Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya

২. ফগ্গুনসুত্তং

2. Phaggunasuttaṃ

৫৬. তেন খো পন সমযেন আযস্মা ফগ্গুনো ¹ আবাধিকো হোতি দুক্খিতো বাল়্হগিলানো। অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘আযস্মা, ভন্তে, ফগ্গুনো আবাধিকো দুক্খিতো বাল়্হগিলানো। সাধু, ভন্তে , ভগৰা যেনাযস্মা ফগ্গুনো তেনুপসঙ্কমতু অনুকম্পং উপাদাযা’’তি। অধিৰাসেসি ভগৰা তুণ্হীভাৰেন। অথ খো ভগৰা সাযন্হসমযং পটিসল্লানা ৰুট্ঠিতো যেনাযস্মা ফগ্গুনো তেনুপসঙ্কমি। অদ্দসা খো আযস্মা ফগ্গুনো ভগৰন্তং দূরতোৰ আগচ্ছন্তং। দিস্ৰান মঞ্চকে সমধোসি ²। অথ খো ভগৰা আযস্মন্তং ফগ্গুনং এতদৰোচ – ‘‘অলং, ফগ্গুন, মা ত্ৰং মঞ্চকে সমধোসি। সন্তিমানি আসনানি পরেহি পঞ্ঞত্তানি, তত্থাহং নিসীদিস্সামী’’তি। নিসীদি ভগৰা পঞ্ঞত্তে আসনে। নিসজ্জ খো ভগৰা আযস্মন্তং ফগ্গুনং এতদৰোচ –

56. Tena kho pana samayena āyasmā phagguno ³ ābādhiko hoti dukkhito bāḷhagilāno. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘āyasmā, bhante, phagguno ābādhiko dukkhito bāḷhagilāno. Sādhu, bhante , bhagavā yenāyasmā phagguno tenupasaṅkamatu anukampaṃ upādāyā’’ti. Adhivāsesi bhagavā tuṇhībhāvena. Atha kho bhagavā sāyanhasamayaṃ paṭisallānā vuṭṭhito yenāyasmā phagguno tenupasaṅkami. Addasā kho āyasmā phagguno bhagavantaṃ dūratova āgacchantaṃ. Disvāna mañcake samadhosi ⁴. Atha kho bhagavā āyasmantaṃ phaggunaṃ etadavoca – ‘‘alaṃ, phagguna, mā tvaṃ mañcake samadhosi. Santimāni āsanāni parehi paññattāni, tatthāhaṃ nisīdissāmī’’ti. Nisīdi bhagavā paññatte āsane. Nisajja kho bhagavā āyasmantaṃ phaggunaṃ etadavoca –

‘‘কচ্চি তে, ফগ্গুন, খমনীযং কচ্চি যাপনীযং? কচ্চি তে দুক্খা ৰেদনা পটিক্কমন্তি, নো অভিক্কমন্তি; পটিক্কমোসানং পঞ্ঞাযতি, নো অভিক্কমো’’তি? ‘‘ন মে , ভন্তে , খমনীযং ন যাপনীযং। বাল়্হা মে দুক্খা ৰেদনা অভিক্কমন্তি, নো পটিক্কমন্তি; অভিক্কমোসানং পঞ্ঞাযতি, নো পটিক্কমো।

‘‘Kacci te, phagguna, khamanīyaṃ kacci yāpanīyaṃ? Kacci te dukkhā vedanā paṭikkamanti, no abhikkamanti; paṭikkamosānaṃ paññāyati, no abhikkamo’’ti? ‘‘Na me , bhante , khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo.

‘‘সেয্যথাপি, ভন্তে, বলৰা পুরিসো তিণ্হেন সিখরেন মুদ্ধনি ⁵ অভিমত্থেয্য ⁶; এৰমেৰং খো মে, ভন্তে, অধিমত্তা ৰাতা মুদ্ধনি ⁷ ঊহনন্তি। ন মে, ভন্তে, খমনীযং ন যাপনীযং। বাল়্হা মে দুক্খা ৰেদনা অভিক্কমন্তি, নো পটিক্কমন্তি; অভিক্কমোসানং পঞ্ঞাযতি, নো পটিক্কমো।

‘‘Seyyathāpi, bhante, balavā puriso tiṇhena sikharena muddhani ⁸ abhimattheyya ⁹; evamevaṃ kho me, bhante, adhimattā vātā muddhani ¹⁰ ūhananti. Na me, bhante, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo.

‘‘সেয্যথাপি, ভন্তে, বলৰা পুরিসো দল়্হেন ৰরত্তক্খণ্ডেন সীসৰেঠনং দদেয্য; এৰমেৰং খো মে, ভন্তে, অধিমত্তা সীসে সীসৰেদনা। ন মে, ভন্তে, খমনীযং ন যাপনীযং। বাল়্হা মে দুক্খা ৰেদনা অভিক্কমন্তি, নো পটিক্কমন্তি; অভিক্কমোসানং পঞ্ঞাযতি, নো পটিক্কমো।

‘‘Seyyathāpi, bhante, balavā puriso daḷhena varattakkhaṇḍena sīsaveṭhanaṃ dadeyya; evamevaṃ kho me, bhante, adhimattā sīse sīsavedanā. Na me, bhante, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo.

‘‘সেয্যথাপি, ভন্তে, দক্খো গোঘাতকো ৰা গোঘাতকন্তেৰাসী ৰা তিণ্হেন গোৰিকন্তনেন কুচ্ছিং পরিকন্তেয্য; এৰমেৰং খো মে, ভন্তে, অধিমত্তা ৰাতা কুচ্ছিং পরিকন্তন্তি। ন মে, ভন্তে, খমনীযং ন যাপনীযং। বাল়্হা মে দুক্খা ৰেদনা অভিক্কমন্তি, নো পটিক্কমন্তি; অভিক্কমোসানং পঞ্ঞাযতি, নো পটিক্কমো।

‘‘Seyyathāpi, bhante, dakkho goghātako vā goghātakantevāsī vā tiṇhena govikantanena kucchiṃ parikanteyya; evamevaṃ kho me, bhante, adhimattā vātā kucchiṃ parikantanti. Na me, bhante, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo.

‘‘সেয্যথাপি, ভন্তে, দ্ৰে বলৰন্তো পুরিসা দুব্বলতরং পুরিসং নানাবাহাসু গহেত্ৰা অঙ্গারকাসুযা সন্তাপেয্যুং সম্পরিতাপেয্যুং; এৰমেৰং খো মে, ভন্তে, অধিমত্তো কাযস্মিং ডাহো। ন মে, ভন্তে, খমনীযং ন যাপনীযং। বাল়্হা মে দুক্খা ৰেদনা অভিক্কমন্তি, নো পটিক্কমন্তি; অভিক্কমোসানং পঞ্ঞাযতি, নো পটিক্কমো’’তি। অথ খো ভগৰা আযস্মন্তং ফগ্গুনং ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা উট্ঠাযাসনা পক্কামি।

‘‘Seyyathāpi, bhante, dve balavanto purisā dubbalataraṃ purisaṃ nānābāhāsu gahetvā aṅgārakāsuyā santāpeyyuṃ samparitāpeyyuṃ; evamevaṃ kho me, bhante, adhimatto kāyasmiṃ ḍāho. Na me, bhante, khamanīyaṃ na yāpanīyaṃ. Bāḷhā me dukkhā vedanā abhikkamanti, no paṭikkamanti; abhikkamosānaṃ paññāyati, no paṭikkamo’’ti. Atha kho bhagavā āyasmantaṃ phaggunaṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmi.

অথ খো আযস্মা ফগ্গুনো অচিরপক্কন্তস্স ভগৰতো কালমকাসি। তম্হি চস্স সমযে মরণকালে ইন্দ্রিযানি ৰিপ্পসীদিংসু। অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘আযস্মা, ভন্তে, ফগ্গুনো অচিরপক্কন্তস্স ভগৰতো কালমকাসি। তম্হি চস্স সমযে মরণকালে ইন্দ্রিযানি ৰিপ্পসীদিংসূ’’তি।

Atha kho āyasmā phagguno acirapakkantassa bhagavato kālamakāsi. Tamhi cassa samaye maraṇakāle indriyāni vippasīdiṃsu. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘āyasmā, bhante, phagguno acirapakkantassa bhagavato kālamakāsi. Tamhi cassa samaye maraṇakāle indriyāni vippasīdiṃsū’’ti.

