| Library / Tipiṭaka / ਤਿਪਿਟਕ • Tipiṭaka / ਖੁਦ੍ਦਸਿਕ੍ਖਾ-ਮੂਲਸਿਕ੍ਖਾ • Khuddasikkhā-mūlasikkhā |
੭. ਪવਾਰਣਾਨਿਦ੍ਦੇਸવਣ੍ਣਨਾ
7. Pavāraṇāniddesavaṇṇanā
੭੩. ਯੇਨ ਇਰਿਯਾਪਥੇਨ ਉਪਲਕ੍ਖਿਤੋ ਪਞ੍ਚਨ੍ਨਂ ਭੋਜਨਾਨਂ ਯਂ ਕਿਞ੍ਚਿ ਭੋਜਨਂ ਭੁਞ੍ਜਮਾਨੋ ਅਯਂ ਭਿਕ੍ਖੁ ਕਪ੍ਪਿਯਾਨਂ ਪਞ੍ਚਨ੍ਨਂ ਭੋਜਨਾਨਂ ਹਤ੍ਥਪਾਸੋਪਨੀਤਾਨਂ ਪવਾਰਿਤੋ, ਤਤੋ ਇਰਿਯਾਪਥਤੋ ਅਞ੍ਞੇਨ ਇਰਿਯਾਪਥੇਨ ਅਨਤਿਰਿਤ੍ਤਕਂ ਯਾવਕਾਲਿਕਂ ਭੁਞ੍ਜੇਯ੍ਯ ਚੇ, ਇਮਸ੍ਸ ਪਾਚਿਤ੍ਤਿ ਹੋਤੀਤਿ ਪਦਤ੍ਥਯੋਜਨਾ। ਭੁਞ੍ਜਨਤ੍ਥਾਯ ਪਟਿਗ੍ਗਹਣੇ ਪਨ ਦੁਕ੍ਕਟਂ। ਤਤ੍ਥ ਇਰਿਯਾਯ ਕਾਯਿਕਕਿਰਿਯਾਯ ਪਥੋ ਪવਤ੍ਤਨੂਪਾਯੋ ਇਰਿਯਾਪਥੋ, ਠਾਨਗਮਨਨਿਸਜ੍ਜਨਸਯਨਾਨਿ। ਪવਾਰੇਤਿ ਪਟਿਕ੍ਖਿਪਤੀਤਿ ਪવਾਰਿਤੋ, ਅਥ વਾ ਪવਾਰਣਂ ਪਟਿਕ੍ਖਿਪਨਂ ਪવਾਰਿਤਂ, ਤਮਸ੍ਸ ਅਤ੍ਥੀਤਿ ਪવਾਰਿਤੋ, ਕਤਪ੍ਪવਾਰਣੋ ਕਤਪ੍ਪਟਿਕ੍ਖੇਪੋਤਿ ਅਤ੍ਥੋ, ਅਥ વਾ ਪਰਿવੇਸਕੇਨ વਾਰੀਯਤੀਤਿ ਪવਾਰਿਤੋ ਪਟਿਕ੍ਖੇਪਿਤੋ। ਅਨਤਿਰਿਤ੍ਤਕਨ੍ਤਿ ਯਂ ਪવਾਰੇਤ੍વਾ ਆਸਨਾ વੁਟ੍ਠਹਨ੍ਤਸ੍ਸ ‘‘ਅਲਮੇਤਂ ਸਬ੍ਬ’’ਨ੍ਤਿ ਏવਂ ਅਤਿਰਿਤ੍ਤਕਰਣਾਦੀਹਿ ਸਤ੍ਤਹਿ વਿਨਯਕਮ੍ਮਾਕਾਰੇਹਿ ਕਪ੍ਪਿਯਂ ਕਤਂ, ਤਞ੍ਚ ‘‘ਅਜ੍ਜ વਾ ਯਦਾ વਾ ਇਚ੍ਛਤਿ, ਤਦਾ ਖਾਦਿਸ੍ਸਤੀ’’ਤਿ ਆਹਟਂ, ਗਿਲਾਨਾਤਿਰਿਤ੍ਤਞ੍ਚ ਅਤਿਰਿਤ੍ਤਂ ਅਧਿਕਨ੍ਤਿ વੁਚ੍ਚਤਿ, ਤਤੋ ਅਞ੍ਞਂ ਅਨਤਿਰਿਤ੍ਤਕਂ ਅਨਧਿਕਨ੍ਤਿ ਅਤ੍ਥੋ। ਕੁਸਲਂ ਚਿਤ੍ਤਂ ਪਾਤੇਤੀਤਿ ਪਾਚਿਤ੍ਤਿ, ਤਸ੍ਮਾ ਇਤ੍ਥਿਯਂ ਤਿਮ੍ਹਿ ਤ-ਕਾਰਸ੍ਸ ਚ-ਕਾਰੇ, ਦ੍વਿਤ੍ਤੇ ਚ ਪਾਚਿਤ੍ਤਿ। ਯਾਮਕਾਲਿਕਂ ਸਤ੍ਤਾਹਕਾਲਿਕਂ ਯਾવਜੀવਿਕਂ ਆਹਾਰਤ੍ਥਾਯ ਪਟਿਗ੍ਗਣ੍ਹਤੋ ਆਪਤ੍ਤਿ ਦੁਕ੍ਕਟਸ੍ਸ, ਅਜ੍ਝੋਹਾਰੇ ਅਜ੍ਝੋਹਾਰੇ ਆਪਤ੍ਤਿ ਦੁਕ੍ਕਟਸ੍ਸ।
73. Yena iriyāpathena upalakkhito pañcannaṃ bhojanānaṃ yaṃ kiñci bhojanaṃ bhuñjamāno ayaṃ bhikkhu kappiyānaṃ pañcannaṃ bhojanānaṃ hatthapāsopanītānaṃ pavārito, tato iriyāpathato aññena iriyāpathena anatirittakaṃ yāvakālikaṃ bhuñjeyya ce, imassa pācitti hotīti padatthayojanā. Bhuñjanatthāya paṭiggahaṇe pana dukkaṭaṃ. Tattha iriyāya kāyikakiriyāya patho pavattanūpāyo iriyāpatho, ṭhānagamananisajjanasayanāni. Pavāreti paṭikkhipatīti pavārito, atha vā pavāraṇaṃ paṭikkhipanaṃ pavāritaṃ, tamassa atthīti pavārito, katappavāraṇo katappaṭikkhepoti attho, atha vā parivesakena vārīyatīti pavārito paṭikkhepito. Anatirittakanti yaṃ pavāretvā āsanā vuṭṭhahantassa ‘‘alametaṃ sabba’’nti evaṃ atirittakaraṇādīhi sattahi vinayakammākārehi kappiyaṃ kataṃ, tañca ‘‘ajja vā yadā vā icchati, tadā khādissatī’’ti āhaṭaṃ, gilānātirittañca atirittaṃ adhikanti vuccati, tato aññaṃ anatirittakaṃ anadhikanti attho. Kusalaṃ cittaṃ pātetīti pācitti, tasmā itthiyaṃ timhi ta-kārassa ca-kāre, dvitte ca pācitti. Yāmakālikaṃ sattāhakālikaṃ yāvajīvikaṃ āhāratthāya paṭiggaṇhato āpatti dukkaṭassa, ajjhohāre ajjhohāre āpatti dukkaṭassa.
੭੪. ਇਦਾਨਿ ਯਾਯ ਪવਾਰਿਤਾ, ਸਾ ਪਞ੍ਚਙ੍ਗਸਮ੍ਪਨ੍ਨਾਯੇવ ਪવਾਰਣਾ ਨਾਮ ਹੋਤੀਤਿ ਦਸ੍ਸੇਤੁਂ ‘‘ਅਸਨ’’ਨ੍ਤਿਆਦਿਮਾਹ। ਤਤ੍ਥ ਅਸਨਨ੍ਤਿ ਭੁਞ੍ਜਮਾਨਸ੍ਸ ਭੁਞ੍ਜਨਂ। ਇਮਿਨਾ ਯਂ વਿਪ੍ਪਕਤਂ ਭੋਜਨਂ, ਤਂ ਦਸ੍ਸੇਤਿ। ਭੋਜਨਞ੍ਚੇવਾਤਿ ਪવਾਰਣਪ੍ਪਹੋਨਕਂ ਭੋਜਨਞ੍ਚੇવ ਹੋਤੀਤਿ। ਅਭਿਹਾਰੋਤਿ ਦਾਯਕਸ੍ਸ ਕਾਯੇਨ ਪવਾਰਣਪ੍ਪਹੋਨਕਸ੍ਸ ਅਭਿਹਰਣਂ, ਨ વਾਚਾਯ। ਸਮੀਪਤਾਤਿ ਅਡ੍ਢਤੇਯ੍ਯਹਤ੍ਥਪ੍ਪਮਾਣਸਙ੍ਖਾਤਾ ਸਮੀਪਤਾ ਚ। ਏਤ੍ਥ ਪਨ ਸਚੇ ਭਿਕ੍ਖੁ ਨਿਸਿਨ੍ਨੋ ਹੋਤਿ, ਆਸਨਸ੍ਸ ਪਚ੍ਛਿਮਨ੍ਤਤੋ ਪਟ੍ਠਾਯ, ਸਚੇ ਠਿਤੋ, ਪਣ੍ਹਿਅਨ੍ਤਤੋ ਪਟ੍ਠਾਯ, ਸਚੇ ਨਿਪਨ੍ਨੋ, ਯੇਨ ਪਸ੍ਸੇਨ ਨਿਪਨ੍ਨੋ, ਤਸ੍ਸ ਪਾਰਿਮਨ੍ਤਤੋ ਪਟ੍ਠਾਯ ਦਾਯਕਸ੍ਸ ਠਿਤਸ੍ਸ વਾ ਨਿਸਿਨ੍ਨਸ੍ਸ વਾ ਨਿਪਨ੍ਨਸ੍ਸ વਾ ਠਪੇਤ੍વਾ ਪਸਾਰਿਤਹਤ੍ਥਂ ਯਂ ਆਸਨ੍ਨਤਰਂ ਅਙ੍ਗਂ, ਤਸ੍ਸ ਓਰਿਮਨ੍ਤੇਨ ਪਰਿਚ੍ਛਿਨ੍ਦਿਤ੍વਾ ਅਡ੍ਢਤੇਯ੍ਯਹਤ੍ਥਪਾਸੋ વੇਦਿਤਬ੍ਬੋ। ਕਾਯવਾਚਾਪਟਿਕ੍ਖੇਪੋਤਿ ਤਸ੍ਸ ਅਭਿਹਟਭੋਜਨਸ੍ਸ ਅਙ੍ਗੁਲਿਚਲਨਾਦਿਕਾਯવਿਕਾਰੇਨ વਾ ‘‘ਅਲ’’ਨ੍ਤਿਆਦਿਨਾ વਚੀવਿਕਾਰੇਨ વਾ ਪਟਿਕ੍ਖਿਪਨਂ। ਇਤਿ ਇਮੇਹਿ ਪਞ੍ਚਹਙ੍ਗੇਹਿ ਪવਾਰਣਾ ਪਕਾਰਯੁਤ੍ਤવਾਰਣਾ ਪਞ੍ਚਅਙ੍ਗਾਤਿ ਸਮ੍ਬਨ੍ਧੋ। ਪਞ੍ਚ ਅਙ੍ਗਾਨਿ ਯਸ੍ਸਾ ਸਾ ਪਞ੍ਚਅਙ੍ਗਾ।
74. Idāni yāya pavāritā, sā pañcaṅgasampannāyeva pavāraṇā nāma hotīti dassetuṃ ‘‘asana’’ntiādimāha. Tattha asananti bhuñjamānassa bhuñjanaṃ. Iminā yaṃ vippakataṃ bhojanaṃ, taṃ dasseti. Bhojanañcevāti pavāraṇappahonakaṃ bhojanañceva hotīti. Abhihāroti dāyakassa kāyena pavāraṇappahonakassa abhiharaṇaṃ, na vācāya. Samīpatāti aḍḍhateyyahatthappamāṇasaṅkhātā samīpatā ca. Ettha pana sace bhikkhu nisinno hoti, āsanassa pacchimantato paṭṭhāya, sace ṭhito, paṇhiantato paṭṭhāya, sace nipanno, yena passena nipanno, tassa pārimantato paṭṭhāya dāyakassa ṭhitassa vā nisinnassa vā nipannassa vā ṭhapetvā pasāritahatthaṃ yaṃ āsannataraṃ aṅgaṃ, tassa orimantena paricchinditvā aḍḍhateyyahatthapāso veditabbo. Kāyavācāpaṭikkhepoti tassa abhihaṭabhojanassa aṅgulicalanādikāyavikārena vā ‘‘ala’’ntiādinā vacīvikārena vā paṭikkhipanaṃ. Iti imehi pañcahaṅgehi pavāraṇā pakārayuttavāraṇā pañcaaṅgāti sambandho. Pañca aṅgāni yassā sā pañcaaṅgā.
