| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
পৰারণাঠপনকথা
Pavāraṇāṭhapanakathā
২৩৬. ভাসিতায লপিতায অপরিযোসিতাযাতি এত্থ সব্বসঙ্গাহিকঞ্চ পুগ্গলিকঞ্চাতি দুৰিধং পৰারণাঠপনং। তত্থ সব্বসঙ্গাহিকে ‘‘সুণাতু মে ভন্তে সঙ্ঘো…পে॰… সঙ্ঘো তেৰাচিকং পৰারে’’ ইতি সুকারতো যাৰ রেকারো, তাৰ ভাসিতা লপিতা অপরিযোসিতাৰ হোতি পৰারণা। এত্থন্তরে একপদেপি ঠপেন্তেন ঠপিতা হোতি পৰারণা। ‘য্য’কারে পন পত্তে পরিযোসিতা হোতি, তস্মা ততো পট্ঠায ঠপেন্তেন ঠপিতাপি অট্ঠপিতা হোতি। পুগ্গলিকঠপনে পন – ‘‘সঙ্ঘং ভন্তে পৰারেমি…পে॰… ততিযম্পি ভন্তে সঙ্ঘং পৰারেমি দিট্ঠেন ৰা…পে॰… পস্সন্তো পটী’’তি সঙ্কারতো যাৰ অযং সব্বপচ্ছিমো ‘টি’কারো তাৰ ভাসিতা লপিতা অপরিযোসিতাৰ হোতি পৰারণা, এত্থন্তরে একপদেপি ঠপেন্তেন ঠপিতা হোতি পৰারণা, ‘‘করিস্সামী’’তি ৰুত্তে পন পরিযোসিতা হোতি, তস্মা ‘‘করিস্সামী’’তি এতস্মিং পদে পত্তে ঠপিতাপি অট্ঠপিতা হোতি। এস নযো দ্ৰেৰাচিকএকৰাচিকসমানৰস্সিকাসুপি। এতাসুপি হি টিকারাৰসানংযেৰ ঠপনখেত্তন্তি।
236.Bhāsitāyalapitāya apariyositāyāti ettha sabbasaṅgāhikañca puggalikañcāti duvidhaṃ pavāraṇāṭhapanaṃ. Tattha sabbasaṅgāhike ‘‘suṇātu me bhante saṅgho…pe… saṅgho tevācikaṃ pavāre’’ iti sukārato yāva rekāro, tāva bhāsitā lapitā apariyositāva hoti pavāraṇā. Etthantare ekapadepi ṭhapentena ṭhapitā hoti pavāraṇā. ‘Yya’kāre pana patte pariyositā hoti, tasmā tato paṭṭhāya ṭhapentena ṭhapitāpi aṭṭhapitā hoti. Puggalikaṭhapane pana – ‘‘saṅghaṃ bhante pavāremi…pe… tatiyampi bhante saṅghaṃ pavāremi diṭṭhena vā…pe… passanto paṭī’’ti saṅkārato yāva ayaṃ sabbapacchimo ‘ṭi’kāro tāva bhāsitā lapitā apariyositāva hoti pavāraṇā, etthantare ekapadepi ṭhapentena ṭhapitā hoti pavāraṇā, ‘‘karissāmī’’ti vutte pana pariyositā hoti, tasmā ‘‘karissāmī’’ti etasmiṃ pade patte ṭhapitāpi aṭṭhapitā hoti. Esa nayo dvevācikaekavācikasamānavassikāsupi. Etāsupi hi ṭikārāvasānaṃyeva ṭhapanakhettanti.
২৩৭. অনুযুঞ্জিযমানোতি ‘‘কিম্হি নং ঠপেসী’’তি পরতো ৰুত্তনযেন পুচ্ছিযমানো। ওমদ্দিত্ৰাতি এতানি ‘‘অলং ভিক্খু মা ভণ্ডন’’ন্তিআদীনি ৰচনানি ৰত্ৰা, ৰচনোমদ্দনা হি ইধ ওমদ্দনাতি অধিপ্পেতা। অনুদ্ধংসিতং পটিজানাতীতি ‘‘অমূলকেন পারাজিকেন অনুদ্ধংসিতো অযং মযা’’তি এৰং পটিজানাতি। যথাধম্মন্তি সঙ্ঘাদিসেসেন অনুদ্ধংসনে পাচিত্তিযং; ইতরেহি দুক্কটং। নাসেত্ৰাতি লিঙ্গনাসনায নাসেত্ৰা।
237.Anuyuñjiyamānoti ‘‘kimhi naṃ ṭhapesī’’ti parato vuttanayena pucchiyamāno. Omadditvāti etāni ‘‘alaṃ bhikkhu mā bhaṇḍana’’ntiādīni vacanāni vatvā, vacanomaddanā hi idha omaddanāti adhippetā. Anuddhaṃsitaṃ paṭijānātīti ‘‘amūlakena pārājikena anuddhaṃsito ayaṃ mayā’’ti evaṃ paṭijānāti. Yathādhammanti saṅghādisesena anuddhaṃsane pācittiyaṃ; itarehi dukkaṭaṃ. Nāsetvāti liṅganāsanāya nāsetvā.
২৩৮. সাস্স যথাধম্মং পটিকতাতি এত্তকমেৰ ৰত্ৰা পৰারেথাতি ৰত্তব্বা, অসুকা নাম আপত্তীতি ইদং পন ন ৰত্তব্বং, এতঞ্হি কলহস্স মুখং হোতি।
238.Sāssa yathādhammaṃ paṭikatāti ettakameva vatvā pavārethāti vattabbā, asukā nāma āpattīti idaṃ pana na vattabbaṃ, etañhi kalahassa mukhaṃ hoti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
১৪১. পৰারণাঠপনং • 141. Pavāraṇāṭhapanaṃ
১৪২. থুল্লচ্চযৰত্থুকাদি • 142. Thullaccayavatthukādi
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পৰারণাঠপনকথাৰণ্ণনা • Pavāraṇāṭhapanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অনাপত্তিপন্নরসকাদিকথাৰণ্ণনা • Anāpattipannarasakādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অফাসুৰিহারকথাদিৰণ্ণনা • Aphāsuvihārakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৪১. পৰারণাট্ঠপনকথা • 141. Pavāraṇāṭṭhapanakathā
