| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
3. பேஸுஞ்ஞஸிக்கா²பத³வண்ணனா
3. Pesuññasikkhāpadavaṇṇanā
36. ததியே ப⁴ண்ட³னங் ஜாதங் ஏதேஸந்தி ப⁴ண்ட³னஜாதா. ஸம்மந்தனந்தி ரஹோ ஸங்ஸந்த³னங். ஹத்த²பராமாஸாதி³வஸேன மத்த²கங் பத்தோ கலஹோ ஜாதோ ஏதேஸந்தி கலஹஜாதா. அனாபத்திகா³மிகங் விருத்³த⁴வாத³பூ⁴தங் விவாத³ங் ஆபன்னாதி விவாதா³பன்னா. விக்³க³ஹஸங்வத்தனிகா கதா² விக்³கா³ஹிககதா². பிஸதீதி பிஸுணா, வாசா, ஸமக்³கே³ ஸத்தே அவயவபூ⁴தே வக்³கே³ பி⁴ன்னே கரோதீதி அத்தோ². பிஸுணா ஏவ பேஸுஞ்ஞங். தாய வாசாய வா ஸமன்னாக³தோ பிஸுணோ, தஸ்ஸ கம்மங் பேஸுஞ்ஞங். பியபா⁴வஸ்ஸ ஸுஞ்ஞகரணவாசந்தி இமினா பன ‘‘பியஸுஞ்ஞகரணதோ பிஸுணா’’தி நிருத்தினயேன அத்த²ங் வத³தி.
36. Tatiye bhaṇḍanaṃ jātaṃ etesanti bhaṇḍanajātā. Sammantananti raho saṃsandanaṃ. Hatthaparāmāsādivasena matthakaṃ patto kalaho jāto etesanti kalahajātā. Anāpattigāmikaṃ viruddhavādabhūtaṃ vivādaṃ āpannāti vivādāpannā. Viggahasaṃvattanikā kathā viggāhikakathā. Pisatīti pisuṇā, vācā, samagge satte avayavabhūte vagge bhinne karotīti attho. Pisuṇā eva pesuññaṃ. Tāya vācāya vā samannāgato pisuṇo, tassa kammaṃ pesuññaṃ. Piyabhāvassa suññakaraṇavācanti iminā pana ‘‘piyasuññakaraṇato pisuṇā’’ti niruttinayena atthaṃ vadati.
இதா⁴பி ‘‘த³ஸஹாகாரேஹி பேஸுஞ்ஞங் உபஸங்ஹரதீ’’தி வசனதோ த³ஸவித⁴அக்கோஸவத்து²வஸேனேவ பேஸுஞ்ஞங் உபஸங்ஹரந்தஸ்ஸ பாசித்தியங். பாளிமுத்தகானங் சோரோதிஆதீ³னங் வஸேன பன து³க்கடமேவாதி வேதி³தப்³ப³ங் . ‘‘அனக்கோஸவத்து²பூ⁴தங் பன பேஸுஞ்ஞகரங் தஸ்ஸ கிரியங் வசனங் வா பியகம்யதாய உபஸங்ஹரந்தஸ்ஸ கிஞ்சாபி இமினா ஸிக்கா²பதே³ன ஆபத்தி ந தி³ஸ்ஸதி, ததா²பி து³க்கடேனெத்த² ப⁴விதப்³ப³’’ந்தி வத³ந்தி. ஜாதிஆதீ³ஹி அனஞ்ஞாபதே³ஸேன அக்கோஸந்தஸ்ஸ பி⁴க்கு²னோ ஸுத்வா பி⁴க்கு²ஸ்ஸ உபஸங்ஹரணங், பியகம்யதாபே⁴தா³தி⁴ப்பாயேஸு அஞ்ஞதரதா, தஸ்ஸ விஜானநாதி இமானெத்த² தீணி அங்கா³னி.
Idhāpi ‘‘dasahākārehi pesuññaṃ upasaṃharatī’’ti vacanato dasavidhaakkosavatthuvaseneva pesuññaṃ upasaṃharantassa pācittiyaṃ. Pāḷimuttakānaṃ corotiādīnaṃ vasena pana dukkaṭamevāti veditabbaṃ . ‘‘Anakkosavatthubhūtaṃ pana pesuññakaraṃ tassa kiriyaṃ vacanaṃ vā piyakamyatāya upasaṃharantassa kiñcāpi iminā sikkhāpadena āpatti na dissati, tathāpi dukkaṭenettha bhavitabba’’nti vadanti. Jātiādīhi anaññāpadesena akkosantassa bhikkhuno sutvā bhikkhussa upasaṃharaṇaṃ, piyakamyatābhedādhippāyesu aññataratā, tassa vijānanāti imānettha tīṇi aṅgāni.
பேஸுஞ்ஞஸிக்கா²பத³வண்ணனா நிட்டி²தா.
Pesuññasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. பேஸுஞ்ஞஸிக்கா²பத³வண்ணனா • 3. Pesuññasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. பேஸுஞ்ஞஸிக்கா²பத³வண்ணனா • 3. Pesuññasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. பேஸுஞ்ஞஸிக்கா²பத³வண்ணனா • 3. Pesuññasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. பேஸுஞ்ஞஸிக்கா²பத³ங் • 3. Pesuññasikkhāpadaṃ