੭੫. ਇਦਾਨਿ ਏਤੇਸੁ ਓਦਨਾਦਿਪਞ੍ਚવਿਧਂ ਭੋਜਨਂ ਦਸ੍ਸੇਤ੍વਾ ਤਾਨਿ ਚ ਪੁਨ વਿਭਜਿਤ੍વਾ ਦਸ੍ਸੇਤੁਂ ‘‘ਓਦਨੋ’’ਤਿਆਦਿ ਆਰਦ੍ਧਂ। ਤਤ੍ਥ ਸਾਲੀਤਿ ਰਤ੍ਤਸਾਲਿਆਦਿਕਾ ਸਬ੍ਬਾਪਿ ਸਾਲਿਜਾਤਿ। વੀਹੀਤਿ ਸਬ੍ਬਾਪਿ વੀਹਿਨਾਮਿਕਾ વੀਹਿਜਾਤਿ। ਕਙ੍ਗੂਤਿ ਸੇਤਰਤ੍ਤਕਾਲ਼ਭੇਦਾ ਸਬ੍ਬਾਪਿ ਕਙ੍ਗੁਜਾਤਿ। ਕੁਦ੍ਰੂਸੋ ਨਾਮ ਕਾਲ਼ਕੋਦ੍ਰવੋ। વਰਕੋ ਨਾਮ ਸੇਤવਣ੍ਣੋ ਕੋਦ੍ਰવੋ। ਯવਗੋਧੁਮੇਸੁ ਪਨ ਭੇਦੋ ਨਤ੍ਥਿ। ਏવਂ ਯਥਾવੁਤ੍ਤਾਨਂ ਸਾਨੁਲੋਮਾਨਂ ਸਤ੍ਤਨ੍ਨਂ ਧਞ੍ਞਾਨਂ ਭੋਜ੍ਜਯਾਗੁ ਚਾਤਿ ਸਮ੍ਬਨ੍ਧੋ। ਭੋਜ੍ਜਯਾਗੁ ਚਾਤਿ ਉਣ੍ਹਂ વਾ ਸੀਤਲਂ વਾ ਭੁਞ੍ਜਨ੍ਤਾਨਂ ਭੋਜਨਕਾਲੇ ਗਹਿਤਟ੍ਠਾਨੇ ਓਧਿ ਪਞ੍ਞਾਯਤਿ, ਸਾ ਭੋਜ੍ਜਯਾਗੁ। ਚ-ਸਦ੍ਦੇਨ ਓਦਨੋ ਚਾਤਿ ਸਮ੍ਬਨ੍ਧੋ , ਓਦਨੋ ਨਾਮਾਤਿ ਅਤ੍ਥੋ। ਸਚੇ ਪਨ ਭਤ੍ਤੇ ਉਦਕਕਞ੍ਜਿਕਖੀਰਾਦੀਨਿ ਆਕਿਰਿਤ੍વਾ ‘‘ਯਾਗੁਂ ਗਣ੍ਹਥਾ’’ਤਿ ਦੇਨ੍ਤਿ, ਕਿਞ੍ਚਾਪਿ ਤਨੁਕਾ ਹੋਤਿ, ਪવਾਰਣਂ ਜਨੇਤਿ। ਸਚੇ ਪਨ ਉਦਕਾਦੀਸੁ ਪਕ੍ਖਿਪਿਤ੍વਾ ਪਚਿਤ੍વਾ ਦੇਨ੍ਤਿ, ਯਾਗੁਸਙ੍ਗਹਮੇવ ਗਚ੍ਛਤਿ। ਸਚੇ ਪਨ ਤਨੁਕਾਯਪਿ ਯਾਗੁਯਾ ਸਾਸਪਮਤ੍ਤਮ੍ਪਿ ਮਚ੍ਛਮਂਸਖਣ੍ਡਂ વਾ ਨ੍ਹਾਰੁ વਾ ਪਕ੍ਖਿਤ੍ਤਂ ਹੋਤਿ, ਪવਾਰਣਂ ਜਨੇਤਿ।
75. Idāni etesu odanādipañcavidhaṃ bhojanaṃ dassetvā tāni ca puna vibhajitvā dassetuṃ ‘‘odano’’tiādi āraddhaṃ. Tattha sālīti rattasāliādikā sabbāpi sālijāti. Vīhīti sabbāpi vīhināmikā vīhijāti. Kaṅgūti setarattakāḷabhedā sabbāpi kaṅgujāti. Kudrūso nāma kāḷakodravo. Varako nāma setavaṇṇo kodravo. Yavagodhumesu pana bhedo natthi. Evaṃ yathāvuttānaṃ sānulomānaṃ sattannaṃ dhaññānaṃ bhojjayāgu cāti sambandho. Bhojjayāgu cāti uṇhaṃ vā sītalaṃ vā bhuñjantānaṃ bhojanakāle gahitaṭṭhāne odhi paññāyati, sā bhojjayāgu. Ca-saddena odano cāti sambandho , odano nāmāti attho. Sace pana bhatte udakakañjikakhīrādīni ākiritvā ‘‘yāguṃ gaṇhathā’’ti denti, kiñcāpi tanukā hoti, pavāraṇaṃ janeti. Sace pana udakādīsu pakkhipitvā pacitvā denti, yāgusaṅgahameva gacchati. Sace pana tanukāyapi yāguyā sāsapamattampi macchamaṃsakhaṇḍaṃ vā nhāru vā pakkhittaṃ hoti, pavāraṇaṃ janeti.
੭੬. ਸਾਮਾਕਾਦਿਤਿਣਂ ਕੁਦ੍ਰੂਸਕੇ ਸਙ੍ਗਹਂ ਗਤਂ, વਰਕਚੋਰਕੋ વਰਕੇ ਸਙ੍ਗਹਂ ਗਤੋ, ਨੀવਾਰੋ ਚੇવ ਸਾਲਿਯਂ ਸਙ੍ਗਹਂ ਗਤੋਤਿ ਯੋਜਨਾ। ਸਾਮਾਕਾਦਿਤਿਣਨ੍ਤਿ ਸਾਮਾਕੋ ਆਦਿ ਯਸ੍ਸ, ਤਮੇવ ਤਿਣਂ ਤਿਣਧਞ੍ਞਨ੍ਤਿ ਸਮਾਸੋ।
76. Sāmākāditiṇaṃ kudrūsake saṅgahaṃ gataṃ, varakacorako varake saṅgahaṃ gato, nīvāro ceva sāliyaṃ saṅgahaṃ gatoti yojanā. Sāmākāditiṇanti sāmāko ādi yassa, tameva tiṇaṃ tiṇadhaññanti samāso.
