| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
8. ඵලකදායකත්‌ථෙරඅපදානවණ්‌ණනා
8. Phalakadāyakattheraapadānavaṇṇanā
යානකාරො පුරෙ ආසින්‌තිආදිකං ආයස්‌මතො ඵලකදායකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො අනෙකෙසු අත්‌තභාවෙසු කතපුඤ්‌ඤසම්‌භාරො සිද්‌ධත්‌ථස්‌ස භගවතො කාලෙ වඩ්‌ඪකිකුලෙ නිබ්‌බත්‌තො රතනත්‌තයෙ පසන්‌නො චන්‌දනෙන ආලම්‌බනඵලකං කත්‌වා භගවතො අදාසි. භගවා තස්‌සානුමොදනං අකාසි.
Yānakāro pure āsintiādikaṃ āyasmato phalakadāyakattherassa apadānaṃ. Ayampi purimabuddhesu katādhikāro anekesu attabhāvesu katapuññasambhāro siddhatthassa bhagavato kāle vaḍḍhakikule nibbatto ratanattaye pasanno candanena ālambanaphalakaṃ katvā bhagavato adāsi. Bhagavā tassānumodanaṃ akāsi.
37. සො තෙන පුඤ්‌ඤෙන දෙවමනුස්‌සෙසු සංසරන්‌තො සබ්‌බත්‌ථ කාලෙ චිත්‌තසුඛපීණිතො උභයසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො විඤ්‌ඤුතං පත්‌වා සත්‌ථු ධම්‌මදෙසනං සුත්‌වා සඤ්‌ජාතප්‌පසාදො පබ්‌බජිත්‌වා වායමන්‌තො නචිරස්‌සෙව සහ පටිසම්‌භිදාහි අරහත්‌තං පත්‌වා අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො යානකාරො පුරෙ ආසින්‌තිආදිමාහ. තත්‌ථ යානකාරොති යන්‌ති එතෙන ඉච්‌ඡිතිච්‌ඡිතට්‌ඨානන්‌ති යානං, තං කරොතීති යානකාරො, පුරෙ බුද්‌ධදස්‌සනසමයෙ අහං යානකාරො ආසිං අහොසින්‌ති අත්‌ථො. චන්‌දනං ඵලකං කත්‌වාති චන්‌දති පරිළාහං වූපසමෙතීති චන්‌දනං. අථ වා චන්‌දන්‌ති සුගන්‌ධවාසනත්‌ථං සරීරං විලිම්‌පන්‌ති එතෙනාති චන්‌දනං, තං ආලම්‌බනඵලකං කත්‌වා. ලොකබන්‌ධුනොති සකලලොකස්‌ස බන්‌ධු ඤාතිභූතොති ලොකබන්‌ධු, තස්‌ස ලොකබන්‌ධුනො සත්‌ථුස්‌ස අදාසින්‌ති අත්‌ථො. සෙසං සුවිඤ්‌ඤෙය්‍යමෙවාති.
37. So tena puññena devamanussesu saṃsaranto sabbattha kāle cittasukhapīṇito ubhayasampattiyo anubhavitvā imasmiṃ buddhuppāde kulagehe nibbatto viññutaṃ patvā satthu dhammadesanaṃ sutvā sañjātappasādo pabbajitvā vāyamanto nacirasseva saha paṭisambhidāhi arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento yānakāro pure āsintiādimāha. Tattha yānakāroti yanti etena icchiticchitaṭṭhānanti yānaṃ, taṃ karotīti yānakāro, pure buddhadassanasamaye ahaṃ yānakāro āsiṃ ahosinti attho. Candanaṃ phalakaṃ katvāti candati pariḷāhaṃ vūpasametīti candanaṃ. Atha vā candanti sugandhavāsanatthaṃ sarīraṃ vilimpanti etenāti candanaṃ, taṃ ālambanaphalakaṃ katvā. Lokabandhunoti sakalalokassa bandhu ñātibhūtoti lokabandhu, tassa lokabandhuno satthussa adāsinti attho. Sesaṃ suviññeyyamevāti.
ඵලකදායකත්‌ථෙරඅපදානවණ්‌ණනා සමත්‌තා.
Phalakadāyakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 8. ඵලකදායකත්‌ථෙරඅපදානං • 8. Phalakadāyakattheraapadānaṃ
