| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
3. பேஸுஞ்ஞஸிக்கா²பத³வண்ணனா
3. Pesuññasikkhāpadavaṇṇanā
36. ததியஸிக்கா²பதே³ – ப⁴ண்ட³னஜாதானந்தி ஸஞ்ஜாதப⁴ண்ட³னானங். ப⁴ண்ட³னந்தி கலஹஸ்ஸ புப்³ப³பா⁴கோ³, ‘‘இமினா ச இமினா ச இத³ங் கதங்; ஏவங் வுத்தே ஏவங் வக்கா²மா’’திஆதி³கங் ஸகஸகபக்கே² ஸம்மந்தனங். கலஹோதி ஆபத்திகா³மிகோ காயவாசாவீதிக்கமோ. விவாதோ³தி விக்³கா³ஹிககதா². தங் விவாத³ங் ஆபன்னானங் விவாதா³பன்னானங். பேஸுஞ்ஞந்தி பிஸுணவாசங், பியபா⁴வஸ்ஸ ஸுஞ்ஞகரணவாசந்தி வுத்தங் ஹோதி.
36. Tatiyasikkhāpade – bhaṇḍanajātānanti sañjātabhaṇḍanānaṃ. Bhaṇḍananti kalahassa pubbabhāgo, ‘‘iminā ca iminā ca idaṃ kataṃ; evaṃ vutte evaṃ vakkhāmā’’tiādikaṃ sakasakapakkhe sammantanaṃ. Kalahoti āpattigāmiko kāyavācāvītikkamo. Vivādoti viggāhikakathā. Taṃ vivādaṃ āpannānaṃ vivādāpannānaṃ. Pesuññanti pisuṇavācaṃ, piyabhāvassa suññakaraṇavācanti vuttaṃ hoti.
37. பி⁴க்கு²பேஸுஞ்ஞேதி பி⁴க்கூ²னங் பேஸுஞ்ஞே; பி⁴க்கு²தோ ஸுத்வா பி⁴க்கு²னா பி⁴க்கு²ஸ்ஸ உபஸங்ஹடபேஸுஞ்ஞேதி அத்தோ².
37.Bhikkhupesuññeti bhikkhūnaṃ pesuññe; bhikkhuto sutvā bhikkhunā bhikkhussa upasaṃhaṭapesuññeti attho.
38. த்³வீஹாகாரேஹீதி த்³வீஹி காரணேஹி. பியகம்யஸ்ஸ வாதி ‘‘ஏவங் அஹங் ஏதஸ்ஸ பியோ ப⁴விஸ்ஸாமீ’’தி அத்தனோ பியபா⁴வங் பத்த²யமானஸ்ஸ வா. பே⁴தா³தி⁴ப்பாயஸ்ஸ வாதி ‘‘ஏவமயங் ஏதேன ஸத்³தி⁴ங் பி⁴ஜ்ஜிஸ்ஸதீ’’தி பரஸ்ஸ பரேன பே⁴த³ங் இச்ச²ந்தஸ்ஸ வா. ஜாதிதோபீதிஆதி³ ஸப்³ப³ங் புரிமஸிக்கா²பதே³ வுத்தனயமேவ. இதா⁴பி பி⁴க்கு²னிங் ஆதி³ங் கத்வா ஸப்³பே³ அனுபஸம்பன்னா நாம.
38.Dvīhākārehīti dvīhi kāraṇehi. Piyakamyassa vāti ‘‘evaṃ ahaṃ etassa piyo bhavissāmī’’ti attano piyabhāvaṃ patthayamānassa vā. Bhedādhippāyassa vāti ‘‘evamayaṃ etena saddhiṃ bhijjissatī’’ti parassa parena bhedaṃ icchantassa vā. Jātitopītiādi sabbaṃ purimasikkhāpade vuttanayameva. Idhāpi bhikkhuniṃ ādiṃ katvā sabbe anupasampannā nāma.
ந பியகம்யஸ்ஸ ந பே⁴தா³தி⁴ப்பாயஸ்ஸாதி ஏகங் அக்கோஸந்தங் ஏகஞ்ச க²மந்தங் தி³ஸ்வா ‘‘அஹோ நில்லஜ்ஜோ, ஈதி³ஸம்பி நாம ப⁴வந்தங் புன வத்தப்³ப³ங் மஞ்ஞிஸ்ஸதீ’’தி ஏவங் கேவலங் பாபக³ரஹிதாய ப⁴ணந்தஸ்ஸ அனாபத்தி. ஸேஸங் உத்தானத்த²மேவ. திஸமுட்டா²னங் – காயசித்ததோ வாசாசித்ததோ காயவாசாசித்ததோ ச ஸமுட்டா²தி , கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், திவேத³னந்தி.
Na piyakamyassa na bhedādhippāyassāti ekaṃ akkosantaṃ ekañca khamantaṃ disvā ‘‘aho nillajjo, īdisampi nāma bhavantaṃ puna vattabbaṃ maññissatī’’ti evaṃ kevalaṃ pāpagarahitāya bhaṇantassa anāpatti. Sesaṃ uttānatthameva. Tisamuṭṭhānaṃ – kāyacittato vācācittato kāyavācācittato ca samuṭṭhāti , kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, tivedananti.
பேஸுஞ்ஞஸிக்கா²பத³ங் ததியங்.
Pesuññasikkhāpadaṃ tatiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. பேஸுஞ்ஞஸிக்கா²பத³வண்ணனா • 3. Pesuññasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. பேஸுஞ்ஞஸிக்கா²பத³வண்ணனா • 3. Pesuññasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. பேஸுஞ்ஞஸிக்கா²பத³வண்ணனா • 3. Pesuññasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. பேஸுஞ்ஞஸிக்கா²பத³ங் • 3. Pesuññasikkhāpadaṃ