੭੭. ਭਟ੍ਠਧਞ੍ਞਮਯੋਤਿ ਖਰਪਾਕਭਜ੍ਜਿਤੇਹਿ ਸਤ੍ਤવਿਧੇਹਿ ਧਞ੍ਞੇਹਿ ਕੋਟ੍ਟੇਤ੍વਾ ਕਤੋ, ਅਨ੍ਤਮਸੋ ਚੁਣ੍ਣਮ੍ਪਿ ਕੁਣ੍ਡਕਮ੍ਪਿ ਸਤ੍ਤੁ ਨਾਮਾਤਿ ਅਤ੍ਥੋ। ਸਮਪਾਕਭਜ੍ਜਿਤਾਨਂ ਪਨ ਆਤਪਸੁਕ੍ਖਾਨਂ વਾ ਤਣ੍ਡੁਲਾਨਂ ਸਤ੍ਤੁ વਾ ਕੁਣ੍ਡਕਾਨਿ ਏવ વਾ ਨ ਪવਾਰੇਨ੍ਤਿ। ਯવੇਨ ਸਮ੍ਭવੋ ਉਪ੍ਪਤ੍ਤਿ ਅਸ੍ਸਾਤਿ ਯવਸਮ੍ਭવੋ, ਕੁਮ੍ਮਾਸੋ ਕੁਮ੍ਮਾਸੋ ਨਾਮ। ਮੁਗ੍ਗਾਦੀਹਿ ਕਤੋ ਪਨ ਪવਾਰਣਂ ਨ ਜਨੇਤਿ। ਕਪ੍ਪਿਯੋ ਚਾਤਿ ਕਪ੍ਪਿਯੋਯੇવ ਮਂਸੋ ‘‘ਮਂਸੋ’’ਤਿ વੁਤ੍ਤੋਤਿ ਯੋਜਨਾ। ਚਾਤਿ ਅવਧਾਰਣੇ। ਅਕਪ੍ਪਿਯੋ ਪਨ ਪਟਿਕ੍ਖਿਪਿਤਬ੍ਬੋવ। ਪਟਿਕ੍ਖਿਤ੍ਤੋਪਿ ਨ ਪવਾਰੇਤਿ। ਉਦਕੇ ਸਮ੍ਭવੋ ਯਸ੍ਸ ਸੋ ਮਚ੍ਛੋ ਨਾਮ। ਦ੍વੀਸੁ ਪਨੇਤੇਸੁ ਸਚੇ ਯਾਗੁਂ ਪਿવਨ੍ਤਸ੍ਸ ਯਾਗੁਸਿਤ੍ਥਮਤ੍ਤੇਸੁਪਿ ਮਚ੍ਛਖਣ੍ਡੇਸੁ વਾ ਮਂਸਖਣ੍ਡੇਸੁ વਾ ਏਕਂ ਖਾਦਿਤਂ ਏਕਂ ਹਤ੍ਥੇ વਾ ਪਤ੍ਤੇ વਾ ਹੋਤਿ, ਸੋ ਚੇ ਅਞ੍ਞਂ ਪਟਿਕ੍ਖਿਪਤਿ, ਪવਾਰੇਤਿ। ਦ੍વੇਪਿ ਖਾਦਿਤਾਨਿ ਹੋਨ੍ਤਿ, ਮੁਖੇ ਸਾਸਪਮਤ੍ਤਮ੍ਪਿ ਅવਸਿਟ੍ਠਂ ਨਤ੍ਥਿ, ਸਚੇਪਿ ਅਞ੍ਞਂ ਪਟਿਕ੍ਖਿਪਤਿ, ਨ ਪવਾਰੇਤਿ।
77.Bhaṭṭhadhaññamayoti kharapākabhajjitehi sattavidhehi dhaññehi koṭṭetvā kato, antamaso cuṇṇampi kuṇḍakampi sattu nāmāti attho. Samapākabhajjitānaṃ pana ātapasukkhānaṃ vā taṇḍulānaṃ sattu vā kuṇḍakāni eva vā na pavārenti. Yavena sambhavo uppatti assāti yavasambhavo, kummāso kummāso nāma. Muggādīhi kato pana pavāraṇaṃ na janeti. Kappiyo cāti kappiyoyeva maṃso ‘‘maṃso’’ti vuttoti yojanā. Cāti avadhāraṇe. Akappiyo pana paṭikkhipitabbova. Paṭikkhittopi na pavāreti. Udake sambhavo yassa so maccho nāma. Dvīsu panetesu sace yāguṃ pivantassa yāgusitthamattesupi macchakhaṇḍesu vā maṃsakhaṇḍesu vā ekaṃ khāditaṃ ekaṃ hatthe vā patte vā hoti, so ce aññaṃ paṭikkhipati, pavāreti. Dvepi khāditāni honti, mukhe sāsapamattampi avasiṭṭhaṃ natthi, sacepi aññaṃ paṭikkhipati, na pavāreti.
੭੮. ਇਦਾਨਿ ‘‘ਕੀਦਿਸਂ ਭੁਞ੍ਜਨ੍ਤੋ ਕਿਨ੍ਤਿ વਤ੍વਾ ਉਪਨੀਤਂ ਕਿਂ ਨਾਮ ਨਿਸੇਧੇਨ੍ਤੋ ਪવਾਰੇਤਿ ਨਾਮਾ’’ਤਿ ਚੋਦਨਂ ਮਨਸਿ ਨਿਧਾਯਾਹ ‘‘ਭੁਞ੍ਜਨ੍ਤੋ’’ਤਿਆਦਿ । ਤਤ੍ਥ ਕਪ੍ਪਂ વਾ ਅਕਪ੍ਪਂ વਾ ਪਞ੍ਚਸੁ ਭੋਜਨੇਸੁ ਯਂ ਕਿਞ੍ਚਿ ਭੋਜਨਂ ਭੁਞ੍ਜਨ੍ਤੋ ਭਿਕ੍ਖੁ ਤਨ੍ਨਾਮੇਨ ਤੇਸਂ ਪવਾਰਣਾਜਨਕਭੋਜਨਾਨਂ ਨਾਮੇਨ વਾ ‘‘ਇਮ’’ਨ੍ਤਿ ਸਾਮਞ੍ਞੇਨ વਾ વਤ੍વਾ ਅਭਿਹਟਂ ਹਤ੍ਥਪਾਸੋਪਨੀਤਂ ਕਪ੍ਪਂ ਕਪ੍ਪਿਯਂ ਯਥਾવੁਤ੍ਤਭੋਜਨਂ ਨਿਸੇਧਯਂ ਨਿਸੇਧਯਨ੍ਤੋ ਪવਾਰੇਯ੍ਯਾਤਿ ਪਦਤ੍ਥਸਮ੍ਬਨ੍ਧੋ। ਅਯਮੇਤ੍ਥ ਅਧਿਪ੍ਪਾਯੋ – ਯੇਨ ਚੇ ਅਕਪ੍ਪਿਯਮਂਸਞ੍ਚ ਕੁਲਦੂਸਨવੇਜ੍ਜਕਮ੍ਮਉਤ੍ਤਰਿਮਨੁਸ੍ਸਧਮ੍ਮਾਰੋਚਨਸਾਦਿਤਰੂਪਿਯਾਦੀਹਿ ਨਿਬ੍ਬਤ੍ਤਂ ਅਕਪ੍ਪਿਯਭੋਜਨਞ੍ਚ ਤਥਾ ਅਞ੍ਞਞ੍ਚ ਕਪ੍ਪਿਯਂ વਾ ਅਕਪ੍ਪਿਯਂ વਾ ਏਕਸਿਤ੍ਥਮਤ੍ਤਮ੍ਪਿ ਅਜ੍ਝੋਹਟਂ ਹੋਤਿ, ਸੋ ਸਚੇ ਪਤ੍ਤਮੁਖਹਤ੍ਥੇਸੁ ਯਤ੍ਥ ਕਤ੍ਥਚਿ ਭੋਜਨੇ ਸਤਿ ਸਾਪੇਕ੍ਖੋવ ਅਞ੍ਞਂ ਹਤ੍ਥਪਾਸੇ ਠਿਤੇਨ ‘‘ਓਦਨਂ ਗਣ੍ਹਥਾ’’ਤਿਆਦਿਨਾ ਪવਾਰਣਪ੍ਪਹੋਨਕਸ੍ਸੇવ ਨਾਮੇਨ વਾ ‘‘ਇਮ’’ਨ੍ਤਿ ਸਾਮਞ੍ਞવਸੇਨੇવ વਾ ਕਾਯੇਨੇવ ਅਭਿਹਟਂ વੁਤ੍ਤਲਕ੍ਖਣਂ ਕਪ੍ਪਿਯਮੇવ ਭੋਜਨਂ ਕੇવਲਂ વਾ ਮਿਸ੍ਸਂ વਾ ਕਾਯੇਨ વਾ વਾਚਾਯ વਾ ਪਟਿਕ੍ਖਿਪਤਿ ਪવਾਰੇਤੀਤਿ। ‘‘ਆਕਿਰ ਆਕਿਰ, ਕੋਟ੍ਟੇਤ੍વਾ ਕੋਟ੍ਟੇਤ੍વਾ ਪੂਰੇਹੀ’’ਤਿ ਪਨ વਤ੍ਤੁਂ વਟ੍ਟਤਿ।
78. Idāni ‘‘kīdisaṃ bhuñjanto kinti vatvā upanītaṃ kiṃ nāma nisedhento pavāreti nāmā’’ti codanaṃ manasi nidhāyāha ‘‘bhuñjanto’’tiādi . Tattha kappaṃ vā akappaṃ vā pañcasu bhojanesu yaṃ kiñci bhojanaṃ bhuñjanto bhikkhu tannāmena tesaṃ pavāraṇājanakabhojanānaṃ nāmena vā ‘‘ima’’nti sāmaññena vā vatvā abhihaṭaṃ hatthapāsopanītaṃ kappaṃ kappiyaṃ yathāvuttabhojanaṃ nisedhayaṃ nisedhayanto pavāreyyāti padatthasambandho. Ayamettha adhippāyo – yena ce akappiyamaṃsañca kuladūsanavejjakammauttarimanussadhammārocanasāditarūpiyādīhi nibbattaṃ akappiyabhojanañca tathā aññañca kappiyaṃ vā akappiyaṃ vā ekasitthamattampi ajjhohaṭaṃ hoti, so sace pattamukhahatthesu yattha katthaci bhojane sati sāpekkhova aññaṃ hatthapāse ṭhitena ‘‘odanaṃ gaṇhathā’’tiādinā pavāraṇappahonakasseva nāmena vā ‘‘ima’’nti sāmaññavaseneva vā kāyeneva abhihaṭaṃ vuttalakkhaṇaṃ kappiyameva bhojanaṃ kevalaṃ vā missaṃ vā kāyena vā vācāya vā paṭikkhipati pavāretīti. ‘‘Ākira ākira, koṭṭetvā koṭṭetvā pūrehī’’ti pana vattuṃ vaṭṭati.
੭੯-੮੦. ਇਦਾਨਿ ਯੇ ਪવਾਰਣਂ ਨ ਜਨੇਨ੍ਤਿ, ਤੇ ਦਸ੍ਸੇਤੁਂ ‘‘ਲਾਜਾ’’ਤਿਆਦਿਮਾਹ। ਤਤ੍ਥ ਲਾਜਾ…ਪੇ॰… ਫਲਾਦੀਨਿ ਪવਾਰਣਂ ਨ ਜਨੇਨ੍ਤੀਤਿ ਸਮ੍ਬਨ੍ਧੋ। ਲਾਜਾਤਿ ਸਾਲਿਆਦੀਹਿ ਕਤਾ ਲਾਜਾ। ਤਂਸਤ੍ਤੁਭਤ੍ਤਾਨੀਤਿ ਤੇਹਿ ਲਾਜੇਹਿ ਕਤਾ ਸਤ੍ਤੁ ਚੇવ ਭਤ੍ਤਾਨਿ ਚ। ਗੋਰਸੋਤਿ ਗੁਨ੍ਨਂ ਰਸੋ ਖੀਰਾਦਿ। ਸੁਦ੍ਧਖਜ੍ਜਕੋਤਿ ਮਚ੍ਛਮਂਸੇਹਿ ਅਸਮ੍ਮਿਸ੍ਸਤਾਯ ਸੁਦ੍ਧਖਜ੍ਜਕੋ। ਸਤ੍ਤੁਯੋ ਪਿਣ੍ਡੇਤ੍વਾ ਕਤੋ ਅਪਕ੍ਕੋ ਸਤ੍ਤੁਗੁਲ਼ੋ ਪਨ ਸਤ੍ਤੁਮੋਦਕਸਙ੍ਖਾਤੋ ਪવਾਰੇਤਿ। ਤਣ੍ਡੁਲਾਤਿ ਸਮਪਾਕਭਜ੍ਜਿਤਾਨਂ ਸਾਲਿਆਦੀਨਂ ਤਣ੍ਡੁਲਾ, ਭਜ੍ਜਿਤਤਣ੍ਡੁਲਾ ਏવ વਾ। ਭਟ੍ਠਪਿਟ੍ਠਨ੍ਤਿ ਸੁਦ੍ਧਂ ਯਂ ਕਿਞ੍ਚਿ ਭਜ੍ਜਿਤਂ ਪਿਟ੍ਠਂ। ਪੁਥੁਕਾਤਿ ਸਾਲਿਆਦੀਨਂ ਪੁਥੁਕਾ। ਪੁਥੁਕਾ ਹਿ ਤਨ੍ਤਿਆਗਮਯੁਤ੍ਤਿਯਾ વਿਸੁਮ੍ਪਿ ਗਯ੍ਹਤਿ, ਏਕਤੋਪਿ, ਤਸ੍ਮਾ વੁਤ੍ਤਾવਸੇਸਾਨਂ ਪੁਥੁਕਾવੇਲ਼ੁਆਦੀਨਂ ਭਤ੍ਤਨ੍ਤਿ ਚ ਸਮ੍ਬਨ੍ਧੋ। વੇਲ਼ੂਤਿ ਤੇਸਂ ਤਣ੍ਡੁਲਾ વੁਚ੍ਚਨ੍ਤਿ। ਪੁਥੁਕਾ ਚ વੇਲ਼ੁ ਚ, ਤੇ ਆਦਯੋ ਯੇਸਨ੍ਤਿ ਸਮਾਸੋ। ਚ-ਸਦ੍ਦੋ ਪਨੇਤ੍ਥ ਸਬ੍ਬਤ੍ਥਾਪਿ ਯੋਜੇਤਬ੍ਬੋ। ਆਦਿ-ਸਦ੍ਦੇਨ ਕਨ੍ਦਮੂਲਫਲਾਨਿਪਿ ਗਯ੍ਹਨ੍ਤਿ। વੁਤ੍ਤਾવਸੇਸਾਨਨ੍ਤਿ વੁਤ੍ਤੇਹਿ ਸਤ੍ਤવਿਧੇਹਿ ਧਞ੍ਞੇਹਿ ਅવਸੇਸਾਨਂ। ਰਸਯਾਗੂਤਿ ਰਸੇਹਿ ਪਕ੍ਕਮਂਸਾਦੀਹਿ ਸਮ੍ਮਿਸ੍ਸਾ ਯਾਗੁ। ਰਸੋਪਿ ਤਾਦਿਸੋવ। ਸੁਦ੍ਧਯਾਗੂਤਿ ਮਂਸਾਦੀਹਿ ਅਮਿਸ੍ਸਾ ਸੁਦ੍ਧਯਾਗੁ। ਫਲਾਦੀਨੀਤਿ ਆਦਿ-ਸਦ੍ਦੇਨ ਕਨ੍ਦਾਦੀਨਮ੍ਪਿ ਗਹਣਂ। ਅਪਿ ਚਾਤਿ ਨਿਪਾਤੋ, ਨਿਪਾਤਸਮੁਦਾਯੋ વਾ ਸਮੁਚ੍ਚਯੇ, ਸੋ ਪਚ੍ਚੇਕਂ ਯੋਜੇਤਬ੍ਬੋ।
79-80. Idāni ye pavāraṇaṃ na janenti, te dassetuṃ ‘‘lājā’’tiādimāha. Tattha lājā…pe… phalādīni pavāraṇaṃ na janentīti sambandho. Lājāti sāliādīhi katā lājā. Taṃsattubhattānīti tehi lājehi katā sattu ceva bhattāni ca. Gorasoti gunnaṃ raso khīrādi. Suddhakhajjakoti macchamaṃsehi asammissatāya suddhakhajjako. Sattuyo piṇḍetvā kato apakko sattuguḷo pana sattumodakasaṅkhāto pavāreti. Taṇḍulāti samapākabhajjitānaṃ sāliādīnaṃ taṇḍulā, bhajjitataṇḍulā eva vā. Bhaṭṭhapiṭṭhanti suddhaṃ yaṃ kiñci bhajjitaṃ piṭṭhaṃ. Puthukāti sāliādīnaṃ puthukā. Puthukā hi tantiāgamayuttiyā visumpi gayhati, ekatopi, tasmā vuttāvasesānaṃ puthukāveḷuādīnaṃ bhattanti ca sambandho. Veḷūti tesaṃ taṇḍulā vuccanti. Puthukā ca veḷu ca, te ādayo yesanti samāso. Ca-saddo panettha sabbatthāpi yojetabbo. Ādi-saddena kandamūlaphalānipi gayhanti. Vuttāvasesānanti vuttehi sattavidhehi dhaññehi avasesānaṃ. Rasayāgūti rasehi pakkamaṃsādīhi sammissā yāgu. Rasopi tādisova. Suddhayāgūti maṃsādīhi amissā suddhayāgu. Phalādīnīti ādi-saddena kandādīnampi gahaṇaṃ. Api cāti nipāto, nipātasamudāyo vā samuccaye, so paccekaṃ yojetabbo.
੮੧. ਇਦਾਨਿ ਯਸ੍ਮਾ ਸਤ੍ਤਹਿ વਿਨਯਕਮ੍ਮਾਕਾਰੇਹਿ ਯਂ ਅਤਿਰਿਤ੍ਤਂ ਅਕਤਂ, ਤਤ੍ਥ ਪਾਚਿਤ੍ਤਿਯਂ વੁਤ੍ਤਂ, ਬ੍ਯਤਿਰੇਕਤੋ ਅਤਿਰਿਤ੍ਤਕਤੇ ਨਤ੍ਥਿ, ਤਸ੍ਮਾ ਅਤਿਰਿਤ੍ਤਂ ਕਰੋਨ੍ਤੇਨ ਏવਂ ਕਾਤਬ੍ਬਨ੍ਤਿ ਦਸ੍ਸੇਨ੍ਤੋ ‘‘ਪવਾਰਿਤੇਨਾ’’ਤਿਆਦਿਮਾਹ। ਤਤ੍ਥ ਪવਾਰਿਤੇਨ વੁਟ੍ਠਾਯ ਅਤਿਰਿਤ੍ਤਂ ਨ ਕਾਤਬ੍ਬਂ, ਭੋਜਨਂ ਅਭੁਤ੍ਤੇਨ ਚ ਅਤਿਰਿਤ੍ਤਂ ਨ ਕਾਤਬ੍ਬਨ੍ਤਿ ਸਮ੍ਬਨ੍ਧੋ। ਭੋਜਨਨ੍ਤਿ ਪવਾਰਣਪ੍ਪਹੋਨਕਭੋਜਨਂ। ਅਭੁਤ੍ਤੇਨਾਤਿ ਏਕਸਿਤ੍ਥਮਤ੍ਤਮ੍ਪਿ ਅਭੁਤ੍ਤਾવਿਨਾ। ਯੇਨ ਯਂવਾ ਪੁਰੇ ਕਤਨ੍ਤਿ ਏਤ੍ਥ ਚ ਏવ-ਸਦ੍ਦੋ ਦੀਘਂ ਕਤ੍વਾ ਨਿਦ੍ਦਿਟ੍ਠੋ, ਸੋ ਚ ਅਜ੍ਝਾਹਟੇਨ ਤਂ-ਸਦ੍ਦੇਨ ਸਮ੍ਬਨ੍ਧੀਯਤਿ, ਤਸ੍ਮਾ ਯੇਨ ਭਿਕ੍ਖੁਨਾ ਯਂ ਭੋਜਨਂ ਪੁਰੇ ਪੁਬ੍ਬੇ ਅਤਿਰਿਤ੍ਤਂ ਕਤਂ, ਤੇਨੇવ ਤਮੇવ ਅਤਿਰਿਤ੍ਤਂ ਨ ਕਾਤਬ੍ਬਨ੍ਤਿ ਯੋਜੇਤ੍વਾ ਅਤ੍ਥੋ વੇਦਿਤਬ੍ਬੋ। ਤਸ੍ਮਾ ਕਪ੍ਪਿਯਂ ਕਾਰੇਤ੍વਾ ਭੁਞ੍ਜਨ੍ਤਸ੍ਸ ਅਞ੍ਞਂ ਆਮਿਸਂ ਆਕਿਰਨ੍ਤਿ, ਤਂ ਸੋ ਪੁਨ ਕਾਤੁਂ ਨ ਲਭਤਿ, ਤਸ੍ਮਿਂ ਭੋਜਨੇ ਕਰਿਯਮਾਨੇ ਪਠਮਕਤੇਨ ਸਦ੍ਧਿਂ ਕਤਂ ਹੋਤੀਤਿ। ਅਞ੍ਞਸ੍ਮਿਂ ਪਨ ਤੇਨ વਾ ਅਞ੍ਞੇਨ વਾ ਕਾਤੁਂ વਟ੍ਟਤਿ।
81. Idāni yasmā sattahi vinayakammākārehi yaṃ atirittaṃ akataṃ, tattha pācittiyaṃ vuttaṃ, byatirekato atirittakate natthi, tasmā atirittaṃ karontena evaṃ kātabbanti dassento ‘‘pavāritenā’’tiādimāha. Tattha pavāritena vuṭṭhāya atirittaṃ na kātabbaṃ, bhojanaṃ abhuttena ca atirittaṃ na kātabbanti sambandho. Bhojananti pavāraṇappahonakabhojanaṃ. Abhuttenāti ekasitthamattampi abhuttāvinā. Yena yaṃvā pure katanti ettha ca eva-saddo dīghaṃ katvā niddiṭṭho, so ca ajjhāhaṭena taṃ-saddena sambandhīyati, tasmā yena bhikkhunā yaṃ bhojanaṃ pure pubbe atirittaṃ kataṃ, teneva tameva atirittaṃ na kātabbanti yojetvā attho veditabbo. Tasmā kappiyaṃ kāretvā bhuñjantassa aññaṃ āmisaṃ ākiranti, taṃ so puna kātuṃ na labhati, tasmiṃ bhojane kariyamāne paṭhamakatena saddhiṃ kataṃ hotīti. Aññasmiṃ pana tena vā aññena vā kātuṃ vaṭṭati.
੮੨. ‘‘ਕਪ੍ਪਿਯ’’ਨ੍ਤਿਆਦੀਨਿ ‘‘ਕਰੋਨ੍ਤੋ’’ਤਿ ਏਤਸ੍ਸ ਕਮ੍ਮਪਦਾਨਿ। ਕਪ੍ਪਿਯਞ੍ਚੇવ ਗਹਿਤਞ੍ਚੇવ ਉਚ੍ਚਾਰਿਤਞ੍ਚੇવ ਹਤ੍ਥਪਾਸਗਞ੍ਚੇવ ਯਾવਕਾਲਿਕਂ ਅਤਿਰਿਤ੍ਤਂ ਕਰੋਨ੍ਤੋ ‘‘ਅਲਮੇਤਂ ਸਬ੍ਬ’’ਨ੍ਤਿ ਏવਂ ਭਾਸਤੂਤਿ ਯੋਜਨਾ। ਤਤ੍ਥਯਂ ਫਲਂ વਾ ਕਨ੍ਦਮੂਲਾਦਿ વਾ ਪਞ੍ਚਹਿ ਸਮਣਕਪ੍ਪੇਹਿ ਕਪ੍ਪਿਯਂ ਕਤਂ, ਯਞ੍ਚ ਕਪ੍ਪਿਯਮਂਸਂ વਾ ਕਪ੍ਪਿਯਭੋਜਨਂ વਾ, ਏਤਂ ਕਪ੍ਪਿਯਂ ਨਾਮ। ਗਹਿਤਨ੍ਤਿ ਭਿਕ੍ਖੁਨਾ ਪਟਿਗ੍ਗਹਿਤਂ। ਉਚ੍ਚਾਰਿਤਨ੍ਤਿ ਕਪ੍ਪਿਯਂ ਕਾਰੇਤੁਂ ਆਗਤੇਨ ਭਿਕ੍ਖੁਨਾ ਈਸਕਮ੍ਪਿ ਉਕ੍ਖਿਤ੍ਤਂ વਾ ਅਪਨਾਮਿਤਂ વਾ, ਤਂ ਪਨ ਅਤਿਰਿਤ੍ਤਕਾਰਕੇਨ ‘‘ਅਲਮੇਤਂ ਸਬ੍ਬ’’ਨ੍ਤਿ વੁਤ੍ਤੇਨ ਕਾਤਬ੍ਬਂ। ਹਤ੍ਥਪਾਸਗਨ੍ਤਿ ਕਪ੍ਪਿਯਂ ਕਾਰੇਤੁਂ ਆਗਤੇਨ ਹਤ੍ਥਪਾਸਂ ਗਤਂ। ਅਤਿਰਿਤ੍ਤਂ ਕਰੋਨ੍ਤੋਤਿ ਈਦਿਸਂ ਚਤੁਬ੍ਬਿਧਾਕਾਰਸਮ੍ਪਨ੍ਨਂ ਭੋਜਨਂ ਅਤਿਰਿਤ੍ਤਂ ਕਰੋਨ੍ਤੋ ਪવਾਰੇਤ੍વਾ ਆਸਨਾ ਅવੁਟ੍ਠਿਤੋ વਾ ਅਪ੍ਪવਾਰੇਤ੍વਾਪਿ ਸਬ੍ਬਥਾ ਭੁਤ੍ਤੋ વਾਤਿ ਏવਂ ਦੁવਿਧવਿਨਯਕਮ੍ਮਾਕਾਰਸਮ੍ਪਨ੍ਨੋ ਭਿਕ੍ਖੁ। ਅਲਮੇਤਂ ਸਬ੍ਬਨ੍ਤਿ ਏવਂ ਭਾਸਤੂਤਿ ਅਲਮੇਤਂ ਸਬ੍ਬਂ ਇਤਿ ਏવਂ ਭਾਸਤੁ। ਏવਂ ਸਤ੍ਤવਿਧਂ વਿਨਯਕਮ੍ਮਾਕਾਰਂ ਸਮ੍ਪਾਦੇਨ੍ਤੋ વਚੀਭੇਦਂ ਕਤ੍વਾ ਸਕਿਮ੍ਪਿ ਏવਂ વਦੇਯ੍ਯਾਤਿ ਅਤ੍ਥੋ।
82.‘‘Kappiya’’ntiādīni ‘‘karonto’’ti etassa kammapadāni. Kappiyañceva gahitañceva uccāritañceva hatthapāsagañceva yāvakālikaṃ atirittaṃ karonto ‘‘alametaṃ sabba’’nti evaṃ bhāsatūti yojanā. Tatthayaṃ phalaṃ vā kandamūlādi vā pañcahi samaṇakappehi kappiyaṃ kataṃ, yañca kappiyamaṃsaṃ vā kappiyabhojanaṃ vā, etaṃ kappiyaṃ nāma. Gahitanti bhikkhunā paṭiggahitaṃ. Uccāritanti kappiyaṃ kāretuṃ āgatena bhikkhunā īsakampi ukkhittaṃ vā apanāmitaṃ vā, taṃ pana atirittakārakena ‘‘alametaṃ sabba’’nti vuttena kātabbaṃ. Hatthapāsaganti kappiyaṃ kāretuṃ āgatena hatthapāsaṃ gataṃ. Atirittaṃ karontoti īdisaṃ catubbidhākārasampannaṃ bhojanaṃ atirittaṃ karonto pavāretvā āsanā avuṭṭhito vā appavāretvāpi sabbathā bhutto vāti evaṃ duvidhavinayakammākārasampanno bhikkhu. Alametaṃ sabbanti evaṃ bhāsatūti alametaṃ sabbaṃ iti evaṃ bhāsatu. Evaṃ sattavidhaṃ vinayakammākāraṃ sampādento vacībhedaṃ katvā sakimpi evaṃ vadeyyāti attho.
੮੩. ਕਪ੍ਪਿਯਂ ਕਰੋਨ੍ਤੇਨ ਪਨ ਅਨੁਪਸਮ੍ਪਨ੍ਨਸ੍ਸ ਹਤ੍ਥੇ ਠਿਤਂ ਨ ਕਾਤਬ੍ਬਂ। ਤੇਨਾਹ ‘‘ਨ ਕਰੇ…ਪੇ॰… ਹਤ੍ਥਗ’’ਨ੍ਤਿ। ਉਪਸਮ੍ਪਨ੍ਨਤੋ ਅਞ੍ਞੋ ਅਨੁਪਸਮ੍ਪਨ੍ਨੋ, ਤਸ੍ਸ ਹਤ੍ਥੇ ਗਤਂ ਅਨੁਪਸਮ੍ਪਨ੍ਨਹਤ੍ਥਗਂ। ਪੇਸਯਿਤ੍વਾਪੀਤਿ ਸਚੇ ਤਤ੍ਥ ਅਞ੍ਞੋ ਬ੍ਯਤ੍ਤੋ ਭਿਕ੍ਖੁ ਨਤ੍ਥਿ, ਯਤ੍ਥ ਅਤ੍ਥਿ, ਤਤ੍ਥ ਪੇਸਯਿਤ੍વਾਪਿ। ਤਂ ਅਤਿਰਿਤ੍ਤਕਤਂ ਅਕਾਰਕੋ ਅਤਿਰਿਤ੍ਤਕਾਰਕਤੋ ਅਞ੍ਞੋ ਸਬ੍ਬੋ ਪવਾਰਿਤੋਪਿ ਅਪ੍ਪવਾਰਿਤੋਪਿ ਭੁਞ੍ਜਿਤੁਂ ਲਬ੍ਭਤੇਤਿ ਸਮ੍ਬਨ੍ਧਨੀਯਂ। ਪવਾਰਿਤੇਨ ਪਨ ਮੁਖਞ੍ਚ ਹਤ੍ਥਞ੍ਚ ਸੋਧੇਤ੍વਾ ਭੁਞ੍ਜਿਤਬ੍ਬਂ।
83. Kappiyaṃ karontena pana anupasampannassa hatthe ṭhitaṃ na kātabbaṃ. Tenāha ‘‘na kare…pe… hatthaga’’nti. Upasampannato añño anupasampanno, tassa hatthe gataṃ anupasampannahatthagaṃ. Pesayitvāpīti sace tattha añño byatto bhikkhu natthi, yattha atthi, tattha pesayitvāpi. Taṃ atirittakataṃ akārako atirittakārakato añño sabbo pavāritopi appavāritopi bhuñjituṃ labbhateti sambandhanīyaṃ. Pavāritena pana mukhañca hatthañca sodhetvā bhuñjitabbaṃ.
ਪવਾਰਣਾਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Pavāraṇāniddesavaṇṇanā niṭṭhitā.
