| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. පවිවෙකසුත්‌තං
2. Pavivekasuttaṃ
94. ‘‘තීණිමානි , භික්‌ඛවෙ, අඤ්‌ඤතිත්‌ථියා පරිබ්‌බාජකා පවිවෙකානි පඤ්‌ඤාපෙන්‌ති. කතමානි තීණි? චීවරපවිවෙකං, පිණ්‌ඩපාතපවිවෙකං, සෙනාසනපවිවෙකං.
94. ‘‘Tīṇimāni , bhikkhave, aññatitthiyā paribbājakā pavivekāni paññāpenti. Katamāni tīṇi? Cīvarapavivekaṃ, piṇḍapātapavivekaṃ, senāsanapavivekaṃ.
‘‘තත්‍රිදං, භික්‌ඛවෙ, අඤ්‌ඤතිත්‌ථියා පරිබ්‌බාජකා චීවරපවිවෙකස්‌මිං පඤ්‌ඤාපෙන්‌ති, සාණානිපි ධාරෙන්‌ති, මසාණානිපි ධාරෙන්‌ති, ඡවදුස්‌සානිපි ධාරෙන්‌ති, පංසුකූලානිපි ධාරෙන්‌ති, තිරීටානිපි ධාරෙන්‌ති, අජිනම්‌පි ධාරෙන්‌ති, අජිනක්‌ඛිපම්‌පි ධාරෙන්‌ති, කුසචීරම්‌පි ධාරෙන්‌ති, වාකචීරම්‌පි ධාරෙන්‌ති, ඵලකචීරම්‌පි ධාරෙන්‌ති, කෙසකම්‌බලම්‌පි ධාරෙන්‌ති, වාලකම්‌බලම්‌පි ධාරෙන්‌ති , උලූකපක්‌ඛිකම්‌පි ධාරෙන්‌ති. ඉදං ඛො, භික්‌ඛවෙ, අඤ්‌ඤතිත්‌ථියා පරිබ්‌බාජකා චීවරපවිවෙකස්‌මිං පඤ්‌ඤාපෙන්‌ති.
‘‘Tatridaṃ, bhikkhave, aññatitthiyā paribbājakā cīvarapavivekasmiṃ paññāpenti, sāṇānipi dhārenti, masāṇānipi dhārenti, chavadussānipi dhārenti, paṃsukūlānipi dhārenti, tirīṭānipi dhārenti, ajinampi dhārenti, ajinakkhipampi dhārenti, kusacīrampi dhārenti, vākacīrampi dhārenti, phalakacīrampi dhārenti, kesakambalampi dhārenti, vālakambalampi dhārenti , ulūkapakkhikampi dhārenti. Idaṃ kho, bhikkhave, aññatitthiyā paribbājakā cīvarapavivekasmiṃ paññāpenti.
‘‘තත්‍රිදං, භික්‌ඛවෙ, අඤ්‌ඤතිත්‌ථියා පරිබ්‌බාජකා පිණ්‌ඩපාතපවිවෙකස්‌මිං පඤ්‌ඤාපෙන්‌ති. සාකභක්‌ඛාපි හොන්‌ති, සාමාකභක්‌ඛාපි හොන්‌ති, නීවාරභක්‌ඛාපි හොන්‌ති, දද්‌දුලභක්‌ඛාපි හොන්‌ති, හටභක්‌ඛාපි හොන්‌ති, කණභක්‌ඛාපි හොන්‌ති, ආචාමභක්‌ඛාපි හොන්‌ති, පිඤ්‌ඤාකභක්‌ඛාපි හොන්‌ති, තිණභක්‌ඛාපි හොන්‌ති, ගොමයභක්‌ඛාපි හොන්‌ති, වනමූලඵලාහාරා යාපෙන්‌ති පවත්‌තඵලභොජී. ඉදං ඛො, භික්‌ඛවෙ, අඤ්‌ඤතිත්‌ථියා පරිබ්‌බාජකා පිණ්‌ඩපාතපවිවෙකස්‌මිං පඤ්‌ඤාපෙන්‌ති.
‘‘Tatridaṃ, bhikkhave, aññatitthiyā paribbājakā piṇḍapātapavivekasmiṃ paññāpenti. Sākabhakkhāpi honti, sāmākabhakkhāpi honti, nīvārabhakkhāpi honti, daddulabhakkhāpi honti, haṭabhakkhāpi honti, kaṇabhakkhāpi honti, ācāmabhakkhāpi honti, piññākabhakkhāpi honti, tiṇabhakkhāpi honti, gomayabhakkhāpi honti, vanamūlaphalāhārā yāpenti pavattaphalabhojī. Idaṃ kho, bhikkhave, aññatitthiyā paribbājakā piṇḍapātapavivekasmiṃ paññāpenti.
‘‘තත්‍රිදං, භික්‌ඛවෙ, අඤ්‌ඤතිත්‌ථියා පරිබ්‌බාජකා සෙනාසනපවිවෙකස්‌මිං පඤ්‌ඤාපෙන්‌ති අරඤ්‌ඤං රුක්‌ඛමූලං සුසානං 1 වනපත්‌ථං අබ්‌භොකාසං පලාලපුඤ්‌ජං භුසාගාරං 2. ඉදං ඛො, භික්‌ඛවෙ, අඤ්‌ඤතිත්‌ථියා පරිබ්‌බාජකා සෙනාසනපවිවෙකස්‌මිං පඤ්‌ඤාපෙන්‌ති. ඉමානි ඛො, භික්‌ඛවෙ, තීණි අඤ්‌ඤතිත්‌ථියා පරිබ්‌බාජකා පවිවෙකානි පඤ්‌ඤාපෙන්‌ති.
‘‘Tatridaṃ, bhikkhave, aññatitthiyā paribbājakā senāsanapavivekasmiṃ paññāpenti araññaṃ rukkhamūlaṃ susānaṃ 3 vanapatthaṃ abbhokāsaṃ palālapuñjaṃ bhusāgāraṃ 4. Idaṃ kho, bhikkhave, aññatitthiyā paribbājakā senāsanapavivekasmiṃ paññāpenti. Imāni kho, bhikkhave, tīṇi aññatitthiyā paribbājakā pavivekāni paññāpenti.
‘‘තීණි ඛො පනිමානි, භික්‌ඛවෙ, ඉමස්‌මිං ධම්‌මවිනයෙ භික්‌ඛුනො පවිවෙකානි. කතමානි තීණි? ඉධ, භික්‌ඛවෙ, භික්‌ඛු සීලවා ච හොති, දුස්‌සීල්‍යඤ්‌චස්‌ස පහීනං හොති, තෙන ච විවිත්‌තො හොති; සම්‌මාදිට්‌ඨිකො ච හොති, මිච්‌ඡාදිට්‌ඨි චස්‌ස පහීනා හොති, තාය ච විවිත්‌තො හොති; ඛීණාසවො ච හොති, ආසවා චස්‌ස පහීනා හොන්‌ති, තෙහි ච විවිත්‌තො හොති . යතො ඛො, භික්‌ඛවෙ, භික්‌ඛු සීලවා හොති, දුස්‌සීල්‍යඤ්‌චස්‌ස පහීනං හොති, තෙන ච විවිත්‌තො හොති; සම්‌මාදිට්‌ඨිකො ච හොති, මිච්‌ඡාදිට්‌ඨි චස්‌ස පහීනා හොති, තාය ච විවිත්‌තො හොති; ඛීණාසවො ච හොති, ආසවා චස්‌ස පහීනා හොන්‌ති, තෙහි ච විවිත්‌තො හොති. අයං වුච්‌චති, භික්‌ඛවෙ, ‘භික්‌ඛු අග්‌ගප්‌පත්‌තො සාරප්‌පත්‌තො සුද්‌ධො සාරෙ පතිට්‌ඨිතො’’’.
‘‘Tīṇi kho panimāni, bhikkhave, imasmiṃ dhammavinaye bhikkhuno pavivekāni. Katamāni tīṇi? Idha, bhikkhave, bhikkhu sīlavā ca hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti . Yato kho, bhikkhave, bhikkhu sīlavā hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti. Ayaṃ vuccati, bhikkhave, ‘bhikkhu aggappatto sārappatto suddho sāre patiṭṭhito’’’.
‘‘සෙය්‍යථාපි, භික්‌ඛවෙ, කස්‌සකස්‌ස ගහපතිස්‌ස සම්‌පන්‌නං සාලික්‌ඛෙත්‌තං. තමෙනං කස්‌සකො ගහපති සීඝං සීඝං 5 ලවාපෙය්‍ය. සීඝං සීඝං ලවාපෙත්‌වා සීඝං සීඝං සඞ්‌ඝරාපෙය්‍ය. සීඝං සීඝං සඞ්‌ඝරාපෙත්‌වා සීඝං සීඝං උබ්‌බහාපෙය්‍ය 6. සීඝං සීඝං උබ්‌බහාපෙත්‌වා සීඝං සීඝං පුඤ්‌ජං කාරාපෙය්‍ය. සීඝං සීඝං පුඤ්‌ජං කාරාපෙත්‌වා සීඝං සීඝං මද්‌දාපෙය්‍ය. සීඝං සීඝං මද්‌දාපෙත්‌වා සීඝං සීඝං පලාලානි උද්‌ධරාපෙය්‍ය. සීඝං සීඝං පලාලානි උද්‌ධරාපෙත්‌වා සීඝං සීඝං භුසිකං උද්‌ධරාපෙය්‍ය. සීඝං සීඝං භුසිකං උද්‌ධරාපෙත්‌වා සීඝං සීඝං ඔපුනාපෙය්‍ය. සීඝං සීඝං ඔපුනාපෙත්‌වා සීඝං සීඝං අතිහරාපෙය්‍ය. සීඝං සීඝං අතිහරාපෙත්‌වා සීඝං සීඝං කොට්‌ටාපෙය්‍ය. සීඝං සීඝං කොට්‌ටාපෙත්‌වා සීඝං සීඝං ථුසානි උද්‌ධරාපෙය්‍ය. එවමස්‌සු 7 තානි, භික්‌ඛවෙ, කස්‌සකස්‌ස ගහපතිස්‌ස ධඤ්‌ඤානි අග්‌ගප්‌පත්‌තානි සාරප්‌පත්‌තානි සුද්‌ධානි සාරෙ පතිට්‌ඨිතානි.
‘‘Seyyathāpi, bhikkhave, kassakassa gahapatissa sampannaṃ sālikkhettaṃ. Tamenaṃ kassako gahapati sīghaṃ sīghaṃ 8 lavāpeyya. Sīghaṃ sīghaṃ lavāpetvā sīghaṃ sīghaṃ saṅgharāpeyya. Sīghaṃ sīghaṃ saṅgharāpetvā sīghaṃ sīghaṃ ubbahāpeyya 9. Sīghaṃ sīghaṃ ubbahāpetvā sīghaṃ sīghaṃ puñjaṃ kārāpeyya. Sīghaṃ sīghaṃ puñjaṃ kārāpetvā sīghaṃ sīghaṃ maddāpeyya. Sīghaṃ sīghaṃ maddāpetvā sīghaṃ sīghaṃ palālāni uddharāpeyya. Sīghaṃ sīghaṃ palālāni uddharāpetvā sīghaṃ sīghaṃ bhusikaṃ uddharāpeyya. Sīghaṃ sīghaṃ bhusikaṃ uddharāpetvā sīghaṃ sīghaṃ opunāpeyya. Sīghaṃ sīghaṃ opunāpetvā sīghaṃ sīghaṃ atiharāpeyya. Sīghaṃ sīghaṃ atiharāpetvā sīghaṃ sīghaṃ koṭṭāpeyya. Sīghaṃ sīghaṃ koṭṭāpetvā sīghaṃ sīghaṃ thusāni uddharāpeyya. Evamassu 10 tāni, bhikkhave, kassakassa gahapatissa dhaññāni aggappattāni sārappattāni suddhāni sāre patiṭṭhitāni.
‘‘එවමෙවං ඛො, භික්‌ඛවෙ, යතො භික්‌ඛු සීලවා ච හොති, දුස්‌සීල්‍යඤ්‌චස්‌ස පහීනං හොති, තෙන ච විවිත්‌තො හොති; සම්‌මාදිට්‌ඨිකො ච හොති, මිච්‌ඡාදිට්‌ඨි චස්‌ස පහීනා හොති, තාය ච විවිත්‌තො හොති; ඛීණාසවො ච හොති, ආසවා චස්‌ස පහීනා හොන්‌ති, තෙහි ච විවිත්‌තො හොති. අයං වුච්‌චති, භික්‌ඛවෙ, ‘භික්‌ඛු අග්‌ගප්‌පත්‌තො සාරප්‌පත්‌තො සුද්‌ධො සාරෙ පතිට්‌ඨිතො’’’ති. දුතියං.
‘‘Evamevaṃ kho, bhikkhave, yato bhikkhu sīlavā ca hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti. Ayaṃ vuccati, bhikkhave, ‘bhikkhu aggappatto sārappatto suddho sāre patiṭṭhito’’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 2. පවිවෙකසුත්‌තවණ්‌ණනා • 2. Pavivekasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 2. පවිවෙකසුත්‌තවණ්‌ණනා • 2. Pavivekasuttavaṇṇanā
