| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
145. бавааран̣аасан̇г̇ахо
145. Pavāraṇāsaṅgaho
241. д̇зна ко бана самаязна самб̣ахулаа санд̣̇идтаа самбхад̇д̇аа бхигкуу госалзсу ж̇анабад̣̇з ан̃н̃ад̇арасмим̣ ааваасз вассам̣ убаг̇ажчим̣су. д̇зсам̣ самаг̇г̇аанам̣ саммод̣̇амаанаанам̣ авивад̣̇амаанаанам̣ вихарад̇ам̣ ан̃н̃ад̇аро паасувихааро ад̇хиг̇ад̇о ход̇и. ат̇а ко д̇зсам̣ бхигкуунам̣ зд̇ад̣̇ахоси – ‘‘амхаагам̣ ко самаг̇г̇аанам̣ саммод̣̇амаанаанам̣ авивад̣̇амаанаанам̣ вихарад̇ам̣ ан̃н̃ад̇аро паасувихааро ад̇хиг̇ад̇о. сажз маяам̣ ид̣̇аани баваарзссаама , сияааби бхигкуу баваарзд̇ваа жааригам̣ баггамзяяум̣. звам̣ маяам̣ имамхаа паасувихаараа бариб̣аахираа бхависсаама. гат̇ам̣ ну ко амхзхи бадибаж̇ж̇ид̇аб̣б̣а’’нд̇и? бхаг̇авад̇о зд̇амад̇т̇ам̣ аарожзсум̣.
241. Tena kho pana samayena sambahulā sandiṭṭhā sambhattā bhikkhū kosalesu janapade aññatarasmiṃ āvāse vassaṃ upagacchiṃsu. Tesaṃ samaggānaṃ sammodamānānaṃ avivadamānānaṃ viharataṃ aññataro phāsuvihāro adhigato hoti. Atha kho tesaṃ bhikkhūnaṃ etadahosi – ‘‘amhākaṃ kho samaggānaṃ sammodamānānaṃ avivadamānānaṃ viharataṃ aññataro phāsuvihāro adhigato. Sace mayaṃ idāni pavāressāma , siyāpi bhikkhū pavāretvā cārikaṃ pakkameyyuṃ. Evaṃ mayaṃ imamhā phāsuvihārā paribāhirā bhavissāma. Kathaṃ nu kho amhehi paṭipajjitabba’’nti? Bhagavato etamatthaṃ ārocesuṃ.
ид̇ха бана, бхигкавз, самб̣ахулаа санд̣̇идтаа самбхад̇д̇аа бхигкуу ан̃н̃ад̇арасмим̣ ааваасз вассам̣ убаг̇ажчанд̇и. д̇зсам̣ самаг̇г̇аанам̣ саммод̣̇амаанаанам̣ авивад̣̇амаанаанам̣ вихарад̇ам̣ ан̃н̃ад̇аро паасувихааро ад̇хиг̇ад̇о ход̇и. д̇ад̇ра жз бхигкуунам̣ звам̣ ход̇и – ‘‘амхаагам̣ ко самаг̇г̇аанам̣ саммод̣̇амаанаанам̣ авивад̣̇амаанаанам̣ вихарад̇ам̣ ан̃н̃ад̇аро паасувихааро ад̇хиг̇ад̇о. сажз маяам̣ ид̣̇аани баваарзссаама, сияааби бхигкуу баваарзд̇ваа жааригам̣ баггамзяяум̣. звам̣ маяам̣ имамхаа паасувихаараа бариб̣аахираа бхависсаамаа’’д̇и, ануж̇аанаами, бхигкавз, д̇зхи бхигкуухи бавааран̣аасан̇г̇ахам̣ гаад̇ум̣. зван̃жа бана, бхигкавз, гаад̇аб̣б̣о. саб̣б̣зхзва згаж̇жхам̣ саннибад̇ид̇аб̣б̣ам̣ – саннибад̇ид̇ваа б̣яад̇д̇зна бхигкунаа бадиб̣алзна сан̇гхо н̃аабзд̇аб̣б̣о –
Idha pana, bhikkhave, sambahulā sandiṭṭhā sambhattā bhikkhū aññatarasmiṃ āvāse vassaṃ upagacchanti. Tesaṃ samaggānaṃ sammodamānānaṃ avivadamānānaṃ viharataṃ aññataro phāsuvihāro adhigato hoti. Tatra ce bhikkhūnaṃ evaṃ hoti – ‘‘amhākaṃ kho samaggānaṃ sammodamānānaṃ avivadamānānaṃ viharataṃ aññataro phāsuvihāro adhigato. Sace mayaṃ idāni pavāressāma, siyāpi bhikkhū pavāretvā cārikaṃ pakkameyyuṃ. Evaṃ mayaṃ imamhā phāsuvihārā paribāhirā bhavissāmā’’ti, anujānāmi, bhikkhave, tehi bhikkhūhi pavāraṇāsaṅgahaṃ kātuṃ. Evañca pana, bhikkhave, kātabbo. Sabbeheva ekajjhaṃ sannipatitabbaṃ – sannipatitvā byattena bhikkhunā paṭibalena saṅgho ñāpetabbo –
‘‘сун̣аад̇у мз, бханд̇з, сан̇гхо. амхаагам̣ самаг̇г̇аанам̣ саммод̣̇амаанаанам̣ авивад̣̇амаанаанам̣ вихарад̇ам̣ ан̃н̃ад̇аро паасувихааро ад̇хиг̇ад̇о. сажз маяам̣ ид̣̇аани баваарзссаама, сияааби бхигкуу баваарзд̇ваа жааригам̣ баггамзяяум̣. звам̣ маяам̣ имамхаа паасувихаараа бариб̣аахираа бхависсаама. яад̣̇и сан̇гхасса бад̇д̇агаллам̣, сан̇гхо бавааран̣аасан̇г̇ахам̣ гарзяяа, ид̣̇аани убосат̇ам̣ гарзяяа, баад̇имогкам̣ уд̣̇д̣̇исзяяа, ааг̇амз ж̇ун̣хз гомуд̣̇ияаа жаад̇умаасинияаа баваарзяяа. зсаа н̃ад̇д̇и.
‘‘Suṇātu me, bhante, saṅgho. Amhākaṃ samaggānaṃ sammodamānānaṃ avivadamānānaṃ viharataṃ aññataro phāsuvihāro adhigato. Sace mayaṃ idāni pavāressāma, siyāpi bhikkhū pavāretvā cārikaṃ pakkameyyuṃ. Evaṃ mayaṃ imamhā phāsuvihārā paribāhirā bhavissāma. Yadi saṅghassa pattakallaṃ, saṅgho pavāraṇāsaṅgahaṃ kareyya, idāni uposathaṃ kareyya, pātimokkhaṃ uddiseyya, āgame juṇhe komudiyā cātumāsiniyā pavāreyya. Esā ñatti.
‘‘сун̣аад̇у мз, бханд̇з, сан̇гхо. амхаагам̣ самаг̇г̇аанам̣ саммод̣̇амаанаанам̣ авивад̣̇амаанаанам̣ вихарад̇ам̣ ан̃н̃ад̇аро паасувихааро ад̇хиг̇ад̇о. сажз маяам̣ ид̣̇аани баваарзссаама, сияааби бхигкуу баваарзд̇ваа жааригам̣ баггамзяяум̣. звам̣ маяам̣ имамхаа паасувихаараа бариб̣аахираа бхависсаама. сан̇гхо бавааран̣аасан̇г̇ахам̣ гарод̇и, ид̣̇аани убосат̇ам̣ гариссад̇и, баад̇имогкам̣ уд̣̇д̣̇исиссад̇и, ааг̇амз ж̇ун̣хз гомуд̣̇ияаа жаад̇умаасинияаа баваарзссад̇и. яассааяасмад̇о камад̇и бавааран̣аасан̇г̇ахасса гаран̣ам̣, ид̣̇аани убосат̇ам̣ гариссад̇и, баад̇имогкам̣ уд̣̇д̣̇исиссад̇и, ааг̇амз ж̇ун̣хз гомуд̣̇ияаа жаад̇умаасинияаа баваарзссад̇и, со д̇ун̣хасса; яасса нагкамад̇и, со бхаасзяяа.
‘‘Suṇātu me, bhante, saṅgho. Amhākaṃ samaggānaṃ sammodamānānaṃ avivadamānānaṃ viharataṃ aññataro phāsuvihāro adhigato. Sace mayaṃ idāni pavāressāma, siyāpi bhikkhū pavāretvā cārikaṃ pakkameyyuṃ. Evaṃ mayaṃ imamhā phāsuvihārā paribāhirā bhavissāma. Saṅgho pavāraṇāsaṅgahaṃ karoti, idāni uposathaṃ karissati, pātimokkhaṃ uddisissati, āgame juṇhe komudiyā cātumāsiniyā pavāressati. Yassāyasmato khamati pavāraṇāsaṅgahassa karaṇaṃ, idāni uposathaṃ karissati, pātimokkhaṃ uddisissati, āgame juṇhe komudiyā cātumāsiniyā pavāressati, so tuṇhassa; yassa nakkhamati, so bhāseyya.
‘‘гад̇о сан̇гхзна бавааран̣аасан̇г̇ахо, ид̣̇аани убосат̇ам̣ гариссад̇и, баад̇имогкам̣ уд̣̇д̣̇исиссад̇и, ааг̇амз ж̇ун̣хз гомуд̣̇ияаа жаад̇умаасинияаа баваарзссад̇и. камад̇и сан̇гхасса, д̇асмаа д̇ун̣хий, звамзд̇ам̣ д̇хаараяаамий’’д̇и.
‘‘Kato saṅghena pavāraṇāsaṅgaho, idāni uposathaṃ karissati, pātimokkhaṃ uddisissati, āgame juṇhe komudiyā cātumāsiniyā pavāressati. Khamati saṅghassa, tasmā tuṇhī, evametaṃ dhārayāmī’’ti.
д̇зхи жз, бхигкавз, бхигкуухи гад̇з бавааран̣аасан̇г̇ахз ан̃н̃ад̇аро бхигку звам̣ вад̣̇зяяа – ‘‘ижчаамахам̣, аавусо, ж̇анабад̣̇ажааригам̣ баггамид̇ум̣; ад̇т̇и мз ж̇анабад̣̇з гаран̣ийяа’’нд̇и, со звамасса важанийяо – ‘‘саад̇хаавусо, баваарзд̇ваа г̇ажчаахий’’д̇и. со жз , бхигкавз, бхигку баваараяамаано ан̃н̃ад̇арасса бхигкуно бавааран̣ам̣ табзд̇и, со звамасса важанийяо – ‘‘аниссаро ко мз д̇вам̣, аавусо, бавааран̣ааяа, на д̇ааваахам̣ баваарзссаамий’’д̇и. д̇асса жз, бхигкавз, бхигкуно баваараяамаанасса ан̃н̃ад̇аро бхигку д̇асса бхигкуно бавааран̣ам̣ табзд̇и, убхо сан̇гхзна самануяун̃ж̇ид̇ваа самануг̇аахид̇ваа яат̇аад̇хаммам̣ гаараабзд̇аб̣б̣аа. со жз, бхигкавз, бхигку ж̇анабад̣̇з д̇ам̣ гаран̣ийяам̣ д̇ийрзд̇ваа бунад̣̇зва анд̇о гомуд̣̇ияаа жаад̇умаасинияаа д̇ам̣ ааваасам̣ ааг̇ажчад̇и, д̇зхи жз, бхигкавз, бхигкуухи баваарияамаанз ан̃н̃ад̇аро бхигку д̇асса бхигкуно бавааран̣ам̣ табзд̇и, со звамасса важанийяо – ‘‘аниссаро ко мз д̇вам̣, аавусо, бавааран̣ааяа; баваарид̇о аха’’нд̇и. д̇зхи жз, бхигкавз, бхигкуухи баваарияамаанз со бхигку ан̃н̃ад̇арасса бхигкуно бавааран̣ам̣ табзд̇и, убхо сан̇гхзна самануяун̃ж̇ид̇ваа самануг̇аахид̇ваа яат̇аад̇хаммам̣ гаараабзд̇ваа сан̇гхзна баваарзд̇аб̣б̣анд̇и.
Tehi ce, bhikkhave, bhikkhūhi kate pavāraṇāsaṅgahe aññataro bhikkhu evaṃ vadeyya – ‘‘icchāmahaṃ, āvuso, janapadacārikaṃ pakkamituṃ; atthi me janapade karaṇīya’’nti, so evamassa vacanīyo – ‘‘sādhāvuso, pavāretvā gacchāhī’’ti. So ce , bhikkhave, bhikkhu pavārayamāno aññatarassa bhikkhuno pavāraṇaṃ ṭhapeti, so evamassa vacanīyo – ‘‘anissaro kho me tvaṃ, āvuso, pavāraṇāya, na tāvāhaṃ pavāressāmī’’ti. Tassa ce, bhikkhave, bhikkhuno pavārayamānassa aññataro bhikkhu tassa bhikkhuno pavāraṇaṃ ṭhapeti, ubho saṅghena samanuyuñjitvā samanugāhitvā yathādhammaṃ kārāpetabbā. So ce, bhikkhave, bhikkhu janapade taṃ karaṇīyaṃ tīretvā punadeva anto komudiyā cātumāsiniyā taṃ āvāsaṃ āgacchati, tehi ce, bhikkhave, bhikkhūhi pavāriyamāne aññataro bhikkhu tassa bhikkhuno pavāraṇaṃ ṭhapeti, so evamassa vacanīyo – ‘‘anissaro kho me tvaṃ, āvuso, pavāraṇāya; pavārito aha’’nti. Tehi ce, bhikkhave, bhikkhūhi pavāriyamāne so bhikkhu aññatarassa bhikkhuno pavāraṇaṃ ṭhapeti, ubho saṅghena samanuyuñjitvā samanugāhitvā yathādhammaṃ kārāpetvā saṅghena pavāretabbanti.
бавааран̣аасан̇г̇ахо нидтид̇о.
Pavāraṇāsaṅgaho niṭṭhito.
бавааран̣аагканд̇хаго жад̇уд̇т̇о.
Pavāraṇākkhandhako catuttho.
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / бавааран̣аасан̇г̇ахагат̇аа • Pavāraṇāsaṅgahakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / бавааран̣аасан̇г̇ахагат̇ааван̣н̣анаа • Pavāraṇāsaṅgahakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / бавааран̣аасан̇г̇ахагат̇ааван̣н̣анаа • Pavāraṇāsaṅgahakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 145. бавааран̣аасан̇г̇ахагат̇аа • 145. Pavāraṇāsaṅgahakathā
