| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. ப²லதா³யகத்தே²ரஅபதா³னவண்ணனா
7. Phaladāyakattheraapadānavaṇṇanā
அஜ்ஜா²யகோ மந்தத⁴ரோதிஆதி³கங் ஆயஸ்மதோ ப²லதா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ அனேகேஸு ப⁴வேஸு விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ப்³ராஹ்மணகுலே நிப்³ப³த்தோ விஞ்ஞுதங் பத்வா வேத³த்தயாதி³ஸகஸிப்பேஸு பாரப்பத்தோ அனேகேஸங் ப்³ராஹ்மணஸஹஸ்ஸானிங் பாமொக்கோ² ஆசரியோ ஸகஸிப்பானங் பரியோஸானங் அதி³ஸ்வா தத்த² ச ஸாரங் அபஸ்ஸந்தோ க⁴ராவாஸங் பஹாய இஸிபப்³ப³ஜ்ஜங் பப்³ப³ஜித்வா ஹிமவந்தஸ்ஸ அவிதூ³ரே அஸ்ஸமங் காரெத்வா ஸஹ ஸிஸ்ஸேஹி வாஸங் கப்பேஸி, தஸ்மிங் ஸமயே பது³முத்தரோ ப⁴க³வா பி⁴க்கா²ய சரமானோ தஸ்ஸானுகம்பாய தங் பதே³ஸங் ஸம்பாபுணி. தாபஸோ ப⁴க³வந்தங் தி³ஸ்வா பஸன்னமானஸோ அத்தனோ அத்தா²ய புடகே நிக்கி²பித்வா ருக்க²க்³கே³ லக்³கி³தானி மது⁴ரானி பது³மப²லானி மது⁴னா ஸஹ அதா³ஸி. ப⁴க³வா தஸ்ஸ ஸோமனஸ்ஸுப்பாத³னத்த²ங் பஸ்ஸந்தஸ்ஸேவ பரிபு⁴ஞ்ஜித்வா ஆகாஸே டி²தோ ப²லதா³னானிஸங்ஸங் கதெ²த்வா பக்காமி.
Ajjhāyako mantadharotiādikaṃ āyasmato phaladāyakattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto padumuttarassa bhagavato kāle brāhmaṇakule nibbatto viññutaṃ patvā vedattayādisakasippesu pārappatto anekesaṃ brāhmaṇasahassāniṃ pāmokkho ācariyo sakasippānaṃ pariyosānaṃ adisvā tattha ca sāraṃ apassanto gharāvāsaṃ pahāya isipabbajjaṃ pabbajitvā himavantassa avidūre assamaṃ kāretvā saha sissehi vāsaṃ kappesi, tasmiṃ samaye padumuttaro bhagavā bhikkhāya caramāno tassānukampāya taṃ padesaṃ sampāpuṇi. Tāpaso bhagavantaṃ disvā pasannamānaso attano atthāya puṭake nikkhipitvā rukkhagge laggitāni madhurāni padumaphalāni madhunā saha adāsi. Bhagavā tassa somanassuppādanatthaṃ passantasseva paribhuñjitvā ākāse ṭhito phaladānānisaṃsaṃ kathetvā pakkāmi.
75. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே ஏகஸ்மிங் குலகே³ஹே நிப்³ப³த்தோ ஸத்தவஸ்ஸிகோயேவ அரஹத்தங் பத்வா புப்³பே³ கதகுஸலகம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ அஜ்ஜா²யகோ மந்தத⁴ரோதிஆதி³மாஹ. தத்த² அஜ்ஜே²தி சிந்தேதீதி அஜ்ஜா²யி, அஜ்ஜா²யியேவ அஜ்ஜா²யகோ. எத்த² ஹி அகாரோ ‘‘படிஸேதே⁴ வுத்³தி⁴தப்³பா⁴வே…பே॰… அகாரோ விரஹப்பகே’’தி ஏவங் வுத்தேஸு த³ஸஸு அத்தே²ஸு தப்³பா⁴வே வத்ததி. ஸிஸ்ஸானங் ஸவனதா⁴ரணாதி³வஸேன ஹிதங் அஜ்ஜே²தி சிந்தேதி ஸஜ்ஜா²யங் கரோதீதி அஜ்ஜா²யகோ, சிந்தகோதி அத்தோ². ஆசரியஸ்ஸ ஸந்திகே உக்³க³ஹிதங் ஸப்³ப³ங் மந்தங் மனேன தா⁴ரேதி பவத்தேதீதி மந்தத⁴ரோ. திண்ணங் வேதா³ன பாரகூ³தி வேத³ங் வுச்சதி ஞாணங், வேதே³ன வேதி³தப்³பா³ பு³ஜ்ஜி²தப்³பா³தி வேதா³, இருவேத³யஜுவேத³ஸாமவேத³ஸங்கா²தா தயோ க³ந்தா², தேஸங் வேதா³னங் பாரங் பரியோஸானங் கோடிங் க³தோ பத்தோதி பாரகூ³. ஸேஸங் பாகடமேவாதி
75. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde vibhavasampanne ekasmiṃ kulagehe nibbatto sattavassikoyeva arahattaṃ patvā pubbe katakusalakammaṃ saritvā somanassajāto pubbacaritāpadānaṃ pakāsento ajjhāyako mantadharotiādimāha. Tattha ajjheti cintetīti ajjhāyi, ajjhāyiyeva ajjhāyako. Ettha hi akāro ‘‘paṭisedhe vuddhitabbhāve…pe… akāro virahappake’’ti evaṃ vuttesu dasasu atthesu tabbhāve vattati. Sissānaṃ savanadhāraṇādivasena hitaṃ ajjheti cinteti sajjhāyaṃ karotīti ajjhāyako, cintakoti attho. Ācariyassa santike uggahitaṃ sabbaṃ mantaṃ manena dhāreti pavattetīti mantadharo. Tiṇṇaṃ vedāna pāragūti vedaṃ vuccati ñāṇaṃ, vedena veditabbā bujjhitabbāti vedā, iruvedayajuvedasāmavedasaṅkhātā tayo ganthā, tesaṃ vedānaṃ pāraṃ pariyosānaṃ koṭiṃ gato pattoti pāragū. Sesaṃ pākaṭamevāti
ப²லதா³யகத்தே²ரஅபதா³னவண்ணனா ஸமத்தா.
Phaladāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. ப²லதா³யகத்தே²ரஅபதா³னங் • 7. Phaladāyakattheraapadānaṃ
