| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੧੦. ਫਲਞਾਣਕਥਾવਣ੍ਣਨਾ
10. Phalañāṇakathāvaṇṇanā
੪੪੩-੪੪੪. ਇਦਾਨਿ ਫਲੇ ਞਾਣਕਥਾ ਨਾਮ ਹੋਤਿ। ਤਤ੍ਥ ‘‘ਬੁਦ੍ਧਾਪਿ ਸਤ੍ਤਾਨਂ ਅਰਿਯਫਲਪ੍ਪਤ੍ਤਿਯਾ ਧਮ੍ਮਂ ਦੇਸੇਨ੍ਤਿ ਸਾવਕਾਪਿ, ਇਤਿ ਇਮਿਨਾ ਸਾਮਞ੍ਞੇਨ ਬੁਦ੍ਧਾਨਂ વਿਯ ਸਾવਕਾਨਮ੍ਪਿ ਤੇਨ ਤੇਨ ਸਤ੍ਤੇਨ ਪਤ੍ਤਬ੍ਬੇ ਫਲੇ ਞਾਣਂ ਅਤ੍ਥੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਸਾવਕਸ੍ਸਾਤਿ ਪੁਚ੍ਛਾ ਸਕવਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ। ਅਥ ਨਂ ‘‘ਯਦਿ ਸਾવਕਸ੍ਸ ਫਲੇ ਞਾਣਂ ਅਤ੍ਥਿ, ਯਥਾ ਬੁਦ੍ਧਾ ਸਮਾਨੇਪਿ ਸੋਤਾਪਤ੍ਤਿਫਲੇ ਅਤ੍ਤਨੋ ਞਾਣਬਲੇਨ ‘ਅਯਂ ਏਕਬੀਜੀ, ਅਯਂ ਕੋਲਂਕੋਲੋ, ਅਯਂ ਸਤ੍ਤਕ੍ਖਤ੍ਤੁਪਰਮੋ’ਤਿ ਫਲਸ੍ਸਕਤਂ ਪਞ੍ਞਪੇਨ੍ਤਿ, ਕਿਂ ਤੇ ਏવਂ ਸਾવਕੋਪੀ’’ਤਿ ਚੋਦੇਤੁਂ ਸਾવਕੋ ਫਲਸ੍ਸ ਕਤਂ ਪਞ੍ਞਪੇਤੀਤਿ ਆਹ। ਇਤਰੋ ਪਟਿਕ੍ਖਿਪਤਿ।
443-444. Idāni phale ñāṇakathā nāma hoti. Tattha ‘‘buddhāpi sattānaṃ ariyaphalappattiyā dhammaṃ desenti sāvakāpi, iti iminā sāmaññena buddhānaṃ viya sāvakānampi tena tena sattena pattabbe phale ñāṇaṃ atthī’’ti yesaṃ laddhi, seyyathāpi andhakānaṃ; te sandhāya sāvakassāti pucchā sakavādissa, paṭiññā itarassa. Atha naṃ ‘‘yadi sāvakassa phale ñāṇaṃ atthi, yathā buddhā samānepi sotāpattiphale attano ñāṇabalena ‘ayaṃ ekabījī, ayaṃ kolaṃkolo, ayaṃ sattakkhattuparamo’ti phalassakataṃ paññapenti, kiṃ te evaṃ sāvakopī’’ti codetuṃ sāvako phalassa kataṃ paññapetīti āha. Itaro paṭikkhipati.
ਅਤ੍ਥਿ ਸਾવਕਸ੍ਸ ਫਲਪਰੋਪਰਿਯਤ੍ਤੀਤਿਆਦਿ ਫਲੇ ਞਾਣਸ੍ਸ ਅਤ੍ਥਿਤਾਯ ਪਚ੍ਚਯਪੁਚ੍ਛਨਤ੍ਥਂ વੁਤ੍ਤਂ। ਅਯਞ੍ਹੇਤ੍ਥ ਅਧਿਪ੍ਪਾਯੋ – ਬੁਦ੍ਧਾਨਂ ‘‘ਇਦਂ ਫਲਂ ਪਰਂ, ਇਦਂ ਓਪਰ’’ਨ੍ਤਿ ਏવਂ ਫਲਾਨਂ ਉਚ੍ਚਾવਚਭਾવਜਾਨਨਸਙ੍ਖਾਤਾ ਫਲੇ ਪਰੋਪਰਿਯਤ੍ਤਿ ਨਾਮ ਅਤ੍ਥਿ। ਤਥਾ ਇਨ੍ਦ੍ਰਿਯਪੁਗ੍ਗਲਪਰੋਪਰਿਯਤ੍ਤਿਯੋ, ਤਾਸਂ ਅਤ੍ਥਿਤਾਯ ਤਸ੍ਸ ਤਸ੍ਸ ਪੁਗ੍ਗਲਸ੍ਸ ਤੇਸਂ ਤੇਸਂ ਇਨ੍ਦ੍ਰਿਯਾਨਂ વਸੇਨ ਤਂ ਤਂ ਫਲਂ ਜਾਨਨ੍ਤਿ, ਕਿਂ ਤੇ ਸਾવਕਸ੍ਸਾਪਿ ਏਤਾ ਪਰੋਪਰਿਯਤ੍ਤਿਯੋ ਅਤ੍ਥੀਤਿ।
Atthi sāvakassa phalaparopariyattītiādi phale ñāṇassa atthitāya paccayapucchanatthaṃ vuttaṃ. Ayañhettha adhippāyo – buddhānaṃ ‘‘idaṃ phalaṃ paraṃ, idaṃ opara’’nti evaṃ phalānaṃ uccāvacabhāvajānanasaṅkhātā phale paropariyatti nāma atthi. Tathā indriyapuggalaparopariyattiyo, tāsaṃ atthitāya tassa tassa puggalassa tesaṃ tesaṃ indriyānaṃ vasena taṃ taṃ phalaṃ jānanti, kiṃ te sāvakassāpi etā paropariyattiyo atthīti.
ਅਤ੍ਥਿ ਸਾવਕਸ੍ਸ ਖਨ੍ਧਪਞ੍ਞਤ੍ਤੀਤਿਆਦੀਨਿਪਿ ‘‘ਯਦਿ ਤੇ ਸਾવਕਸ੍ਸ ਬੁਦ੍ਧਾਨਂ વਿਯ ਫਲੇ ਞਾਣਂ ਅਤ੍ਥਿ, ਇਮਾ ਹਿ ਪਿਸ੍ਸ ਪਞ੍ਞਤ੍ਤੀਹਿ ਭવਿਤਬ੍ਬਂ। ਕਿਮਸ੍ਸ ਤਾ ਅਤ੍ਥਿ, ਸਕ੍ਕੋਤਿ ਸੋ ਏਤਾ ਪਞ੍ਞਤ੍ਤਿਯੋ ਅਤ੍ਤਨੋ ਬਲੇਨ ਜਾਨਿਤੁਂ વਾ ਪਞ੍ਞਪੇਤੁਂ વਾ’’ਤਿ ਚੋਦਨਤ੍ਥਂ વੁਤ੍ਤਾਨਿ। ਸਾવਕੋ ਜਿਨੋਤਿਆਦਿ ‘‘ਯਦਿ ਸਾવਕਸ੍ਸ ਬੁਦ੍ਧਾਨਂ વਿਯ ਫਲੇ ਞਾਣਂ ਅਤ੍ਥਿ, ਏવਂ ਸਨ੍ਤੇ ਸ੍વੇવ ਜਿਨੋ’’ਤਿ ਚੋਦਨਤ੍ਥਂ વੁਤ੍ਤਂ। ਸਾવਕੋ ਅਨੁਪ੍ਪਨ੍ਨਸ੍ਸਾਤਿ ਪਞ੍ਹੇਪਿ ਅਯਮੇવ ਨਯੋ। ਅਞ੍ਞਾਣੀਤਿ ਪਞ੍ਹੇ ਅવਿਜ੍ਜਾਸਙ੍ਖਾਤਸ੍ਸ ਅਞ੍ਞਾਣਸ੍ਸ વਿਹਤਤ੍ਤਾ ਪਟਿਕ੍ਖਿਤ੍ਤੋ, ਨ ਪਨਸ੍ਸ ਬੁਦ੍ਧਾਨਂ વਿਯ ਫਲੇ ਞਾਣਂ ਅਤ੍ਥਿ। ਤਸ੍ਮਾ ਅਪ੍ਪਤਿਟ੍ਠਿਤੋવ ਪਰવਾਦੀવਾਦੋਤਿ।
Atthi sāvakassa khandhapaññattītiādīnipi ‘‘yadi te sāvakassa buddhānaṃ viya phale ñāṇaṃ atthi, imā hi pissa paññattīhi bhavitabbaṃ. Kimassa tā atthi, sakkoti so etā paññattiyo attano balena jānituṃ vā paññapetuṃ vā’’ti codanatthaṃ vuttāni. Sāvako jinotiādi ‘‘yadi sāvakassa buddhānaṃ viya phale ñāṇaṃ atthi, evaṃ sante sveva jino’’ti codanatthaṃ vuttaṃ. Sāvako anuppannassāti pañhepi ayameva nayo. Aññāṇīti pañhe avijjāsaṅkhātassa aññāṇassa vihatattā paṭikkhitto, na panassa buddhānaṃ viya phale ñāṇaṃ atthi. Tasmā appatiṭṭhitova paravādīvādoti.
ਫਲਞਾਣਕਥਾવਣ੍ਣਨਾ।
Phalañāṇakathāvaṇṇanā.
ਪਞ੍ਚਮੋ વਗ੍ਗੋ।
Pañcamo vaggo.
ਮਹਾਪਣ੍ਣਾਸਕੋ ਸਮਤ੍ਤੋ।
Mahāpaṇṇāsako samatto.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਕਥਾવਤ੍ਥੁਪਾਲ਼ਿ • Kathāvatthupāḷi / (੫੨) ੧੦. ਫਲਞਾਣਕਥਾ • (52) 10. Phalañāṇakathā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਮੂਲਟੀਕਾ • Pañcapakaraṇa-mūlaṭīkā / ੧੦. ਫਲਞਾਣਕਥਾવਣ੍ਣਨਾ • 10. Phalañāṇakathāvaṇṇanā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਅਨੁਟੀਕਾ • Pañcapakaraṇa-anuṭīkā / ੧੦. ਫਲਞਾਣਕਥਾવਣ੍ਣਨਾ • 10. Phalañāṇakathāvaṇṇanā
