| Library / Tipiṭaka / ติปิฎก • Tipiṭaka / สํยุตฺตนิกาย (อฎฺฐกถา) • Saṃyuttanikāya (aṭṭhakathā) |
๓. เปสลสุตฺตวณฺณนา
3. Pesalasuttavaṇṇanā
๒๑๑. ตติเย อติมญฺญตีติ ‘‘กิํ อิเม มหลฺลกา? น เอเตสํ ปาฬิ, น อฎฺฐกถา, น ปทพฺยญฺชนมธุรตา, อมฺหากํ ปน ปาฬิปิ อฎฺฐกถาปิ นยสเตน นยสหเสฺสน อุปฎฺฐาตี’’ติ อติกฺกมิตฺวา มญฺญติฯ โคตมาติ โคตมพุทฺธสาวกตฺตา อตฺตานํ อาลปติฯ มานปถนฺติ มานารมฺมณเญฺจว มานสหภุโน จ ธเมฺมฯ วิปฺปฎิสารีหุวาติ วิปฺปฎิสารี อหุวา, อโหสีติ อโตฺถฯ มคฺคชิโนติ มเคฺคน ชิตกิเลโสฯ กิตฺติญฺจ สุขญฺจาติ วณฺณภณนญฺจ กายิกเจตสิกสุขญฺจฯ อขิโลธ ปธานวาติ อขิโล อิธ ปธานวา วีริยสมฺปโนฺนฯ วิสุโทฺธติ วิสุโทฺธ ภเวยฺยฯ อเสสนฺติ นิเสฺสสํ นววิธํฯ วิชฺชายนฺตกโรติ วิชฺชาย กิเลสานํ อนฺตกโรฯ สมิตาวีติ ราคาทีนํ สมิตตาย สมิตาวีฯ ตติยํฯ
211. Tatiye atimaññatīti ‘‘kiṃ ime mahallakā? Na etesaṃ pāḷi, na aṭṭhakathā, na padabyañjanamadhuratā, amhākaṃ pana pāḷipi aṭṭhakathāpi nayasatena nayasahassena upaṭṭhātī’’ti atikkamitvā maññati. Gotamāti gotamabuddhasāvakattā attānaṃ ālapati. Mānapathanti mānārammaṇañceva mānasahabhuno ca dhamme. Vippaṭisārīhuvāti vippaṭisārī ahuvā, ahosīti attho. Maggajinoti maggena jitakileso. Kittiñca sukhañcāti vaṇṇabhaṇanañca kāyikacetasikasukhañca. Akhilodha padhānavāti akhilo idha padhānavā vīriyasampanno. Visuddhoti visuddho bhaveyya. Asesanti nissesaṃ navavidhaṃ. Vijjāyantakaroti vijjāya kilesānaṃ antakaro. Samitāvīti rāgādīnaṃ samitatāya samitāvī. Tatiyaṃ.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๓. เปสลสุตฺตํ • 3. Pesalasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๓. เปสลสุตฺตวณฺณนา • 3. Pesalasuttavaṇṇanā
