| Library / Tipiṭaka / ཏིཔིཊཀ • Tipiṭaka / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) |
༡༠. པཱཡཱསིརཱཛཉྙསུཏྟཝཎྞནཱ
10. Pāyāsirājaññasuttavaṇṇanā
༤༠༦. ཨེཝཾ མེ སུཏནྟི པཱཡཱསིརཱཛཉྙསུཏྟཾ། ཏཏྲཱཡམཔུབྦཔདཝཎྞནཱ – ཨཱཡསྨཱཏི པིཡཝཙནམེཏཾ། ཀུམཱརཀསྶཔོཏི ཏསྶ ནཱམཾ། ཀུམཱརཀཱལེ པབྦཛིཏཏྟཱ པན བྷགཝཏཱ ‘‘ཀསྶཔཾ པཀྐོསཐ, ཨིདཾ ཕལཾ ཝཱ ཁཱདནཱིཡཾ ཝཱ ཀསྶཔསྶ དེཐཱ’’ཏི ཝུཏྟེ ‘‘ཀཏརཀསྶཔསྶཱ’’ཏི། ‘‘ཀུམཱརཀསྶཔསྶཱ’’ཏི ཨེཝཾ གཧིཏནཱམཏྟཱ ཏཏོ པཊྛཱཡ ཝུཌྜྷཀཱལེཔི ‘‘ཀུམཱརཀསྶཔོ’’ ཏྭེཝ ཝུཙྩཏི། ཨཔིཙ རཉྙོ པོསཱཝནིཀཔུཏྟཏྟཱཔི ཏཾ ཀུམཱརཀསྶཔོཏི སཉྫཱནིཾསུ།
406.Evaṃme sutanti pāyāsirājaññasuttaṃ. Tatrāyamapubbapadavaṇṇanā – āyasmāti piyavacanametaṃ. Kumārakassapoti tassa nāmaṃ. Kumārakāle pabbajitattā pana bhagavatā ‘‘kassapaṃ pakkosatha, idaṃ phalaṃ vā khādanīyaṃ vā kassapassa dethā’’ti vutte ‘‘katarakassapassā’’ti. ‘‘Kumārakassapassā’’ti evaṃ gahitanāmattā tato paṭṭhāya vuḍḍhakālepi ‘‘kumārakassapo’’ tveva vuccati. Apica rañño posāvanikaputtattāpi taṃ kumārakassapoti sañjāniṃsu.
ཨཡཾ པནསྶ པུབྦཡོགཏོ པཊྛཱཡ ཨཱཝིབྷཱཝཀཐཱ – ཐེརོ ཀིར པདུམུཏྟརསྶ བྷགཝཏོ ཀཱལེ སེཊྛིཔུཏྟོ ཨཧོསི། ཨཐེཀདིཝསཾ བྷགཝནྟཾ ཙིཏྲཀཐིཾ ཨེཀཾ ཨཏྟནོ སཱཝཀཾ ཨེཏདགྒེ ཋཔེནྟཾ དིསྭཱ བྷགཝཏོ སཏྟཱཧཾ དཱནཾ དཏྭཱ ‘‘ཨཧམྤི བྷགཝཱ ཨནཱགཏེ ཨེཀསྶ བུདྡྷསྶ ཨཡཾ ཐེརོ ཝིཡ ཙིཏྲཀཐཱི སཱཝཀོ བྷཝཱམཱི’’ཏི པཏྠནཾ ཀཏྭཱ པུཉྙཱནི ཀརོནྟོ ཀསྶཔསྶ བྷགཝཏོ སཱསནེ པབྦཛིཏྭཱ ཝིསེསཾ ནིབྦཏྟེཏུཾ ནཱསཀྑི། ཏདཱ ཀིར པརིནིབྦུཏསྶ བྷགཝཏོ སཱསནེ ཨོསཀྐནྟེ པཉྩ བྷིཀྑཱུ ནིསྶེཎིཾ བནྡྷིཏྭཱ པབྦཏཾ ཨཱརུཡ྄ཧ སམཎདྷམྨཾ ཨཀཾསུ། སངྒྷཏྠེརོ ཏཏིཡདིཝསེ ཨརཧཏྟཾ པཏྟོ, ཨནུཐེརོ ཙཏུཏྠདིཝསེ ཨནཱགཱམཱི ཨཧོསི, ཨིཏརེ ཏཡོ ཝིསེསཾ ནིབྦཏྟེཏུཾ ཨསཀྐོནྟཱ དེཝལོཀེ ནིབྦཏྟཱ།
Ayaṃ panassa pubbayogato paṭṭhāya āvibhāvakathā – thero kira padumuttarassa bhagavato kāle seṭṭhiputto ahosi. Athekadivasaṃ bhagavantaṃ citrakathiṃ ekaṃ attano sāvakaṃ etadagge ṭhapentaṃ disvā bhagavato sattāhaṃ dānaṃ datvā ‘‘ahampi bhagavā anāgate ekassa buddhassa ayaṃ thero viya citrakathī sāvako bhavāmī’’ti patthanaṃ katvā puññāni karonto kassapassa bhagavato sāsane pabbajitvā visesaṃ nibbattetuṃ nāsakkhi. Tadā kira parinibbutassa bhagavato sāsane osakkante pañca bhikkhū nisseṇiṃ bandhitvā pabbataṃ āruyha samaṇadhammaṃ akaṃsu. Saṅghatthero tatiyadivase arahattaṃ patto, anuthero catutthadivase anāgāmī ahosi, itare tayo visesaṃ nibbattetuṃ asakkontā devaloke nibbattā.
ཏེསཾ ཨེཀཾ བུདྡྷནྟརཾ དེཝེསུ ཙ མནུསྶེསུ ཙ སམྤཏྟིཾ ཨནུབྷཝནྟཱནཾ ཨེཀོ ཏཀྐསིལཱཡཾ རཱཛཀུལེ ནིབྦཏྟིཏྭཱ པཀྐུསཱཏི ནཱམ རཱཛཱ ཧུཏྭཱ བྷགཝནྟཾ ཨུདྡིསྶ པབྦཛིཏྭཱ རཱཛགཧཾ ཨུདྡིསྶ ཨཱགཙྪནྟོ ཀུམྦྷཀཱརསཱལཱཡཾ བྷགཝཏོ དྷམྨདེསནཾ སུཏྭཱ ཨནཱགཱམིཕལཾ པཏྟོ། ཨེཀོ ཨེཀསྨིཾ སམུདྡཔཊྚནེ ཀུལགྷརེ ནིབྦཏྟིཏྭཱ ནཱཝཾ ཨཱརུཡ྄ཧ བྷིནྣནཱཝོ དཱརུཙཱིརཱནི ནིཝཱསེཏྭཱ ལཱབྷསམྤཏྟིཾ པཏྟོ ‘‘ཨཧཾ ཨརཧཱ’’ཏི ཙིཏྟཾ ཨུཔྤཱདེཏྭཱ ‘‘ན ཏྭཾ ཨརཧཱ, གཙྪ, སཏྠཱརཾ ཨུཔསངྐམིཏྭཱ པཉྷཾ པུཙྪཱ’’ཏི ཨཏྠཀཱམཱཡ དེཝཏཱཡ ཙོདིཏོ ཏཐཱ ཀཏྭཱ ཨརཧཏྟཕལཾ པཏྟོ།
Tesaṃ ekaṃ buddhantaraṃ devesu ca manussesu ca sampattiṃ anubhavantānaṃ eko takkasilāyaṃ rājakule nibbattitvā pakkusāti nāma rājā hutvā bhagavantaṃ uddissa pabbajitvā rājagahaṃ uddissa āgacchanto kumbhakārasālāyaṃ bhagavato dhammadesanaṃ sutvā anāgāmiphalaṃ patto. Eko ekasmiṃ samuddapaṭṭane kulaghare nibbattitvā nāvaṃ āruyha bhinnanāvo dārucīrāni nivāsetvā lābhasampattiṃ patto ‘‘ahaṃ arahā’’ti cittaṃ uppādetvā ‘‘na tvaṃ arahā, gaccha, satthāraṃ upasaṅkamitvā pañhaṃ pucchā’’ti atthakāmāya devatāya codito tathā katvā arahattaphalaṃ patto.
ཨེཀོ རཱཛགཧེ ཨེཀིསྶཱ ཀུལདཱརིཀཱཡ ཀུཙྪིམྷི ཨུཔྤནྣོ། སཱ ཙ པཋམཾ མཱཏཱཔིཏརོ ཡཱཙིཏྭཱ པབྦཛྫཾ ཨལབྷམཱནཱ ཀུལགྷརཾ གནྟྭཱ གབྦྷཾ གཎྷི ། གབྦྷསཎྛིཏམྤི ཨཛཱནནྟི སཱམིཀཾ ཨཱརཱདྷེཏྭཱ ཏེན ཨནུཉྙཱཏཱ བྷིཀྑུནཱིསུ པབྦཛིཏཱ, ཏསྶཱ གབྦྷནིམིཏྟཾ དིསྭཱ བྷིཀྑུནིཡོ དེཝདཏྟཾ པུཙྪིཾསུ། སོ ‘‘ཨསྶམཎཱི’’ཏི ཨཱཧ། དསབལཾ པུཙྪིཾསུ། སཏྠཱ ཨུཔཱལིཏྠེརཾ སམྤཊིཙྪཱཔེསི། ཐེརོ སཱཝཏྠིནགརཝཱསཱིནི ཀུལཱནི ཝིསཱཁཉྩ ཨུཔཱསིཀཾ པཀྐོསཱཔེཏྭཱ སོདྷེནྟོ ‘‘པུརེ ལདྡྷོ གབྦྷོ, པབྦཛྫཱ ཨརོགཱ’’ཏི ཨཱཧ། སཏྠཱ ‘‘སུཝིནིཙྪིཏཾ ཨདྷིཀརཎ’’ནྟི ཐེརསྶ སཱདྷུཀཱརམདཱསི། སཱ བྷིཀྑུནཱི སུཝཎྞབིམྦསདིསཾ པུཏྟཾ ཝིཛཱཡི། ཏཾ གཧེཏྭཱ རཱཛཱ པསེནདི ཀོསལོ པོསཱཔེསི། ‘‘ཀསྶཔོ’’ཏི ཙསྶ ནཱམཾ ཀཏྭཱ ཨཔརབྷཱགེ ཨལངྐརིཏྭཱ སཏྠུ སནྟིཀཾ ནེཏྭཱ པབྦཱཛེསི། ཨིཏི ནཾ རཉྙོ པོསཱཝནིཀཔུཏྟཏྟཱཔི ‘‘ཀུམཱརཀསྶཔོ’’ཏི སཉྫཱནིཾསཱུཏི། ཏཾ ཨེཀདིཝསཾ ཨནྡྷཝནེ སམཎདྷམྨཾ ཀརོནྟཾ ཨཏྠཀཱམཱ དེཝཏཱ པཉྷེ ཨུགྒཧཱཔེཏྭཱ ‘‘ཨིམེ པཉྷེ བྷགཝནྟཾ པུཙྪཱ’’ཏི ཨཱཧ། ཐེརོ པཉྷེ པུཙྪིཏྭཱ པཉྷཝིསྶཛྫནཱཝསཱནེ ཨརཧཏྟཾ པཱཔུཎི། བྷགཝཱཔི ཏཾ ཙིཏྲཀཐིཀཱནཾ བྷིཀྑཱུནཾ ཨགྒཊྛཱནེ ཋཔེསི།
Eko rājagahe ekissā kuladārikāya kucchimhi uppanno. Sā ca paṭhamaṃ mātāpitaro yācitvā pabbajjaṃ alabhamānā kulagharaṃ gantvā gabbhaṃ gaṇhi . Gabbhasaṇṭhitampi ajānanti sāmikaṃ ārādhetvā tena anuññātā bhikkhunīsu pabbajitā, tassā gabbhanimittaṃ disvā bhikkhuniyo devadattaṃ pucchiṃsu. So ‘‘assamaṇī’’ti āha. Dasabalaṃ pucchiṃsu. Satthā upālittheraṃ sampaṭicchāpesi. Thero sāvatthinagaravāsīni kulāni visākhañca upāsikaṃ pakkosāpetvā sodhento ‘‘pure laddho gabbho, pabbajjā arogā’’ti āha. Satthā ‘‘suvinicchitaṃ adhikaraṇa’’nti therassa sādhukāramadāsi. Sā bhikkhunī suvaṇṇabimbasadisaṃ puttaṃ vijāyi. Taṃ gahetvā rājā pasenadi kosalo posāpesi. ‘‘Kassapo’’ti cassa nāmaṃ katvā aparabhāge alaṅkaritvā satthu santikaṃ netvā pabbājesi. Iti naṃ rañño posāvanikaputtattāpi ‘‘kumārakassapo’’ti sañjāniṃsūti. Taṃ ekadivasaṃ andhavane samaṇadhammaṃ karontaṃ atthakāmā devatā pañhe uggahāpetvā ‘‘ime pañhe bhagavantaṃ pucchā’’ti āha. Thero pañhe pucchitvā pañhavissajjanāvasāne arahattaṃ pāpuṇi. Bhagavāpi taṃ citrakathikānaṃ bhikkhūnaṃ aggaṭṭhāne ṭhapesi.
སེཏབྱཱཏི ཏསྶ ནགརསྶ ནཱམཾ། ཨུཏྟརེན སེཏབྱནྟི སེཏབྱཏོ ཨུཏྟརདིསཱཡ། རཱཛཉྙོཏི ཨནབྷིསིཏྟཀརཱཛཱ། དིཊྛིགཏནྟི དིཊྛིཡེཝ། ཡཐཱ གཱུཐགཏཾ མུཏྟགཏནྟི ཝུཏྟེ ན གཱུཐཱདིཏོ ཨཉྙཾ ཨཏྠི, ཨེཝཾ དིཊྛིཡེཝ དིཊྛིགཏཾ། ཨིཏིཔི ནཏྠཱིཏི ཏཾ ཏཾ ཀཱརཎཾ ཨཔདིསིཏྭཱ ཨེཝམྤི ནཏྠཱིཏི ཝདཏི། པུརཱ…པེ॰… སཉྙཱཔེཏཱིཏི ཡཱཝ ན སཉྙཱཔེཏི།
Setabyāti tassa nagarassa nāmaṃ. Uttarena setabyanti setabyato uttaradisāya. Rājaññoti anabhisittakarājā. Diṭṭhigatanti diṭṭhiyeva. Yathā gūthagataṃ muttagatanti vutte na gūthādito aññaṃ atthi, evaṃ diṭṭhiyeva diṭṭhigataṃ. Itipi natthīti taṃ taṃ kāraṇaṃ apadisitvā evampi natthīti vadati. Purā…pe… saññāpetīti yāva na saññāpeti.
ཙནྡིམསཱུརིཡཨུཔམཱཝཎྞནཱ
Candimasūriyaupamāvaṇṇanā
༤༡༡. ཨིམེ བྷོ, ཀསྶཔ, ཙནྡིམསཱུརིཡཱཏི སོ ཀིར ཐེརེན པུཙྪིཏོ ཙིནྟེསི ‘‘ཨཡཾ སམཎོ པཋམཾ ཙནྡིམསཱུརིཡེ ཨུཔམཾ ཨཱཧརི, ཙནྡིམསཱུརིཡསདིསོ བྷཝིསྶཏི པཉྙཱཡ, ཨནབྷིབྷཝནཱིཡོ ཨཉྙེན, སཙེ པནཱཧཾ ‘ཙནྡིམསཱུརིཡཱ ཨིམསྨིཾ ལོཀེ’ཏི བྷཎིསྶཱམི, ‘ཀིཾ ནིསྶིཏཱ ཨེཏེ, ཀིཏྟཀཔམཱཎཱ, ཀིཏྟཀཾ ཨུཙྩཱ’ཏིཨཱདཱིཧི པལིཝེཋེསྶཏི། ཨཧཾ ཁོ པནེཏཾ ནིབྦེཋེཏུཾ ན སཀྑིསྶཱམི, ‘པརསྨིཾ ལོཀེ’ ཨིཙྩེཝསྶ ཀཐེསྶཱམཱི’’ཏི། ཏསྨཱ ཨེཝམཱཧ།
411.Ime bho, kassapa, candimasūriyāti so kira therena pucchito cintesi ‘‘ayaṃ samaṇo paṭhamaṃ candimasūriye upamaṃ āhari, candimasūriyasadiso bhavissati paññāya, anabhibhavanīyo aññena, sace panāhaṃ ‘candimasūriyā imasmiṃ loke’ti bhaṇissāmi, ‘kiṃ nissitā ete, kittakapamāṇā, kittakaṃ uccā’tiādīhi paliveṭhessati. Ahaṃ kho panetaṃ nibbeṭhetuṃ na sakkhissāmi, ‘parasmiṃ loke’ iccevassa kathessāmī’’ti. Tasmā evamāha.
བྷགཝཱ པན ཏཏོ པུབྦེ ན ཙིརསྶེཝ སུདྷཱབྷོཛནཱིཡཛཱཏཀཾ ཀཐེསི། ཏཏྠ ‘‘ཙནྡེ ཙནྡོ དེཝཔུཏྟོ, སཱུརིཡེ སཱུརིཡོ དེཝཔུཏྟོ’’ཏི ཨཱགཏཾ། བྷགཝཏཱ ཙ ཀཐིཏཾ ཛཱཏཀཾ ཝཱ སུཏྟནྟཾ ཝཱ སཀལཛམྦུདཱིཔེ པཏྠཊཾ ཧོཏི, ཏེན སོ ‘‘ཨེཏྠ ནིཝཱསིནོ དེཝཔུཏྟཱ ནཏྠཱི’’ཏི ན སཀྐཱ ཝཏྟུནྟི ཙིནྟེཏྭཱ དེཝཱ ཏེ ན མནུསྶཱཏི ཨཱཧ།
Bhagavā pana tato pubbe na cirasseva sudhābhojanīyajātakaṃ kathesi. Tattha ‘‘cande cando devaputto, sūriye sūriyo devaputto’’ti āgataṃ. Bhagavatā ca kathitaṃ jātakaṃ vā suttantaṃ vā sakalajambudīpe patthaṭaṃ hoti, tena so ‘‘ettha nivāsino devaputtā natthī’’ti na sakkā vattunti cintetvā devā te na manussāti āha.
༤༡༢. ཨཏྠི པན, རཱཛཉྙ, པརིཡཱཡོཏི ཨཏྠི པན ཀཱརཎནྟི པུཙྪཏི། ཨཱབཱདྷིཀཱཏི ཝིསབྷཱགཝེདནཱསངྑཱཏེན ཨཱབཱདྷེན སམནྣཱགཏཱ། དུཀྑིཏཱཏི དུཀྑཔྤཏྟཱ། བཱལ༹ྷགིལཱནཱཏི ཨདྷིམཏྟགིལཱནཱ། སདྡྷཱཡིཀཱཏི ཨཧཾ ཏུམྷེ སདྡཧཱམི, ཏུམྷེ མཡ྄ཧཾ སདྡྷཱཡིཀཱ སདྡྷཱཡིཏབྦཝཙནཱཏི ཨཏྠོ། པཙྩཡིཀཱཏི ཨཧཾ ཏུམྷེ པཏྟིཡཱམི, ཏུམྷེ མཡ྄ཧཾ པཙྩཡིཀཱ པཏྟིཡཱཡིཏབྦཱཏི ཨཏྠོ།
412.Atthi pana, rājañña, pariyāyoti atthi pana kāraṇanti pucchati. Ābādhikāti visabhāgavedanāsaṅkhātena ābādhena samannāgatā. Dukkhitāti dukkhappattā. Bāḷhagilānāti adhimattagilānā. Saddhāyikāti ahaṃ tumhe saddahāmi, tumhe mayhaṃ saddhāyikā saddhāyitabbavacanāti attho. Paccayikāti ahaṃ tumhe pattiyāmi, tumhe mayhaṃ paccayikā pattiyāyitabbāti attho.
ཙོརཱདིཨུཔམཱཝཎྞནཱ
Corādiupamāvaṇṇanā
༤༡༣. ཨུདྡིསིཏྭཱཏི ཏེསཾ ཨཏྟཱནཉྩ པཊིསཱམིཏབྷཎྜཀཉྩ དསྶེཏྭཱ, སམྤཊིཙྪཱཔེཏྭཱཏི ཨཏྠོ། ཝིཔྤལཔནྟསྶཱཏི ‘‘པུཏྟོ མེ, དྷཱིཏཱ མེ, དྷནཾ མེ’’ཏི ཝིཝིདྷཾ པལཔནྟསྶ། ནིརཡཔཱལེསཱུཏི ནིརཡེ ཀམྨཀཱརཎིཀསཏྟེསུ། ཡེ པན ‘‘ཀམྨམེཝ ཀམྨཀཱརཎཾ ཀརོཏི, ནཏྠི ནིརཡཔཱལཱ’’ཏི ཝདནྟི། ཏེ ‘‘ཏམེནཾ, བྷིཀྑཝེ, ནིརཡཔཱལཱ’’ཏི དེཝདཱུཏསུཏྟཾ པཊིབཱཧནྟི། མནུསྶལོཀེ རཱཛཀུལེསུ ཀཱརཎིཀམནུསྶཱ ཝིཡ ཧི ནིརཡེ ནིརཡཔཱལཱ ཧོནྟི།
413.Uddisitvāti tesaṃ attānañca paṭisāmitabhaṇḍakañca dassetvā, sampaṭicchāpetvāti attho. Vippalapantassāti ‘‘putto me, dhītā me, dhanaṃ me’’ti vividhaṃ palapantassa. Nirayapālesūti niraye kammakāraṇikasattesu. Ye pana ‘‘kammameva kammakāraṇaṃ karoti, natthi nirayapālā’’ti vadanti. Te ‘‘tamenaṃ, bhikkhave, nirayapālā’’ti devadūtasuttaṃ paṭibāhanti. Manussaloke rājakulesu kāraṇikamanussā viya hi niraye nirayapālā honti.
༤༡༥. ཝེལུ༹པེསིཀཱཧཱིཏི ཝེལུ༹ཝིལཱིཝེཧི། སུནིམྨཛྫཐཱཏི ཡཐཱ སུཊྛུ ནིམྨཛྫིཏཾ ཧོཏི, ཨེཝཾ ནིམྨཛྫཐ, ཨཔནེཐཱཏི ཨཏྠོ།
415.Veḷupesikāhīti veḷuvilīvehi. Sunimmajjathāti yathā suṭṭhu nimmajjitaṃ hoti, evaṃ nimmajjatha, apanethāti attho.
ཨསུཙཱིཏི ཨམནཱཔོ། ཨསུཙིསངྑཱཏོཏི ཨསུཙིཀོཊྛཱསབྷཱུཏོ ཨསུཙཱིཏི ཉཱཏོ ཝཱ། དུགྒནྡྷོཏི ཀུཎཔགནྡྷོ། ཛེགུཙྪོཏི ཛིགུཙྪིཏབྦཡུཏྟོ། པཊིཀཱུལོཏི དསྶནེནེཝ པཊིགྷཱཝཧོ། ཨུབྦཱདྷཏཱིཏི དིཝསསྶ དྭིཀྑཏྟུཾ ནྷཏྭཱ ཏིཀྑཏྟུཾ ཝཏྠཱནི པརིཝཏྟེཏྭཱ ཨལངྐཏཔཊིམཎྜིཏཱནཾ ཙཀྐཝཏྟིཨཱདཱིནམྤི མནུསྶཱནཾ གནྡྷོ ཡོཛནསཏེ ཋིཏཱནཾ དེཝཏཱནཾ ཀཎྛེ ཨཱསཏྟཀུཎཔཾ ཝིཡ བཱདྷཏི།
Asucīti amanāpo. Asucisaṅkhātoti asucikoṭṭhāsabhūto asucīti ñāto vā. Duggandhoti kuṇapagandho. Jegucchoti jigucchitabbayutto. Paṭikūloti dassaneneva paṭighāvaho. Ubbādhatīti divasassa dvikkhattuṃ nhatvā tikkhattuṃ vatthāni parivattetvā alaṅkatapaṭimaṇḍitānaṃ cakkavattiādīnampi manussānaṃ gandho yojanasate ṭhitānaṃ devatānaṃ kaṇṭhe āsattakuṇapaṃ viya bādhati.
༤༡༦. པུན པཱཎཱཏིཔཱཏཱདིཔཉྩསཱིལཱནི སམཱདཱཡཝཏྟེནྟཱནཾ ཝསེན ཝདཏི། ཏཱཝཏིཾསཱནནྟི ཨིདཉྩ དཱུརེ ནིབྦཏྟཱ ཏཱཝ མཱ ཨཱགཙྪནྟུ, ཨིམེ ཀསྨཱ ན ཨེནྟཱིཏི ཝདཏི།
416. Puna pāṇātipātādipañcasīlāni samādāyavattentānaṃ vasena vadati. Tāvatiṃsānanti idañca dūre nibbattā tāva mā āgacchantu, ime kasmā na entīti vadati.
༤༡༨. ཛཙྩནྡྷཱུཔམོ མཉྙེ པཊིབྷཱསཱིཏི ཛཙྩནྡྷོ ཝིཡ ཨུཔཊྛཱསི། ཨརཉྙཝནཔཏྠཱནཱིཏི ཨརཉྙཀངྒཡུཏྟཏཱཡ ཨརཉྙཱནི, མཧཱཝནསཎྜཏཱཡ ཝནཔཏྠཱནི། པནྟཱནཱིཏི དཱུརཱནི།
418.Jaccandhūpamomaññe paṭibhāsīti jaccandho viya upaṭṭhāsi. Araññavanapatthānīti araññakaṅgayuttatāya araññāni, mahāvanasaṇḍatāya vanapatthāni. Pantānīti dūrāni.
༤༡༩. ཀལྱཱཎདྷམྨེཏི ཏེནེཝ སཱིལེན སུནྡརདྷམྨེ། དུཀྑཔཊིཀཱུལེཏི དུཀྑཾ ཨཔཏྠེནྟེ། སེཡྻོ བྷཝིསྶཏཱིཏི པརལོཀེ སུགཏིསུཁཾ བྷཝིསྶཏཱིཏི ཨདྷིཔྤཱཡོ།
419.Kalyāṇadhammeti teneva sīlena sundaradhamme. Dukkhapaṭikūleti dukkhaṃ apatthente. Seyyo bhavissatīti paraloke sugatisukhaṃ bhavissatīti adhippāyo.
༤༢༠. ཨུཔཝིཛཉྙཱཏི ཨུཔགཏཝིཛཱཡནཀཱལཱ, པརིཔཀྐགབྦྷཱ ན ཙིརསྶེཝ ཝིཛཱཡིསྶཏཱིཏི ཨཏྠོ། ཨོཔབྷོགྒཱ བྷཝིསྶཏཱིཏི པཱདཔརིཙཱརིཀཱ བྷཝིསྶཏི། ཨནཡབྱསནནྟི མཧཱདུཀྑཾ། ཨཡོཏི སུཁཾ, ན ཨཡོ ཨནཡོ, དུཀྑཾ། ཏདེཏཾ སབྦསོ སུཁཾ བྱསཏི ཝིཀྑིཔཏཱིཏི བྱསནཾ། ཨིཏི ཨནཡོཝ བྱསནཾ ཨནཡབྱསནཾ, མཧཱདུཀྑནྟི ཨཏྠོ། ཨཡོནིསོཏི ཨནུཔཱཡེན། ཨཔཀྐཾ ན པརིཔཱཙེནྟཱིཏི ཨཔརིཎཏཾ ཨཁཱིཎཾ ཨཱཡུཾ ཨནྟརཱཝ ན ཨུཔཙྪིནྡནྟི། པརིཔཱཀཾ ཨཱགམེནྟཱིཏི ཨཱཡུཔརིཔཱཀཀཱལཾ ཨཱགམེནྟི། དྷམྨསེནཱཔཏིནཱཔེཏཾ ཝུཏྟཾ –
420.Upavijaññāti upagatavijāyanakālā, paripakkagabbhā na cirasseva vijāyissatīti attho. Opabhoggā bhavissatīti pādaparicārikā bhavissati. Anayabyasananti mahādukkhaṃ. Ayoti sukhaṃ, na ayo anayo, dukkhaṃ. Tadetaṃ sabbaso sukhaṃ byasati vikkhipatīti byasanaṃ. Iti anayova byasanaṃ anayabyasanaṃ, mahādukkhanti attho. Ayonisoti anupāyena. Apakkaṃ na paripācentīti apariṇataṃ akhīṇaṃ āyuṃ antarāva na upacchindanti. Paripākaṃ āgamentīti āyuparipākakālaṃ āgamenti. Dhammasenāpatināpetaṃ vuttaṃ –
‘‘ནཱབྷིནནྡཱམི མརཎཾ, ནཱབྷིནནྡཱམི ཛཱིཝིཏཾ།
‘‘Nābhinandāmi maraṇaṃ, nābhinandāmi jīvitaṃ;
ཀཱལཉྩ པཊིཀངྑཱམི, ནིབྦིསཾ བྷཏཀོ ཡཐཱཏི༎ (ཐེརགཱ॰ ༡༠༠༡)
Kālañca paṭikaṅkhāmi, nibbisaṃ bhatako yathāti. (theragā. 1001)
༤༢༡. ཨུབྦྷིནྡིཏྭཱཏི མཏྟིཀཱལེཔཾ བྷིནྡིཏྭཱ།
421.Ubbhinditvāti mattikālepaṃ bhinditvā.
༤༢༢. རཱམཎེཡྻཀནྟི རམཎཱིཡབྷཱཝཾ། ཝེལཱསིཀཱཏི ཁིཌྜཱཔརཱདྷིཀཱ། ཀོམཱརིཀཱཏི ཏརུཎདཱརིཀཱ། ཏུཡ྄ཧཾ ཛཱིཝནྟི སུཔིནདསྶནཀཱལེ ནིཀྑམནྟཾ ཝཱ པཝིསནྟཾ ཝཱ ཛཱིཝཾ ཨཔི ནུ པསྶནྟི། ཨིདྷ ཙིཏྟཱཙཱརཾ ‘‘ཛཱིཝ’’ནྟི གཧེཏྭཱ ཨཱཧ། སོ ཧི ཏཏྠ ཛཱིཝསཉྙཱིཏི།
422.Rāmaṇeyyakanti ramaṇīyabhāvaṃ. Velāsikāti khiḍḍāparādhikā. Komārikāti taruṇadārikā. Tuyhaṃ jīvanti supinadassanakāle nikkhamantaṃ vā pavisantaṃ vā jīvaṃ api nu passanti. Idha cittācāraṃ ‘‘jīva’’nti gahetvā āha. So hi tattha jīvasaññīti.
༤༢༣. ཛིཡཱཡཱཏི དྷནུཛིཡཱཡ, གཱིཝཾ ཝེཋེཏྭཱཏི ཨཏྠོ། པཏྠིནྣཏརོཏི ཐདྡྷཏརོ། ཨིམིནཱ ཀིཾ དསྶེཏི? ཏུམྷེ ཛཱིཝཀཱལེ སཏྟསྶ པཉྩཀྑནྡྷཱཏི ཝདནྟི, ཙཝནཀཱལེ པན རཱུཔཀྑནྡྷམཏྟམེཝ ཨཝསིསྶཏི, ཏཡོ ཁནྡྷཱ ཨཔྤཝཏྟཱ ཧོནྟི, ཝིཉྙཱཎཀྑནྡྷོ གཙྪཏི། ཨཝསིཊྛེན རཱུཔཀྑནྡྷེན ལཧུཏརེན བྷཝིཏབྦཾ, གརུཀཏརོ ཙ ཧོཏི། ཏསྨཱ ནཏྠི ཀོཙི ཀུཧིཾ གནྟཱཏི ཨིམམཏྠཾ དསྶེཏི།
423.Jiyāyāti dhanujiyāya, gīvaṃ veṭhetvāti attho. Patthinnataroti thaddhataro. Iminā kiṃ dasseti? Tumhe jīvakāle sattassa pañcakkhandhāti vadanti, cavanakāle pana rūpakkhandhamattameva avasissati, tayo khandhā appavattā honti, viññāṇakkhandho gacchati. Avasiṭṭhena rūpakkhandhena lahutarena bhavitabbaṃ, garukataro ca hoti. Tasmā natthi koci kuhiṃ gantāti imamatthaṃ dasseti.
༤༢༤. ནིབྦུཏནྟི ཝཱུཔསནྟཏེཛཾ།
424.Nibbutanti vūpasantatejaṃ.
༤༢༥. ཨནུཔཧཙྩཱཏི ཨཝིནཱསེཏྭཱ། ཨཱམཏོ ཧོཏཱིཏི ཨདྡྷམཏོ མརིཏུཾ ཨཱརདྡྷོ ཧོཏི། ཨོདྷུནཱཐཱཏི ཨོརཏོ ཀརོཐ། སནྡྷུནཱཐཱཏི པརཏོ ཀརོཐ། ནིདྡྷུནཱཐཱཏི ཨཔརཱཔརཾ ཀརོཐ། ཏཉྩཱཡཏནཾ ན པཊིསཾཝེདེཏཱིཏི ཏེན ཙཀྑུནཱ ཏཾ རཱུཔཱཡཏནཾ ན ཝིབྷཱཝེཏི། ཨེས ནཡོ སབྦཏྠ།
425.Anupahaccāti avināsetvā. Āmato hotīti addhamato marituṃ āraddho hoti. Odhunāthāti orato karotha. Sandhunāthāti parato karotha. Niddhunāthāti aparāparaṃ karotha. Tañcāyatanaṃ na paṭisaṃvedetīti tena cakkhunā taṃ rūpāyatanaṃ na vibhāveti. Esa nayo sabbattha.
༤༢༦. སངྑདྷམོཏི སངྑདྷམཀོ། ཨུཔལཱཔེཏྭཱཏི དྷམིཏྭཱ།
426.Saṅkhadhamoti saṅkhadhamako. Upalāpetvāti dhamitvā.
༤༢༨. ཨགྒིཀོཏི ཨགྒིཔརིཙཱརཀོ། ཨཱཔཱདེཡྻནྟི ནིཔྥཱདེཡྻཾ, ཨཱཡུཾ ཝཱ པཱཔུཎཱཔེཡྻཾ། པོསེཡྻནྟི བྷོཛནཱདཱིཧི བྷརེཡྻཾ། ཝཌྜྷེཡྻནྟི ཝཌྜྷིཾ གམེཡྻཾ། ཨརཎཱིསཧིཏནྟི ཨརཎཱིཡུགལ༹ཾ།
428.Aggikoti aggiparicārako. Āpādeyyanti nipphādeyyaṃ, āyuṃ vā pāpuṇāpeyyaṃ. Poseyyanti bhojanādīhi bhareyyaṃ. Vaḍḍheyyanti vaḍḍhiṃ gameyyaṃ. Araṇīsahitanti araṇīyugaḷaṃ.
༤༢༩. ཏིརོརཱཛཱནོཔཱིཏི ཏིརོརཊྛེ ཨཉྙསྨིམྤི ཛནཔདེ རཱཛཱནོ ཛཱནནྟི། ཨབྱཏྟོཏི ཨཝིསདོ ཨཚེཀོ། ཀོཔེནཔཱིཏི ཡེ མཾ ཨེཝཾ ཝཀྑནྟི, ཏེསུ ཨུཔྤཛྫནཀེན ཀོཔེནཔི ཨེཏཾ དིཊྛིགཏཾ ཧརིསྶཱམི པརིཧརིསྶཱམཱིཏི གཧེཏྭཱ ཝིཙརིསྶཱམི། མཀྑེནཱཏི ཏཡཱ ཝུཏྟཡུཏྟཀཱརཎམཀྑལཀྑཎེན མཀྑེནཱཔི། པལཱསེནཱཏི ཏཡཱ སདྡྷིཾ ཡུགགྒཱཧལཀྑཎེན པལཱསེནཱཔི།
429.Tirorājānopīti tiroraṭṭhe aññasmimpi janapade rājāno jānanti. Abyattoti avisado acheko. Kopenapīti ye maṃ evaṃ vakkhanti, tesu uppajjanakena kopenapi etaṃ diṭṭhigataṃ harissāmi pariharissāmīti gahetvā vicarissāmi. Makkhenāti tayā vuttayuttakāraṇamakkhalakkhaṇena makkhenāpi. Palāsenāti tayā saddhiṃ yugaggāhalakkhaṇena palāsenāpi.
༤༣༠. ཧརིཏཀཔཎྞནྟི ཡཾ ཀིཉྩི ཧརིཏཀཾ, ཨནྟམསོ ཨལླཏིཎཔཎྞམྤི ན ཧོཏཱིཏི ཨཏྠོ། སནྣདྡྷཀལཱཔནྟི སནྣདྡྷདྷནུཀལཱཔཾ། ཨཱསིཏྟོདཀཱནི ཝཊུམཱནཱིཏི པརིཔུཎྞསལིལཱ མགྒཱ ཙ ཀནྡརཱ ཙ། ཡོགྒཱནཱིཏི བལིབདྡེ།
430.Haritakapaṇṇanti yaṃ kiñci haritakaṃ, antamaso allatiṇapaṇṇampi na hotīti attho. Sannaddhakalāpanti sannaddhadhanukalāpaṃ. Āsittodakāni vaṭumānīti paripuṇṇasalilā maggā ca kandarā ca. Yoggānīti balibadde.
བཧུནིཀྑནྟརོཏི བཧུནིཀྑནྟོ ཙིརནིཀྑནྟོཏི ཨཏྠོ། ཡཐཱབྷཏེན བྷཎྜེནཱཏི ཡཾ ཝོ ཏིཎཀཊྛོདཀབྷཎྜཀཾ ཨཱརོཔིཏཾ, ཏེན ཡཐཱབྷཏེན ཡཐཱརོཔིཏེན, ཡཐཱགཧིཏེནཱཏི ཨཏྠོ།
Bahunikkhantaroti bahunikkhanto ciranikkhantoti attho. Yathābhatena bhaṇḍenāti yaṃ vo tiṇakaṭṭhodakabhaṇḍakaṃ āropitaṃ, tena yathābhatena yathāropitena, yathāgahitenāti attho.
ཨཔྤསཱརཱནཱིཏི ཨཔྤགྒྷཱནི། པཎིཡཱནཱིཏི བྷཎྜཱནི།
Appasārānīti appagghāni. Paṇiyānīti bhaṇḍāni.
གཱུཐབྷཱརིཀཱདིཨུཔམཱཝཎྞནཱ
Gūthabhārikādiupamāvaṇṇanā
༤༣༢. མམ ཙ སཱུཀརབྷཏྟནྟི མམ ཙ སཱུཀརཱནཾ ཨིདཾ བྷཏྟཾ། ཨུགྒྷརནྟནྟི ཨུཔརི གྷརནྟཾ། པགྒྷརནྟནྟི ཧེཊྛཱ པརིསྶཝནྟཾ། ཏུམྷེ ཁྭེཏྠ བྷཎེཏི ཏུམྷེ ཁོ ཨེཏྠ བྷཎེ། ཨཡམེཝ ཝཱ པཱཋོ། ཏཐཱ ཧི པན མེ སཱུཀརབྷཏྟནྟི ཏཐཱ ཧི པན མེ ཨཡཾ གཱུཐོ སཱུཀརཱནཾ བྷཏྟཾ།
432.Mamaca sūkarabhattanti mama ca sūkarānaṃ idaṃ bhattaṃ. Uggharantanti upari gharantaṃ. Paggharantanti heṭṭhā parissavantaṃ. Tumhe khvettha bhaṇeti tumhe kho ettha bhaṇe. Ayameva vā pāṭho. Tathā hi pana me sūkarabhattanti tathā hi pana me ayaṃ gūtho sūkarānaṃ bhattaṃ.
༤༣༤. ཨཱགཏཱགཏཾ ཀལིཾ གིལཏཱིཏི ཨཱགཏཱགཏཾ པརཱཛཡགུལ༹ཾ གིལཏི། པཛྫོཧིསྶཱམཱིཏི པཛྫོཧནཾ ཀརིསྶཱམི, བལིཀམྨཾ ཀརིསྶཱམཱིཏི ཨཏྠོ། ཨཀྑེཧི དིབྦིསྶཱམཱཏི གུལེ༹ཧི ཀཱིལི༹སྶཱམ། ལིཏྟཾ པརམེན ཏེཛསཱཏི པརམཏེཛེན ཝིསེན ལིཏྟཾ།
434.Āgatāgataṃ kaliṃ gilatīti āgatāgataṃ parājayaguḷaṃ gilati. Pajjohissāmīti pajjohanaṃ karissāmi, balikammaṃ karissāmīti attho. Akkhehi dibbissāmāti guḷehi kīḷissāma. Littaṃ paramena tejasāti paramatejena visena littaṃ.
༤༣༦. གཱམཔཊྚནྟི ཝུཊྛིཏགཱམཔདེསོ ཝུཙྩཏི། ‘‘གཱམཔད’’ནྟིཔི པཱཋོ, ཨཡམེཝཏྠོ། སཱཎབྷཱརནྟི སཱཎཝཱཀབྷཱརཾ། སུསནྣདྡྷོཏི སུབདྡྷོ། ཏྭཾ པཛཱནཱཧཱིཏི ཏྭཾ ཛཱན། སཙེ གཎྷིཏུཀཱམོསི, གཎྷཱཧཱིཏི ཝུཏྟཾ ཧོཏི།
436.Gāmapaṭṭanti vuṭṭhitagāmapadeso vuccati. ‘‘Gāmapada’’ntipi pāṭho, ayamevattho. Sāṇabhāranti sāṇavākabhāraṃ. Susannaddhoti subaddho. Tvaṃ pajānāhīti tvaṃ jāna. Sace gaṇhitukāmosi, gaṇhāhīti vuttaṃ hoti.
ཁོམནྟི ཁོམཝཱཀཾ། ཨཡནྟི ཀཱལ༹ལོཧཾ། ལོཧནྟི ཏམྦལོཧཾ། སཛ྄ཛྷནྟི རཛཏཾ། སུཝཎྞནྟི སུཝཎྞམཱསཀཾ། ཨབྷིནནྡིཾསཱུཏི ཏུསྶིཾསུ།
Khomanti khomavākaṃ. Ayanti kāḷalohaṃ. Lohanti tambalohaṃ. Sajjhanti rajataṃ. Suvaṇṇanti suvaṇṇamāsakaṃ. Abhinandiṃsūti tussiṃsu.
༤༣༧. ཨཏྟམནོཏི སཀམནོ ཏུཊྛཙིཏྟོ། ཨབྷིརདྡྷོཏི ཨབྷིཔྤསནྣོ། པཉྷཱཔཊིབྷཱནཱནཱིཏི པཉྷུཔཊྛཱནཱནི། པཙྩནཱིཀཾ ཀཏྟབྦནྟི པཙྩནཱིཀཾ པཊིཝིརུདྡྷཾ ཝིཡ ཀཏྟབྦཾ ཨམཉྙིསྶཾ, པཊིལོམགཱཧཾ གཧེཏྭཱ ཨཊྛཱསིནྟི ཨཏྠོ།
437.Attamanoti sakamano tuṭṭhacitto. Abhiraddhoti abhippasanno. Pañhāpaṭibhānānīti pañhupaṭṭhānāni. Paccanīkaṃ kattabbanti paccanīkaṃ paṭiviruddhaṃ viya kattabbaṃ amaññissaṃ, paṭilomagāhaṃ gahetvā aṭṭhāsinti attho.
༤༣༨. སངྒྷཱཏཾ ཨཱཔཛྫནྟཱིཏི སངྒྷཱཏཾ ཝིནཱསཾ མརཎཾ ཨཱཔཛྫནྟི། ན མཧཔྥལོཏི ཝིཔཱཀཕལེན ན མཧཔྥལོ ཧོཏི། ན མཧཱནིསཾསོཏི གུཎཱནིསཾསེན མཧཱནིསཾསོ ན ཧོཏི། ན མཧཱཛུཏིཀོཏི ཨཱནུབྷཱཝཛུཏིཡཱ མཧཱཛུཏིཀོ ན ཧོཏི། ན མཧཱཝིཔྥཱརོཏི ཝིཔཱཀཝིཔྥཱརཏཱཡ མཧཱཝིཔྥཱརོ ན ཧོཏི། བཱིཛནངྒལནྟི བཱིཛཉྩ ནངྒལཉྩ། དུཀྑེཏྟེཏི དུཊྛུཁེཏྟེ ནིསྶཱརཁེཏྟེ། དུབྦྷཱུམེཏི ཝིསམབྷཱུམིབྷཱགེ། པཏིཊྛཱཔེཡྻཱཏི ཋཔེཡྻ། ཁཎྜཱནཱིཏི ཚིནྣབྷིནྣཱནི། པཱུཏཱིནཱིཏི ནིསྶཱརཱནི། ཝཱཏཱཏཔཧཏཱནཱིཏི ཝཱཏེན ཙ ཨཱཏཔེན ཙ ཧཏཱནི པརིཡཱདིནྣཏེཛཱནི། ཨསཱརཱདཱནཱིཏི ཏཎྜུལསཱརཱདཱནརཧིཏཱནི པལཱལཱནི། ཨསུཁསཡིཏཱནཱིཏི ཡཱནི སུཀྑཱཔེཏྭཱ ཀོཊྛེ ཨཱཀིརིཏྭཱ ཋཔིཏཱནི, ཏཱནི སུཁསཡིཏཱནི ནཱམ། ཨེཏཱནི པན ན ཏཱདིསཱནི། ཨནུཔྤཝེཙྪེཡྻཱཏི ཨནུཔཝེསེཡྻ, ན སམྨཱ ཝསྶེཡྻ, ཨནྭདྡྷམཱསཾ ཨནུདསཱཧཾ ཨནུཔཉྩཱཧཾ ན ཝསྶེཡྻཱཏི ཨཏྠོ། ཨཔི ནུ ཏཱནཱིཏི ཨཔི ནུ ཨེཝཾ ཁེཏྟབཱིཛཝུཊྛིདོསེ སཏི ཏཱནི བཱིཛཱནི ཨངྐུརམཱུལཔཏྟཱདཱིཧི ཨུདྡྷཾ ཝུདྡྷིཾ ཧེཊྛཱ ཝིརཱུལ༹ྷིཾ སམནྟཏོ ཙ ཝེཔུལླཾ ཨཱཔཛྫེཡྻུནྟི ། ཨེཝརཱུཔོ ཁོ རཱཛཉྙ ཡཉྙོཏི ཨེཝརཱུཔཾ རཱཛཉྙ དཱནཾ པརཱུཔགྷཱཏེན ཨུཔྤཱདིཏཔཙྩཡཏོཔི དཱཡཀཏོཔི པརིགྒཱཧཀཏོཔི ཨཝིསུདྡྷཏྟཱ ན མཧཔྥལཾ ཧོཏི།
438.Saṅghātaṃ āpajjantīti saṅghātaṃ vināsaṃ maraṇaṃ āpajjanti. Na mahapphaloti vipākaphalena na mahapphalo hoti. Na mahānisaṃsoti guṇānisaṃsena mahānisaṃso na hoti. Na mahājutikoti ānubhāvajutiyā mahājutiko na hoti. Na mahāvipphāroti vipākavipphāratāya mahāvipphāro na hoti. Bījanaṅgalanti bījañca naṅgalañca. Dukkhetteti duṭṭhukhette nissārakhette. Dubbhūmeti visamabhūmibhāge. Patiṭṭhāpeyyāti ṭhapeyya. Khaṇḍānīti chinnabhinnāni. Pūtīnīti nissārāni. Vātātapahatānīti vātena ca ātapena ca hatāni pariyādinnatejāni. Asārādānīti taṇḍulasārādānarahitāni palālāni. Asukhasayitānīti yāni sukkhāpetvā koṭṭhe ākiritvā ṭhapitāni, tāni sukhasayitāni nāma. Etāni pana na tādisāni. Anuppaveccheyyāti anupaveseyya, na sammā vasseyya, anvaddhamāsaṃ anudasāhaṃ anupañcāhaṃ na vasseyyāti attho. Api nu tānīti api nu evaṃ khettabījavuṭṭhidose sati tāni bījāni aṅkuramūlapattādīhi uddhaṃ vuddhiṃ heṭṭhā virūḷhiṃ samantato ca vepullaṃ āpajjeyyunti . Evarūpo kho rājañña yaññoti evarūpaṃ rājañña dānaṃ parūpaghātena uppāditapaccayatopi dāyakatopi pariggāhakatopi avisuddhattā na mahapphalaṃ hoti.
ཨེཝརཱུཔོ ཁོ རཱཛཉྙ ཡཉྙོཏི ཨེཝརཱུཔཾ རཱཛཉྙདཱནཾ ཨཔརཱུཔགྷཱཏེན ཨུཔྤནྣཔཙྩཡཏོཔི ཨཔརཱུཔགྷཱཏིཏཱཡ སཱིལཝནྟདཱཡཀཏོཔི སམྨཱདིཊྛིཨཱདིགུཎསམྤནྣཔཊིགྒཱཧཀཏོཔི མཧཔྥལཾ ཧོཏི། སཙེ པན གུཎཱཏིརེཀཾ ནིརོདྷཱ ཝུཊྛིཏཾ པཊིགྒཱཧཀཾ ལབྷཏི, ཙེཏནཱ ཙ ཝིཔུལཱ ཧོཏི, དིཊྛེཝ དྷམྨེ ཝིཔཱཀཾ དེཏཱིཏི།
Evarūpo kho rājañña yaññoti evarūpaṃ rājaññadānaṃ aparūpaghātena uppannapaccayatopi aparūpaghātitāya sīlavantadāyakatopi sammādiṭṭhiādiguṇasampannapaṭiggāhakatopi mahapphalaṃ hoti. Sace pana guṇātirekaṃ nirodhā vuṭṭhitaṃ paṭiggāhakaṃ labhati, cetanā ca vipulā hoti, diṭṭheva dhamme vipākaṃ detīti.
༤༣༩. ཨིམཾ པན ཐེརསྶ དྷམྨཀཐཾ སུཏྭཱ པཱཡཱསིརཱཛཉྙོ ཐེརཾ ནིམནྟེཏྭཱ སཏྟཱཧཾ ཐེརསྶ མཧཱདཱནཾ དཏྭཱ ཏཏོ པཊྛཱཡ མཧཱཛནསྶ དཱནཾ པཊྛཔེསི། ཏཾ སནྡྷཱཡ ཨཐ ཁོ པཱཡཱསི རཱཛཉྙོཏིཨཱདི ཝུཏྟཾ། ཏཏྠ ཀཎཱཛཀནྟི སཀུཎྜཀཾ ཨུཏྟཎྜུལབྷཏྟཾ། བིལངྒདུཏིཡནྟི ཀཉྫིཀདུཏིཡཾ། དྷོརཀཱནི ཙ ཝཏྠཱནཱིཏི ཐཱུལཱནི ཙ ཝཏྠཱནི། གུལ༹ཝཱལཀཱནཱིཏི གུལ༹དསཱནི, པུཉྫཔུཉྫཝསེན ཋིཏམཧནྟདསཱནཱིཏི ཨཏྠོ། ཨེཝཾ ཨནུདྡིསཏཱིཏི ཨེཝཾ ཨུཔདིསཏི། པཱདཱཔཱིཏི པཱདེནཔི།
439. Imaṃ pana therassa dhammakathaṃ sutvā pāyāsirājañño theraṃ nimantetvā sattāhaṃ therassa mahādānaṃ datvā tato paṭṭhāya mahājanassa dānaṃ paṭṭhapesi. Taṃ sandhāya atha kho pāyāsi rājaññotiādi vuttaṃ. Tattha kaṇājakanti sakuṇḍakaṃ uttaṇḍulabhattaṃ. Bilaṅgadutiyanti kañjikadutiyaṃ. Dhorakāni ca vatthānīti thūlāni ca vatthāni. Guḷavālakānīti guḷadasāni, puñjapuñjavasena ṭhitamahantadasānīti attho. Evaṃ anuddisatīti evaṃ upadisati. Pādāpīti pādenapi.
༤༤༠. ཨསཀྐཙྩནྟི སདྡྷཱཝིརཧིཏཾ ཨསྶདྡྷདཱནཾ། ཨསཧཏྠཱཏི ན སཧཏྠེན། ཨཙིཏྟཱིཀཏནྟི ཙིཏྟཱིཀཱརཝིརཧིཏཾ, ན ཙིཏྟཱིཀཱརམྤི པཙྩུཔཊྛཱཔེཏྭཱ ན པཎཱིཏཙིཏྟཾ ཀཏྭཱ ཨདཱསི། ཨཔཝིདྡྷནྟི ཚཌྜིཏཾ ཝིཔྤཏིཏཾ། སུཉྙཾ སེརཱིསཀནྟི སེརཱིསཀཾ ནཱམ ཨེཀཾ ཏུཙྪཾ རཛཏཝིམཱནཾ ཨུཔགཏོ། ཏསྶ ཀིར དྭཱརེ མཧཱསིརཱིསརུཀྑོ, ཏེན ཏཾ ‘‘སེརཱིསཀ’’ནྟི ཝུཙྩཏི།
440.Asakkaccanti saddhāvirahitaṃ assaddhadānaṃ. Asahatthāti na sahatthena. Acittīkatanti cittīkāravirahitaṃ, na cittīkārampi paccupaṭṭhāpetvā na paṇītacittaṃ katvā adāsi. Apaviddhanti chaḍḍitaṃ vippatitaṃ. Suññaṃ serīsakanti serīsakaṃ nāma ekaṃ tucchaṃ rajatavimānaṃ upagato. Tassa kira dvāre mahāsirīsarukkho, tena taṃ ‘‘serīsaka’’nti vuccati.
༤༤༡. ཨཱཡསྨཱ གཝཾཔཏཱིཏི ཐེརོ ཀིར པུབྦེ མནུསྶཀཱལེ གོཔཱལདཱརཀཱནཾ ཛེཊྛཀོ ཧུཏྭཱ མཧཏོ སིརཱིསསྶ མཱུལཾ སོདྷེཏྭཱ ཝཱལིཀཾ ཨོཀིརིཏྭཱ ཨེཀཾ པིཎྜཔཱཏིཀཏྠེརཾ རུཀྑམཱུལེ ནིསཱིདཱཔེཏྭཱ ཨཏྟནཱ ལདྡྷཾ ཨཱཧཱརཾ དཏྭཱ ཏཏོ ཙུཏོ ཏསྶཱནུབྷཱཝེན ཏསྨིཾ རཛཏཝིམཱནེ ནིབྦཏྟི། སིརཱིསརུཀྑོ ཝིམཱནདྭཱརེ ཨཊྛཱསི། སོ པཉྙཱསཱཡ ཝསྶེཧི ཕལཏི, ཏཏོ པཉྙཱས ཝསྶཱནི གཏཱནཱིཏི དེཝཔུཏྟོ སཾཝེགཾ ཨཱཔཛྫཏི། སོ ཨཔརེན སམཡེན ཨམྷཱཀཾ བྷགཝཏོ ཀཱལེ མནུསྶེསུ ནིབྦཏྟིཏྭཱ སཏྠུ དྷམྨཀཐཾ སུཏྭཱ ཨརཧཏྟཾ པཏྟོ། པུབྦཱཙིཎྞཝསེན པན དིཝཱཝིཧཱརཏྠཱཡ ཏདེཝ ཝིམཱནཾ ཨབྷིཎྷཾ གཙྪཏི, ཏཾ ཀིརསྶ ཨུཏུསུཁཾ ཧོཏི། ཏཾ སནྡྷཱཡ ‘‘ཏེན ཁོ པན སམཡེན ཨཱཡསྨཱ གཝཾཔཏཱི’’ཏིཨཱདི ཝུཏྟཾ།
441.Āyasmāgavaṃpatīti thero kira pubbe manussakāle gopāladārakānaṃ jeṭṭhako hutvā mahato sirīsassa mūlaṃ sodhetvā vālikaṃ okiritvā ekaṃ piṇḍapātikattheraṃ rukkhamūle nisīdāpetvā attanā laddhaṃ āhāraṃ datvā tato cuto tassānubhāvena tasmiṃ rajatavimāne nibbatti. Sirīsarukkho vimānadvāre aṭṭhāsi. So paññāsāya vassehi phalati, tato paññāsa vassāni gatānīti devaputto saṃvegaṃ āpajjati. So aparena samayena amhākaṃ bhagavato kāle manussesu nibbattitvā satthu dhammakathaṃ sutvā arahattaṃ patto. Pubbāciṇṇavasena pana divāvihāratthāya tadeva vimānaṃ abhiṇhaṃ gacchati, taṃ kirassa utusukhaṃ hoti. Taṃ sandhāya ‘‘tena kho pana samayena āyasmā gavaṃpatī’’tiādi vuttaṃ.
སོ སཀྐཙྩཾ དཱནཾ དཏྭཱཏི སོ པརསྶ སནྟཀམྤི དཱནཾ སཀྐཙྩཾ དཏྭཱ། ཨེཝམཱརོཙེསཱིཏི ‘‘སཀྐཙྩཾ དཱནཾ དེཐཱ’’ཏིཨཱདིནཱ ནཡེན ཨཱརོཙེསི། ཏཉྩ པན ཐེརསྶ ཨཱརོཙནཾ སུཏྭཱ མཧཱཛནོ སཀྐཙྩཾ དཱནཾ དཏྭཱ དེཝལོཀེ ནིབྦཏྟོ། པཱཡཱསིསྶ པན རཱཛཉྙསྶ པརིཙཱརཀཱ སཀྐཙྩཾ དཱནཾ དཏྭཱཔི ནིཀནྟིཝསེན གནྟྭཱ ཏསྶེཝ སནྟིཀེ ནིབྦཏྟཱ། ཏཾ ཀིར དིསཱཙཱརིཀཝིམཱནཾ ཝཊྚནིཨཊཝིཡཾ ཨཧོསི། པཱཡཱསིདེཝཔུཏྟོ ཙ ཨེཀདིཝསཾ ཝཱཎིཛཀཱནཾ དསྶེཏྭཱ ཨཏྟནོ ཀཏཀམྨཾ ཀཐེསཱིཏི།
Sosakkaccaṃ dānaṃ datvāti so parassa santakampi dānaṃ sakkaccaṃ datvā. Evamārocesīti ‘‘sakkaccaṃ dānaṃ dethā’’tiādinā nayena ārocesi. Tañca pana therassa ārocanaṃ sutvā mahājano sakkaccaṃ dānaṃ datvā devaloke nibbatto. Pāyāsissa pana rājaññassa paricārakā sakkaccaṃ dānaṃ datvāpi nikantivasena gantvā tasseva santike nibbattā. Taṃ kira disācārikavimānaṃ vaṭṭaniaṭaviyaṃ ahosi. Pāyāsidevaputto ca ekadivasaṃ vāṇijakānaṃ dassetvā attano katakammaṃ kathesīti.
ཨིཏི སུམངྒལཝིལཱསིནིཡཱ དཱིགྷནིཀཱཡཊྛཀཐཱཡཾ
Iti sumaṅgalavilāsiniyā dīghanikāyaṭṭhakathāyaṃ
པཱཡཱསིརཱཛཉྙསུཏྟཝཎྞནཱ ནིཊྛིཏཱ།
Pāyāsirājaññasuttavaṇṇanā niṭṭhitā.
ནིཊྛིཏཱ ཙ མཧཱཝགྒསྶཏྠཝཎྞནཱ།
Niṭṭhitā ca mahāvaggassatthavaṇṇanā.
མཧཱཝགྒཊྛཀཐཱ ནིཊྛིཏཱ།
Mahāvaggaṭṭhakathā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༡༠. པཱཡཱསིསུཏྟཾ • 10. Pāyāsisuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / དཱིགྷནིཀཱཡ (ཊཱིཀཱ) • Dīghanikāya (ṭīkā) / ༡༠. པཱཡཱསིརཱཛཉྙསུཏྟཝཎྞནཱ • 10. Pāyāsirājaññasuttavaṇṇanā
