| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. ப²லகதா³யகத்தே²ரஅபதா³னவண்ணனா
8. Phalakadāyakattheraapadānavaṇṇanā
யானகாரோ புரே ஆஸிந்திஆதி³கங் ஆயஸ்மதோ ப²லகதா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ அனேகேஸு அத்தபா⁴வேஸு கதபுஞ்ஞஸம்பா⁴ரோ ஸித்³த⁴த்த²ஸ்ஸ ப⁴க³வதோ காலே வட்³ட⁴கிகுலே நிப்³ப³த்தோ ரதனத்தயே பஸன்னோ சந்த³னேன ஆலம்ப³னப²லகங் கத்வா ப⁴க³வதோ அதா³ஸி. ப⁴க³வா தஸ்ஸானுமோத³னங் அகாஸி.
Yānakāro pure āsintiādikaṃ āyasmato phalakadāyakattherassa apadānaṃ. Ayampi purimabuddhesu katādhikāro anekesu attabhāvesu katapuññasambhāro siddhatthassa bhagavato kāle vaḍḍhakikule nibbatto ratanattaye pasanno candanena ālambanaphalakaṃ katvā bhagavato adāsi. Bhagavā tassānumodanaṃ akāsi.
37. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ ஸப்³ப³த்த² காலே சித்தஸுக²பீணிதோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்வா ஸத்து² த⁴ம்மதே³ஸனங் ஸுத்வா ஸஞ்ஜாதப்பஸாதோ³ பப்³ப³ஜித்வா வாயமந்தோ நசிரஸ்ஸேவ ஸஹ படிஸம்பி⁴தா³ஹி அரஹத்தங் பத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ யானகாரோ புரே ஆஸிந்திஆதி³மாஹ. தத்த² யானகாரோதி யந்தி ஏதேன இச்சி²திச்சி²தட்டா²னந்தி யானங், தங் கரோதீதி யானகாரோ, புரே பு³த்³த⁴த³ஸ்ஸனஸமயே அஹங் யானகாரோ ஆஸிங் அஹோஸிந்தி அத்தோ². சந்த³னங் ப²லகங் கத்வாதி சந்த³தி பரிளாஹங் வூபஸமேதீதி சந்த³னங். அத² வா சந்த³ந்தி ஸுக³ந்த⁴வாஸனத்த²ங் ஸரீரங் விலிம்பந்தி ஏதேனாதி சந்த³னங், தங் ஆலம்ப³னப²லகங் கத்வா. லோகப³ந்து⁴னோதி ஸகலலோகஸ்ஸ ப³ந்து⁴ ஞாதிபூ⁴தோதி லோகப³ந்து⁴, தஸ்ஸ லோகப³ந்து⁴னோ ஸத்து²ஸ்ஸ அதா³ஸிந்தி அத்தோ². ஸேஸங் ஸுவிஞ்ஞெய்யமேவாதி.
37. So tena puññena devamanussesu saṃsaranto sabbattha kāle cittasukhapīṇito ubhayasampattiyo anubhavitvā imasmiṃ buddhuppāde kulagehe nibbatto viññutaṃ patvā satthu dhammadesanaṃ sutvā sañjātappasādo pabbajitvā vāyamanto nacirasseva saha paṭisambhidāhi arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento yānakāro pure āsintiādimāha. Tattha yānakāroti yanti etena icchiticchitaṭṭhānanti yānaṃ, taṃ karotīti yānakāro, pure buddhadassanasamaye ahaṃ yānakāro āsiṃ ahosinti attho. Candanaṃ phalakaṃ katvāti candati pariḷāhaṃ vūpasametīti candanaṃ. Atha vā candanti sugandhavāsanatthaṃ sarīraṃ vilimpanti etenāti candanaṃ, taṃ ālambanaphalakaṃ katvā. Lokabandhunoti sakalalokassa bandhu ñātibhūtoti lokabandhu, tassa lokabandhuno satthussa adāsinti attho. Sesaṃ suviññeyyamevāti.
ப²லகதா³யகத்தே²ரஅபதா³னவண்ணனா ஸமத்தா.
Phalakadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. ப²லகதா³யகத்தே²ரஅபதா³னங் • 8. Phalakadāyakattheraapadānaṃ
