| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৭. ফলদাযকত্থেরঅপদানৰণ্ণনা
7. Phaladāyakattheraapadānavaṇṇanā
অজ্ঝাযকো মন্তধরোতিআদিকং আযস্মতো ফলদাযকত্থেরস্স অপদানং। অযম্পি পুরিমবুদ্ধেসু কতাধিকারো অনেকেসু ভৰেসু ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে ব্রাহ্মণকুলে নিব্বত্তো ৰিঞ্ঞুতং পত্ৰা ৰেদত্তযাদিসকসিপ্পেসু পারপ্পত্তো অনেকেসং ব্রাহ্মণসহস্সানিং পামোক্খো আচরিযো সকসিপ্পানং পরিযোসানং অদিস্ৰা তত্থ চ সারং অপস্সন্তো ঘরাৰাসং পহায ইসিপব্বজ্জং পব্বজিত্ৰা হিমৰন্তস্স অৰিদূরে অস্সমং কারেত্ৰা সহ সিস্সেহি ৰাসং কপ্পেসি, তস্মিং সমযে পদুমুত্তরো ভগৰা ভিক্খায চরমানো তস্সানুকম্পায তং পদেসং সম্পাপুণি। তাপসো ভগৰন্তং দিস্ৰা পসন্নমানসো অত্তনো অত্থায পুটকে নিক্খিপিত্ৰা রুক্খগ্গে লগ্গিতানি মধুরানি পদুমফলানি মধুনা সহ অদাসি। ভগৰা তস্স সোমনস্সুপ্পাদনত্থং পস্সন্তস্সেৰ পরিভুঞ্জিত্ৰা আকাসে ঠিতো ফলদানানিসংসং কথেত্ৰা পক্কামি।
Ajjhāyako mantadharotiādikaṃ āyasmato phaladāyakattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto padumuttarassa bhagavato kāle brāhmaṇakule nibbatto viññutaṃ patvā vedattayādisakasippesu pārappatto anekesaṃ brāhmaṇasahassāniṃ pāmokkho ācariyo sakasippānaṃ pariyosānaṃ adisvā tattha ca sāraṃ apassanto gharāvāsaṃ pahāya isipabbajjaṃ pabbajitvā himavantassa avidūre assamaṃ kāretvā saha sissehi vāsaṃ kappesi, tasmiṃ samaye padumuttaro bhagavā bhikkhāya caramāno tassānukampāya taṃ padesaṃ sampāpuṇi. Tāpaso bhagavantaṃ disvā pasannamānaso attano atthāya puṭake nikkhipitvā rukkhagge laggitāni madhurāni padumaphalāni madhunā saha adāsi. Bhagavā tassa somanassuppādanatthaṃ passantasseva paribhuñjitvā ākāse ṭhito phaladānānisaṃsaṃ kathetvā pakkāmi.
৭৫. সো তেন পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে একস্মিং কুলগেহে নিব্বত্তো সত্তৰস্সিকোযেৰ অরহত্তং পত্ৰা পুব্বে কতকুসলকম্মং সরিত্ৰা সোমনস্সজাতো পুব্বচরিতাপদানং পকাসেন্তো অজ্ঝাযকো মন্তধরোতিআদিমাহ। তত্থ অজ্ঝেতি চিন্তেতীতি অজ্ঝাযি, অজ্ঝাযিযেৰ অজ্ঝাযকো। এত্থ হি অকারো ‘‘পটিসেধে ৰুদ্ধিতব্ভাৰে…পে॰… অকারো ৰিরহপ্পকে’’তি এৰং ৰুত্তেসু দসসু অত্থেসু তব্ভাৰে ৰত্ততি। সিস্সানং সৰনধারণাদিৰসেন হিতং অজ্ঝেতি চিন্তেতি সজ্ঝাযং করোতীতি অজ্ঝাযকো, চিন্তকোতি অত্থো। আচরিযস্স সন্তিকে উগ্গহিতং সব্বং মন্তং মনেন ধারেতি পৰত্তেতীতি মন্তধরো। তিণ্ণং ৰেদান পারগূতি ৰেদং ৰুচ্চতি ঞাণং, ৰেদেন ৰেদিতব্বা বুজ্ঝিতব্বাতি ৰেদা, ইরুৰেদযজুৰেদসামৰেদসঙ্খাতা তযো গন্থা, তেসং ৰেদানং পারং পরিযোসানং কোটিং গতো পত্তোতি পারগূ। সেসং পাকটমেৰাতি
75. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde vibhavasampanne ekasmiṃ kulagehe nibbatto sattavassikoyeva arahattaṃ patvā pubbe katakusalakammaṃ saritvā somanassajāto pubbacaritāpadānaṃ pakāsento ajjhāyako mantadharotiādimāha. Tattha ajjheti cintetīti ajjhāyi, ajjhāyiyeva ajjhāyako. Ettha hi akāro ‘‘paṭisedhe vuddhitabbhāve…pe… akāro virahappake’’ti evaṃ vuttesu dasasu atthesu tabbhāve vattati. Sissānaṃ savanadhāraṇādivasena hitaṃ ajjheti cinteti sajjhāyaṃ karotīti ajjhāyako, cintakoti attho. Ācariyassa santike uggahitaṃ sabbaṃ mantaṃ manena dhāreti pavattetīti mantadharo. Tiṇṇaṃ vedāna pāragūti vedaṃ vuccati ñāṇaṃ, vedena veditabbā bujjhitabbāti vedā, iruvedayajuvedasāmavedasaṅkhātā tayo ganthā, tesaṃ vedānaṃ pāraṃ pariyosānaṃ koṭiṃ gato pattoti pāragū. Sesaṃ pākaṭamevāti
ফলদাযকত্থেরঅপদানৰণ্ণনা সমত্তা।
Phaladāyakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৭. ফলদাযকত্থেরঅপদানং • 7. Phaladāyakattheraapadānaṃ
