| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
3. පෙණාහිකඞ්‌ගපඤ්‌හො
3. Peṇāhikaṅgapañho
3. ‘‘භන්‌තෙ නාගසෙන, ‘පෙණාහිකාය ද්‌වෙ අඞ්‌ගානි ගහෙතබ්‌බානී’ති යං වදෙසි, කතමානි තානි ද්‌වෙ අඞ්‌ගානි ගහෙතබ්‌බානී’’ති? ‘‘යථා, මහාරාජ, පෙණාහිකා සකපතිම්‌හි උසූයාය ඡාපකෙ න පොසයති, එවමෙව ඛො, මහාරාජ, යොගිනා යොගාවචරෙන සකමනෙ 1 කිලෙසෙ උප්‌පන්‌නෙ උසූයායිතබ්‌බං, සතිපට්‌ඨානෙන සම්‌මාසංවරසුසිරෙ පක්‌ඛිපිත්‌වා මනොද්‌වාරෙ කායගතාසති භාවෙතබ්‌බා. ඉදං, මහාරාජ, පෙණාහිකාය පඨමං අඞ්‌ගං ගහෙතබ්‌බං.
3. ‘‘Bhante nāgasena, ‘peṇāhikāya dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, peṇāhikā sakapatimhi usūyāya chāpake na posayati, evameva kho, mahārāja, yoginā yogāvacarena sakamane 2 kilese uppanne usūyāyitabbaṃ, satipaṭṭhānena sammāsaṃvarasusire pakkhipitvā manodvāre kāyagatāsati bhāvetabbā. Idaṃ, mahārāja, peṇāhikāya paṭhamaṃ aṅgaṃ gahetabbaṃ.
‘‘පුන චපරං, මහාරාජ, පෙණාහිකා පවනෙ දිවසං ගොචරං චරිත්‌වා සායං පක්‌ඛිගණං උපෙති අත්‌තනො ගුත්‌තියා, එවමෙව ඛො, මහාරාජ, යොගිනා යොගාවචරෙන එකකෙන පවිවෙකං සෙවිතබ්‌බං සංයොජනපරිමුත්‌තියා, තත්‍ර රතිං අලභමානෙන උපවාදභයපරිරක්‌ඛණාය සඞ්‌ඝං ඔසරිත්‌වා සඞ්‌ඝරක්‌ඛිතෙන වසිතබ්‌බං. ඉදං, මහාරාජ, පෙණාහිකාය දුතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, බ්‍රහ්‌මුනා සහම්‌පතිනා භගවතො සන්‌තිකෙ –
‘‘Puna caparaṃ, mahārāja, peṇāhikā pavane divasaṃ gocaraṃ caritvā sāyaṃ pakkhigaṇaṃ upeti attano guttiyā, evameva kho, mahārāja, yoginā yogāvacarena ekakena pavivekaṃ sevitabbaṃ saṃyojanaparimuttiyā, tatra ratiṃ alabhamānena upavādabhayaparirakkhaṇāya saṅghaṃ osaritvā saṅgharakkhitena vasitabbaṃ. Idaṃ, mahārāja, peṇāhikāya dutiyaṃ aṅgaṃ gahetabbaṃ. Bhāsitampetaṃ, mahārāja, brahmunā sahampatinā bhagavato santike –
‘‘‘සෙවෙථ පන්‌තානි සෙනාසනානි, චරෙය්‍ය සංයොජනවිප්‌පමොක්‌ඛා;
‘‘‘Sevetha pantāni senāsanāni, careyya saṃyojanavippamokkhā;
සචෙ රතිං නාධිගච්‌ඡෙය්‍ය තත්‌ථ, සඞ්‌ඝෙ වසෙ රක්‌ඛිතත්‌තො සතීමා’’’ති.
Sace ratiṃ nādhigaccheyya tattha, saṅghe vase rakkhitatto satīmā’’’ti.
පෙණාහිකඞ්‌ගපඤ්‌හො තතියො.
Peṇāhikaṅgapañho tatiyo.
Footnotes:
