| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
12. ඵලඤාණනිද්‌දෙසො
12. Phalañāṇaniddeso
63. කථං පයොගප්‌පටිප්‌පස්‌සද්‌ධිපඤ්‌ඤා ඵලෙ ඤාණං? සොතාපත්‌තිමග්‌ගක්‌ඛණෙ දස්‌සනට්‌ඨෙන සම්‌මාදිට්‌ඨි මිච්‌ඡාදිට්‌ඨියා වුට්‌ඨාති, තදනුවත්‌තකකිලෙසෙහි ච ඛන්‌ධෙහි ච වුට්‌ඨාති, බහිද්‌ධා ච සබ්‌බනිමිත්‌තෙහි වුට්‌ඨාති. තංපයොගප්‌පටිප්‌පස්‌සද්‌ධත්‌තා උප්‌පජ්‌ජති සම්‌මාදිට්‌ඨි. මග්‌ගස්‌සෙතං ඵලං.
63. Kathaṃ payogappaṭippassaddhipaññā phale ñāṇaṃ? Sotāpattimaggakkhaṇe dassanaṭṭhena sammādiṭṭhi micchādiṭṭhiyā vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṃpayogappaṭippassaddhattā uppajjati sammādiṭṭhi. Maggassetaṃ phalaṃ.
අභිනිරොපනට්‌ඨෙන සම්‌මාසඞ්‌කප්‌පො මිච්‌ඡාසඞ්‌කප්‌පා වුට්‌ඨාති තදනුවත්‌තකකිලෙසෙහි ච ඛන්‌ධෙහි ච වුට්‌ඨාති, බහිද්‌ධා ච සබ්‌බනිමිත්‌තෙහි වුට්‌ඨාති. තංපයොගප්‌පටිප්‌පස්‌සද්‌ධත්‌තා උප්‌පජ්‌ජති සම්‌මාසඞ්‌කප්‌පො. මග්‌ගස්‌සෙතං ඵලං.
Abhiniropanaṭṭhena sammāsaṅkappo micchāsaṅkappā vuṭṭhāti tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṃpayogappaṭippassaddhattā uppajjati sammāsaṅkappo. Maggassetaṃ phalaṃ.
පරිග්‌ගහට්‌ඨෙන සම්‌මාවාචා මිච්‌ඡාවාචාය වුට්‌ඨාති, තදනුවත්‌තකකිලෙසෙහි ච ඛන්‌ධෙහි ච වුට්‌ඨාති, බහිද්‌ධා ච සබ්‌බනිමිත්‌තෙහි වුට්‌ඨාති. තංපයොගප්‌පටිප්‌පස්‌සද්‌ධත්‌තා උප්‌පජ්‌ජති සම්‌මාවාචා. මග්‌ගස්‌සෙතං ඵලං.
Pariggahaṭṭhena sammāvācā micchāvācāya vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṃpayogappaṭippassaddhattā uppajjati sammāvācā. Maggassetaṃ phalaṃ.
සමුට්‌ඨානට්‌ඨෙන සම්‌මාකම්‌මන්‌තො මිච්‌ඡාකම්‌මන්‌තා වුට්‌ඨාති, තදනුවත්‌තකකිලෙසෙහි ච ඛන්‌ධෙහි ච වුට්‌ඨාති, බහිද්‌ධා ච සබ්‌බනිමිත්‌තෙහි වුට්‌ඨාති. තංපයොගප්‌පටිප්‌පස්‌සද්‌ධත්‌තා උප්‌පජ්‌ජති සම්‌මාකම්‌මන්‌තො. මග්‌ගස්‌සෙතං ඵලං.
Samuṭṭhānaṭṭhena sammākammanto micchākammantā vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṃpayogappaṭippassaddhattā uppajjati sammākammanto. Maggassetaṃ phalaṃ.
වොදානට්‌ඨෙන සම්‌මාආජීවො මිච්‌ඡාආජීවා වුට්‌ඨාති, තදනුවත්‌තකකිලෙසෙහි ච ඛන්‌ධෙහි ච වුට්‌ඨාති, බහිද්‌ධා ච සබ්‌බනිමිත්‌තෙහි වුට්‌ඨාති. තංපයොගප්‌පටිප්‌පස්‌සද්‌ධත්‌තා උප්‌පජ්‌ජති සම්‌මාආජීවො. මග්‌ගස්‌සෙතං ඵලං.
Vodānaṭṭhena sammāājīvo micchāājīvā vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṃpayogappaṭippassaddhattā uppajjati sammāājīvo. Maggassetaṃ phalaṃ.
පග්‌ගහට්‌ඨෙන සම්‌මාවායාමො මිච්‌ඡාවායාමා වුට්‌ඨාති, තදනුවත්‌තකකිලෙසෙහි ච ඛන්‌ධෙහි ච වුට්‌ඨාති, බහිද්‌ධා ච සබ්‌බනිමිත්‌තෙහි වුට්‌ඨාති. තංපයොගප්‌පටිප්‌පස්‌සද්‌ධත්‌තා උප්‌පජ්‌ජති සම්‌මාවායාමො. මග්‌ගස්‌සෙතං ඵලං.
Paggahaṭṭhena sammāvāyāmo micchāvāyāmā vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṃpayogappaṭippassaddhattā uppajjati sammāvāyāmo. Maggassetaṃ phalaṃ.
උපට්‌ඨානට්‌ඨෙන සම්‌මාසති මිච්‌ඡාසතියා වුට්‌ඨාති, තදනුවත්‌තකකිලෙසෙහි ච ඛන්‌ධෙහි ච වුට්‌ඨාති, බහිද්‌ධා ච සබ්‌බනිමිත්‌තෙහි වුට්‌ඨාති. තංපයොගප්‌පටිප්‌පස්‌සද්‌ධත්‌තා උප්‌පජ්‌ජති සම්‌මාසති. මග්‌ගස්‌සෙතං ඵලං.
Upaṭṭhānaṭṭhena sammāsati micchāsatiyā vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṃpayogappaṭippassaddhattā uppajjati sammāsati. Maggassetaṃ phalaṃ.
අවික්‌ඛෙපට්‌ඨෙන සම්‌මාසමාධි මිච්‌ඡාසමාධිතො වුට්‌ඨාති, තදනුවත්‌තකකිලෙසෙහි ච ඛන්‌ධෙහි ච වුට්‌ඨාති, බහිද්‌ධා ච සබ්‌බනිමිත්‌තෙහි වුට්‌ඨාති. තංපයොගප්‌පටිප්‌පස්‌සද්‌ධත්‌තා උප්‌පජ්‌ජති සම්‌මාසමාධි. මග්‌ගස්‌සෙතං ඵලං.
Avikkhepaṭṭhena sammāsamādhi micchāsamādhito vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṃpayogappaṭippassaddhattā uppajjati sammāsamādhi. Maggassetaṃ phalaṃ.
සකදාගාමිමග්‌ගක්‌ඛණෙ දස්‌සනට්‌ඨෙන සම්‌මාදිට්‌ඨි…පෙ.… අවික්‌ඛෙපට්‌ඨෙන සම්‌මාසමාධි ඔළාරිකා කාමරාගසඤ්‌ඤොජනා පටිඝසඤ්‌ඤොජනා ඔළාරිකා කාමරාගානුසයා පටිඝානුසයා වුට්‌ඨාති , තදනුවත්‌තකකිලෙසෙහි ච ඛන්‌ධෙහි ච වුට්‌ඨාති, බහිද්‌ධා ච සබ්‌බනිමිත්‌තෙහි වුට්‌ඨාති. තංපයොගප්‌පටිප්‌පස්‌සද්‌ධත්‌තා උප්‌පජ්‌ජති සම්‌මාසමාධි. මග්‌ගස්‌සෙතං ඵලං.
Sakadāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi oḷārikā kāmarāgasaññojanā paṭighasaññojanā oḷārikā kāmarāgānusayā paṭighānusayā vuṭṭhāti , tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṃpayogappaṭippassaddhattā uppajjati sammāsamādhi. Maggassetaṃ phalaṃ.
අනාගාමිමග්‌ගක්‌ඛණෙ දස්‌සනට්‌ඨෙන සම්‌මාදිට්‌ඨි…පෙ.… අවික්‌ඛෙපට්‌ඨෙන සම්‌මාසමාධි අනුසහගතා කාමරාගසඤ්‌ඤොජනා පටිඝසඤ්‌ඤොජනා අනුසහගතා කාමරාගානුසයා පටිඝානුසයා වුට්‌ඨාති, තදනුවත්‌තකකිලෙසෙහි ච ඛන්‌ධෙහි ච වුට්‌ඨාති, බහිද්‌ධා ච සබ්‌බනිමිත්‌තෙහි වුට්‌ඨාති. තංපයොගප්‌පටිප්‌පස්‌සද්‌ධත්‌තා උප්‌පජ්‌ජති සම්‌මාසමාධි. මග්‌ගස්‌සෙතං ඵලං.
Anāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi anusahagatā kāmarāgasaññojanā paṭighasaññojanā anusahagatā kāmarāgānusayā paṭighānusayā vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṃpayogappaṭippassaddhattā uppajjati sammāsamādhi. Maggassetaṃ phalaṃ.
අරහත්‌තමග්‌ගක්‌ඛණෙ දස්‌සනට්‌ඨෙන සම්‌මාදිට්‌ඨි…පෙ.… අවික්‌ඛෙපට්‌ඨෙන සම්‌මාසමාධි රූපරාගා අරූපරාගා මානා උද්‌ධච්‌චා අවිජ්‌ජාය මානානුසයා භවරාගානුසයා අවිජ්‌ජානුසයා වුට්‌ඨාති, තදනුවත්‌තකකිලෙසෙහි ච ඛන්‌ධෙහි ච වුට්‌ඨාති, බහිද්‌ධා ච සබ්‌බනිමිත්‌තෙහි වුට්‌ඨාති. තංපයොගප්‌පටිප්‌පස්‌සද්‌ධත්‌තා උප්‌පජ්‌ජති සම්‌මාසමාධි. මග්‌ගස්‌සෙතං ඵලං. තං ඤාතට්‌ඨෙන ඤාණං, පජානනට්‌ඨෙන පඤ්‌ඤා. තෙන වුච්‌චති – ‘‘පයොගප්‌පටිප්‌පස්‌සද්‌ධිපඤ්‌ඤා ඵලෙ ඤාණං’’.
Arahattamaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi rūparāgā arūparāgā mānā uddhaccā avijjāya mānānusayā bhavarāgānusayā avijjānusayā vuṭṭhāti, tadanuvattakakilesehi ca khandhehi ca vuṭṭhāti, bahiddhā ca sabbanimittehi vuṭṭhāti. Taṃpayogappaṭippassaddhattā uppajjati sammāsamādhi. Maggassetaṃ phalaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘payogappaṭippassaddhipaññā phale ñāṇaṃ’’.
ඵලඤාණනිද්‌දෙසො ද්‌වාදසමො.
Phalañāṇaniddeso dvādasamo.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / 12. ඵලඤාණනිද්‌දෙසවණ්‌ණනා • 12. Phalañāṇaniddesavaṇṇanā
