| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
பவாரணாட²பனகதா²
Pavāraṇāṭhapanakathā
236. பா⁴ஸிதாய லபிதாய அபரியோஸிதாயாதி எத்த² ஸப்³ப³ஸங்கா³ஹிகஞ்ச புக்³க³லிகஞ்சாதி து³வித⁴ங் பவாரணாட²பனங். தத்த² ஸப்³ப³ஸங்கா³ஹிகே ‘‘ஸுணாது மே ப⁴ந்தே ஸங்கோ⁴…பே॰… ஸங்கோ⁴ தேவாசிகங் பவாரே’’ இதி ஸுகாரதோ யாவ ரேகாரோ, தாவ பா⁴ஸிதா லபிதா அபரியோஸிதாவ ஹோதி பவாரணா. எத்த²ந்தரே ஏகபதே³பி ட²பெந்தேன ட²பிதா ஹோதி பவாரணா. ‘ய்ய’காரே பன பத்தே பரியோஸிதா ஹோதி, தஸ்மா ததோ பட்டா²ய ட²பெந்தேன ட²பிதாபி அட்ட²பிதா ஹோதி. புக்³க³லிகட²பனே பன – ‘‘ஸங்க⁴ங் ப⁴ந்தே பவாரேமி…பே॰… ததியம்பி ப⁴ந்தே ஸங்க⁴ங் பவாரேமி தி³ட்டே²ன வா…பே॰… பஸ்ஸந்தோ படீ’’தி ஸங்காரதோ யாவ அயங் ஸப்³ப³பச்சி²மோ ‘டி’காரோ தாவ பா⁴ஸிதா லபிதா அபரியோஸிதாவ ஹோதி பவாரணா, எத்த²ந்தரே ஏகபதே³பி ட²பெந்தேன ட²பிதா ஹோதி பவாரணா, ‘‘கரிஸ்ஸாமீ’’தி வுத்தே பன பரியோஸிதா ஹோதி, தஸ்மா ‘‘கரிஸ்ஸாமீ’’தி ஏதஸ்மிங் பதே³ பத்தே ட²பிதாபி அட்ட²பிதா ஹோதி. ஏஸ நயோ த்³வேவாசிகஏகவாசிகஸமானவஸ்ஸிகாஸுபி. ஏதாஸுபி ஹி டிகாராவஸானங்யேவ ட²பனகெ²த்தந்தி.
236.Bhāsitāyalapitāya apariyositāyāti ettha sabbasaṅgāhikañca puggalikañcāti duvidhaṃ pavāraṇāṭhapanaṃ. Tattha sabbasaṅgāhike ‘‘suṇātu me bhante saṅgho…pe… saṅgho tevācikaṃ pavāre’’ iti sukārato yāva rekāro, tāva bhāsitā lapitā apariyositāva hoti pavāraṇā. Etthantare ekapadepi ṭhapentena ṭhapitā hoti pavāraṇā. ‘Yya’kāre pana patte pariyositā hoti, tasmā tato paṭṭhāya ṭhapentena ṭhapitāpi aṭṭhapitā hoti. Puggalikaṭhapane pana – ‘‘saṅghaṃ bhante pavāremi…pe… tatiyampi bhante saṅghaṃ pavāremi diṭṭhena vā…pe… passanto paṭī’’ti saṅkārato yāva ayaṃ sabbapacchimo ‘ṭi’kāro tāva bhāsitā lapitā apariyositāva hoti pavāraṇā, etthantare ekapadepi ṭhapentena ṭhapitā hoti pavāraṇā, ‘‘karissāmī’’ti vutte pana pariyositā hoti, tasmā ‘‘karissāmī’’ti etasmiṃ pade patte ṭhapitāpi aṭṭhapitā hoti. Esa nayo dvevācikaekavācikasamānavassikāsupi. Etāsupi hi ṭikārāvasānaṃyeva ṭhapanakhettanti.
237. அனுயுஞ்ஜியமானோதி ‘‘கிம்ஹி நங் ட²பேஸீ’’தி பரதோ வுத்தனயேன புச்சி²யமானோ. ஓமத்³தி³த்வாதி ஏதானி ‘‘அலங் பி⁴க்கு² மா ப⁴ண்ட³ன’’ந்திஆதீ³னி வசனானி வத்வா, வசனோமத்³த³னா ஹி இத⁴ ஓமத்³த³னாதி அதி⁴ப்பேதா. அனுத்³த⁴ங்ஸிதங் படிஜானாதீதி ‘‘அமூலகேன பாராஜிகேன அனுத்³த⁴ங்ஸிதோ அயங் மயா’’தி ஏவங் படிஜானாதி. யதா²த⁴ம்மந்தி ஸங்கா⁴தி³ஸேஸேன அனுத்³த⁴ங்ஸனே பாசித்தியங்; இதரேஹி து³க்கடங். நாஸெத்வாதி லிங்க³னாஸனாய நாஸெத்வா.
237.Anuyuñjiyamānoti ‘‘kimhi naṃ ṭhapesī’’ti parato vuttanayena pucchiyamāno. Omadditvāti etāni ‘‘alaṃ bhikkhu mā bhaṇḍana’’ntiādīni vacanāni vatvā, vacanomaddanā hi idha omaddanāti adhippetā. Anuddhaṃsitaṃ paṭijānātīti ‘‘amūlakena pārājikena anuddhaṃsito ayaṃ mayā’’ti evaṃ paṭijānāti. Yathādhammanti saṅghādisesena anuddhaṃsane pācittiyaṃ; itarehi dukkaṭaṃ. Nāsetvāti liṅganāsanāya nāsetvā.
238. ஸாஸ்ஸ யதா²த⁴ம்மங் படிகதாதி எத்தகமேவ வத்வா பவாரேதா²தி வத்தப்³பா³, அஸுகா நாம ஆபத்தீதி இத³ங் பன ந வத்தப்³ப³ங், ஏதஞ்ஹி கலஹஸ்ஸ முக²ங் ஹோதி.
238.Sāssa yathādhammaṃ paṭikatāti ettakameva vatvā pavārethāti vattabbā, asukā nāma āpattīti idaṃ pana na vattabbaṃ, etañhi kalahassa mukhaṃ hoti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
141. பவாரணாட²பனங் • 141. Pavāraṇāṭhapanaṃ
142. து²ல்லச்சயவத்து²காதி³ • 142. Thullaccayavatthukādi
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பவாரணாட²பனகதா²வண்ணனா • Pavāraṇāṭhapanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனாபத்திபன்னரஸகாதி³கதா²வண்ணனா • Anāpattipannarasakādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அபா²ஸுவிஹாரகதா²தி³வண்ணனா • Aphāsuvihārakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 141. பவாரணாட்ட²பனகதா² • 141. Pavāraṇāṭṭhapanakathā
