| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. பவிவேகஸுத்தவண்ணனா
2. Pavivekasuttavaṇṇanā
94. து³தியே சீவரபவிவேகந்தி சீவரங் நிஸ்ஸாய உப்பஜ்ஜனககிலேஸேஹி விவித்தபா⁴வங். ஸேஸத்³வயேபி ஏஸேவ நயோ. ஸாணானீதி ஸாணவாகசேலானி. மஸாணானீதி மிஸ்ஸகசேலானி. ச²வது³ஸ்ஸானீதி மதஸரீரதோ ச²ட்³டி³தவத்தா²னி, ஏரகதிணாதீ³னி வா க³ந்தெ²த்வா கதனிவாஸனானி. பங்ஸுகூலானீதி பத²வியங் ச²ட்³டி³தனந்தகானி. திரீடானீதி ருக்க²தசவத்தா²னி. அஜினானீதி அஜினமிக³சம்மானி. அஜினக்கி²பந்தி ததே³வ மஜ்ஜே² பா²லிதங், ஸஹகு²ரகந்திபி வத³ந்தி. குஸசீரந்தி குஸதிணானி க³ந்தெ²த்வா கதசீரங். வாகசீரப²லகசீரேஸுபி ஏஸேவ நயோ. கேஸகம்ப³லந்தி மனுஸ்ஸகேஸேஹி கதகம்ப³லங். வாலகம்ப³லந்தி அஸ்ஸவாலாதீ³ஹி கதகம்ப³லங். உலூகபக்கி²கந்தி உலூகபத்தானி க³ந்தெ²த்வா கதனிவாஸனங்.
94. Dutiye cīvarapavivekanti cīvaraṃ nissāya uppajjanakakilesehi vivittabhāvaṃ. Sesadvayepi eseva nayo. Sāṇānīti sāṇavākacelāni. Masāṇānīti missakacelāni. Chavadussānīti matasarīrato chaḍḍitavatthāni, erakatiṇādīni vā ganthetvā katanivāsanāni. Paṃsukūlānīti pathaviyaṃ chaḍḍitanantakāni. Tirīṭānīti rukkhatacavatthāni. Ajinānīti ajinamigacammāni. Ajinakkhipanti tadeva majjhe phālitaṃ, sahakhurakantipi vadanti. Kusacīranti kusatiṇāni ganthetvā katacīraṃ. Vākacīraphalakacīresupi eseva nayo. Kesakambalanti manussakesehi katakambalaṃ. Vālakambalanti assavālādīhi katakambalaṃ. Ulūkapakkhikanti ulūkapattāni ganthetvā katanivāsanaṃ.
ஸாகப⁴க்கா²தி அல்லஸாகப⁴க்கா². ஸாமாகப⁴க்கா²தி ஸாமாகதண்டு³லப⁴க்கா². நீவாராதீ³ஸு நீவாரா நாம அரஞ்ஞே ஸயங் ஜாதவீஹிஜாதி. த³த்³து³லந்தி சம்மகாரேஹி சம்மங் லிகி²த்வா ச²ட்³டி³தகஸடங். ஹடங் வுச்சதி ஸிலேஸோபி ஸேவாலோபி கணிகாராதி³ருக்க²னிய்யாஸோபி. கணந்தி குண்ட³கங். ஆசாமோதி ப⁴த்தஉக்க²லிகாய லக்³கோ³ ஜா²மஓத³னோ. தங் ச²ட்³டி³தட்டா²னே க³ஹெத்வா கா²த³ந்தி, ஓத³னகஞ்ஜியந்திபி வத³ந்தி. பிஞ்ஞாகாத³யோ பாகடாவ. பவத்தப²லபோ⁴ஜீதி பதிதப²லபோ⁴ஜீ. பு⁴ஸாகா³ரந்தி க²லஸாலங்.
Sākabhakkhāti allasākabhakkhā. Sāmākabhakkhāti sāmākataṇḍulabhakkhā. Nīvārādīsu nīvārā nāma araññe sayaṃ jātavīhijāti. Daddulanti cammakārehi cammaṃ likhitvā chaḍḍitakasaṭaṃ. Haṭaṃ vuccati silesopi sevālopi kaṇikārādirukkhaniyyāsopi. Kaṇanti kuṇḍakaṃ. Ācāmoti bhattaukkhalikāya laggo jhāmaodano. Taṃ chaḍḍitaṭṭhāne gahetvā khādanti, odanakañjiyantipi vadanti. Piññākādayo pākaṭāva. Pavattaphalabhojīti patitaphalabhojī. Bhusāgāranti khalasālaṃ.
ஸீலவாதி சதுபாரிஸுத்³தி⁴ஸீலேன ஸமன்னாக³தோ. து³ஸ்ஸீல்யஞ்சஸ்ஸ பஹீனங் ஹோதீதி பஞ்ச து³ஸ்ஸீல்யானி பஹீனானி ஹொந்தி. ஸம்மாதி³ட்டி²கோதி யாதா²வதி³ட்டி²கோ. மிச்சா²தி³ட்டீ²தி அயாதா²வதி³ட்டி². ஆஸவாதி சத்தாரோ ஆஸவா. அக்³க³ப்பத்தோதி ஸீலக்³க³ப்பத்தோ. ஸாரப்பத்தோதி ஸீலஸாரங் பத்தோ. ஸுத்³தோ⁴தி பரிஸுத்³தோ⁴. ஸாரே பதிட்டி²தோதி ஸீலஸமாதி⁴பஞ்ஞாஸாரே பதிட்டி²தோ.
Sīlavāti catupārisuddhisīlena samannāgato. Dussīlyañcassa pahīnaṃ hotīti pañca dussīlyāni pahīnāni honti. Sammādiṭṭhikoti yāthāvadiṭṭhiko. Micchādiṭṭhīti ayāthāvadiṭṭhi. Āsavāti cattāro āsavā. Aggappattoti sīlaggappatto. Sārappattoti sīlasāraṃ patto. Suddhoti parisuddho. Sāre patiṭṭhitoti sīlasamādhipaññāsāre patiṭṭhito.
ஸெய்யதா²பீதி யதா² நாம. ஸம்பன்னந்தி பரிபுண்ணங் பரிபக்கஸாலிப⁴ரிதங். ஸங்க⁴ராபெய்யாதி ஸங்கட்³டா⁴பெய்ய. உப்³ப³ஹாபெய்யாதி க²லட்டா²னங் ஆஹராபெய்ய. பு⁴ஸிகந்தி பு⁴ஸங். கொட்டாபெய்யாதி உது³க்க²லே பக்கி²பாபெத்வா முஸலேஹி பஹராபெய்ய. அக்³க³ப்பத்தானீதி தண்டு³லக்³க³ங் பத்தானி. ஸாரப்பத்தாதீ³ஸுபி ஏஸேவ நயோ. ஸேஸங் உத்தானமேவ. யங் பனெத்த² ‘‘து³ஸ்ஸீல்யஞ்சஸ்ஸ பஹீனங் மிச்சா²தி³ட்டி² சஸ்ஸ பஹீனா’’தி வுத்தங், தங் ஸோதாபத்திமக்³கே³ன பஹீனபா⁴வங் ஸந்தா⁴ய வுத்தந்தி வேதி³தப்³ப³ங்.
Seyyathāpīti yathā nāma. Sampannanti paripuṇṇaṃ paripakkasālibharitaṃ. Saṅgharāpeyyāti saṅkaḍḍhāpeyya. Ubbahāpeyyāti khalaṭṭhānaṃ āharāpeyya. Bhusikanti bhusaṃ. Koṭṭāpeyyāti udukkhale pakkhipāpetvā musalehi paharāpeyya. Aggappattānīti taṇḍulaggaṃ pattāni. Sārappattādīsupi eseva nayo. Sesaṃ uttānameva. Yaṃ panettha ‘‘dussīlyañcassa pahīnaṃ micchādiṭṭhi cassa pahīnā’’ti vuttaṃ, taṃ sotāpattimaggena pahīnabhāvaṃ sandhāya vuttanti veditabbaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. பவிவேகஸுத்தங் • 2. Pavivekasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. பவிவேகஸுத்தவண்ணனா • 2. Pavivekasuttavaṇṇanā
