| Library / Tipiṭaka / д̇ибидага • Tipiṭaka / милинд̣̇абан̃хабаал̣и • Milindapañhapāḷi |
4. парусаваажаабхаавабан̃хо
4. Pharusavācābhāvapañho
4. ‘‘бханд̇з нааг̇асзна, бхаасид̇амбзд̇ам̣ т̇зрзна саарибуд̇д̇зна д̇хаммасзнаабад̇инаа ‘барисуд̣̇д̇хаважийсамаажааро аавусо д̇ат̇ааг̇ад̇о, над̇т̇и д̇ат̇ааг̇ад̇асса важийд̣̇ужжарид̇ам̣, яам̣ д̇ат̇ааг̇ад̇о рагкзяяа ‘маа мз ид̣̇ам̣ баро ан̃н̃аасий’д̇и. буна жа д̇ат̇ааг̇ад̇о т̇зрасса суд̣̇иннасса галанд̣̇абуд̇д̇асса абараад̇хз баарааж̇игам̣ бан̃н̃абзнд̇о парусаахи ваажаахи могхабурисаваад̣̇зна самуд̣̇аажари, д̇зна жа со т̇зро могхабурисаваад̣̇зна ман̇гужид̇д̇авасзна рунд̇хид̇ад̇д̇аа виббадисаарий наасагки арияамаг̇г̇ам̣ бадивиж̇жхид̇ум̣. яад̣̇и, бханд̇з нааг̇асзна, барисуд̣̇д̇хаважийсамаажааро д̇ат̇ааг̇ад̇о, над̇т̇и д̇ат̇ааг̇ад̇асса важийд̣̇ужжарид̇ам̣, д̇зна хи д̇ат̇ааг̇ад̇зна т̇зрасса суд̣̇иннасса галанд̣̇абуд̇д̇асса абараад̇хз могхабурисаваад̣̇зна самуд̣̇аажин̣н̣анд̇и яам̣ важанам̣, д̇ам̣ мижчаа. яад̣̇и бхаг̇авад̇аа т̇зрасса суд̣̇иннасса галанд̣̇абуд̇д̇асса абараад̇хз могхабурисаваад̣̇зна самуд̣̇аажин̣н̣ам̣, д̇зна хи барисуд̣̇д̇хаважийсамаажааро д̇ат̇ааг̇ад̇о, над̇т̇и д̇ат̇ааг̇ад̇асса важийд̣̇ужжарид̇анд̇и д̇амби важанам̣ мижчаа. аяамби убхад̇о годиго бан̃хо д̇аваануббад̇д̇о, со д̇аяаа ниб̣б̣аахид̇аб̣б̣о’’д̇и.
4. ‘‘Bhante nāgasena, bhāsitampetaṃ therena sāriputtena dhammasenāpatinā ‘parisuddhavacīsamācāro āvuso tathāgato, natthi tathāgatassa vacīduccaritaṃ, yaṃ tathāgato rakkheyya ‘mā me idaṃ paro aññāsī’ti. Puna ca tathāgato therassa sudinnassa kalandaputtassa aparādhe pārājikaṃ paññapento pharusāhi vācāhi moghapurisavādena samudācari, tena ca so thero moghapurisavādena maṅkucittavasena rundhitattā vippaṭisārī nāsakkhi ariyamaggaṃ paṭivijjhituṃ. Yadi, bhante nāgasena, parisuddhavacīsamācāro tathāgato, natthi tathāgatassa vacīduccaritaṃ, tena hi tathāgatena therassa sudinnassa kalandaputtassa aparādhe moghapurisavādena samudāciṇṇanti yaṃ vacanaṃ, taṃ micchā. Yadi bhagavatā therassa sudinnassa kalandaputtassa aparādhe moghapurisavādena samudāciṇṇaṃ, tena hi parisuddhavacīsamācāro tathāgato, natthi tathāgatassa vacīduccaritanti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘бхаасид̇амбзд̇ам̣, махаарааж̇а, т̇зрзна саарибуд̇д̇зна д̇хаммасзнаабад̇инаа ‘барисуд̣̇д̇хаважийсамаажааро аавусо д̇ат̇ааг̇ад̇о, над̇т̇и д̇ат̇ааг̇ад̇асса важийд̣̇ужжарид̇ам̣, яам̣ д̇ат̇ааг̇ад̇о рагкзяяа ‘маа мз ид̣̇ам̣ баро ан̃н̃аасий’д̇и. ааяасмад̇о жа суд̣̇иннасса галанд̣̇абуд̇д̇асса абараад̇хз баарааж̇игам̣ бан̃н̃абзнд̇зна бхаг̇авад̇аа могхабурисаваад̣̇зна самуд̣̇аажин̣н̣ам̣, д̇ан̃жа бана ад̣̇удтажид̇д̇зна асаарамбхзна яаат̇аавалагкан̣зна. гин̃жа д̇ад̇т̇а яаат̇аавалагкан̣ам̣, яасса, махаарааж̇а, буг̇г̇аласса имасмим̣ ад̇д̇абхаавз жад̇усажжаабхисамаяо на ход̇и, д̇асса бурисад̇д̇анам̣ могхам̣ ан̃н̃ам̣ гаяирамаанам̣ ан̃н̃зна самбхавад̇и, д̇зна вужжад̇и ‘могхабурисо’д̇и. ид̇и, махаарааж̇а, бхаг̇авад̇аа ааяасмад̇о суд̣̇иннасса галанд̣̇абуд̇д̇асса сад̇аававажанзна самуд̣̇аажин̣н̣ам̣, но абхууд̇аваад̣̇знаа’’д̇и.
