| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៣០. បេត្តិទេវបេត្តិវិសយសុត្តំ
30. Pettidevapettivisayasuttaṃ
១២០១. …បេ.… ‘‘ឯវមេវ ខោ, ភិក្ខវេ, អប្បកា តេ សត្តា យេ បេត្តិវិសយា ចុតា ទេវេសុ បច្ចាជាយន្តិ; អថ ខោ ឯតេវ ពហុតរា សត្តា យេ បេត្តិវិសយា ចុតា បេត្តិវិសយេ បច្ចាជាយន្តិ។ តំ កិស្ស ហេតុ? អទិដ្ឋត្តា ភិក្ខវេ, ចតុន្នំ អរិយសច្ចានំ។ កតមេសំ ចតុន្នំ ? ទុក្ខស្ស អរិយសច្ចស្ស, ទុក្ខសមុទយស្ស អរិយសច្ចស្ស, ទុក្ខនិរោធស្ស អរិយសច្ចស្ស, ទុក្ខនិរោធគាមិនិយា បដិបទាយ អរិយសច្ចស្ស’’។
1201. …Pe… ‘‘evameva kho, bhikkhave, appakā te sattā ye pettivisayā cutā devesu paccājāyanti; atha kho eteva bahutarā sattā ye pettivisayā cutā pettivisaye paccājāyanti. Taṃ kissa hetu? Adiṭṭhattā bhikkhave, catunnaṃ ariyasaccānaṃ. Katamesaṃ catunnaṃ ? Dukkhassa ariyasaccassa, dukkhasamudayassa ariyasaccassa, dukkhanirodhassa ariyasaccassa, dukkhanirodhagāminiyā paṭipadāya ariyasaccassa’’.
‘‘តស្មាតិហ , ភិក្ខវេ, ‘ឥទំ ទុក្ខ’ន្តិ យោគោ ករណីយោ, ‘អយំ ទុក្ខសមុទយោ’តិ យោគោ ករណីយោ, ‘អយំ ទុក្ខនិរោធោ’តិ យោគោ ករណីយោ, ‘អយំ ទុក្ខនិរោធគាមិនី បដិបទា’តិ យោគោ ករណីយោ’’តិ។ ឥទមវោច ភគវា។ អត្តមនា តេ ភិក្ខូ ភគវតោ ភាសិតំ អភិនន្ទុន្តិ។ តិំសតិមំ។
‘‘Tasmātiha , bhikkhave, ‘idaṃ dukkha’nti yogo karaṇīyo, ‘ayaṃ dukkhasamudayo’ti yogo karaṇīyo, ‘ayaṃ dukkhanirodho’ti yogo karaṇīyo, ‘ayaṃ dukkhanirodhagāminī paṭipadā’ti yogo karaṇīyo’’ti. Idamavoca bhagavā. Attamanā te bhikkhū bhagavato bhāsitaṃ abhinandunti. Tiṃsatimaṃ.
បញ្ចគតិបេយ្យាលវគ្គោ ឯកាទសមោ។
Pañcagatipeyyālavaggo ekādasamo.
តស្សុទ្ទានំ –
Tassuddānaṃ –
មនុស្សតោ ចុតា ឆាបិ, ទេវា ចុតា និរយតោ;
Manussato cutā chāpi, devā cutā nirayato;
តិរច្ឆានបេត្តិវិសយា, តិំសមត្តោ គតិវគ្គោតិ។
Tiracchānapettivisayā, tiṃsamatto gativaggoti.
សច្ចសំយុត្តំ ទ្វាទសមំ។
Saccasaṃyuttaṃ dvādasamaṃ.
មហាវគ្គោ បញ្ចមោ។
Mahāvaggo pañcamo.
តស្សុទ្ទានំ –
Tassuddānaṃ –
មគ្គពោជ្ឈង្គំ សតិយា, ឥន្ទ្រិយំ សម្មប្បធានំ;
Maggabojjhaṅgaṃ satiyā, indriyaṃ sammappadhānaṃ;
ពលិទ្ធិបាទានុរុទ្ធា, ឈានានាបានសំយុតំ;
Baliddhipādānuruddhā, jhānānāpānasaṃyutaṃ;
សោតាបត្តិ សច្ចញ្ចាតិ, មហាវគ្គោតិ វុច្ចតីតិ។
Sotāpatti saccañcāti, mahāvaggoti vuccatīti.
មហាវគ្គសំយុត្តបាឡិ និដ្ឋិតា។
Mahāvaggasaṃyuttapāḷi niṭṭhitā.
