| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೩. ಪಾಯಸದಾಯಕತ್ಥೇರಅಪದಾನವಣ್ಣನಾ
3. Pāyasadāyakattheraapadānavaṇṇanā
ಸುವಣ್ಣವಣ್ಣೋ ಸಮ್ಬುದ್ಧೋತಿಆದಿಕಂ ಆಯಸ್ಮತೋ ಪಾಯಸದಾಯಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ವಿಪಸ್ಸಿಸ್ಸ ಭಗವತೋ ಕಾಲೇ ಏಕಸ್ಮಿಂ ವಿಭವಸಮ್ಪನ್ನೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ವಾ ಘರಾವಾಸಂ ವಸನ್ತೋ ಹತ್ಥಿಅಸ್ಸಧನಧಞ್ಞಸತ್ತರತನಾದಿವಿಭವಸಮ್ಪನ್ನೋ ಸದ್ಧಾಸಮ್ಪನ್ನೋ ಕಮ್ಮಫಲಂ ಸದ್ದಹಿತ್ವಾ ಸಹಸ್ಸಮತ್ತಾ ಸುವಣ್ಣಪಾತಿಯೋ ಕಾರೇತ್ವಾ ತಸ್ಮಿಂ ಖೀರಪಾಯಸಸಹಸ್ಸಸ್ಸ ಪೂರೇತ್ವಾ ತಾ ಸಬ್ಬಾ ಗಾಹಾಪೇತ್ವಾ ಸಿಮ್ಬಲಿವನಂ ಅಗಮಾಸಿ। ತಸ್ಮಿಂ ಸಮಯೇ ವಿಪಸ್ಸೀ ಭಗವಾ ಛಬ್ಬಣ್ಣರಂಸಿಯೋ ವಿಸ್ಸಜ್ಜೇತ್ವಾ ಆಕಾಸೇ ಚಙ್ಕಮಂ ಮಾಪೇತ್ವಾ ಚಙ್ಕಮತಿ। ಸೋ ಪನ ಸೇಟ್ಠಿ ತಂ ಅಚ್ಛರಿಯಂ ದಿಸ್ವಾ ಅತೀವ ಪಸನ್ನೋ ಪಾತಿಯೋ ಠಪೇತ್ವಾ ವನ್ದಿತ್ವಾ ಆರೋಚೇಸಿ ಪಟಿಗ್ಗಹಣಾಯ। ಅಥ ಭಗವಾ ಅನುಕಮ್ಪಂ ಉಪಾದಾಯ ಪಟಿಗ್ಗಹೇಸಿ, ಪಟಿಗ್ಗಹೇತ್ವಾ ಚ ಪನ ತಸ್ಸ ಸೋಮನುಸ್ಸುಪ್ಪಾದನತ್ಥಂ ಸಹಸ್ಸಮತ್ತೇಹಿ ಭಿಕ್ಖುಸಙ್ಘೇಹಿ ಸದ್ಧಿಂ ಪರಿಭುಞ್ಜಿ, ತದವಸೇಸಂ ಅನೇಕಸಹಸ್ಸಭಿಕ್ಖೂ ಪರಿಭುಞ್ಜಿಂಸು। ಸೋ ತೇನ ಪುಞ್ಞೇನ ಸುಗತೀಸುಯೇವ ಸಂಸರನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಸದ್ಧಾಜಾತೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Suvaṇṇavaṇṇo sambuddhotiādikaṃ āyasmato pāyasadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ vibhavasampanne kulagehe nibbatto viññutaṃ patvā gharāvāsaṃ vasanto hatthiassadhanadhaññasattaratanādivibhavasampanno saddhāsampanno kammaphalaṃ saddahitvā sahassamattā suvaṇṇapātiyo kāretvā tasmiṃ khīrapāyasasahassassa pūretvā tā sabbā gāhāpetvā simbalivanaṃ agamāsi. Tasmiṃ samaye vipassī bhagavā chabbaṇṇaraṃsiyo vissajjetvā ākāse caṅkamaṃ māpetvā caṅkamati. So pana seṭṭhi taṃ acchariyaṃ disvā atīva pasanno pātiyo ṭhapetvā vanditvā ārocesi paṭiggahaṇāya. Atha bhagavā anukampaṃ upādāya paṭiggahesi, paṭiggahetvā ca pana tassa somanussuppādanatthaṃ sahassamattehi bhikkhusaṅghehi saddhiṃ paribhuñji, tadavasesaṃ anekasahassabhikkhū paribhuñjiṃsu. So tena puññena sugatīsuyeva saṃsaranto imasmiṃ buddhuppāde kulagehe nibbatto viññutaṃ patto saddhājāto pabbajitvā nacirasseva arahā ahosi.
೨೬. ಸೋ ಅಪರಭಾಗೇ ಅತ್ತನೋ ಕುಸಲಂ ಪಚ್ಚವೇಕ್ಖಮಾನೋ ತಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಸುವಣ್ಣವಣ್ಣೋ ಸಮ್ಬುದ್ಧೋತಿಆದಿಮಾಹ। ತಂ ಹೇಟ್ಠಾ ವುತ್ತಮೇವ।
26. So aparabhāge attano kusalaṃ paccavekkhamāno taṃ saritvā somanassajāto pubbacaritāpadānaṃ pakāsento suvaṇṇavaṇṇo sambuddhotiādimāha. Taṃ heṭṭhā vuttameva.
೨೮. ಚಙ್ಕಮಂ ಸುಸಮಾರೂಳ್ಹೋತಿ ಚದಿನನ್ತೋ ಪದವಿಕ್ಖೇಪಂ ಕರೋನ್ತೋ ಕಮತಿ ಗಚ್ಛತೀತಿ ಚಙ್ಕಮಂ, ಚಙ್ಕಮಸ್ಸ ಪದವಿಕ್ಖೇಪಸ್ಸ ಆಧಾರಭೂತಪಥವಿಪದೇಸೋ ಚಙ್ಕಮಂ ನಾಮಾತಿ ಅತ್ಥೋ, ಏತಂ ಚಙ್ಕಮಂಸು ವಿಸೇಸೇನ ಆರೂಳ್ಹೋತಿ ಸಮ್ಬನ್ಧೋ। ಅಮ್ಬರೇ ಅನಿಲಾಯನೇತಿ ವರೀಯತಿ ಛಾದಿಯತಿ ಅನೇನಾತಿ ವರಂ, ನ ಬರನ್ತಿ ಅಮ್ಬರಂ, ಸೇತವತ್ಥಸದಿಸಂ ಆಕಾಸನ್ತಿ ಅತ್ಥೋ। ನತ್ಥಿ ನಿಲೀಯನಂ ಗೋಪನಂ ಏತ್ಥಾತಿ ಅನಿಲಂ, ಆ ಸಮನ್ತತೋ ಯನ್ತಿ ಗಚ್ಛನ್ತಿ ಅನೇನ ಇದ್ಧಿಮನ್ತೋತಿ ಆಯನಂ, ಅನಿಲಞ್ಚ ತಂ ಆಯನಞ್ಚೇತಿ ಅನಿಲಾಯನಂ, ತಸ್ಮಿಂ ಅಮ್ಬರೇ ಅನಿಲಾಯನೇ ಚಙ್ಕಮಂ ಮಾಪಯಿನ್ತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
28.Caṅkamaṃ susamārūḷhoti cadinanto padavikkhepaṃ karonto kamati gacchatīti caṅkamaṃ, caṅkamassa padavikkhepassa ādhārabhūtapathavipadeso caṅkamaṃ nāmāti attho, etaṃ caṅkamaṃsu visesena ārūḷhoti sambandho. Ambare anilāyaneti varīyati chādiyati anenāti varaṃ, na baranti ambaraṃ, setavatthasadisaṃ ākāsanti attho. Natthi nilīyanaṃ gopanaṃ etthāti anilaṃ, ā samantato yanti gacchanti anena iddhimantoti āyanaṃ, anilañca taṃ āyanañceti anilāyanaṃ, tasmiṃ ambare anilāyane caṅkamaṃ māpayinti attho. Sesaṃ sabbattha uttānamevāti.
ಪಾಯಸದಾಯಕತ್ಥೇರಅಪದಾನವಣ್ಣನಾ ಸಮತ್ತಾ।
Pāyasadāyakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೩. ಪಾಯಸದಾಯಕತ್ಥೇರಅಪದಾನಂ • 3. Pāyasadāyakattheraapadānaṃ
