| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៣. បេសលសុត្តំ
3. Pesalasuttaṃ
២១១. ឯកំ សមយំ អាយស្មា វង្គីសោ អាឡវិយំ វិហរតិ អគ្គាឡវេ ចេតិយេ អាយស្មតា និគ្រោធកប្បេន ឧបជ្ឈាយេន សទ្ធិំ។ តេន ខោ បន សមយេន អាយស្មា វង្គីសោ អត្តនោ បដិភានេន អញ្ញេ បេសលេ ភិក្ខូ អតិមញ្ញតិ។ អថ ខោ អាយស្មតោ វង្គីសស្ស ឯតទហោសិ – ‘‘អលាភា វត មេ, ន វត មេ លាភា; ទុល្លទ្ធំ វត មេ, ន វត មេ សុលទ្ធំ; យ្វាហំ អត្តនោ បដិភានេន អញ្ញេ បេសលេ ភិក្ខូ អតិមញ្ញាមី’’តិ។ អថ ខោ អាយស្មា វង្គីសោ អត្តនាវ អត្តនោ វិប្បដិសារំ ឧប្បាទេត្វា តាយំ វេលាយំ ឥមា គាថាយោ អភាសិ –
211. Ekaṃ samayaṃ āyasmā vaṅgīso āḷaviyaṃ viharati aggāḷave cetiye āyasmatā nigrodhakappena upajjhāyena saddhiṃ. Tena kho pana samayena āyasmā vaṅgīso attano paṭibhānena aññe pesale bhikkhū atimaññati. Atha kho āyasmato vaṅgīsassa etadahosi – ‘‘alābhā vata me, na vata me lābhā; dulladdhaṃ vata me, na vata me suladdhaṃ; yvāhaṃ attano paṭibhānena aññe pesale bhikkhū atimaññāmī’’ti. Atha kho āyasmā vaṅgīso attanāva attano vippaṭisāraṃ uppādetvā tāyaṃ velāyaṃ imā gāthāyo abhāsi –
‘‘មានំ បជហស្សុ គោតម, មានបថញ្ច បជហស្សុ;
‘‘Mānaṃ pajahassu gotama, mānapathañca pajahassu;
អសេសំ មានបថស្មិំ, សមុច្ឆិតោ វិប្បដិសារីហុវា ចិររត្តំ។
Asesaṃ mānapathasmiṃ, samucchito vippaṭisārīhuvā cirarattaṃ.
‘‘មក្ខេន មក្ខិតា បជា, មានហតា និរយំ បបតន្តិ;
‘‘Makkhena makkhitā pajā, mānahatā nirayaṃ papatanti;
សោចន្តិ ជនា ចិររត្តំ, មានហតា និរយំ ឧបបន្នា។
Socanti janā cirarattaṃ, mānahatā nirayaṃ upapannā.
‘‘ន ហិ សោចតិ ភិក្ខុ កទាចិ, មគ្គជិនោ សម្មាបដិបន្នោ;
‘‘Na hi socati bhikkhu kadāci, maggajino sammāpaṭipanno;
កិត្តិញ្ច សុខញ្ច អនុភោតិ, ធម្មទសោតិ តមាហុ បហិតត្តំ។
Kittiñca sukhañca anubhoti, dhammadasoti tamāhu pahitattaṃ.
‘‘តស្មា អខិលោធ បធានវា, នីវរណានិ បហាយ វិសុទ្ធោ;
‘‘Tasmā akhilodha padhānavā, nīvaraṇāni pahāya visuddho;
មានញ្ច បហាយ អសេសំ, វិជ្ជាយន្តករោ សមិតាវី’’តិ។
Mānañca pahāya asesaṃ, vijjāyantakaro samitāvī’’ti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៣. បេសលសុត្តវណ្ណនា • 3. Pesalasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៣. បេសលសុត្តវណ្ណនា • 3. Pesalasuttavaṇṇanā
