| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. পৰিৰেকসুত্তং
2. Pavivekasuttaṃ
৯৪. ‘‘তীণিমানি , ভিক্খৰে, অঞ্ঞতিত্থিযা পরিব্বাজকা পৰিৰেকানি পঞ্ঞাপেন্তি। কতমানি তীণি? চীৰরপৰিৰেকং, পিণ্ডপাতপৰিৰেকং, সেনাসনপৰিৰেকং।
94. ‘‘Tīṇimāni , bhikkhave, aññatitthiyā paribbājakā pavivekāni paññāpenti. Katamāni tīṇi? Cīvarapavivekaṃ, piṇḍapātapavivekaṃ, senāsanapavivekaṃ.
‘‘তত্রিদং, ভিক্খৰে, অঞ্ঞতিত্থিযা পরিব্বাজকা চীৰরপৰিৰেকস্মিং পঞ্ঞাপেন্তি, সাণানিপি ধারেন্তি, মসাণানিপি ধারেন্তি, ছৰদুস্সানিপি ধারেন্তি, পংসুকূলানিপি ধারেন্তি, তিরীটানিপি ধারেন্তি, অজিনম্পি ধারেন্তি, অজিনক্খিপম্পি ধারেন্তি, কুসচীরম্পি ধারেন্তি, ৰাকচীরম্পি ধারেন্তি, ফলকচীরম্পি ধারেন্তি, কেসকম্বলম্পি ধারেন্তি, ৰালকম্বলম্পি ধারেন্তি , উলূকপক্খিকম্পি ধারেন্তি। ইদং খো, ভিক্খৰে, অঞ্ঞতিত্থিযা পরিব্বাজকা চীৰরপৰিৰেকস্মিং পঞ্ঞাপেন্তি।
‘‘Tatridaṃ, bhikkhave, aññatitthiyā paribbājakā cīvarapavivekasmiṃ paññāpenti, sāṇānipi dhārenti, masāṇānipi dhārenti, chavadussānipi dhārenti, paṃsukūlānipi dhārenti, tirīṭānipi dhārenti, ajinampi dhārenti, ajinakkhipampi dhārenti, kusacīrampi dhārenti, vākacīrampi dhārenti, phalakacīrampi dhārenti, kesakambalampi dhārenti, vālakambalampi dhārenti , ulūkapakkhikampi dhārenti. Idaṃ kho, bhikkhave, aññatitthiyā paribbājakā cīvarapavivekasmiṃ paññāpenti.
‘‘তত্রিদং, ভিক্খৰে, অঞ্ঞতিত্থিযা পরিব্বাজকা পিণ্ডপাতপৰিৰেকস্মিং পঞ্ঞাপেন্তি। সাকভক্খাপি হোন্তি, সামাকভক্খাপি হোন্তি, নীৰারভক্খাপি হোন্তি, দদ্দুলভক্খাপি হোন্তি, হটভক্খাপি হোন্তি, কণভক্খাপি হোন্তি, আচামভক্খাপি হোন্তি, পিঞ্ঞাকভক্খাপি হোন্তি, তিণভক্খাপি হোন্তি, গোমযভক্খাপি হোন্তি, ৰনমূলফলাহারা যাপেন্তি পৰত্তফলভোজী। ইদং খো, ভিক্খৰে, অঞ্ঞতিত্থিযা পরিব্বাজকা পিণ্ডপাতপৰিৰেকস্মিং পঞ্ঞাপেন্তি।
‘‘Tatridaṃ, bhikkhave, aññatitthiyā paribbājakā piṇḍapātapavivekasmiṃ paññāpenti. Sākabhakkhāpi honti, sāmākabhakkhāpi honti, nīvārabhakkhāpi honti, daddulabhakkhāpi honti, haṭabhakkhāpi honti, kaṇabhakkhāpi honti, ācāmabhakkhāpi honti, piññākabhakkhāpi honti, tiṇabhakkhāpi honti, gomayabhakkhāpi honti, vanamūlaphalāhārā yāpenti pavattaphalabhojī. Idaṃ kho, bhikkhave, aññatitthiyā paribbājakā piṇḍapātapavivekasmiṃ paññāpenti.
‘‘তত্রিদং, ভিক্খৰে, অঞ্ঞতিত্থিযা পরিব্বাজকা সেনাসনপৰিৰেকস্মিং পঞ্ঞাপেন্তি অরঞ্ঞং রুক্খমূলং সুসানং 1 ৰনপত্থং অব্ভোকাসং পলালপুঞ্জং ভুসাগারং 2। ইদং খো, ভিক্খৰে, অঞ্ঞতিত্থিযা পরিব্বাজকা সেনাসনপৰিৰেকস্মিং পঞ্ঞাপেন্তি। ইমানি খো, ভিক্খৰে, তীণি অঞ্ঞতিত্থিযা পরিব্বাজকা পৰিৰেকানি পঞ্ঞাপেন্তি।
‘‘Tatridaṃ, bhikkhave, aññatitthiyā paribbājakā senāsanapavivekasmiṃ paññāpenti araññaṃ rukkhamūlaṃ susānaṃ 3 vanapatthaṃ abbhokāsaṃ palālapuñjaṃ bhusāgāraṃ 4. Idaṃ kho, bhikkhave, aññatitthiyā paribbājakā senāsanapavivekasmiṃ paññāpenti. Imāni kho, bhikkhave, tīṇi aññatitthiyā paribbājakā pavivekāni paññāpenti.
‘‘তীণি খো পনিমানি, ভিক্খৰে, ইমস্মিং ধম্মৰিনযে ভিক্খুনো পৰিৰেকানি। কতমানি তীণি? ইধ, ভিক্খৰে, ভিক্খু সীলৰা চ হোতি, দুস্সীল্যঞ্চস্স পহীনং হোতি, তেন চ ৰিৰিত্তো হোতি; সম্মাদিট্ঠিকো চ হোতি, মিচ্ছাদিট্ঠি চস্স পহীনা হোতি, তায চ ৰিৰিত্তো হোতি; খীণাসৰো চ হোতি, আসৰা চস্স পহীনা হোন্তি, তেহি চ ৰিৰিত্তো হোতি । যতো খো, ভিক্খৰে, ভিক্খু সীলৰা হোতি, দুস্সীল্যঞ্চস্স পহীনং হোতি, তেন চ ৰিৰিত্তো হোতি; সম্মাদিট্ঠিকো চ হোতি, মিচ্ছাদিট্ঠি চস্স পহীনা হোতি, তায চ ৰিৰিত্তো হোতি; খীণাসৰো চ হোতি, আসৰা চস্স পহীনা হোন্তি, তেহি চ ৰিৰিত্তো হোতি। অযং ৰুচ্চতি, ভিক্খৰে, ‘ভিক্খু অগ্গপ্পত্তো সারপ্পত্তো সুদ্ধো সারে পতিট্ঠিতো’’’।
‘‘Tīṇi kho panimāni, bhikkhave, imasmiṃ dhammavinaye bhikkhuno pavivekāni. Katamāni tīṇi? Idha, bhikkhave, bhikkhu sīlavā ca hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti . Yato kho, bhikkhave, bhikkhu sīlavā hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti. Ayaṃ vuccati, bhikkhave, ‘bhikkhu aggappatto sārappatto suddho sāre patiṭṭhito’’’.
‘‘সেয্যথাপি, ভিক্খৰে, কস্সকস্স গহপতিস্স সম্পন্নং সালিক্খেত্তং। তমেনং কস্সকো গহপতি সীঘং সীঘং 5 লৰাপেয্য। সীঘং সীঘং লৰাপেত্ৰা সীঘং সীঘং সঙ্ঘরাপেয্য। সীঘং সীঘং সঙ্ঘরাপেত্ৰা সীঘং সীঘং উব্বহাপেয্য 6। সীঘং সীঘং উব্বহাপেত্ৰা সীঘং সীঘং পুঞ্জং কারাপেয্য। সীঘং সীঘং পুঞ্জং কারাপেত্ৰা সীঘং সীঘং মদ্দাপেয্য। সীঘং সীঘং মদ্দাপেত্ৰা সীঘং সীঘং পলালানি উদ্ধরাপেয্য। সীঘং সীঘং পলালানি উদ্ধরাপেত্ৰা সীঘং সীঘং ভুসিকং উদ্ধরাপেয্য। সীঘং সীঘং ভুসিকং উদ্ধরাপেত্ৰা সীঘং সীঘং ওপুনাপেয্য। সীঘং সীঘং ওপুনাপেত্ৰা সীঘং সীঘং অতিহরাপেয্য। সীঘং সীঘং অতিহরাপেত্ৰা সীঘং সীঘং কোট্টাপেয্য। সীঘং সীঘং কোট্টাপেত্ৰা সীঘং সীঘং থুসানি উদ্ধরাপেয্য। এৰমস্সু 7 তানি, ভিক্খৰে, কস্সকস্স গহপতিস্স ধঞ্ঞানি অগ্গপ্পত্তানি সারপ্পত্তানি সুদ্ধানি সারে পতিট্ঠিতানি।
‘‘Seyyathāpi, bhikkhave, kassakassa gahapatissa sampannaṃ sālikkhettaṃ. Tamenaṃ kassako gahapati sīghaṃ sīghaṃ 8 lavāpeyya. Sīghaṃ sīghaṃ lavāpetvā sīghaṃ sīghaṃ saṅgharāpeyya. Sīghaṃ sīghaṃ saṅgharāpetvā sīghaṃ sīghaṃ ubbahāpeyya 9. Sīghaṃ sīghaṃ ubbahāpetvā sīghaṃ sīghaṃ puñjaṃ kārāpeyya. Sīghaṃ sīghaṃ puñjaṃ kārāpetvā sīghaṃ sīghaṃ maddāpeyya. Sīghaṃ sīghaṃ maddāpetvā sīghaṃ sīghaṃ palālāni uddharāpeyya. Sīghaṃ sīghaṃ palālāni uddharāpetvā sīghaṃ sīghaṃ bhusikaṃ uddharāpeyya. Sīghaṃ sīghaṃ bhusikaṃ uddharāpetvā sīghaṃ sīghaṃ opunāpeyya. Sīghaṃ sīghaṃ opunāpetvā sīghaṃ sīghaṃ atiharāpeyya. Sīghaṃ sīghaṃ atiharāpetvā sīghaṃ sīghaṃ koṭṭāpeyya. Sīghaṃ sīghaṃ koṭṭāpetvā sīghaṃ sīghaṃ thusāni uddharāpeyya. Evamassu 10 tāni, bhikkhave, kassakassa gahapatissa dhaññāni aggappattāni sārappattāni suddhāni sāre patiṭṭhitāni.
‘‘এৰমেৰং খো, ভিক্খৰে, যতো ভিক্খু সীলৰা চ হোতি, দুস্সীল্যঞ্চস্স পহীনং হোতি, তেন চ ৰিৰিত্তো হোতি; সম্মাদিট্ঠিকো চ হোতি, মিচ্ছাদিট্ঠি চস্স পহীনা হোতি, তায চ ৰিৰিত্তো হোতি; খীণাসৰো চ হোতি, আসৰা চস্স পহীনা হোন্তি, তেহি চ ৰিৰিত্তো হোতি। অযং ৰুচ্চতি, ভিক্খৰে, ‘ভিক্খু অগ্গপ্পত্তো সারপ্পত্তো সুদ্ধো সারে পতিট্ঠিতো’’’তি। দুতিযং।
‘‘Evamevaṃ kho, bhikkhave, yato bhikkhu sīlavā ca hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti. Ayaṃ vuccati, bhikkhave, ‘bhikkhu aggappatto sārappatto suddho sāre patiṭṭhito’’’ti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. পৰিৰেকসুত্তৰণ্ণনা • 2. Pavivekasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২. পৰিৰেকসুত্তৰণ্ণনা • 2. Pavivekasuttavaṇṇanā