‘‘Bhāsitampetaṃ, mahārāja, therena sāriputtena dhammasenāpatinā ‘parisuddhavacīsamācāro āvuso tathāgato, natthi tathāgatassa vacīduccaritaṃ, yaṃ tathāgato rakkheyya ‘mā me idaṃ paro aññāsī’ti. Āyasmato ca sudinnassa kalandaputtassa aparādhe pārājikaṃ paññapentena bhagavatā moghapurisavādena samudāciṇṇaṃ, tañca pana aduṭṭhacittena asārambhena yāthāvalakkhaṇena. Kiñca tattha yāthāvalakkhaṇaṃ, yassa, mahārāja, puggalassa imasmiṃ attabhāve catusaccābhisamayo na hoti, tassa purisattanaṃ moghaṃ aññaṃ kayiramānaṃ aññena sambhavati, tena vuccati ‘moghapuriso’ti. Iti, mahārāja, bhagavatā āyasmato sudinnassa kalandaputtassa satāvavacanena samudāciṇṇaṃ, no abhūtavādenā’’ti.
‘‘сабхаавамби, бханд̇з нааг̇асзна, яо аггосанд̇о бхан̣ад̇и, д̇асса маяам̣ гахаабан̣ам̣ д̣̇ан̣д̣ам̣ д̇хаарзма, абараад̇хо язва со вад̇т̇ум̣ ниссааяа висум̣ вохаарам̣ аажаранд̇о аггосад̇ий’’д̇и. ‘‘ад̇т̇и бана, махаарааж̇а, суд̇абуб̣б̣ам̣ д̇аяаа калид̇асса абхиваад̣̇анам̣ ваа бажжудтаанам̣ ваа саггаарам̣ ваа убааяанаануббад̣̇аанам̣ ваа’’д̇и? ‘‘на хи, бханд̇з, яад̇о гуд̇ожи яад̇т̇а гад̇т̇ажи калид̇о, со барибхаасанаарахо ход̇и д̇аж̇ж̇анаарахо, уд̇д̇аман̇г̇амбисса чинд̣̇анд̇и хананд̇иби б̣анд̇ханд̇иби гхаад̇знд̇иби жхаабзнд̇ибий’’д̇и 1. ‘‘д̇зна хи, махаарааж̇а, бхаг̇авад̇аа гирияаа язва гад̇аа, но агирияаа’’д̇и.
‘‘Sabhāvampi, bhante nāgasena, yo akkosanto bhaṇati, tassa mayaṃ kahāpaṇaṃ daṇḍaṃ dhārema, aparādho yeva so vatthuṃ nissāya visuṃ vohāraṃ ācaranto akkosatī’’ti. ‘‘Atthi pana, mahārāja, sutapubbaṃ tayā khalitassa abhivādanaṃ vā paccuṭṭhānaṃ vā sakkāraṃ vā upāyanānuppadānaṃ vā’’ti? ‘‘Na hi, bhante, yato kutoci yattha katthaci khalito, so paribhāsanāraho hoti tajjanāraho, uttamaṅgampissa chindanti hanantipi bandhantipi ghātentipi jhāpentipī’’ti 2. ‘‘Tena hi, mahārāja, bhagavatā kiriyā yeva katā, no akiriyā’’ti.
