| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. பவாரணாஸுத்தவண்ணனா
7. Pavāraṇāsuttavaṇṇanā
215. ஸத்தமே தத³ஹூதி தஸ்மிங் அஹு, தஸ்மிங் தி³வஸேதி அத்தோ². உபவஸந்தி எத்தா²தி உபோஸதோ². உபவஸந்தீதி ச ஸீலேன வா அனஸனேன வா உபேதா ஹுத்வா வஸந்தீதி அத்தோ². ஸோ பனேஸ உபோஸத²தி³வஸோ அட்ட²மீசாதுத்³த³ஸீபன்னரஸீபே⁴தே³ன திவிதோ⁴, தஸ்மா ஸேஸத்³வயனிவாரணத்த²ங் பன்னரஸேதி வுத்தங். பவாரணாயாதி வஸ்ஸங்-வுட்ட²-பவாரணாய. விஸுத்³தி⁴பவாரணாதிபி ஏதிஸ்ஸாவ நாமங். நிஸின்னோ ஹோதீதி ஸாயன்ஹஸமயே ஸம்பத்தபரிஸாய காலயுத்தங் த⁴ம்மங் தே³ஸெத்வா உத³ககொட்ட²கே க³த்தானி பரிஸிஞ்சித்வா நிவத்த²னிவாஸனோ ஏகங்ஸங் ஸுக³தமஹாசீவரங் கத்வா மஜ்ஜி²மத்த²ம்ப⁴ங் நிஸ்ஸாய பஞ்ஞத்தே வரபு³த்³தா⁴ஸனே புரத்தி²மதி³ஸாய உட்ட²ஹதோ சந்த³மண்ட³லஸ்ஸ ஸிரிங் ஸிரியா அபி⁴ப⁴வமானோ நிஸின்னோ ஹோதி. துண்ஹீபூ⁴தங் துண்ஹீபூ⁴தந்தி யதோ யதோ அனுவிலோகேதி, ததோ ததோ துண்ஹீபூ⁴தமேவ. தத்த² ஹி ஏகபி⁴க்கு²ஸ்ஸாபி ஹத்த²குக்குச்சங் வா பாத³குக்குச்சங் வா நத்தி², ஸப்³பே³ நிரவா ஸந்தேன இரியாபதே²ன நிஸீதி³ங்ஸு. அனுவிலோகெத்வாதி தி³ஸ்ஸமானபஞ்சபஸாதே³ஹி நெத்தேஹி அனுவிலோகெத்வா. ஹந்தா³தி வொஸ்ஸக்³க³த்தே² நிபாதோ. ந ச மே கிஞ்சி க³ரஹதா²தி எத்த² ந ச கிஞ்சீதி புச்ச²னத்தே² ந-காரோ. கிங் மே கிஞ்சி க³ரஹத²? யதி³ க³ரஹத², வத³த², இச்சா²பேமி வோ வத்துந்தி அத்தோ². காயிகங் வா வாசஸிகங் வாதி இமினா காயவசீத்³வாரானேவ பவாரேதி, ந மனொத்³வாரங். கஸ்மா? அபாகடத்தா. காயவசீத்³வாரேஸு ஹி தோ³ஸோ பாகடோ ஹோதி, ந மனொத்³வாரே. ‘‘ஏகமஞ்சே ஸயதோபி ஹி கிங் சிந்தேஸீ’’தி? புச்சி²த்வா சித்தாசாரங் ஜானாதி. இதி மனொத்³வாரங் அபாகடத்தா ந பவாரேதி, நோ அபரிஸுத்³த⁴த்தா. போ³தி⁴ஸத்தபூ⁴தஸ்ஸாபி ஹி தஸ்ஸ பூ⁴ரித³த்தச²த்³த³ந்தஸங்க²பாலத⁴ம்மபாலாதி³காலே மனொத்³வாரங் பரிஸுத்³த⁴ங், இதா³னெத்த² வத்தப்³ப³மேவ நத்தி².
215. Sattame tadahūti tasmiṃ ahu, tasmiṃ divaseti attho. Upavasanti etthāti uposatho. Upavasantīti ca sīlena vā anasanena vā upetā hutvā vasantīti attho. So panesa uposathadivaso aṭṭhamīcātuddasīpannarasībhedena tividho, tasmā sesadvayanivāraṇatthaṃ pannaraseti vuttaṃ. Pavāraṇāyāti vassaṃ-vuṭṭha-pavāraṇāya. Visuddhipavāraṇātipi etissāva nāmaṃ. Nisinno hotīti sāyanhasamaye sampattaparisāya kālayuttaṃ dhammaṃ desetvā udakakoṭṭhake gattāni parisiñcitvā nivatthanivāsano ekaṃsaṃ sugatamahācīvaraṃ katvā majjhimatthambhaṃ nissāya paññatte varabuddhāsane puratthimadisāya uṭṭhahato candamaṇḍalassa siriṃ siriyā abhibhavamāno nisinno hoti. Tuṇhībhūtaṃ tuṇhībhūtanti yato yato anuviloketi, tato tato tuṇhībhūtameva. Tattha hi ekabhikkhussāpi hatthakukkuccaṃ vā pādakukkuccaṃ vā natthi, sabbe niravā santena iriyāpathena nisīdiṃsu. Anuviloketvāti dissamānapañcapasādehi nettehi anuviloketvā. Handāti vossaggatthe nipāto. Na ca me kiñci garahathāti ettha na ca kiñcīti pucchanatthe na-kāro. Kiṃ me kiñci garahatha? Yadi garahatha, vadatha, icchāpemi vo vattunti attho. Kāyikaṃ vā vācasikaṃ vāti iminā kāyavacīdvārāneva pavāreti, na manodvāraṃ. Kasmā? Apākaṭattā. Kāyavacīdvāresu hi doso pākaṭo hoti, na manodvāre. ‘‘Ekamañce sayatopi hi kiṃ cintesī’’ti? Pucchitvā cittācāraṃ jānāti. Iti manodvāraṃ apākaṭattā na pavāreti, no aparisuddhattā. Bodhisattabhūtassāpi hi tassa bhūridattachaddantasaṅkhapāladhammapālādikāle manodvāraṃ parisuddhaṃ, idānettha vattabbameva natthi.
ஏதத³வோசாதி த⁴ம்மஸேனாபதிட்டா²னே டி²தத்தா பி⁴க்கு²ஸங்க⁴ஸ்ஸ பா⁴ரங் வஹந்தோ ஏதங் அவோச. ந கோ² மயங், ப⁴ந்தேதி, ப⁴ந்தே, மயங் ப⁴க³வதோ ந கிஞ்சி க³ரஹாம. காயிகங் வா வாசஸிகங் வாதி இத³ங் சதுன்னங் அரக்கி²யதங் ஸந்தா⁴ய தே²ரோ ஆஹ. ப⁴க³வதோ ஹி சத்தாரி அரக்கி²யானி. யதா²ஹ –
Etadavocāti dhammasenāpatiṭṭhāne ṭhitattā bhikkhusaṅghassa bhāraṃ vahanto etaṃ avoca. Na kho mayaṃ, bhanteti, bhante, mayaṃ bhagavato na kiñci garahāma. Kāyikaṃ vā vācasikaṃ vāti idaṃ catunnaṃ arakkhiyataṃ sandhāya thero āha. Bhagavato hi cattāri arakkhiyāni. Yathāha –
‘‘சத்தாரிமானி , பி⁴க்க²வே, ததா²க³தஸ்ஸ அரக்கி²யானி. கதமானி சத்தாரி? பரிஸுத்³த⁴காயஸமாசாரோ, பி⁴க்க²வே, ததா²க³தோ, நத்தி² ததா²க³தஸ்ஸ காயது³ச்சரிதங், யங் ததா²க³தோ ரக்கெ²ய்ய ‘மா மே இத³ங் பரோ அஞ்ஞாஸீ’தி. பரிஸுத்³த⁴வசீஸமாசாரோ, பி⁴க்க²வே, ததா²க³தோ, நத்தி² ததா²க³தஸ்ஸ வசீது³ச்சரிதங், யங் ததா²க³தோ ரக்கெ²ய்ய, ‘மா மே இத³ங் பரோ அஞ்ஞாஸீ’தி. பரிஸுத்³த⁴மனோஸமாசாரோ, பி⁴க்க²வே, ததா²க³தோ, நத்தி² ததா²க³தஸ்ஸ மனோது³ச்சரிதங், யங் ததா²க³தோ ரக்கெ²ய்ய, ‘மா மே இத³ங் பரோ அஞ்ஞாஸீ’தி. பரிஸுத்³தா⁴ஜீவோ, பி⁴க்க²வே, ததா²க³தோ, நத்தி² ததா²க³தஸ்ஸ மிச்சா²ஆஜீவோ, யங் ததா²க³தோ ரக்கெ²ய்ய ‘‘மா மே இத³ங் பரோ அஞ்ஞாஸீ’’தி (அ॰ நி॰ 7.58).
‘‘Cattārimāni , bhikkhave, tathāgatassa arakkhiyāni. Katamāni cattāri? Parisuddhakāyasamācāro, bhikkhave, tathāgato, natthi tathāgatassa kāyaduccaritaṃ, yaṃ tathāgato rakkheyya ‘mā me idaṃ paro aññāsī’ti. Parisuddhavacīsamācāro, bhikkhave, tathāgato, natthi tathāgatassa vacīduccaritaṃ, yaṃ tathāgato rakkheyya, ‘mā me idaṃ paro aññāsī’ti. Parisuddhamanosamācāro, bhikkhave, tathāgato, natthi tathāgatassa manoduccaritaṃ, yaṃ tathāgato rakkheyya, ‘mā me idaṃ paro aññāsī’ti. Parisuddhājīvo, bhikkhave, tathāgato, natthi tathāgatassa micchāājīvo, yaṃ tathāgato rakkheyya ‘‘mā me idaṃ paro aññāsī’’ti (a. ni. 7.58).
இதா³னி ப⁴க³வதோ யதா²பூ⁴தகு³ணே கதெ²ந்தோ ப⁴க³வா ஹி, ப⁴ந்தேதிஆதி³மாஹ. தத்த² அனுப்பன்னஸ்ஸாதி கஸ்ஸபஸம்மாஸம்பு³த்³த⁴தோ பட்டா²ய அஞ்ஞேன ஸமணேன வா ப்³ராஹ்மணேன வா அனுப்பாதி³தபுப்³ப³ஸ்ஸ. அஸஞ்ஜாதஸ்ஸாதி இத³ங் அனுப்பன்னவேவசனமேவ. அனக்கா²தஸ்ஸாதி அஞ்ஞேன அதே³ஸிதஸ்ஸ. பச்சா² ஸமன்னாக³தாதி பட²மக³தஸ்ஸ ப⁴க³வதோ பச்சா² ஸமனுஆக³தா. இதி தே²ரோ யஸ்மா ஸப்³பே³பி ப⁴க³வதோ ஸீலாத³யோ கு³ணா அரஹத்தமக்³க³மேவ நிஸ்ஸாய ஆக³தா, தஸ்மா அரஹத்தமக்³க³மேவ நிஸ்ஸாய கு³ணங் கதே²ஸி. தேன ஸப்³ப³கு³ணா கதி²தாவ ஹொந்தி. அஹஞ்ச கோ², ப⁴ந்தேதி இத³ங் தே²ரோ ஸதே³வகே லோகே அக்³க³புக்³க³லஸ்ஸ அத்தனோ சேவ ஸங்க⁴ஸ்ஸ ச காயிகவாசஸிகங் பவாரெந்தோ ஆஹ.
Idāni bhagavato yathābhūtaguṇe kathento bhagavā hi, bhantetiādimāha. Tattha anuppannassāti kassapasammāsambuddhato paṭṭhāya aññena samaṇena vā brāhmaṇena vā anuppāditapubbassa. Asañjātassāti idaṃ anuppannavevacanameva. Anakkhātassāti aññena adesitassa. Pacchā samannāgatāti paṭhamagatassa bhagavato pacchā samanuāgatā. Iti thero yasmā sabbepi bhagavato sīlādayo guṇā arahattamaggameva nissāya āgatā, tasmā arahattamaggameva nissāya guṇaṃ kathesi. Tena sabbaguṇā kathitāva honti. Ahañca kho, bhanteti idaṃ thero sadevake loke aggapuggalassa attano ceva saṅghassa ca kāyikavācasikaṃ pavārento āha.
பிதரா பவத்திதந்தி சக்கவத்திம்ஹி காலங்கதே வா பப்³ப³ஜிதே வா ஸத்தாஹச்சயேன சக்கங் அந்தரதா⁴யதி, ததோ த³ஸவித⁴ங் த்³வாத³ஸவித⁴ங் சக்கவத்திவத்தங் பூரெத்வா நிஸின்னஸ்ஸ புத்தஸ்ஸ அஞ்ஞங் பாதுப⁴வதி, தங் ஸோ பவத்தேதி. ரதனமயத்தா பன ஸதி³ஸட்டே²ன ததே³வ வத்தங் கத்வா ‘‘பிதரா பவத்தித’’ந்தி வுத்தங். யஸ்மா வா ஸோ ‘‘அப்பொஸ்ஸுக்கோ த்வங், தே³வ, ஹோஹி, அஹமனுஸாஸிஸ்ஸாமீ’’தி ஆஹ, தஸ்மா பிதரா பவத்திதங் ஆணாசக்கங் அனுப்பவத்தேதி நாம. ஸம்மதே³வ அனுப்பவத்தேஸீதி ஸம்மா நயேன ஹேதுனா காரணேனேவ அனுப்பவத்தேஸி. ப⁴க³வா ஹி சதுஸச்சத⁴ம்மங் கதே²தி, தே²ரோ தமேவ அனுகதே²தி, தஸ்மா ஏவமாஹ. உப⁴தோபா⁴க³விமுத்தாதி த்³வீஹி பா⁴கே³ஹி விமுத்தா , அரூபாவசரஸமாபத்தியா ரூபகாயதோ விமுத்தா, அக்³க³மக்³கே³ன நாமகாயதோதி. பஞ்ஞாவிமுத்தாதி பஞ்ஞாய விமுத்தா தேவிஜ்ஜாதி³பா⁴வங் அப்பத்தா கீ²ணாஸவா.
Pitarāpavattitanti cakkavattimhi kālaṅkate vā pabbajite vā sattāhaccayena cakkaṃ antaradhāyati, tato dasavidhaṃ dvādasavidhaṃ cakkavattivattaṃ pūretvā nisinnassa puttassa aññaṃ pātubhavati, taṃ so pavatteti. Ratanamayattā pana sadisaṭṭhena tadeva vattaṃ katvā ‘‘pitarā pavattita’’nti vuttaṃ. Yasmā vā so ‘‘appossukko tvaṃ, deva, hohi, ahamanusāsissāmī’’ti āha, tasmā pitarā pavattitaṃ āṇācakkaṃ anuppavatteti nāma. Sammadeva anuppavattesīti sammā nayena hetunā kāraṇeneva anuppavattesi. Bhagavā hi catusaccadhammaṃ katheti, thero tameva anukatheti, tasmā evamāha. Ubhatobhāgavimuttāti dvīhi bhāgehi vimuttā , arūpāvacarasamāpattiyā rūpakāyato vimuttā, aggamaggena nāmakāyatoti. Paññāvimuttāti paññāya vimuttā tevijjādibhāvaṃ appattā khīṇāsavā.
விஸுத்³தி⁴யாதி விஸுத்³த⁴த்தா²ய. ஸங்யோஜனப³ந்த⁴னச்சி²தா³தி ஸங்யோஜனஸங்கா²தே சேவ ப³ந்த⁴னஸங்கா²தே ச கிலேஸே சி²ந்தி³த்வா டி²தா. விஜிதஸங்கா³மந்தி விஜிதராக³தோ³ஸமோஹஸங்கா³மங், மாரப³லஸ்ஸ விஜிதத்தாபி விஜிதஸங்கா³மங். ஸத்த²வாஹந்தி அட்ட²ங்கி³கமக்³க³ரதே² ஆரோபெத்வா வேனெய்யஸத்த²ங் வாஹேதி ஸங்ஸாரகந்தாரங் உத்தாரேதீதி ப⁴க³வா ஸத்த²வாஹோ, தங் ஸத்த²வாஹங். பலாபோதி அந்தோதுச்சோ² து³ஸ்ஸீலோ. ஆதி³ச்சப³ந்து⁴னந்தி ஆதி³ச்சப³ந்து⁴ங் ஸத்தா²ரங் த³ஸப³லங் வந்தா³மீதி வத³தி. ஸத்தமங்.
Visuddhiyāti visuddhatthāya. Saṃyojanabandhanacchidāti saṃyojanasaṅkhāte ceva bandhanasaṅkhāte ca kilese chinditvā ṭhitā. Vijitasaṅgāmanti vijitarāgadosamohasaṅgāmaṃ, mārabalassa vijitattāpi vijitasaṅgāmaṃ. Satthavāhanti aṭṭhaṅgikamaggarathe āropetvā veneyyasatthaṃ vāheti saṃsārakantāraṃ uttāretīti bhagavā satthavāho, taṃ satthavāhaṃ. Palāpoti antotuccho dussīlo. Ādiccabandhunanti ādiccabandhuṃ satthāraṃ dasabalaṃ vandāmīti vadati. Sattamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. பவாரணாஸுத்தங் • 7. Pavāraṇāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. பவாரணாஸுத்தவண்ணனா • 7. Pavāraṇāsuttavaṇṇanā