‘‘কিং হানন্দ, ফগ্গুনস্স ¹¹ ভিক্খুনো ইন্দ্রিযানি ন ৰিপ্পসীদিস্সন্তি! ফগ্গুনস্স, আনন্দ, ভিক্খুনো পঞ্চহি ওরম্ভাগিযেহি সংযোজনেহি চিত্তং অৰিমুত্তং অহোসি। তস্স তং ধম্মদেসনং সুত্ৰা পঞ্চহি ওরম্ভাগিযেহি সংযোজনেহি চিত্তং ৰিমুত্তং।

‘‘Kiṃ hānanda, phaggunassa ¹² bhikkhuno indriyāni na vippasīdissanti! Phaggunassa, ānanda, bhikkhuno pañcahi orambhāgiyehi saṃyojanehi cittaṃ avimuttaṃ ahosi. Tassa taṃ dhammadesanaṃ sutvā pañcahi orambhāgiyehi saṃyojanehi cittaṃ vimuttaṃ.

‘‘ছযিমে, আনন্দ, আনিসংসা কালেন ধম্মস্সৰনে ¹³ কালেন অত্থুপপরিক্খায। কতমে ছ? ইধানন্দ, ভিক্খুনো পঞ্চহি ওরম্ভাগিযেহি সংযোজনেহি চিত্তং অৰিমুত্তং হোতি। সো তম্হি সমযে মরণকালে লভতি তথাগতং দস্সনায। তস্স তথাগতো ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি। তস্স তং ধম্মদেসনং সুত্ৰা পঞ্চহি ওরম্ভাগিযেহি সংযোজনেহি চিত্তং ৰিমুচ্চতি। অযং, আনন্দ, পঠমো আনিসংসো কালেন ধম্মস্সৰনে।

‘‘Chayime, ānanda, ānisaṃsā kālena dhammassavane ¹⁴ kālena atthupaparikkhāya. Katame cha? Idhānanda, bhikkhuno pañcahi orambhāgiyehi saṃyojanehi cittaṃ avimuttaṃ hoti. So tamhi samaye maraṇakāle labhati tathāgataṃ dassanāya. Tassa tathāgato dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ, kevalaparipuṇṇaṃ parisuddhaṃ brahmacariyaṃ pakāseti. Tassa taṃ dhammadesanaṃ sutvā pañcahi orambhāgiyehi saṃyojanehi cittaṃ vimuccati. Ayaṃ, ānanda, paṭhamo ānisaṃso kālena dhammassavane.

‘‘পুন চপরং, আনন্দ, ভিক্খুনো পঞ্চহি ওরম্ভাগিযেহি সংযোজনেহি চিত্তং অৰিমুত্তং হোতি। সো তম্হি সমযে মরণকালে ন হেৰ খো ¹⁵ লভতি তথাগতং দস্সনায, অপি চ খো তথাগতসাৰকং লভতি দস্সনায। তস্স তথাগতসাৰকো ধম্মং দেসেতি আদিকল্যাণং মজ্ঝেকল্যাণং পরিযোসানকল্যাণং সাত্থং সব্যঞ্জনং, কেৰলপরিপুণ্ণং পরিসুদ্ধং ব্রহ্মচরিযং পকাসেতি। তস্স তং ধম্মদেসনং সুত্ৰা পঞ্চহি ওরম্ভাগিযেহি সংযোজনেহি চিত্তং ৰিমুচ্চতি। অযং, আনন্দ, দুতিযো আনিসংসো কালেন ধম্মস্সৰনে।

‘‘Puna caparaṃ, ānanda, bhikkhuno pañcahi orambhāgiyehi saṃyojanehi cittaṃ avimuttaṃ hoti. So tamhi samaye maraṇakāle na heva kho ¹⁶ labhati tathāgataṃ dassanāya, api ca kho tathāgatasāvakaṃ labhati dassanāya. Tassa tathāgatasāvako dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ, kevalaparipuṇṇaṃ parisuddhaṃ brahmacariyaṃ pakāseti. Tassa taṃ dhammadesanaṃ sutvā pañcahi orambhāgiyehi saṃyojanehi cittaṃ vimuccati. Ayaṃ, ānanda, dutiyo ānisaṃso kālena dhammassavane.

