| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೮. ಫಲಕದಾಯಕತ್ಥೇರಅಪದಾನವಣ್ಣನಾ
8. Phalakadāyakattheraapadānavaṇṇanā
ಯಾನಕಾರೋ ಪುರೇ ಆಸಿನ್ತಿಆದಿಕಂ ಆಯಸ್ಮತೋ ಫಲಕದಾಯಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ಅನೇಕೇಸು ಅತ್ತಭಾವೇಸು ಕತಪುಞ್ಞಸಮ್ಭಾರೋ ಸಿದ್ಧತ್ಥಸ್ಸ ಭಗವತೋ ಕಾಲೇ ವಡ್ಢಕಿಕುಲೇ ನಿಬ್ಬತ್ತೋ ರತನತ್ತಯೇ ಪಸನ್ನೋ ಚನ್ದನೇನ ಆಲಮ್ಬನಫಲಕಂ ಕತ್ವಾ ಭಗವತೋ ಅದಾಸಿ। ಭಗವಾ ತಸ್ಸಾನುಮೋದನಂ ಅಕಾಸಿ।
Yānakāro pure āsintiādikaṃ āyasmato phalakadāyakattherassa apadānaṃ. Ayampi purimabuddhesu katādhikāro anekesu attabhāvesu katapuññasambhāro siddhatthassa bhagavato kāle vaḍḍhakikule nibbatto ratanattaye pasanno candanena ālambanaphalakaṃ katvā bhagavato adāsi. Bhagavā tassānumodanaṃ akāsi.
೩೭. ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ಸಬ್ಬತ್ಥ ಕಾಲೇ ಚಿತ್ತಸುಖಪೀಣಿತೋ ಉಭಯಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ವಾ ಸತ್ಥು ಧಮ್ಮದೇಸನಂ ಸುತ್ವಾ ಸಞ್ಜಾತಪ್ಪಸಾದೋ ಪಬ್ಬಜಿತ್ವಾ ವಾಯಮನ್ತೋ ನಚಿರಸ್ಸೇವ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪತ್ವಾ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಯಾನಕಾರೋ ಪುರೇ ಆಸಿನ್ತಿಆದಿಮಾಹ। ತತ್ಥ ಯಾನಕಾರೋತಿ ಯನ್ತಿ ಏತೇನ ಇಚ್ಛಿತಿಚ್ಛಿತಟ್ಠಾನನ್ತಿ ಯಾನಂ, ತಂ ಕರೋತೀತಿ ಯಾನಕಾರೋ, ಪುರೇ ಬುದ್ಧದಸ್ಸನಸಮಯೇ ಅಹಂ ಯಾನಕಾರೋ ಆಸಿಂ ಅಹೋಸಿನ್ತಿ ಅತ್ಥೋ। ಚನ್ದನಂ ಫಲಕಂ ಕತ್ವಾತಿ ಚನ್ದತಿ ಪರಿಳಾಹಂ ವೂಪಸಮೇತೀತಿ ಚನ್ದನಂ। ಅಥ ವಾ ಚನ್ದನ್ತಿ ಸುಗನ್ಧವಾಸನತ್ಥಂ ಸರೀರಂ ವಿಲಿಮ್ಪನ್ತಿ ಏತೇನಾತಿ ಚನ್ದನಂ, ತಂ ಆಲಮ್ಬನಫಲಕಂ ಕತ್ವಾ। ಲೋಕಬನ್ಧುನೋತಿ ಸಕಲಲೋಕಸ್ಸ ಬನ್ಧು ಞಾತಿಭೂತೋತಿ ಲೋಕಬನ್ಧು, ತಸ್ಸ ಲೋಕಬನ್ಧುನೋ ಸತ್ಥುಸ್ಸ ಅದಾಸಿನ್ತಿ ಅತ್ಥೋ। ಸೇಸಂ ಸುವಿಞ್ಞೇಯ್ಯಮೇವಾತಿ।
37. So tena puññena devamanussesu saṃsaranto sabbattha kāle cittasukhapīṇito ubhayasampattiyo anubhavitvā imasmiṃ buddhuppāde kulagehe nibbatto viññutaṃ patvā satthu dhammadesanaṃ sutvā sañjātappasādo pabbajitvā vāyamanto nacirasseva saha paṭisambhidāhi arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento yānakāro pure āsintiādimāha. Tattha yānakāroti yanti etena icchiticchitaṭṭhānanti yānaṃ, taṃ karotīti yānakāro, pure buddhadassanasamaye ahaṃ yānakāro āsiṃ ahosinti attho. Candanaṃ phalakaṃ katvāti candati pariḷāhaṃ vūpasametīti candanaṃ. Atha vā candanti sugandhavāsanatthaṃ sarīraṃ vilimpanti etenāti candanaṃ, taṃ ālambanaphalakaṃ katvā. Lokabandhunoti sakalalokassa bandhu ñātibhūtoti lokabandhu, tassa lokabandhuno satthussa adāsinti attho. Sesaṃ suviññeyyamevāti.
ಫಲಕದಾಯಕತ್ಥೇರಅಪದಾನವಣ್ಣನಾ ಸಮತ್ತಾ।
Phalakadāyakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೮. ಫಲಕದಾಯಕತ್ಥೇರಅಪದಾನಂ • 8. Phalakadāyakattheraapadānaṃ
