| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༢. པཝིཝེཀསུཏྟཾ
2. Pavivekasuttaṃ
༩༤. ‘‘ཏཱིཎིམཱནི , བྷིཀྑཝེ, ཨཉྙཏིཏྠིཡཱ པརིབྦཱཛཀཱ པཝིཝེཀཱནི པཉྙཱཔེནྟི། ཀཏམཱནི ཏཱིཎི? ཙཱིཝརཔཝིཝེཀཾ, པིཎྜཔཱཏཔཝིཝེཀཾ, སེནཱསནཔཝིཝེཀཾ།
94. ‘‘Tīṇimāni , bhikkhave, aññatitthiyā paribbājakā pavivekāni paññāpenti. Katamāni tīṇi? Cīvarapavivekaṃ, piṇḍapātapavivekaṃ, senāsanapavivekaṃ.
‘‘ཏཏྲིདཾ, བྷིཀྑཝེ, ཨཉྙཏིཏྠིཡཱ པརིབྦཱཛཀཱ ཙཱིཝརཔཝིཝེཀསྨིཾ པཉྙཱཔེནྟི, སཱཎཱནིཔི དྷཱརེནྟི, མསཱཎཱནིཔི དྷཱརེནྟི, ཚཝདུསྶཱནིཔི དྷཱརེནྟི, པཾསུཀཱུལཱནིཔི དྷཱརེནྟི, ཏིརཱིཊཱནིཔི དྷཱརེནྟི, ཨཛིནམྤི དྷཱརེནྟི, ཨཛིནཀྑིཔམྤི དྷཱརེནྟི, ཀུསཙཱིརམྤི དྷཱརེནྟི, ཝཱཀཙཱིརམྤི དྷཱརེནྟི, ཕལཀཙཱིརམྤི དྷཱརེནྟི, ཀེསཀམྦལམྤི དྷཱརེནྟི, ཝཱལཀམྦལམྤི དྷཱརེནྟི , ཨུལཱུཀཔཀྑིཀམྤི དྷཱརེནྟི། ཨིདཾ ཁོ, བྷིཀྑཝེ, ཨཉྙཏིཏྠིཡཱ པརིབྦཱཛཀཱ ཙཱིཝརཔཝིཝེཀསྨིཾ པཉྙཱཔེནྟི།
‘‘Tatridaṃ, bhikkhave, aññatitthiyā paribbājakā cīvarapavivekasmiṃ paññāpenti, sāṇānipi dhārenti, masāṇānipi dhārenti, chavadussānipi dhārenti, paṃsukūlānipi dhārenti, tirīṭānipi dhārenti, ajinampi dhārenti, ajinakkhipampi dhārenti, kusacīrampi dhārenti, vākacīrampi dhārenti, phalakacīrampi dhārenti, kesakambalampi dhārenti, vālakambalampi dhārenti , ulūkapakkhikampi dhārenti. Idaṃ kho, bhikkhave, aññatitthiyā paribbājakā cīvarapavivekasmiṃ paññāpenti.
‘‘ཏཏྲིདཾ, བྷིཀྑཝེ, ཨཉྙཏིཏྠིཡཱ པརིབྦཱཛཀཱ པིཎྜཔཱཏཔཝིཝེཀསྨིཾ པཉྙཱཔེནྟི། སཱཀབྷཀྑཱཔི ཧོནྟི, སཱམཱཀབྷཀྑཱཔི ཧོནྟི, ནཱིཝཱརབྷཀྑཱཔི ཧོནྟི, དདྡུལབྷཀྑཱཔི ཧོནྟི, ཧཊབྷཀྑཱཔི ཧོནྟི, ཀཎབྷཀྑཱཔི ཧོནྟི, ཨཱཙཱམབྷཀྑཱཔི ཧོནྟི, པིཉྙཱཀབྷཀྑཱཔི ཧོནྟི, ཏིཎབྷཀྑཱཔི ཧོནྟི, གོམཡབྷཀྑཱཔི ཧོནྟི, ཝནམཱུལཕལཱཧཱརཱ ཡཱཔེནྟི པཝཏྟཕལབྷོཛཱི། ཨིདཾ ཁོ, བྷིཀྑཝེ, ཨཉྙཏིཏྠིཡཱ པརིབྦཱཛཀཱ པིཎྜཔཱཏཔཝིཝེཀསྨིཾ པཉྙཱཔེནྟི།
‘‘Tatridaṃ, bhikkhave, aññatitthiyā paribbājakā piṇḍapātapavivekasmiṃ paññāpenti. Sākabhakkhāpi honti, sāmākabhakkhāpi honti, nīvārabhakkhāpi honti, daddulabhakkhāpi honti, haṭabhakkhāpi honti, kaṇabhakkhāpi honti, ācāmabhakkhāpi honti, piññākabhakkhāpi honti, tiṇabhakkhāpi honti, gomayabhakkhāpi honti, vanamūlaphalāhārā yāpenti pavattaphalabhojī. Idaṃ kho, bhikkhave, aññatitthiyā paribbājakā piṇḍapātapavivekasmiṃ paññāpenti.
‘‘ཏཏྲིདཾ, བྷིཀྑཝེ, ཨཉྙཏིཏྠིཡཱ པརིབྦཱཛཀཱ སེནཱསནཔཝིཝེཀསྨིཾ པཉྙཱཔེནྟི ཨརཉྙཾ རུཀྑམཱུལཾ སུསཱནཾ 1 ཝནཔཏྠཾ ཨབྦྷོཀཱསཾ པལཱལཔུཉྫཾ བྷུསཱགཱརཾ 2། ཨིདཾ ཁོ, བྷིཀྑཝེ, ཨཉྙཏིཏྠིཡཱ པརིབྦཱཛཀཱ སེནཱསནཔཝིཝེཀསྨིཾ པཉྙཱཔེནྟི། ཨིམཱནི ཁོ, བྷིཀྑཝེ, ཏཱིཎི ཨཉྙཏིཏྠིཡཱ པརིབྦཱཛཀཱ པཝིཝེཀཱནི པཉྙཱཔེནྟི།
‘‘Tatridaṃ, bhikkhave, aññatitthiyā paribbājakā senāsanapavivekasmiṃ paññāpenti araññaṃ rukkhamūlaṃ susānaṃ 3 vanapatthaṃ abbhokāsaṃ palālapuñjaṃ bhusāgāraṃ 4. Idaṃ kho, bhikkhave, aññatitthiyā paribbājakā senāsanapavivekasmiṃ paññāpenti. Imāni kho, bhikkhave, tīṇi aññatitthiyā paribbājakā pavivekāni paññāpenti.
‘‘ཏཱིཎི ཁོ པནིམཱནི, བྷིཀྑཝེ, ཨིམསྨིཾ དྷམྨཝིནཡེ བྷིཀྑུནོ པཝིཝེཀཱནི། ཀཏམཱནི ཏཱིཎི? ཨིདྷ, བྷིཀྑཝེ, བྷིཀྑུ སཱིལཝཱ ཙ ཧོཏི, དུསྶཱིལྱཉྩསྶ པཧཱིནཾ ཧོཏི, ཏེན ཙ ཝིཝིཏྟོ ཧོཏི; སམྨཱདིཊྛིཀོ ཙ ཧོཏི, མིཙྪཱདིཊྛི ཙསྶ པཧཱིནཱ ཧོཏི, ཏཱཡ ཙ ཝིཝིཏྟོ ཧོཏི; ཁཱིཎཱསཝོ ཙ ཧོཏི, ཨཱསཝཱ ཙསྶ པཧཱིནཱ ཧོནྟི, ཏེཧི ཙ ཝིཝིཏྟོ ཧོཏི ། ཡཏོ ཁོ, བྷིཀྑཝེ, བྷིཀྑུ སཱིལཝཱ ཧོཏི, དུསྶཱིལྱཉྩསྶ པཧཱིནཾ ཧོཏི, ཏེན ཙ ཝིཝིཏྟོ ཧོཏི; སམྨཱདིཊྛིཀོ ཙ ཧོཏི, མིཙྪཱདིཊྛི ཙསྶ པཧཱིནཱ ཧོཏི, ཏཱཡ ཙ ཝིཝིཏྟོ ཧོཏི; ཁཱིཎཱསཝོ ཙ ཧོཏི, ཨཱསཝཱ ཙསྶ པཧཱིནཱ ཧོནྟི, ཏེཧི ཙ ཝིཝིཏྟོ ཧོཏི། ཨཡཾ ཝུཙྩཏི, བྷིཀྑཝེ, ‘བྷིཀྑུ ཨགྒཔྤཏྟོ སཱརཔྤཏྟོ སུདྡྷོ སཱརེ པཏིཊྛིཏོ’’’།
‘‘Tīṇi kho panimāni, bhikkhave, imasmiṃ dhammavinaye bhikkhuno pavivekāni. Katamāni tīṇi? Idha, bhikkhave, bhikkhu sīlavā ca hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti . Yato kho, bhikkhave, bhikkhu sīlavā hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti. Ayaṃ vuccati, bhikkhave, ‘bhikkhu aggappatto sārappatto suddho sāre patiṭṭhito’’’.
‘‘སེཡྻཐཱཔི, བྷིཀྑཝེ, ཀསྶཀསྶ གཧཔཏིསྶ སམྤནྣཾ སཱལིཀྑེཏྟཾ། ཏམེནཾ ཀསྶཀོ གཧཔཏི སཱིགྷཾ སཱིགྷཾ 5 ལཝཱཔེཡྻ། སཱིགྷཾ སཱིགྷཾ ལཝཱཔེཏྭཱ སཱིགྷཾ སཱིགྷཾ སངྒྷརཱཔེཡྻ། སཱིགྷཾ སཱིགྷཾ སངྒྷརཱཔེཏྭཱ སཱིགྷཾ སཱིགྷཾ ཨུབྦཧཱཔེཡྻ 6། སཱིགྷཾ སཱིགྷཾ ཨུབྦཧཱཔེཏྭཱ སཱིགྷཾ སཱིགྷཾ པུཉྫཾ ཀཱརཱཔེཡྻ། སཱིགྷཾ སཱིགྷཾ པུཉྫཾ ཀཱརཱཔེཏྭཱ སཱིགྷཾ སཱིགྷཾ མདྡཱཔེཡྻ། སཱིགྷཾ སཱིགྷཾ མདྡཱཔེཏྭཱ སཱིགྷཾ སཱིགྷཾ པལཱལཱནི ཨུདྡྷརཱཔེཡྻ། སཱིགྷཾ སཱིགྷཾ པལཱལཱནི ཨུདྡྷརཱཔེཏྭཱ སཱིགྷཾ སཱིགྷཾ བྷུསིཀཾ ཨུདྡྷརཱཔེཡྻ། སཱིགྷཾ སཱིགྷཾ བྷུསིཀཾ ཨུདྡྷརཱཔེཏྭཱ སཱིགྷཾ སཱིགྷཾ ཨོཔུནཱཔེཡྻ། སཱིགྷཾ སཱིགྷཾ ཨོཔུནཱཔེཏྭཱ སཱིགྷཾ སཱིགྷཾ ཨཏིཧརཱཔེཡྻ། སཱིགྷཾ སཱིགྷཾ ཨཏིཧརཱཔེཏྭཱ སཱིགྷཾ སཱིགྷཾ ཀོཊྚཱཔེཡྻ། སཱིགྷཾ སཱིགྷཾ ཀོཊྚཱཔེཏྭཱ སཱིགྷཾ སཱིགྷཾ ཐུསཱནི ཨུདྡྷརཱཔེཡྻ། ཨེཝམསྶུ 7 ཏཱནི, བྷིཀྑཝེ, ཀསྶཀསྶ གཧཔཏིསྶ དྷཉྙཱནི ཨགྒཔྤཏྟཱནི སཱརཔྤཏྟཱནི སུདྡྷཱནི སཱརེ པཏིཊྛིཏཱནི།
‘‘Seyyathāpi, bhikkhave, kassakassa gahapatissa sampannaṃ sālikkhettaṃ. Tamenaṃ kassako gahapati sīghaṃ sīghaṃ 8 lavāpeyya. Sīghaṃ sīghaṃ lavāpetvā sīghaṃ sīghaṃ saṅgharāpeyya. Sīghaṃ sīghaṃ saṅgharāpetvā sīghaṃ sīghaṃ ubbahāpeyya 9. Sīghaṃ sīghaṃ ubbahāpetvā sīghaṃ sīghaṃ puñjaṃ kārāpeyya. Sīghaṃ sīghaṃ puñjaṃ kārāpetvā sīghaṃ sīghaṃ maddāpeyya. Sīghaṃ sīghaṃ maddāpetvā sīghaṃ sīghaṃ palālāni uddharāpeyya. Sīghaṃ sīghaṃ palālāni uddharāpetvā sīghaṃ sīghaṃ bhusikaṃ uddharāpeyya. Sīghaṃ sīghaṃ bhusikaṃ uddharāpetvā sīghaṃ sīghaṃ opunāpeyya. Sīghaṃ sīghaṃ opunāpetvā sīghaṃ sīghaṃ atiharāpeyya. Sīghaṃ sīghaṃ atiharāpetvā sīghaṃ sīghaṃ koṭṭāpeyya. Sīghaṃ sīghaṃ koṭṭāpetvā sīghaṃ sīghaṃ thusāni uddharāpeyya. Evamassu 10 tāni, bhikkhave, kassakassa gahapatissa dhaññāni aggappattāni sārappattāni suddhāni sāre patiṭṭhitāni.
‘‘ཨེཝམེཝཾ ཁོ, བྷིཀྑཝེ, ཡཏོ བྷིཀྑུ སཱིལཝཱ ཙ ཧོཏི, དུསྶཱིལྱཉྩསྶ པཧཱིནཾ ཧོཏི, ཏེན ཙ ཝིཝིཏྟོ ཧོཏི; སམྨཱདིཊྛིཀོ ཙ ཧོཏི, མིཙྪཱདིཊྛི ཙསྶ པཧཱིནཱ ཧོཏི, ཏཱཡ ཙ ཝིཝིཏྟོ ཧོཏི; ཁཱིཎཱསཝོ ཙ ཧོཏི, ཨཱསཝཱ ཙསྶ པཧཱིནཱ ཧོནྟི, ཏེཧི ཙ ཝིཝིཏྟོ ཧོཏི། ཨཡཾ ཝུཙྩཏི, བྷིཀྑཝེ, ‘བྷིཀྑུ ཨགྒཔྤཏྟོ སཱརཔྤཏྟོ སུདྡྷོ སཱརེ པཏིཊྛིཏོ’’’ཏི། དུཏིཡཾ།
‘‘Evamevaṃ kho, bhikkhave, yato bhikkhu sīlavā ca hoti, dussīlyañcassa pahīnaṃ hoti, tena ca vivitto hoti; sammādiṭṭhiko ca hoti, micchādiṭṭhi cassa pahīnā hoti, tāya ca vivitto hoti; khīṇāsavo ca hoti, āsavā cassa pahīnā honti, tehi ca vivitto hoti. Ayaṃ vuccati, bhikkhave, ‘bhikkhu aggappatto sārappatto suddho sāre patiṭṭhito’’’ti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༢. པཝིཝེཀསུཏྟཝཎྞནཱ • 2. Pavivekasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༢. པཝིཝེཀསུཏྟཝཎྞནཱ • 2. Pavivekasuttavaṇṇanā