‘‘гирияамби, бханд̇з нааг̇асзна, гурумаанзна бад̇ируубзна гаад̇аб̣б̣ам̣ анужчавигзна, саванзнаби, бханд̇з нааг̇асзна, д̇ат̇ааг̇ад̇асса сад̣̇зваго лого од̇д̇аббад̇и хирияад̇и бхияяо д̣̇ассанзна д̇ад̇уд̇д̇арим̣ убасан̇гаманзна баяирубаасанзнаа’’д̇и. ‘‘аби ну ко, махаарааж̇а, д̇игижчаго абхисаннз гааяз губид̇з д̣̇осз синзханийяаани бхзсаж̇ж̇аани д̣̇зд̇ий’’д̇и? ‘‘на хи, бханд̇з, д̇ин̣хаани лзканийяаани бхзсаж̇ж̇аани д̣̇зд̇ий’’д̇и. ‘‘звамзва ко, махаарааж̇а, д̇ат̇ааг̇ад̇о саб̣б̣агилзсаб̣яаад̇хивуубасамааяа анусидтим̣ д̣̇зд̇и, парусааби, махаарааж̇а, д̇ат̇ааг̇ад̇асса ваажаа сад̇д̇з синзхаяад̇и, муд̣̇угз гарод̇и. яат̇аа, махаарааж̇а, ун̣хамби уд̣̇агам̣ яам̣ гин̃жи синзханийяам̣ синзхаяад̇и, муд̣̇угам̣ гарод̇и, звамзва ко, махаарааж̇а, парусааби д̇ат̇ааг̇ад̇асса ваажаа ад̇т̇авад̇ий ход̇и гарун̣аасахаг̇ад̇аа. яат̇аа, махаарааж̇а, бид̇уважанам̣ буд̇д̇аанам̣ ад̇т̇аванд̇ам̣ ход̇и гарун̣аасахаг̇ад̇ам̣, звамзва ко, махаарааж̇а, парусааби д̇ат̇ааг̇ад̇асса ваажаа ад̇т̇авад̇ий ход̇и гарун̣аасахаг̇ад̇аа. парусааби, махаарааж̇а, д̇ат̇ааг̇ад̇асса ваажаа сад̇д̇аанам̣ гилзсаббахаанаа 3 ход̇и. яат̇аа, махаарааж̇а, д̣̇уг̇г̇анд̇хамби г̇омуд̇д̇ам̣ бийд̇ам̣ вирасамби аг̇ад̣̇ам̣ кааяид̇ам̣ сад̇д̇аанам̣ б̣яаад̇хим̣ ханад̇и, звамзва ко, махаарааж̇а, парусааби д̇ат̇ааг̇ад̇асса ваажаа ад̇т̇авад̇ий гарун̣аасахаг̇ад̇аа. яат̇аа, махаарааж̇а, маханд̇оби д̇уулабун̃ж̇о 4 барасса гааяз нибад̇ид̇ваа руж̇ам̣ на гарод̇и, звамзва ко, махаарааж̇а, парусааби д̇ат̇ааг̇ад̇асса ваажаа на гассажи д̣̇угкам̣ уббаад̣̇зд̇ий’’д̇и. ‘‘сувинижчид̇о, бханд̇з нааг̇асзна, бан̃хо б̣ахуухи гааран̣зхи, саад̇ху, бханд̇з нааг̇асзна, звамзд̇ам̣ д̇ат̇аа самбадижчаамий’’д̇и.
‘‘Kiriyampi, bhante nāgasena, kurumānena patirūpena kātabbaṃ anucchavikena, savanenapi, bhante nāgasena, tathāgatassa sadevako loko ottappati hiriyati bhiyyo dassanena tatuttariṃ upasaṅkamanena payirupāsanenā’’ti. ‘‘Api nu kho, mahārāja, tikicchako abhisanne kāye kupite dose sinehanīyāni bhesajjāni detī’’ti? ‘‘Na hi, bhante, tiṇhāni lekhanīyāni bhesajjāni detī’’ti. ‘‘Evameva kho, mahārāja, tathāgato sabbakilesabyādhivūpasamāya anusiṭṭhiṃ deti, pharusāpi, mahārāja, tathāgatassa vācā satte sinehayati, muduke karoti. Yathā, mahārāja, uṇhampi udakaṃ yaṃ kiñci sinehanīyaṃ sinehayati, mudukaṃ karoti, evameva kho, mahārāja, pharusāpi tathāgatassa vācā atthavatī hoti karuṇāsahagatā. Yathā, mahārāja, pituvacanaṃ puttānaṃ atthavantaṃ hoti karuṇāsahagataṃ, evameva kho, mahārāja, pharusāpi tathāgatassa vācā atthavatī hoti karuṇāsahagatā. Pharusāpi, mahārāja, tathāgatassa vācā sattānaṃ kilesappahānā 5 hoti. Yathā, mahārāja, duggandhampi gomuttaṃ pītaṃ virasampi agadaṃ khāyitaṃ sattānaṃ byādhiṃ hanati, evameva kho, mahārāja, pharusāpi tathāgatassa vācā atthavatī karuṇāsahagatā. Yathā, mahārāja, mahantopi tūlapuñjo 6 parassa kāye nipatitvā rujaṃ na karoti, evameva kho, mahārāja, pharusāpi tathāgatassa vācā na kassaci dukkhaṃ uppādetī’’ti. ‘‘Suvinicchito, bhante nāgasena, pañho bahūhi kāraṇehi, sādhu, bhante nāgasena, evametaṃ tathā sampaṭicchāmī’’ti.
парусаваажаабхаавабан̃хо жад̇уд̇т̇о.
Pharusavācābhāvapañho catuttho.
Footnotes:
