanto’’tiādi . Tattha kappaṃ vā akappaṃ vā pañcasu bhojanesu yaṃ kiñci bhojanaṃ bhuñjanto bhikkhu tannāmena tesaṃ pavāraṇājanakabhojanānaṃ nāmena vā ‘‘ima’’nti sāmaññena vā vatvā abhihaṭaṃ hatthapāsopanītaṃ kappaṃ kappiyaṃ yathāvuttabhojanaṃ nisedhayaṃ nisedhayanto pavāreyyāti padatthasambandho. Ayamettha adhippāyo – yena ce akappiyamaṃsañca kuladūsanavejjakammauttarimanussadhammārocanasāditarūpiyādīhi nibbattaṃ akappiyabhojanañca tathā aññañca kappiyaṃ vā akappiyaṃ vā ekasitthamattampi ajjhohaṭaṃ hoti, so sace pattamukhahatthesu yattha katthaci bhojane sati sāpekkhova aññaṃ hatthapāse ṭhitena ‘‘odanaṃ gaṇhathā’’tiādinā pavāraṇappahonakasseva nāmena vā ‘‘ima’’nti sāmaññavaseneva vā kāyeneva abhihaṭaṃ vuttalakkhaṇaṃ kappiyameva bhojanaṃ kevalaṃ vā missaṃ vā kāyena vā vācāya vā paṭikkhipati pavāretīti. ‘‘Ākira ākira, koṭṭetvā koṭṭetvā pūrehī’’ti pana vattuṃ vaṭṭati.
79-80. இதா³னி யே பவாரணங் ந ஜனெந்தி, தே த³ஸ்ஸேதுங் ‘‘லாஜா’’திஆதி³மாஹ. தத்த² லாஜா…பே॰… ப²லாதீ³னி பவாரணங் ந ஜனெந்தீதி ஸம்ப³ந்தோ⁴. லாஜாதி ஸாலிஆதீ³ஹி கதா லாஜா. தங்ஸத்துப⁴த்தானீதி தேஹி லாஜேஹி கதா ஸத்து சேவ ப⁴த்தானி ச. கோ³ரஸோதி கு³ன்னங் ரஸோ கீ²ராதி³. ஸுத்³த⁴க²ஜ்ஜகோதி மச்ச²மங்ஸேஹி அஸம்மிஸ்ஸதாய ஸுத்³த⁴க²ஜ்ஜகோ. ஸத்துயோ பிண்டெ³த்வா கதோ அபக்கோ ஸத்துகு³ளோ பன ஸத்துமோத³கஸங்கா²தோ பவாரேதி. தண்டு³லாதி ஸமபாகப⁴ஜ்ஜிதானங் ஸாலிஆதீ³னங் தண்டு³லா, ப⁴ஜ்ஜிததண்டு³லா ஏவ வா. ப⁴ட்ட²பிட்ட²ந்தி ஸுத்³த⁴ங் யங் கிஞ்சி ப⁴ஜ்ஜிதங் பிட்ட²ங். புது²காதி ஸாலிஆதீ³னங் புது²கா. புது²கா ஹி தந்திஆக³மயுத்தியா விஸும்பி க³ய்ஹதி, ஏகதோபி, தஸ்மா வுத்தாவஸேஸானங் புது²காவேளுஆதீ³னங் ப⁴த்தந்தி ச ஸம்ப³ந்தோ⁴. வேளூதி தேஸங் தண்டு³லா வுச்சந்தி. புது²கா ச வேளு ச, தே ஆத³யோ யேஸந்தி ஸமாஸோ. ச-ஸத்³தோ³ பனெத்த² ஸப்³ப³த்தா²பி யோஜேதப்³போ³. ஆதி³-ஸத்³தே³ன கந்த³மூலப²லானிபி க³ய்ஹந்தி. வுத்தாவஸேஸானந்தி வுத்தேஹி ஸத்தவிதே⁴ஹி த⁴ஞ்ஞேஹி அவஸேஸானங். ரஸயாகூ³தி ரஸேஹி பக்கமங்ஸாதீ³ஹி ஸம்மிஸ்ஸா யாகு³. ரஸோபி தாதி³ஸோவ. ஸுத்³த⁴யாகூ³தி மங்ஸாதீ³ஹி அமிஸ்ஸா ஸுத்³த⁴யாகு³. ப²லாதீ³னீதி ஆதி³-ஸத்³தே³ன கந்தா³தீ³னம்பி க³ஹணங். அபி சாதி நிபாதோ, நிபாதஸமுதா³யோ வா ஸமுச்சயே, ஸோ பச்சேகங் யோஜேதப்³போ³.
79-80. Idāni ye pavāraṇaṃ na janenti, te dassetuṃ ‘‘lājā’’tiādimāha. Tattha lājā…pe… phalādīni pavāraṇaṃ na janentīti sambandho. Lājāti sāliādīhi katā lājā. Taṃsattubhattānīti tehi lājehi katā sattu ceva bhattāni ca. Gorasoti gunnaṃ raso khīrādi. Suddhakhajjakoti macchamaṃsehi asammissatāya suddhakhajjako. Sattuyo piṇḍetvā kato apakko sattuguḷo pana sattumodakasaṅkhāto pavāreti. Taṇḍulāti samapākabhajjitānaṃ sāliādīnaṃ taṇḍulā, bhajjitataṇḍulā eva vā. Bhaṭṭhapiṭṭhanti suddhaṃ yaṃ kiñci bhajjitaṃ piṭṭhaṃ. Puthukāti sāliādīnaṃ puthukā. Puthukā hi tantiāgamayuttiyā visumpi gayhati, ekatopi, tasmā vuttāvasesānaṃ puthukāveḷuādīnaṃ bhattanti ca sambandho. Veḷūti tesaṃ taṇḍulā vuccanti. Puthukā ca veḷu ca, te ādayo yesanti samāso. Ca-saddo panettha sabbatthāpi yojetabbo. Ādi-saddena kandamūlaphalānipi gayhanti. Vuttāvasesānanti vuttehi sattavidhehi dhaññehi avasesānaṃ. Rasayāgūti rasehi pakkamaṃsādīhi sammissā yāgu. Rasopi tādisova. Suddhayāgūti maṃsādīhi amissā suddhayāgu. Phalādīnīti ādi-saddena kandādīnampi gahaṇaṃ. Api cāti nipāto, nipātasamudāyo vā samuccaye, so paccekaṃ yojetabbo.
81. இதா³னி யஸ்மா ஸத்தஹி வினயகம்மாகாரேஹி யங் அதிரித்தங் அகதங், தத்த² பாசித்தியங் வுத்தங், ப்³யதிரேகதோ அதிரித்தகதே நத்தி², தஸ்மா அதிரித்தங் கரொந்தேன ஏவங் காதப்³ப³ந்தி த³ஸ்ஸெந்தோ ‘‘பவாரிதேனா’’திஆதி³மாஹ. தத்த² பவாரிதேன வுட்டா²ய அதிரித்தங் ந காதப்³ப³ங், போ⁴ஜனங் அபு⁴த்தேன ச அதிரித்தங் ந காதப்³ப³ந்தி ஸம்ப³ந்தோ⁴. போ⁴ஜனந்தி பவாரணப்பஹோனகபோ⁴ஜனங். அபு⁴த்தேனாதி ஏகஸித்த²மத்தம்பி அபு⁴த்தாவினா. யேன யங்வா புரே கதந்தி எத்த² ச ஏவ-ஸத்³தோ³ தீ³க⁴ங் கத்வா நித்³தி³ட்டோ², ஸோ ச அஜ்ஜா²ஹடேன தங்-ஸத்³தே³ன ஸம்ப³ந்தீ⁴யதி, தஸ்மா யேன பி⁴க்கு²னா யங் போ⁴ஜனங் புரே புப்³பே³ அதிரித்தங் கதங், தேனேவ தமேவ அதிரித்தங் ந காதப்³ப³ந்தி யோஜெத்வா அத்தோ² வேதி³தப்³போ³. தஸ்மா கப்பியங் காரெத்வா பு⁴ஞ்ஜந்தஸ்ஸ அஞ்ஞங் ஆமிஸங் ஆகிரந்தி, தங் ஸோ புன காதுங் ந லப⁴தி, தஸ்மிங் போ⁴ஜனே கரியமானே பட²மகதேன ஸத்³தி⁴ங் கதங் ஹோதீதி. அஞ்ஞஸ்மிங் பன தேன வா அஞ்ஞேன வா காதுங் வட்டதி.
81. Idāni yasmā sattahi vinayakammākārehi yaṃ atirittaṃ akataṃ, tattha pācittiyaṃ vuttaṃ, byatirekato atirittakate natthi, tasmā atirittaṃ karontena evaṃ kātabbanti dassento ‘‘pavāritenā’’tiādimāha. Tattha pavāritena vuṭṭhāya atirittaṃ na kātabbaṃ, bhojanaṃ abhuttena ca atirittaṃ na kātabbanti sambandho. Bhojananti pavāraṇappahonakabhojanaṃ. Abhuttenāti ekasitthamattampi abhuttāvinā. Yena yaṃvā pure katanti ettha ca eva-saddo dīghaṃ katvā niddiṭṭho, so ca ajjhāhaṭena taṃ-saddena sambandhīyati, tasmā yena bhikkhunā yaṃ bhojanaṃ pure pubbe atirittaṃ kataṃ, teneva tameva atirittaṃ na kātabbanti yojetvā attho veditabbo. Tasmā kappiyaṃ kāretvā bhuñjantassa aññaṃ āmisaṃ ākiranti, taṃ so puna kātuṃ na labhati, tasmiṃ bhojane kariyamāne paṭhamakatena saddhiṃ kataṃ hotīti. Aññasmiṃ pana tena vā aññena vā kātuṃ vaṭṭati.
82. ‘‘கப்பிய’’ந்திஆதீ³னி ‘‘கரொந்தோ’’தி ஏதஸ்ஸ கம்மபதா³னி. கப்பியஞ்சேவ க³ஹிதஞ்சேவ உச்சாரிதஞ்சேவ ஹத்த²பாஸக³ஞ்சேவ யாவகாலிகங் அதிரித்தங் கரொந்தோ ‘‘அலமேதங் ஸப்³ப³’’ந்தி ஏவங் பா⁴ஸதூதி யோஜனா. தத்த²யங் ப²லங் வா கந்த³மூலாதி³ வா பஞ்சஹி ஸமணகப்பேஹி கப்பியங் கதங், யஞ்ச கப்பியமங்ஸங் வா கப்பியபோ⁴ஜனங் வா, ஏதங் கப்பியங் நாம. க³ஹிதந்தி பி⁴க்கு²னா படிக்³க³ஹிதங். உச்சாரிதந்தி கப்பியங் காரேதுங் ஆக³தேன பி⁴க்கு²னா ஈஸகம்பி உக்கி²த்தங் வா அபனாமிதங் வா, தங் பன அதிரித்தகாரகேன ‘‘அலமேதங் ஸப்³ப³’’ந்தி வுத்தேன காதப்³ப³ங். ஹத்த²பாஸக³ந்தி கப்பியங் காரேதுங் ஆக³தேன ஹத்த²பாஸங் க³தங். அதிரித்தங் கரொந்தோதி ஈதி³ஸங் சதுப்³பி³தா⁴காரஸம்பன்னங் போ⁴ஜனங் அதிரித்தங் கரொந்தோ பவாரெத்வா ஆஸனா அவுட்டி²தோ வா அப்பவாரெத்வாபி ஸப்³ப³தா² பு⁴த்தோ வாதி ஏவங் து³வித⁴வினயகம்மாகாரஸம்பன்னோ பி⁴க்கு². அலமேதங் ஸப்³ப³ந்தி ஏவங் பா⁴ஸதூதி அலமேதங் ஸப்³ப³ங் இதி ஏவங் பா⁴ஸது. ஏவங் ஸத்தவித⁴ங் வினயகம்மாகாரங் ஸம்பாதெ³ந்தோ வசீபே⁴த³ங் கத்வா ஸகிம்பி ஏவங் வதெ³ய்யாதி அத்தோ².
82.‘‘Kappiya’’ntiādīni ‘‘karonto’’ti etassa kammapadāni. Kappiyañceva gahitañceva uccāritañceva hatthapāsagañceva yāvakālikaṃ atirittaṃ karonto ‘‘alametaṃ sabba’’nti evaṃ bhāsatūti yojanā. Tatthayaṃ phalaṃ vā kandamūlādi vā pañcahi samaṇakappehi kappiyaṃ kataṃ, yañca kappiyamaṃsaṃ vā kappiyabhojanaṃ vā, etaṃ kappiyaṃ nāma. Gahitanti bhikkhunā paṭiggahitaṃ. Uccāritanti kappiyaṃ kāretuṃ āgatena bhikkhunā īsakampi ukkhittaṃ vā apanāmitaṃ vā, taṃ pana atirittakārakena ‘‘alametaṃ sabba’’nti vuttena kātabbaṃ. Hatthapāsaganti kappiyaṃ kāretuṃ āgatena hatthapāsaṃ gataṃ. Atirittaṃ karontoti īdisaṃ catubbidhākārasampannaṃ bhojanaṃ atirittaṃ karonto pavāretvā āsanā avuṭṭhito vā appavāretvāpi sabbathā bhutto vāti evaṃ duvidhavinayakammākārasampanno bhikkhu. Alametaṃ sabbanti evaṃ bhāsatūti alametaṃ sabbaṃ iti evaṃ bhāsatu. Evaṃ sattavidhaṃ vinayakammākāraṃ sampādento vacībhedaṃ katvā sakimpi evaṃ vadeyyāti attho.
83. கப்பியங் கரொந்தேன பன அனுபஸம்பன்னஸ்ஸ ஹத்தே² டி²தங் ந காதப்³ப³ங். தேனாஹ ‘‘ந கரே…பே॰… ஹத்த²க³’’ந்தி. உபஸம்பன்னதோ அஞ்ஞோ அனுபஸம்பன்னோ, தஸ்ஸ ஹத்தே² க³தங் அனுபஸம்பன்னஹத்த²க³ங். பேஸயித்வாபீதி ஸசே தத்த² அஞ்ஞோ ப்³யத்தோ பி⁴க்கு² நத்தி², யத்த² அத்தி², தத்த² பேஸயித்வாபி. தங் அதிரித்தகதங் அகாரகோ அதிரித்தகாரகதோ அஞ்ஞோ ஸப்³போ³ பவாரிதோபி அப்பவாரிதோபி பு⁴ஞ்ஜிதுங் லப்³ப⁴தேதி ஸம்ப³ந்த⁴னீயங். பவாரிதேன பன முக²ஞ்ச ஹத்த²ஞ்ச ஸோதெ⁴த்வா பு⁴ஞ்ஜிதப்³ப³ங்.
83. Kappiyaṃ karontena pana anupasampannassa hatthe ṭhitaṃ na kātabbaṃ. Tenāha ‘‘na kare…pe… hatthaga’’nti. Upasampannato añño anupasampanno, tassa hatthe gataṃ anupasampannahatthagaṃ. Pesayitvāpīti sace tattha añño byatto bhikkhu natthi, yattha atthi, tattha pesayitvāpi. Taṃ atirittakataṃ akārako atirittakārakato añño sabbo pavāritopi appavāritopi bhuñjituṃ labbhateti sambandhanīyaṃ. Pavāritena pana mukhañca hatthañca sodhetvā bhuñjitabbaṃ.
பவாரணானித்³தே³ஸவண்ணனா நிட்டி²தா.
Pavāraṇāniddesavaṇṇanā niṭṭhitā.
