| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
២. បវិវេកសុត្តវណ្ណនា
2. Pavivekasuttavaṇṇanā
៩៤. ទុតិយេ ចីវរបវិវេកន្តិ ចីវរំ និស្សាយ ឧប្បជ្ជនកកិលេសេហិ វិវិត្តភាវំ។ សេសទ្វយេបិ ឯសេវ នយោ។ សាណានីតិ សាណវាកចេលានិ។ មសាណានីតិ មិស្សកចេលានិ។ ឆវទុស្សានីតិ មតសរីរតោ ឆឌ្ឌិតវត្ថានិ, ឯរកតិណាទីនិ វា គន្ថេត្វា កតនិវាសនានិ។ បំសុកូលានីតិ បថវិយំ ឆឌ្ឌិតនន្តកានិ។ តិរីដានីតិ រុក្ខតចវត្ថានិ។ អជិនានីតិ អជិនមិគចម្មានិ។ អជិនក្ខិបន្តិ តទេវ មជ្ឈេ ផាលិតំ, សហខុរកន្តិបិ វទន្តិ។ កុសចីរន្តិ កុសតិណានិ គន្ថេត្វា កតចីរំ។ វាកចីរផលកចីរេសុបិ ឯសេវ នយោ។ កេសកម្ពលន្តិ មនុស្សកេសេហិ កតកម្ពលំ។ វាលកម្ពលន្តិ អស្សវាលាទីហិ កតកម្ពលំ។ ឧលូកបក្ខិកន្តិ ឧលូកបត្តានិ គន្ថេត្វា កតនិវាសនំ។
94. Dutiye cīvarapavivekanti cīvaraṃ nissāya uppajjanakakilesehi vivittabhāvaṃ. Sesadvayepi eseva nayo. Sāṇānīti sāṇavākacelāni. Masāṇānīti missakacelāni. Chavadussānīti matasarīrato chaḍḍitavatthāni, erakatiṇādīni vā ganthetvā katanivāsanāni. Paṃsukūlānīti pathaviyaṃ chaḍḍitanantakāni. Tirīṭānīti rukkhatacavatthāni. Ajinānīti ajinamigacammāni. Ajinakkhipanti tadeva majjhe phālitaṃ, sahakhurakantipi vadanti. Kusacīranti kusatiṇāni ganthetvā katacīraṃ. Vākacīraphalakacīresupi eseva nayo. Kesakambalanti manussakesehi katakambalaṃ. Vālakambalanti assavālādīhi katakambalaṃ. Ulūkapakkhikanti ulūkapattāni ganthetvā katanivāsanaṃ.
សាកភក្ខាតិ អល្លសាកភក្ខា។ សាមាកភក្ខាតិ សាមាកតណ្ឌុលភក្ខា។ នីវារាទីសុ នីវារា នាម អរញ្ញេ សយំ ជាតវីហិជាតិ។ ទទ្ទុលន្តិ ចម្មការេហិ ចម្មំ លិខិត្វា ឆឌ្ឌិតកសដំ។ ហដំ វុច្ចតិ សិលេសោបិ សេវាលោបិ កណិការាទិរុក្ខនិយ្យាសោបិ។ កណន្តិ កុណ្ឌកំ។ អាចាមោតិ ភត្តឧក្ខលិកាយ លគ្គោ ឈាមឱទនោ។ តំ ឆឌ្ឌិតដ្ឋានេ គហេត្វា ខាទន្តិ, ឱទនកញ្ជិយន្តិបិ វទន្តិ។ បិញ្ញាកាទយោ បាកដាវ។ បវត្តផលភោជីតិ បតិតផលភោជី។ ភុសាគារន្តិ ខលសាលំ។
Sākabhakkhāti allasākabhakkhā. Sāmākabhakkhāti sāmākataṇḍulabhakkhā. Nīvārādīsu nīvārā nāma araññe sayaṃ jātavīhijāti. Daddulanti cammakārehi cammaṃ likhitvā chaḍḍitakasaṭaṃ. Haṭaṃ vuccati silesopi sevālopi kaṇikārādirukkhaniyyāsopi. Kaṇanti kuṇḍakaṃ. Ācāmoti bhattaukkhalikāya laggo jhāmaodano. Taṃ chaḍḍitaṭṭhāne gahetvā khādanti, odanakañjiyantipi vadanti. Piññākādayo pākaṭāva. Pavattaphalabhojīti patitaphalabhojī. Bhusāgāranti khalasālaṃ.
