| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. ப²ஸ்ஸமூலகஸுத்தங்
10. Phassamūlakasuttaṃ
258. ‘‘திஸ்ஸோ இமா, பி⁴க்க²வே, வேத³னா ப²ஸ்ஸஜா ப²ஸ்ஸமூலகா ப²ஸ்ஸனிதா³னா ப²ஸ்ஸபச்சயா. கதமா திஸ்ஸோ? ஸுகா² வேத³னா, து³க்கா² வேத³னா, அது³க்க²மஸுகா² வேத³னா. ஸுக²வேத³னியங், பி⁴க்க²வே, ப²ஸ்ஸங் படிச்ச உப்பஜ்ஜதி ஸுகா² வேத³னா. தஸ்ஸேவ ஸுக²வேத³னியஸ்ஸ ப²ஸ்ஸஸ்ஸ நிரோதா⁴, யங் தஜ்ஜங் வேத³யிதங் ஸுக²வேத³னியங் ப²ஸ்ஸங் படிச்ச உப்பன்னா ஸுகா² வேத³னா, ஸா நிருஜ்ஜ²தி, ஸா வூபஸம்மதி. து³க்க²வேத³னியங், பி⁴க்க²வே, ப²ஸ்ஸங் படிச்ச உப்பஜ்ஜதி து³க்கா² வேத³னா. தஸ்ஸேவ து³க்க²வேத³னியஸ்ஸ ப²ஸ்ஸஸ்ஸ நிரோதா⁴, யங் தஜ்ஜங் வேத³யிதங் து³க்க²வேத³னியங் ப²ஸ்ஸங் படிச்ச உப்பன்னா து³க்கா² வேத³னா, ஸா நிருஜ்ஜ²தி, ஸா வூபஸம்மதி. அது³க்க²மஸுக²வேத³னியங், பி⁴க்க²வே, ப²ஸ்ஸங் படிச்ச உப்பஜ்ஜதி அது³க்க²மஸுகா² வேத³னா. தஸ்ஸேவ அது³க்க²மஸுக²வேத³னியஸ்ஸ ப²ஸ்ஸஸ்ஸ நிரோதா⁴, யங் தஜ்ஜங் வேத³யிதங் அது³க்க²மஸுக²வேத³னியங் ப²ஸ்ஸங் படிச்ச உப்பன்னா அது³க்க²மஸுகா² வேத³னா, ஸா நிருஜ்ஜ²தி, ஸா வூபஸம்மதி. ஸெய்யதா²பி , பி⁴க்க²வே, த்³வின்னங் கட்டா²னங் ஸங்க⁴ட்டனஸமோதா⁴னா 1 உஸ்மா ஜாயதி, தேஜோ அபி⁴னிப்³ப³த்ததி. தேஸங்யேவ கட்டா²னங் நானாபா⁴வா வினிக்கே²பா, யா தஜ்ஜா உஸ்மா, ஸா நிருஜ்ஜ²தி, ஸா வூபஸம்மதி. ஏவமேவ கோ², பி⁴க்க²வே, இமா திஸ்ஸோ வேத³னா ப²ஸ்ஸஜா ப²ஸ்ஸமூலகா ப²ஸ்ஸனிதா³னா ப²ஸ்ஸபச்சயா. தஜ்ஜங் ப²ஸ்ஸங் படிச்ச தஜ்ஜா வேத³னா உப்பஜ்ஜந்தி. தஜ்ஜஸ்ஸ ப²ஸ்ஸஸ்ஸ நிரோதா⁴ தஜ்ஜா வேத³னா நிருஜ்ஜ²ந்தீ’’தி. த³ஸமங்.
258. ‘‘Tisso imā, bhikkhave, vedanā phassajā phassamūlakā phassanidānā phassapaccayā. Katamā tisso? Sukhā vedanā, dukkhā vedanā, adukkhamasukhā vedanā. Sukhavedaniyaṃ, bhikkhave, phassaṃ paṭicca uppajjati sukhā vedanā. Tasseva sukhavedaniyassa phassassa nirodhā, yaṃ tajjaṃ vedayitaṃ sukhavedaniyaṃ phassaṃ paṭicca uppannā sukhā vedanā, sā nirujjhati, sā vūpasammati. Dukkhavedaniyaṃ, bhikkhave, phassaṃ paṭicca uppajjati dukkhā vedanā. Tasseva dukkhavedaniyassa phassassa nirodhā, yaṃ tajjaṃ vedayitaṃ dukkhavedaniyaṃ phassaṃ paṭicca uppannā dukkhā vedanā, sā nirujjhati, sā vūpasammati. Adukkhamasukhavedaniyaṃ, bhikkhave, phassaṃ paṭicca uppajjati adukkhamasukhā vedanā. Tasseva adukkhamasukhavedaniyassa phassassa nirodhā, yaṃ tajjaṃ vedayitaṃ adukkhamasukhavedaniyaṃ phassaṃ paṭicca uppannā adukkhamasukhā vedanā, sā nirujjhati, sā vūpasammati. Seyyathāpi , bhikkhave, dvinnaṃ kaṭṭhānaṃ saṅghaṭṭanasamodhānā 2 usmā jāyati, tejo abhinibbattati. Tesaṃyeva kaṭṭhānaṃ nānābhāvā vinikkhepā, yā tajjā usmā, sā nirujjhati, sā vūpasammati. Evameva kho, bhikkhave, imā tisso vedanā phassajā phassamūlakā phassanidānā phassapaccayā. Tajjaṃ phassaṃ paṭicca tajjā vedanā uppajjanti. Tajjassa phassassa nirodhā tajjā vedanā nirujjhantī’’ti. Dasamaṃ.
ஸகா³தா²வக்³கோ³ பட²மோ .
Sagāthāvaggo paṭhamo .
தஸ்ஸுத்³தா³னங் –
Tassuddānaṃ –
ஸமாதி⁴ ஸுக²ங் பஹானேன, பாதாலங் த³ட்ட²ப்³பே³ன ச;
Samādhi sukhaṃ pahānena, pātālaṃ daṭṭhabbena ca;
ஸல்லேன சேவ கே³லஞ்ஞா, அனிச்ச ப²ஸ்ஸமூலகாதி.
Sallena ceva gelaññā, anicca phassamūlakāti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. ப²ஸ்ஸமூலகஸுத்தவண்ணனா • 10. Phassamūlakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ப²ஸ்ஸமூலகஸுத்தவண்ணனா • 10. Phassamūlakasuttavaṇṇanā
