| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
3. பேஸுஞ்ஞஸிக்கா²பத³வண்ணனா
3. Pesuññasikkhāpadavaṇṇanā
பி⁴க்கு²பேஸுஞ்ஞேதி பிஸதீதி பிஸுணா, யாய வாசாய ஸமக்³கே³ ஸத்தே அவயவபூ⁴தே வக்³கே³ பி⁴ன்னே கரோதி, ஸா வாசா பிஸுணா, பிஸுணா ஏவ பேஸுஞ்ஞங், தாய வாசாய ஸமன்னாக³தோ பிஸுணோ, தஸ்ஸ கம்மங் பேஸுஞ்ஞங், பி⁴க்கு²ஸ்ஸ பேஸுஞ்ஞங் பி⁴க்கு²பேஸுஞ்ஞங், தஸ்மிங் பி⁴க்கு²பேஸுஞ்ஞே, பி⁴க்கு²தோ ஸுத்வா பி⁴க்கு²னா, பி⁴க்கு²ஸ்ஸ வா உபஸங்ஹடபேஸுஞ்ஞேதி அத்தோ². தேனாஹ ‘‘ஜாதிஆதீ³ஹீ’’திஆதி³. தஞ்ச கோ² த்³வீஹி காரணேஹி உபஸங்ஹரதீதி ஆஹ ‘‘பி⁴க்கு²னோ பியகம்யதாய வா’’திஆதி³. தத்த² பி⁴க்கு²னோ பியகம்யதாயாதி யஸ்ஸ தங் பா⁴ஸதி, தஸ்ஸ பி⁴க்கு²னோ ‘‘ஏவமஹங் ஏதஸ்ஸ பியோ ப⁴விஸ்ஸாமீ’’தி அத்தனோ பியபா⁴வங் பத்த²யமானதாய. பே⁴தா³தி⁴ப்பாயேனாதி ‘‘ஏவமயங் தேன ஸத்³தி⁴ங் பி⁴ஜ்ஜிஸ்ஸதீ’’தி பரஸ்ஸ பரேன பே⁴த³ங் இச்ச²ந்தேன. அத² வா பியஸுஞ்ஞகரணதோ பேஸுஞ்ஞங் (ஸாரத்த²॰ டீ॰ பாசித்திய 3.36) நிருத்தினயேன, யாய வாசாய யஸ்ஸ தங் பா⁴ஸதி, தஸ்ஸ ஹத³யே அத்தனோ பியபா⁴வங், பரஸ்ஸ ச ஸுஞ்ஞபா⁴வங் கரோதி, ஸா வாசா, ‘‘பி⁴க்கு²ஸ்ஸ பேஸுஞ்ஞங் பி⁴க்கு²பேஸுஞ்ஞ’’ந்திஆதி³னா ஏவம்பெத்த² அத்தோ² த³ட்ட²ப்³போ³. ‘‘வுத்தனயேனேவாதி ‘‘ஜாதிஆதீ³ஹி அக்கோஸவத்தூ²ஹீ’’திஆதி³னா வுத்தனயேன.
Bhikkhupesuññeti pisatīti pisuṇā, yāya vācāya samagge satte avayavabhūte vagge bhinne karoti, sā vācā pisuṇā, pisuṇā eva pesuññaṃ, tāya vācāya samannāgato pisuṇo, tassa kammaṃ pesuññaṃ, bhikkhussa pesuññaṃ bhikkhupesuññaṃ, tasmiṃ bhikkhupesuññe, bhikkhuto sutvā bhikkhunā, bhikkhussa vā upasaṃhaṭapesuññeti attho. Tenāha ‘‘jātiādīhī’’tiādi. Tañca kho dvīhi kāraṇehi upasaṃharatīti āha ‘‘bhikkhuno piyakamyatāya vā’’tiādi. Tattha bhikkhuno piyakamyatāyāti yassa taṃ bhāsati, tassa bhikkhuno ‘‘evamahaṃ etassa piyo bhavissāmī’’ti attano piyabhāvaṃ patthayamānatāya. Bhedādhippāyenāti ‘‘evamayaṃ tena saddhiṃ bhijjissatī’’ti parassa parena bhedaṃ icchantena. Atha vā piyasuññakaraṇato pesuññaṃ (sārattha. ṭī. pācittiya 3.36) niruttinayena, yāya vācāya yassa taṃ bhāsati, tassa hadaye attano piyabhāvaṃ, parassa ca suññabhāvaṃ karoti, sā vācā, ‘‘bhikkhussa pesuññaṃ bhikkhupesuñña’’ntiādinā evampettha attho daṭṭhabbo. ‘‘Vuttanayenevāti ‘‘jātiādīhi akkosavatthūhī’’tiādinā vuttanayena.
பாளிமுத்தகஅக்கோஸூபஸங்ஹாரேதி ‘‘சோரோஸீ’’திஆதி³னா அக்கோஸஸ்ஸ உபஸங்ஹாரே. ‘‘அனக்கோஸவத்து²பூ⁴தங் பன பேஸுஞ்ஞகரங் தஸ்ஸ கிரியங், வசனங் வா பியகம்யதாய உபஸங்ஹரந்தஸ்ஸ கிஞ்சாபி இமினா ஸிக்கா²பதே³ன ஆபத்தி ந தி³ஸ்ஸதி, ததா²பி து³க்கடேன ப⁴விதப்³ப³’’ந்தி (ஸாரத்த²॰ டீ॰ பாசித்திய 3.36) வத³ந்தி. பாபக³ரஹிதாய வத³ந்தஸ்ஸாதி ஏகங் அக்கோஸந்தங், ஏகஞ்ச க²மந்தங் தி³ஸ்வா ‘‘அஹோ நில்லஜ்ஜோ, ஈதி³ஸம்பி நாம ப⁴வந்தங் புன வத்தப்³ப³ங் மஞ்ஞிஸ்ஸதீ’’தி ஏவங் கேவலங் பாபக³ரஹிதாய ப⁴ணந்தஸ்ஸ.
Pāḷimuttakaakkosūpasaṃhāreti ‘‘corosī’’tiādinā akkosassa upasaṃhāre. ‘‘Anakkosavatthubhūtaṃ pana pesuññakaraṃ tassa kiriyaṃ, vacanaṃ vā piyakamyatāya upasaṃharantassa kiñcāpi iminā sikkhāpadena āpatti na dissati, tathāpi dukkaṭena bhavitabba’’nti (sārattha. ṭī. pācittiya 3.36) vadanti. Pāpagarahitāya vadantassāti ekaṃ akkosantaṃ, ekañca khamantaṃ disvā ‘‘aho nillajjo, īdisampi nāma bhavantaṃ puna vattabbaṃ maññissatī’’ti evaṃ kevalaṃ pāpagarahitāya bhaṇantassa.
பேஸுஞ்ஞஸிக்கா²பத³வண்ணனா நிட்டி²தா.
Pesuññasikkhāpadavaṇṇanā niṭṭhitā.