សីលវាតិ ចតុបារិសុទ្ធិសីលេន សមន្នាគតោ។ ទុស្សីល្យញ្ចស្ស បហីនំ ហោតីតិ បញ្ច ទុស្សីល្យានិ បហីនានិ ហោន្តិ។ សម្មាទិដ្ឋិកោតិ យាថាវទិដ្ឋិកោ។ មិច្ឆាទិដ្ឋីតិ អយាថាវទិដ្ឋិ។ អាសវាតិ ចត្តារោ អាសវា។ អគ្គប្បត្តោតិ សីលគ្គប្បត្តោ។ សារប្បត្តោតិ សីលសារំ បត្តោ។ សុទ្ធោតិ បរិសុទ្ធោ។ សារេ បតិដ្ឋិតោតិ សីលសមាធិបញ្ញាសារេ បតិដ្ឋិតោ។
Sīlavāti catupārisuddhisīlena samannāgato. Dussīlyañcassa pahīnaṃ hotīti pañca dussīlyāni pahīnāni honti. Sammādiṭṭhikoti yāthāvadiṭṭhiko. Micchādiṭṭhīti ayāthāvadiṭṭhi. Āsavāti cattāro āsavā. Aggappattoti sīlaggappatto. Sārappattoti sīlasāraṃ patto. Suddhoti parisuddho. Sāre patiṭṭhitoti sīlasamādhipaññāsāre patiṭṭhito.
សេយ្យថាបីតិ យថា នាម។ សម្បន្នន្តិ បរិបុណ្ណំ បរិបក្កសាលិភរិតំ។ សង្ឃរាបេយ្យាតិ សង្កឌ្ឍាបេយ្យ។ ឧព្ពហាបេយ្យាតិ ខលដ្ឋានំ អាហរាបេយ្យ។ ភុសិកន្តិ ភុសំ។ កោដ្ដាបេយ្យាតិ ឧទុក្ខលេ បក្ខិបាបេត្វា មុសលេហិ បហរាបេយ្យ។ អគ្គប្បត្តានីតិ តណ្ឌុលគ្គំ បត្តានិ។ សារប្បត្តាទីសុបិ ឯសេវ នយោ។ សេសំ ឧត្តានមេវ។ យំ បនេត្ថ ‘‘ទុស្សីល្យញ្ចស្ស បហីនំ មិច្ឆាទិដ្ឋិ ចស្ស បហីនា’’តិ វុត្តំ, តំ សោតាបត្តិមគ្គេន បហីនភាវំ សន្ធាយ វុត្តន្តិ វេទិតព្ពំ។
Seyyathāpīti yathā nāma. Sampannanti paripuṇṇaṃ paripakkasālibharitaṃ. Saṅgharāpeyyāti saṅkaḍḍhāpeyya. Ubbahāpeyyāti khalaṭṭhānaṃ āharāpeyya. Bhusikanti bhusaṃ. Koṭṭāpeyyāti udukkhale pakkhipāpetvā musalehi paharāpeyya. Aggappattānīti taṇḍulaggaṃ pattāni. Sārappattādīsupi eseva nayo. Sesaṃ uttānameva. Yaṃ panettha ‘‘dussīlyañcassa pahīnaṃ micchādiṭṭhi cassa pahīnā’’ti vuttaṃ, taṃ sotāpattimaggena pahīnabhāvaṃ sandhāya vuttanti veditabbaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ២. បវិវេកសុត្តំ • 2. Pavivekasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ២. បវិវេកសុត្តវណ្ណនា • 2. Pavivekasuttavaṇṇanā
