| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๒. ปวิเวกสุตฺตวณฺณนา
2. Pavivekasuttavaṇṇanā
๙๔. ทุติเย จีวรปวิเวกนฺติ จีวรํ นิสฺสาย อุปฺปชฺชนกกิเลเสหิ วิวิตฺตภาวํฯ เสสทฺวเยปิ เอเสว นโยฯ สาณานีติ สาณวากเจลานิฯ มสาณานีติ มิสฺสกเจลานิฯ ฉวทุสฺสานีติ มตสรีรโต ฉฑฺฑิตวตฺถานิ, เอรกติณาทีนิ วา คเนฺถตฺวา กตนิวาสนานิฯ ปํสุกูลานีติ ปถวิยํ ฉฑฺฑิตนนฺตกานิฯ ติรีฎานีติ รุกฺขตจวตฺถานิฯ อชินานีติ อชินมิคจมฺมานิฯ อชินกฺขิปนฺติ ตเทว มเชฺฌ ผาลิตํ, สหขุรกนฺติปิ วทนฺติฯ กุสจีรนฺติ กุสติณานิ คเนฺถตฺวา กตจีรํฯ วากจีรผลกจีเรสุปิ เอเสว นโยฯ เกสกมฺพลนฺติ มนุสฺสเกเสหิ กตกมฺพลํฯ วาลกมฺพลนฺติ อสฺสวาลาทีหิ กตกมฺพลํฯ อุลูกปกฺขิกนฺติ อุลูกปตฺตานิ คเนฺถตฺวา กตนิวาสนํฯ
94. Dutiye cīvarapavivekanti cīvaraṃ nissāya uppajjanakakilesehi vivittabhāvaṃ. Sesadvayepi eseva nayo. Sāṇānīti sāṇavākacelāni. Masāṇānīti missakacelāni. Chavadussānīti matasarīrato chaḍḍitavatthāni, erakatiṇādīni vā ganthetvā katanivāsanāni. Paṃsukūlānīti pathaviyaṃ chaḍḍitanantakāni. Tirīṭānīti rukkhatacavatthāni. Ajinānīti ajinamigacammāni. Ajinakkhipanti tadeva majjhe phālitaṃ, sahakhurakantipi vadanti. Kusacīranti kusatiṇāni ganthetvā katacīraṃ. Vākacīraphalakacīresupi eseva nayo. Kesakambalanti manussakesehi katakambalaṃ. Vālakambalanti assavālādīhi katakambalaṃ. Ulūkapakkhikanti ulūkapattāni ganthetvā katanivāsanaṃ.
สากภกฺขาติ อลฺลสากภกฺขาฯ สามากภกฺขาติ สามากตณฺฑุลภกฺขาฯ นีวาราทีสุ นีวารา นาม อรเญฺญ สยํ ชาตวีหิชาติฯ ททฺทุลนฺติ จมฺมกาเรหิ จมฺมํ ลิขิตฺวา ฉฑฺฑิตกสฎํฯ หฎํ วุจฺจติ สิเลโสปิ เสวาโลปิ กณิการาทิรุกฺขนิยฺยาโสปิฯ กณนฺติ กุณฺฑกํฯ อาจาโมติ ภตฺตอุกฺขลิกาย ลโคฺค ฌามโอทโนฯ ตํ ฉฑฺฑิตฎฺฐาเน คเหตฺวา ขาทนฺติ, โอทนกญฺชิยนฺติปิ วทนฺติฯ ปิญฺญากาทโย ปากฎาวฯ ปวตฺตผลโภชีติ ปติตผลโภชีฯ ภุสาคารนฺติ ขลสาลํฯ
Sākabhakkhāti allasākabhakkhā. Sāmākabhakkhāti sāmākataṇḍulabhakkhā. Nīvārādīsu nīvārā nāma araññe sayaṃ jātavīhijāti. Daddulanti cammakārehi cammaṃ likhitvā chaḍḍitakasaṭaṃ. Haṭaṃ vuccati silesopi sevālopi kaṇikārādirukkhaniyyāsopi. Kaṇanti kuṇḍakaṃ. Ācāmoti bhattaukkhalikāya laggo jhāmaodano. Taṃ chaḍḍitaṭṭhāne gahetvā khādanti, odanakañjiyantipi vadanti. Piññākādayo pākaṭāva. Pavattaphalabhojīti patitaphalabhojī. Bhusāgāranti khalasālaṃ.
สีลวาติ จตุปาริสุทฺธิสีเลน สมนฺนาคโตฯ ทุสฺสีลฺยญฺจสฺส ปหีนํ โหตีติ ปญฺจ ทุสฺสีลฺยานิ ปหีนานิ โหนฺติฯ สมฺมาทิฎฺฐิโกติ ยาถาวทิฎฺฐิโกฯ มิจฺฉาทิฎฺฐีติ อยาถาวทิฎฺฐิฯ อาสวาติ จตฺตาโร อาสวาฯ อคฺคปฺปโตฺตติ สีลคฺคปฺปโตฺตฯ สารปฺปโตฺตติ สีลสารํ ปโตฺตฯ สุโทฺธติ ปริสุโทฺธฯ สาเร ปติฎฺฐิโตติ สีลสมาธิปญฺญาสาเร ปติฎฺฐิโตฯ
Sīlavāti catupārisuddhisīlena samannāgato. Dussīlyañcassa pahīnaṃ hotīti pañca dussīlyāni pahīnāni honti. Sammādiṭṭhikoti yāthāvadiṭṭhiko. Micchādiṭṭhīti ayāthāvadiṭṭhi. Āsavāti cattāro āsavā. Aggappattoti sīlaggappatto. Sārappattoti sīlasāraṃ patto. Suddhoti parisuddho. Sāre patiṭṭhitoti sīlasamādhipaññāsāre patiṭṭhito.
เสยฺยถาปีติ ยถา นามฯ สมฺปนฺนนฺติ ปริปุณฺณํ ปริปกฺกสาลิภริตํฯ สงฺฆราเปยฺยาติ สงฺกฑฺฒาเปยฺยฯ อุพฺพหาเปยฺยาติ ขลฎฺฐานํ อาหราเปยฺยฯ ภุสิกนฺติ ภุสํฯ โกฎฺฎาเปยฺยาติ อุทุกฺขเล ปกฺขิปาเปตฺวา มุสเลหิ ปหราเปยฺยฯ อคฺคปฺปตฺตานีติ ตณฺฑุลคฺคํ ปตฺตานิฯ สารปฺปตฺตาทีสุปิ เอเสว นโยฯ เสสํ อุตฺตานเมวฯ ยํ ปเนตฺถ ‘‘ทุสฺสีลฺยญฺจสฺส ปหีนํ มิจฺฉาทิฎฺฐิ จสฺส ปหีนา’’ติ วุตฺตํ, ตํ โสตาปตฺติมเคฺคน ปหีนภาวํ สนฺธาย วุตฺตนฺติ เวทิตพฺพํฯ
Seyyathāpīti yathā nāma. Sampannanti paripuṇṇaṃ paripakkasālibharitaṃ. Saṅgharāpeyyāti saṅkaḍḍhāpeyya. Ubbahāpeyyāti khalaṭṭhānaṃ āharāpeyya. Bhusikanti bhusaṃ. Koṭṭāpeyyāti udukkhale pakkhipāpetvā musalehi paharāpeyya. Aggappattānīti taṇḍulaggaṃ pattāni. Sārappattādīsupi eseva nayo. Sesaṃ uttānameva. Yaṃ panettha ‘‘dussīlyañcassa pahīnaṃ micchādiṭṭhi cassa pahīnā’’ti vuttaṃ, taṃ sotāpattimaggena pahīnabhāvaṃ sandhāya vuttanti veditabbaṃ.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๒. ปวิเวกสุตฺตํ • 2. Pavivekasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๒. ปวิเวกสุตฺตวณฺณนา • 2. Pavivekasuttavaṇṇanā
