| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၃. ပာယသဒာယကတ္ထေရအပဒာနဝဏ္ဏနာ
3. Pāyasadāyakattheraapadānavaṇṇanā
သုဝဏ္ဏဝဏ္ဏော သမ္ဗုဒ္ဓောတိအာဒိကံ အာယသ္မတော ပာယသဒာယကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဝိပသ္သိသ္သ ဘဂဝတော ကာလေ ဧကသ္မိံ ဝိဘဝသမ္ပန္နေ ကုလဂေဟေ နိဗ္ဗတ္တော ဝိညုတံ ပတ္ဝာ ဃရာဝာသံ ဝသန္တော ဟတ္ထိအသ္သဓနဓညသတ္တရတနာဒိဝိဘဝသမ္ပန္နော သဒ္ဓာသမ္ပန္နော ကမ္မဖလံ သဒ္ဒဟိတ္ဝာ သဟသ္သမတ္တာ သုဝဏ္ဏပာတိယော ကာရေတ္ဝာ တသ္မိံ ခီရပာယသသဟသ္သသ္သ ပူရေတ္ဝာ တာ သဗ္ဗာ ဂာဟာပေတ္ဝာ သိမ္ဗလိဝနံ အဂမာသိ။ တသ္မိံ သမယေ ဝိပသ္သီ ဘဂဝာ ဆဗ္ဗဏ္ဏရံသိယော ဝိသ္သဇ္ဇေတ္ဝာ အာကာသေ စင္ကမံ မာပေတ္ဝာ စင္ကမတိ။ သော ပန သေဋ္ဌိ တံ အစ္ဆရိယံ ဒိသ္ဝာ အတီဝ ပသန္နော ပာတိယော ဌပေတ္ဝာ ဝန္ဒိတ္ဝာ အာရောစေသိ ပဋိဂ္ဂဟဏာယ။ အထ ဘဂဝာ အနုကမ္ပံ ဥပာဒာယ ပဋိဂ္ဂဟေသိ, ပဋိဂ္ဂဟေတ္ဝာ စ ပန တသ္သ သောမနုသ္သုပ္ပာဒနတ္ထံ သဟသ္သမတ္တေဟိ ဘိက္ခုသင္ဃေဟိ သဒ္ဓိံ ပရိဘုဉ္ဇိ, တဒဝသေသံ အနေကသဟသ္သဘိက္ခူ ပရိဘုဉ္ဇိံသု။ သော တေန ပုညေန သုဂတီသုယေဝ သံသရန္တော ဣမသ္မိံ ဗုဒ္ဓုပ္ပာဒေ ကုလဂေဟေ နိဗ္ဗတ္တော ဝိညုတံ ပတ္တော သဒ္ဓာဇာတော ပဗ္ဗဇိတ္ဝာ နစိရသ္သေဝ အရဟာ အဟောသိ။
Suvaṇṇavaṇṇo sambuddhotiādikaṃ āyasmato pāyasadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ vibhavasampanne kulagehe nibbatto viññutaṃ patvā gharāvāsaṃ vasanto hatthiassadhanadhaññasattaratanādivibhavasampanno saddhāsampanno kammaphalaṃ saddahitvā sahassamattā suvaṇṇapātiyo kāretvā tasmiṃ khīrapāyasasahassassa pūretvā tā sabbā gāhāpetvā simbalivanaṃ agamāsi. Tasmiṃ samaye vipassī bhagavā chabbaṇṇaraṃsiyo vissajjetvā ākāse caṅkamaṃ māpetvā caṅkamati. So pana seṭṭhi taṃ acchariyaṃ disvā atīva pasanno pātiyo ṭhapetvā vanditvā ārocesi paṭiggahaṇāya. Atha bhagavā anukampaṃ upādāya paṭiggahesi, paṭiggahetvā ca pana tassa somanussuppādanatthaṃ sahassamattehi bhikkhusaṅghehi saddhiṃ paribhuñji, tadavasesaṃ anekasahassabhikkhū paribhuñjiṃsu. So tena puññena sugatīsuyeva saṃsaranto imasmiṃ buddhuppāde kulagehe nibbatto viññutaṃ patto saddhājāto pabbajitvā nacirasseva arahā ahosi.
၂၆. သော အပရဘာဂေ အတ္တနော ကုသလံ ပစ္စဝေက္ခမာနော တံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော သုဝဏ္ဏဝဏ္ဏော သမ္ဗုဒ္ဓောတိအာဒိမာဟ။ တံ ဟေဋ္ဌာ ဝုတ္တမေဝ။
26. So aparabhāge attano kusalaṃ paccavekkhamāno taṃ saritvā somanassajāto pubbacaritāpadānaṃ pakāsento suvaṇṇavaṇṇo sambuddhotiādimāha. Taṃ heṭṭhā vuttameva.
၂၈. စင္ကမံ သုသမာရူဠ္ဟောတိ စဒိနန္တော ပဒဝိက္ခေပံ ကရောန္တော ကမတိ ဂစ္ဆတီတိ စင္ကမံ, စင္ကမသ္သ ပဒဝိက္ခေပသ္သ အာဓာရဘူတပထဝိပဒေသော စင္ကမံ နာမာတိ အတ္ထော, ဧတံ စင္ကမံသု ဝိသေသေန အာရူဠ္ဟောတိ သမ္ဗန္ဓော။ အမ္ဗရေ အနိလာယနေတိ ဝရီယတိ ဆာဒိယတိ အနေနာတိ ဝရံ, န ဗရန္တိ အမ္ဗရံ, သေတဝတ္ထသဒိသံ အာကာသန္တိ အတ္ထော။ နတ္ထိ နိလီယနံ ဂောပနံ ဧတ္ထာတိ အနိလံ, အာ သမန္တတော ယန္တိ ဂစ္ဆန္တိ အနေန ဣဒ္ဓိမန္တောတိ အာယနံ, အနိလဉ္စ တံ အာယနဉ္စေတိ အနိလာယနံ, တသ္မိံ အမ္ဗရေ အနိလာယနေ စင္ကမံ မာပယိန္တိ အတ္ထော။ သေသံ သဗ္ဗတ္ထ ဥတ္တာနမေဝာတိ။
28.Caṅkamaṃ susamārūḷhoti cadinanto padavikkhepaṃ karonto kamati gacchatīti caṅkamaṃ, caṅkamassa padavikkhepassa ādhārabhūtapathavipadeso caṅkamaṃ nāmāti attho, etaṃ caṅkamaṃsu visesena ārūḷhoti sambandho. Ambare anilāyaneti varīyati chādiyati anenāti varaṃ, na baranti ambaraṃ, setavatthasadisaṃ ākāsanti attho. Natthi nilīyanaṃ gopanaṃ etthāti anilaṃ, ā samantato yanti gacchanti anena iddhimantoti āyanaṃ, anilañca taṃ āyanañceti anilāyanaṃ, tasmiṃ ambare anilāyane caṅkamaṃ māpayinti attho. Sesaṃ sabbattha uttānamevāti.
ပာယသဒာယကတ္ထေရအပဒာနဝဏ္ဏနာ သမတ္တာ။
Pāyasadāyakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၃. ပာယသဒာယကတ္ထေရအပဒာနံ • 3. Pāyasadāyakattheraapadānaṃ
