| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
10. ப²லஞாணகதா²வண்ணனா
10. Phalañāṇakathāvaṇṇanā
443-444. இதா³னி ப²லே ஞாணகதா² நாம ஹோதி. தத்த² ‘‘பு³த்³தா⁴பி ஸத்தானங் அரியப²லப்பத்தியா த⁴ம்மங் தே³ஸெந்தி ஸாவகாபி, இதி இமினா ஸாமஞ்ஞேன பு³த்³தா⁴னங் விய ஸாவகானம்பி தேன தேன ஸத்தேன பத்தப்³பே³ ப²லே ஞாணங் அத்தீ²’’தி யேஸங் லத்³தி⁴, ஸெய்யதா²பி அந்த⁴கானங்; தே ஸந்தா⁴ய ஸாவகஸ்ஸாதி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ‘‘யதி³ ஸாவகஸ்ஸ ப²லே ஞாணங் அத்தி², யதா² பு³த்³தா⁴ ஸமானேபி ஸோதாபத்திப²லே அத்தனோ ஞாணப³லேன ‘அயங் ஏகபீ³ஜீ, அயங் கோலங்கோலோ, அயங் ஸத்தக்க²த்துபரமோ’தி ப²லஸ்ஸகதங் பஞ்ஞபெந்தி, கிங் தே ஏவங் ஸாவகோபீ’’தி சோதே³துங் ஸாவகோ ப²லஸ்ஸ கதங் பஞ்ஞபேதீதி ஆஹ. இதரோ படிக்கி²பதி.
443-444. Idāni phale ñāṇakathā nāma hoti. Tattha ‘‘buddhāpi sattānaṃ ariyaphalappattiyā dhammaṃ desenti sāvakāpi, iti iminā sāmaññena buddhānaṃ viya sāvakānampi tena tena sattena pattabbe phale ñāṇaṃ atthī’’ti yesaṃ laddhi, seyyathāpi andhakānaṃ; te sandhāya sāvakassāti pucchā sakavādissa, paṭiññā itarassa. Atha naṃ ‘‘yadi sāvakassa phale ñāṇaṃ atthi, yathā buddhā samānepi sotāpattiphale attano ñāṇabalena ‘ayaṃ ekabījī, ayaṃ kolaṃkolo, ayaṃ sattakkhattuparamo’ti phalassakataṃ paññapenti, kiṃ te evaṃ sāvakopī’’ti codetuṃ sāvako phalassa kataṃ paññapetīti āha. Itaro paṭikkhipati.
அத்தி² ஸாவகஸ்ஸ ப²லபரோபரியத்தீதிஆதி³ ப²லே ஞாணஸ்ஸ அத்தி²தாய பச்சயபுச்ச²னத்த²ங் வுத்தங். அயஞ்ஹெத்த² அதி⁴ப்பாயோ – பு³த்³தா⁴னங் ‘‘இத³ங் ப²லங் பரங், இத³ங் ஓபர’’ந்தி ஏவங் ப²லானங் உச்சாவசபா⁴வஜானநஸங்கா²தா ப²லே பரோபரியத்தி நாம அத்தி². ததா² இந்த்³ரியபுக்³க³லபரோபரியத்தியோ, தாஸங் அத்தி²தாய தஸ்ஸ தஸ்ஸ புக்³க³லஸ்ஸ தேஸங் தேஸங் இந்த்³ரியானங் வஸேன தங் தங் ப²லங் ஜானந்தி, கிங் தே ஸாவகஸ்ஸாபி ஏதா பரோபரியத்தியோ அத்தீ²தி.
Atthi sāvakassa phalaparopariyattītiādi phale ñāṇassa atthitāya paccayapucchanatthaṃ vuttaṃ. Ayañhettha adhippāyo – buddhānaṃ ‘‘idaṃ phalaṃ paraṃ, idaṃ opara’’nti evaṃ phalānaṃ uccāvacabhāvajānanasaṅkhātā phale paropariyatti nāma atthi. Tathā indriyapuggalaparopariyattiyo, tāsaṃ atthitāya tassa tassa puggalassa tesaṃ tesaṃ indriyānaṃ vasena taṃ taṃ phalaṃ jānanti, kiṃ te sāvakassāpi etā paropariyattiyo atthīti.
அத்தி² ஸாவகஸ்ஸ க²ந்த⁴பஞ்ஞத்தீதிஆதீ³னிபி ‘‘யதி³ தே ஸாவகஸ்ஸ பு³த்³தா⁴னங் விய ப²லே ஞாணங் அத்தி², இமா ஹி பிஸ்ஸ பஞ்ஞத்தீஹி ப⁴விதப்³ப³ங். கிமஸ்ஸ தா அத்தி², ஸக்கோதி ஸோ ஏதா பஞ்ஞத்தியோ அத்தனோ ப³லேன ஜானிதுங் வா பஞ்ஞபேதுங் வா’’தி சோத³னத்த²ங் வுத்தானி. ஸாவகோ ஜினோதிஆதி³ ‘‘யதி³ ஸாவகஸ்ஸ பு³த்³தா⁴னங் விய ப²லே ஞாணங் அத்தி², ஏவங் ஸந்தே ஸ்வேவ ஜினோ’’தி சோத³னத்த²ங் வுத்தங். ஸாவகோ அனுப்பன்னஸ்ஸாதி பஞ்ஹேபி அயமேவ நயோ. அஞ்ஞாணீதி பஞ்ஹே அவிஜ்ஜாஸங்கா²தஸ்ஸ அஞ்ஞாணஸ்ஸ விஹதத்தா படிக்கி²த்தோ, ந பனஸ்ஸ பு³த்³தா⁴னங் விய ப²லே ஞாணங் அத்தி². தஸ்மா அப்பதிட்டி²தோவ பரவாதீ³வாதோ³தி.
Atthi sāvakassa khandhapaññattītiādīnipi ‘‘yadi te sāvakassa buddhānaṃ viya phale ñāṇaṃ atthi, imā hi pissa paññattīhi bhavitabbaṃ. Kimassa tā atthi, sakkoti so etā paññattiyo attano balena jānituṃ vā paññapetuṃ vā’’ti codanatthaṃ vuttāni. Sāvako jinotiādi ‘‘yadi sāvakassa buddhānaṃ viya phale ñāṇaṃ atthi, evaṃ sante sveva jino’’ti codanatthaṃ vuttaṃ. Sāvako anuppannassāti pañhepi ayameva nayo. Aññāṇīti pañhe avijjāsaṅkhātassa aññāṇassa vihatattā paṭikkhitto, na panassa buddhānaṃ viya phale ñāṇaṃ atthi. Tasmā appatiṭṭhitova paravādīvādoti.
ப²லஞாணகதா²வண்ணனா.
Phalañāṇakathāvaṇṇanā.
பஞ்சமோ வக்³கோ³.
Pañcamo vaggo.
மஹாபண்ணாஸகோ ஸமத்தோ.
Mahāpaṇṇāsako samatto.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (52) 10. ப²லஞாணகதா² • (52) 10. Phalañāṇakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 10. ப²லஞாணகதா²வண்ணனா • 10. Phalañāṇakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 10. ப²லஞாணகதா²வண்ணனா • 10. Phalañāṇakathāvaṇṇanā