‘‘পুন চপরং, আনন্দ, ভিক্খুনো পঞ্চহি ওরম্ভাগিযেহি সংযোজনেহি চিত্তং অৰিমুত্তং হোতি। সো তম্হি সমযে মরণকালে ন হেৰ খো লভতি তথাগতং দস্সনায, নপি তথাগতসাৰকং লভতি দস্সনায; অপি চ খো যথাসুতং যথাপরিযত্তং ধম্মং চেতসা অনুৰিতক্কেতি অনুৰিচারেতি মনসানুপেক্খতি। তস্স যথাসুতং যথাপরিযত্তং ধম্মং চেতসা অনুৰিতক্কযতো অনুৰিচারযতো মনসানুপেক্খতো পঞ্চহি ওরম্ভাগিযেহি সংযোজনেহি চিত্তং ৰিমুচ্চতি। অযং, আনন্দ, ততিযো আনিসংসো কালেন অত্থুপপরিক্খায।

‘‘Puna caparaṃ, ānanda, bhikkhuno pañcahi orambhāgiyehi saṃyojanehi cittaṃ avimuttaṃ hoti. So tamhi samaye maraṇakāle na heva kho labhati tathāgataṃ dassanāya, napi tathāgatasāvakaṃ labhati dassanāya; api ca kho yathāsutaṃ yathāpariyattaṃ dhammaṃ cetasā anuvitakketi anuvicāreti manasānupekkhati. Tassa yathāsutaṃ yathāpariyattaṃ dhammaṃ cetasā anuvitakkayato anuvicārayato manasānupekkhato pañcahi orambhāgiyehi saṃyojanehi cittaṃ vimuccati. Ayaṃ, ānanda, tatiyo ānisaṃso kālena atthupaparikkhāya.

‘‘ইধানন্দ , ভিক্খুনো পঞ্চহি ওরম্ভাগিযেহি সংযোজনেহি চিত্তং ৰিমুত্তং হোতি, অনুত্তরে চ খো উপধিসঙ্খযে চিত্তং অৰিমুত্তং হোতি। সো তম্হি সমযে মরণকালে লভতি তথাগতং দস্সনায। তস্স তথাগতো ধম্মং দেসেতি আদিকল্যাণং মজ্ঝেকল্যাণং…পে॰… ব্রহ্মচরিযং পকাসেতি। তস্স তং ধম্মদেসনং সুত্ৰা অনুত্তরে উপধিসঙ্খযে চিত্তং ৰিমুচ্চতি। অযং, আনন্দ, চতুত্থো আনিসংসো কালেন ধম্মস্সৰনে।

‘‘Idhānanda , bhikkhuno pañcahi orambhāgiyehi saṃyojanehi cittaṃ vimuttaṃ hoti, anuttare ca kho upadhisaṅkhaye cittaṃ avimuttaṃ hoti. So tamhi samaye maraṇakāle labhati tathāgataṃ dassanāya. Tassa tathāgato dhammaṃ deseti ādikalyāṇaṃ majjhekalyāṇaṃ…pe… brahmacariyaṃ pakāseti. Tassa taṃ dhammadesanaṃ sutvā anuttare upadhisaṅkhaye cittaṃ vimuccati. Ayaṃ, ānanda, catuttho ānisaṃso kālena dhammassavane.

‘‘পুন চপরং, আনন্দ, ভিক্খুনো পঞ্চহি ওরম্ভাগিযেহি সংযোজনেহি চিত্তং ৰিমুত্তং হোতি, অনুত্তরে চ খো উপধিসঙ্খযে চিত্তং অৰিমুত্তং হোতি। সো তম্হি সমযে মরণকালে ন হেৰ খো লভতি তথাগতং দস্সনায, অপি চ খো তথাগতসাৰকং লভতি দস্সনায। তস্স তথাগতসাৰকো ধম্মং দেসেতি আদিকল্যাণং…পে॰… পরিসুদ্ধং ব্রহ্মচরিযং পকাসেতি। তস্স তং ধম্মদেসনং সুত্ৰা অনুত্তরে উপধিসঙ্খযে চিত্তং ৰিমুচ্চতি। অযং, আনন্দ, পঞ্চমো আনিসংসো কালেন ধম্মস্সৰনে।

‘‘Puna caparaṃ, ānanda, bhikkhuno pañcahi orambhāgiyehi saṃyojanehi cittaṃ vimuttaṃ hoti, anuttare ca kho upadhisaṅkhaye cittaṃ avimuttaṃ hoti. So tamhi samaye maraṇakāle na heva kho labhati tathāgataṃ dassanāya, api ca kho tathāgatasāvakaṃ labhati dassanāya. Tassa tathāgatasāvako dhammaṃ deseti ādikalyāṇaṃ…pe… parisuddhaṃ brahmacariyaṃ pakāseti. Tassa taṃ dhammadesanaṃ sutvā anuttare upadhisaṅkhaye cittaṃ vimuccati. Ayaṃ, ānanda, pañcamo ānisaṃso kālena dhammassavane.

‘‘পুন চপরং, আনন্দ, ভিক্খুনো পঞ্চহি ওরম্ভাগিযেহি সংযোজনেহি চিত্তং ৰিমুত্তং হোতি, অনুত্তরে চ খো উপধিসঙ্খযে চিত্তং অৰিমুত্তং হোতি। সো তম্হি সমযে মরণকালে ন হেৰ খো লভতি তথাগতং দস্সনায, নপি তথাগতসাৰকং লভতি দস্সনায; অপি চ খো যথাসুতং যথাপরিযত্তং ধম্মং চেতসা অনুৰিতক্কেতি অনুৰিচারেতি মনসানুপেক্খতি। তস্স যথাসুতং যথাপরিযত্তং ধম্মং চেতসা অনুৰিতক্কযতো অনুৰিচারযতো মনসানুপেক্খতো অনুত্তরে উপধিসঙ্খযে চিত্তং ৰিমুচ্চতি। অযং, আনন্দ, ছট্ঠো আনিসংসো কালেন অত্থুপপরিক্খায। ইমে খো, আনন্দ, ছ আনিসংসা কালেন ধম্মস্সৰনে কালেন অত্থুপপরিক্খাযা’’তি। দুতিযং।

‘‘Puna caparaṃ, ānanda, bhikkhuno pañcahi orambhāgiyehi saṃyojanehi cittaṃ vimuttaṃ hoti, anuttare ca kho upadhisaṅkhaye cittaṃ avimuttaṃ hoti. So tamhi samaye maraṇakāle na heva kho labhati tathāgataṃ dassanāya, napi tathāgatasāvakaṃ labhati dassanāya; api ca kho yathāsutaṃ yathāpariyattaṃ dhammaṃ cetasā anuvitakketi anuvicāreti manasānupekkhati. Tassa yathāsutaṃ yathāpariyattaṃ dhammaṃ cetasā anuvitakkayato anuvicārayato manasānupekkhato anuttare upadhisaṅkhaye cittaṃ vimuccati. Ayaṃ, ānanda, chaṭṭho ānisaṃso kālena atthupaparikkhāya. Ime kho, ānanda, cha ānisaṃsā kālena dhammassavane kālena atthupaparikkhāyā’’ti. Dutiyaṃ.

Next: ৩. ছল়ভিজাতিসুত্তং • 3. Chaḷabhijātisuttaṃ

Footnotes:

1. ফেগ্গুনো (ক॰), ফগ্গুণো (সী॰ স্যা॰)

2. সমঞ্চোপি (সী॰ স্যা॰ পী॰), সং + ধূ + ঈ = সমধোসি

3. phegguno (ka.), phagguṇo (sī. syā.)

4. samañcopi (sī. syā. pī.), saṃ + dhū + ī = samadhosi

5. মুদ্ধানং (সী॰ পী॰)

6. অভিমট্ঠেয্য (স্যা॰)

7. হনন্তি (সী॰ পী॰), ওহনন্তি (স্যা॰)

8. muddhānaṃ (sī. pī.)

9. abhimaṭṭheyya (syā.)

10. hananti (sī. pī.), ohananti (syā.)

11. ফেগ্গুনস্স আনন্দ (ক॰)

12. pheggunassa ānanda (ka.)

13. ধম্মসৰণে (সী॰)

14. dhammasavaṇe (sī.)

15. নো চ খো (ক॰)

16. no ca kho (ka.)

Related texts:

অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. ফগ্গুনসুত্তৰণ্ণনা • 2. Phaggunasuttavaṇṇanā

টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২. ফগ্গুনসুত্তৰণ্ণনা • 2. Phaggunasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact