| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၃. ပေဏာဟိကင္ဂပဉ္ဟော
3. Peṇāhikaṅgapañho
၃. ‘‘ဘန္တေ နာဂသေန, ‘ပေဏာဟိကာယ ဒ္ဝေ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒ္ဝေ အင္ဂာနိ ဂဟေတဗ္ဗာနီ’’တိ? ‘‘ယထာ, မဟာရာဇ, ပေဏာဟိကာ သကပတိမ္ဟိ ဥသူယာယ ဆာပကေ န ပောသယတိ, ဧဝမေဝ ခော, မဟာရာဇ, ယောဂိနာ ယောဂာဝစရေန သကမနေ 1 ကိလေသေ ဥပ္ပန္နေ ဥသူယာယိတဗ္ဗံ, သတိပဋ္ဌာနေန သမ္မာသံဝရသုသိရေ ပက္ခိပိတ္ဝာ မနောဒ္ဝာရေ ကာယဂတာသတိ ဘာဝေတဗ္ဗာ။ ဣဒံ, မဟာရာဇ, ပေဏာဟိကာယ ပဌမံ အင္ဂံ ဂဟေတဗ္ဗံ။
3. ‘‘Bhante nāgasena, ‘peṇāhikāya dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, peṇāhikā sakapatimhi usūyāya chāpake na posayati, evameva kho, mahārāja, yoginā yogāvacarena sakamane 2 kilese uppanne usūyāyitabbaṃ, satipaṭṭhānena sammāsaṃvarasusire pakkhipitvā manodvāre kāyagatāsati bhāvetabbā. Idaṃ, mahārāja, peṇāhikāya paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, ပေဏာဟိကာ ပဝနေ ဒိဝသံ ဂောစရံ စရိတ္ဝာ သာယံ ပက္ခိဂဏံ ဥပေတိ အတ္တနော ဂုတ္တိယာ, ဧဝမေဝ ခော, မဟာရာဇ, ယောဂိနာ ယောဂာဝစရေန ဧကကေန ပဝိဝေကံ သေဝိတဗ္ဗံ သံယောဇနပရိမုတ္တိယာ, တတ္ရ ရတိံ အလဘမာနေန ဥပဝာဒဘယပရိရက္ခဏာယ သင္ဃံ ဩသရိတ္ဝာ သင္ဃရက္ခိတေန ဝသိတဗ္ဗံ။ ဣဒံ, မဟာရာဇ, ပေဏာဟိကာယ ဒုတိယံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဗ္ရဟ္မုနာ သဟမ္ပတိနာ ဘဂဝတော သန္တိကေ –
‘‘Puna caparaṃ, mahārāja, peṇāhikā pavane divasaṃ gocaraṃ caritvā sāyaṃ pakkhigaṇaṃ upeti attano guttiyā, evameva kho, mahārāja, yoginā yogāvacarena ekakena pavivekaṃ sevitabbaṃ saṃyojanaparimuttiyā, tatra ratiṃ alabhamānena upavādabhayaparirakkhaṇāya saṅghaṃ osaritvā saṅgharakkhitena vasitabbaṃ. Idaṃ, mahārāja, peṇāhikāya dutiyaṃ aṅgaṃ gahetabbaṃ. Bhāsitampetaṃ, mahārāja, brahmunā sahampatinā bhagavato santike –
‘‘‘သေဝေထ ပန္တာနိ သေနာသနာနိ၊ စရေယ္ယ သံယောဇနဝိပ္ပမောက္ခာ။
‘‘‘Sevetha pantāni senāsanāni, careyya saṃyojanavippamokkhā;
သစေ ရတိံ နာဓိဂစ္ဆေယ္ယ တတ္ထ၊ သင္ဃေ ဝသေ ရက္ခိတတ္တော သတီမာ’’’တိ။
Sace ratiṃ nādhigaccheyya tattha, saṅghe vase rakkhitatto satīmā’’’ti.
ပေဏာဟိကင္ဂပဉ္ဟော တတိယော။
Peṇāhikaṅgapañho tatiyo.
Footnotes:
