| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༣. པེཎཱཧིཀངྒཔཉྷོ
3. Peṇāhikaṅgapañho
༣. ‘‘བྷནྟེ ནཱགསེན, ‘པེཎཱཧིཀཱཡ དྭེ ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི དྭེ ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, པེཎཱཧིཀཱ སཀཔཏིམྷི ཨུསཱུཡཱཡ ཚཱཔཀེ ན པོསཡཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སཀམནེ 1 ཀིལེསེ ཨུཔྤནྣེ ཨུསཱུཡཱཡིཏབྦཾ, སཏིཔཊྛཱནེན སམྨཱསཾཝརསུསིརེ པཀྑིཔིཏྭཱ མནོདྭཱརེ ཀཱཡགཏཱསཏི བྷཱཝེཏབྦཱ། ཨིདཾ, མཧཱརཱཛ, པེཎཱཧིཀཱཡ པཋམཾ ཨངྒཾ གཧེཏབྦཾ།
3. ‘‘Bhante nāgasena, ‘peṇāhikāya dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, peṇāhikā sakapatimhi usūyāya chāpake na posayati, evameva kho, mahārāja, yoginā yogāvacarena sakamane 2 kilese uppanne usūyāyitabbaṃ, satipaṭṭhānena sammāsaṃvarasusire pakkhipitvā manodvāre kāyagatāsati bhāvetabbā. Idaṃ, mahārāja, peṇāhikāya paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, པེཎཱཧིཀཱ པཝནེ དིཝསཾ གོཙརཾ ཙརིཏྭཱ སཱཡཾ པཀྑིགཎཾ ཨུཔེཏི ཨཏྟནོ གུཏྟིཡཱ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨེཀཀེན པཝིཝེཀཾ སེཝིཏབྦཾ སཾཡོཛནཔརིམུཏྟིཡཱ, ཏཏྲ རཏིཾ ཨལབྷམཱནེན ཨུཔཝཱདབྷཡཔརིརཀྑཎཱཡ སངྒྷཾ ཨོསརིཏྭཱ སངྒྷརཀྑིཏེན ཝསིཏབྦཾ། ཨིདཾ, མཧཱརཱཛ, པེཎཱཧིཀཱཡ དུཏིཡཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, བྲཧྨུནཱ སཧམྤཏིནཱ བྷགཝཏོ སནྟིཀེ –
‘‘Puna caparaṃ, mahārāja, peṇāhikā pavane divasaṃ gocaraṃ caritvā sāyaṃ pakkhigaṇaṃ upeti attano guttiyā, evameva kho, mahārāja, yoginā yogāvacarena ekakena pavivekaṃ sevitabbaṃ saṃyojanaparimuttiyā, tatra ratiṃ alabhamānena upavādabhayaparirakkhaṇāya saṅghaṃ osaritvā saṅgharakkhitena vasitabbaṃ. Idaṃ, mahārāja, peṇāhikāya dutiyaṃ aṅgaṃ gahetabbaṃ. Bhāsitampetaṃ, mahārāja, brahmunā sahampatinā bhagavato santike –
‘‘‘སེཝེཐ པནྟཱནི སེནཱསནཱནི, ཙརེཡྻ སཾཡོཛནཝིཔྤམོཀྑཱ།
‘‘‘Sevetha pantāni senāsanāni, careyya saṃyojanavippamokkhā;
སཙེ རཏིཾ ནཱདྷིགཙྪེཡྻ ཏཏྠ, སངྒྷེ ཝསེ རཀྑིཏཏྟོ སཏཱིམཱ’’’ཏི༎
Sace ratiṃ nādhigaccheyya tattha, saṅghe vase rakkhitatto satīmā’’’ti.
པེཎཱཧིཀངྒཔཉྷོ ཏཏིཡོ།
Peṇāhikaṅgapañho tatiyo.
Footnotes:
